MUC

Print Friendly and PDF

Wednesday, July 6, 2016

Khangno leh Sianthona

KHANGNO LEH SIANTHO' NA

Zopau tawh kigelh laibu tampi om hi. Khangno leh siangtho'na tawh kisai kigelhna a omlo phial himai hi; tawm mahmah hi. A kigenna laibu a om sunsunte ah lai gual khat gual nih cih simloh omlo hi. Tua ahih manin i gam i lei ah khangno leh siangtho'na tawh kisai laibu kisam mahmah hi.

Nang leh kei in manpha i sak nei ciat hihang. Manpha nasakte ngaihsun in . Bangte manpha pen nasa hiam? Pasian in zong manpha a sak om hi. Tua in nuntakna siangtho ahih kei leh, a siangtho nuntakna ahi hi. Hih thumanpha ahilh nop manin, dailen'buk koi munah bawl ding cih a kipan biakpiak zia ding dongah zuih ding Pasian in hilh hi. Pua lam siangtho' na panin nuntak siangtho ding Pasian' geelna ahi hi.

Puan kang sitset khat pen puan siangtho khat hi. Tui ph7 dawn dingin tui siangtho kici hi. A hiinglo, tho bawk loh an nek dingin siangtho hi. Tua ahih leh a siangtho nuntakna cih in bang hi ding hiam? Bang acih nopna hi ding hiam? Bang munte ah siangtho ding?

Siangtho'na A Thupi Zia:


1.    E.G.White in bangci hiam cih leh, " siangtholo lampi ah thuman thutak in a khe nga neilo hi" (Counsels on Health, 101)

2. A sianglo nate lawngvet kei in, ci hi. 2 Kor.6:17

3.  A sianglo mite in Pasian' ukna tawntung nuntakna sungah tum khalo ding hi. (IKor.6:9; Ephet 5:5)
4.   A sianglo a gamta mi in Jerusalem thak ah lut lo ding hi. (Mang.21:27) 
5.    Nuntak siangtho lo tawh Topa mulo ding hi. Nuntakna siangtho na nungta un. (Heb. 12:14)

6.   Nek le dawn akipan sepna bawlna leh hihna khempeuh ah Pasian a minthan' na ding semin a bawl dingin Pasian in hong deih hi. (IKor.10:31)

Siangtho na in, gupna ngah nading hilo napi, gupna tawh kizom veve; tuam koih theih hi lo hi. Siangtho' na in Pasian zia leh tong hi. A siangtho Pasian in amite zong siangtho dingin deih hi. (Siam.11:44; IPet.1:15) Siangtho'na piakkhong letsong bangin kingah hilo hi. Ngim kul, ni khat khit ni khat, hanciam kul hi.


Pualam Pan Kimu Thei Sung lam siangtho'na 1. Etnop, i Muhnopte:
Na muhnop, na et-et nate a siangtho hiam? Kawllai ahih kei leh Manglai-in Late 101:3 sim in. David in, " ahoihlo nate ka en kei ding hi. " ci hi. (Late 101:3) Zo Lai Siangtho ah ' asia na peuhmah ka deih kei hi.' ci-in , atung a in ka gennopna kawk zaw,bun' zaw sa ing.

Etloh ding 'na' om hih tuak hi. Khantoh hun ahih zah khatin siatna zong khang pah hi. Tuhun ciang, lim hoihlo, CD, DVD Video akipan Internet ah atuamtuam, khangnote in a ethuai lo nuntakna asiasak thei, hoihlohna siatna hong tun thei tam semsem hi. Etloh ding en den na hih leh, na mittang panin tuate hepkhiat kul hi. Banghanghiam cih leh "mit in a muh cim thei lo hi" (Thuhilhna 1:11;Pau.20:27) En nuam tektek, i et i muh bangin i gamtatna in zui nuam pah hi. Zuih ding hamsa sa nawnlo hi. A hoih i tam et leh hoihna in tam zuih dinga, siatna i tam et leh , siatna in zuih pah ding hi. I sim laibu, magazine leh journal tuamtuamte a siangtho hiam? A hoihlo zongsatna lampi ah hong tun' thei a hoihlo tampi om hi.

Kawllai ahih kei leh manglai-in Isaiah 33:15 sim in. Zo Lai Siangtho ah a gen khak loh om hi. Thuman in gamta in, thutang a gen mi icihte in siatna panin a mit a heisan mi ahi hi,cih Zo Lai Siangtho in tua ci genlo hi.

I Nungak i Tangval Lai-in Siangthona:
I nungak itangvalna-ah i siangtho hiam? Milian mihaute bangin nasia takin mopawi na bawl zawh loh hangin, lungneu kei in. Mo ken' bangmah na keng zo kei leh zong maizum kei in. Na nungak siangtho'na na tangval siangtho'na na van ken manpha pen hi sak in. Tua in, sum ii lei theih loh, alei zawhloh manphatna hi.

Kuamah in hong mu kei ta ci-in ut bangbangin kigamta hi. Lai Siangtho gen siangtho'na 'nu le pa mawhna bawl kei in (Pai.20:14) kizuilo ahih manin HIV, AIDS khang semsem hi. Mun khatkhat te-ah, numei ahi zong pasal ahi zongin, anih tuakun, paktatna panin natna hoihlo a nei a om hiam? Si sit (test) bawlmasalo -in kipi kiteng lo uh hi. Na sisan kisit ding hi leh, na siang lai diam? Lam kim lam paam vanzuakna te ah ' Aphaw' ci in kilim zuak mahmah hi. Tua 'Aphaw" nei peuh leng phamawh kei, aci mi tam semsem hi. ' Aphaw' in natna dal kha thei phial mah ding hi. Ahi zongin mawhnopna lungsim dal zolo hi. 'Kamawh hi' cih kitheihna aseel zo ding, adal zo ding mihing in bawl thei lo hi. Tuhun-ah akhitsa mahmah, nungak a siangtho nawnlote (virgin nawnlo) siangtho sak kikna (re-virginity) ci-in aki theilo dingin khui kik thei uh hi. ' A van ' siangtho tawh kibang bek hi a, nungak siangtho kici thei lo ding hi. 'Aphaw' a khiatna gen leng, 'lawm' cihna hi. Gamvakna khawngah lawm (aphaw) nih le thum phaleng hoih hi. Tu-in na lawm kua hiam? Kha Siangtho na lawm hi sak in. Tua hi leh nuntakna siangtho ding hi.

Nu leh pa mawhna bawlloh zong a mun le ahun lem loh man maw, hun lem mun lem hileh kua teng bangzah i sianghto lai ding hiam? Mi tawh na mawh ngei hiam? Mawh ngeilo , ut keng, aci mi khat kiangah, tua leh sum lakh 100 hong pia ningin minute 10 sung bekbek nupa bangin omkhawmni kici leh bangzah i siangzo lai diam? Nuntakna siangtho a lunggulh ngiat mah na hi hiam? Sum ii lei zawh loh ding khangno kisam hi. Hong khial sak thei dingte kiangah va ki neelneel lo-in mawhpih dingin akun ngeetngut den Potifer' zi kiang panin a taikhia Joseph etteh huai hi. Joseph a bang khangno dingin Pasian in hong sam hi.
Mawhpih nopna tawh zawlmite, kam khum tawh hong zolzol, a thugente a neel dakdak mite pelh in. (Pau. 5:1-3; 6:24).


Silh Leh Teen:

I silh iteen puante in Pasian a pahtawi hiam?. Thumaan akilangh sak hiam? Kei puan silh leh, nang bangmah kisai kei, kici kha thei hi. Silh ding-a kilawmlo puan om hi. Paunak 7:10 ah 'numei paktatte paunsilh ngeite' ci-in gen hi. Koi bang puansilh dante in numei paktatte silh hi, cih Lai Siangtho in a genloh hang, tuabang puan namte theihloh ding hi peuhmahlo hi. Nu leh pa mawhnopna a khangsak thei puan sim loh adang hilo hi. Fashion puan lamah designer, a minthang mahmah Mary Quant kiangah tuhun fashion puante' deihna bang hiam? Bang hangin tua puante minthang hiam? ci-in aki dot ciangin hih bangin Mary Quant in dawngkik hi. 'Nu leh pa mawhnopna lungsim akhangsak, alawp sak puan bawl ka hih manin minthan'na kangaha, ka puan bawlte kideih ahih manin ka khawng mahmah hi.'

Tulai fashion puan kideih pawlkhat gen leng: a tamzaw numei pheituamsau-te, a tut ciang bombi sungten a dawk hamtang theithei dingin kikhui kibawl sese zen hi. pawlkhat leuleu kigak pha lua kisa, bombi sungten paizia bang kidawk zawzen hi. Kigak lua leh, sisan luan susia ahih manin cidam nadingin zong hoihlo hi, ci-in cidamna lam mipil te-in gen uh hi. Nawi kidawk theithei ding angbak gol puan; nikbawk tom mahmah; a sung a teng kidawk zo zah phialin puan panlua, cihte silh kei zaw leng hoih zaw hi. Muslim gam pawl khat ah fashion show, model show cihte ka ngeina uh tawh kituaklo, ci-in kikham hi.

Tuma kum 10 val deuh lai-in leitungah HIV/AIDS pun'na tam penpen gam in Thai gam hi. Tua gammite omzia en lehang a puan silhte uh den a i gen puan namte khat leh khat nasia takin kidem uh hi. Tu-in Thai fashion puan ci-in puanzuak te khot mahmah namte hi citciat hi.

Kawlgam ah om ihih mah bangin, i silh iteente Kawl ngeina zui thei leng sia lo hi. Puan silh in lungsim pulaak ahih
mite in na puan silh hong muh ciang, ' aw hih nu, hih pa nuntakna siangtho nei mah hi, a cih nang thupi hi.


Kampau:

"Keima kam a cing ding khat koih inla, ka mukte kongkhak a vil ding khat koih in." Late 141:3. Phattuamman a om lo kampauna bangin thu hong kikhen ding hi. (Matt.12:36). Gu tawh kidim a omkhong thei lo leii (Jeim 3:8) in nikhat in a tawm pen kammal 10,000 bang gen khia hi. Tuate lakah kammal hoih kammal siangtho bangzah kihel hiam? Kolose 3:8 ah, kamhoihlo pauna nei nawn kei un, ci-in kigelh hi. "Kam hoihlo" cihna ah Greek kammal 'aischrologia' kizang hi. A khiatna in, zahmawh kampau, numei pasal angkawmna tawh kisai kammalte acihna hi. Mikhat pen zahmawh kammal zanglo in ni a tumlo om thei mawk hi. Tua bang kammalte i zatloh ding hong hilh hi. Pasian tawh hong kigamla sak thei thu ginalo, ahaihuai thu kikup thu kiselnate pelh in. (II Tim. 2:16) Bang thute gennop nasa hiam? A tamzaw na gen thute bang thu hiam? Tu laitak la kideih Rock music,rap, hiphop cihte siatna lam hong tunpih ding kammal tam zat ahih manin , tua bang aw-te i ngaih vetloh ding kisam hi.


Nek Le Dawn:

I pumpi in Kha Siangtho ten'na hi . (IKor 6:19). Lai Siangtho nek ding le nek loh ding an namte gen hi. (Siam. 11) Khristian hilo te in zong a zat loh uh , khamtheih guihtheih - zu nam khempeuh, za nam khempeuh, khaini, kuun-pong, kuun-za, tuibuk akipan a tuamtuam na zang hiam? I nek an leh lungsim puak kizom ahih manin lungsim a susia thei nek leh dawnte zat loh ding hi. Gilvahna hong pia theilo nate leina in sum zang kei in. (Isai. 55:2)


Kipuahzia:

Thuhilhsia 9:8 ' na puante siangsakin..... nasam gum sak ngeikei in. " Puan niinte namsia hi. Khua-ul gimnam puan silhsilh huai lo hi. Ih silh bangbang a siang ding kisam hi. A niin-na munah natna in bawk nuam hi. Puan niin lua leh,khaah piang hi. Khaah om leh ci-thak in meima piang hi.
Tulai sam style pawlkhat, zan lup siat ciang sam tho leng-lang dan tam mahmah hi. Sam hiathiat kullo, ol mahmah, tua hangin kideih ahi tam bel thei khang. Ih sam-te hiat sinsen ding kisam hi. Kisil zelzel kul hi. Khut le khete siangtho sak den in. Lu niin lua leh, hiik omin kici damlo hi. Ci niin lua leh, meima om thei, ci thak thei hi. Khangno kam-uih kilawm lo hi. Kam sung siangtho ding kisam hi. Ahun le amun tawh kituakin kipuah zia kankul, siamkul hi. A-uanglua kizepna, kipuah loh luatnate siangtho vai lo hi. Tuahna peuhpeuh ah zuntha, ektha, cilsia, napnit, khaksawhla, cihte khangno siangtho vai lo hi.

Taksa pumpi ei deih bangin bawl ding hilo hi. Banghang hiam cih leh Kha siangtho omna inn hi. ( II Kor 6:16). I pumpi tungah lim tuamtuam le lai gelh tatto cihte zang kei un, ci-in Laisiangtho in hong hilh hi. Siam.21:5-6

Lungsim Siangtho:

A thupi pen le a kisampi pen in lungsim siangtho ahi hi. Kawl lai, ahih kei leh manglai in Paunak 23:7 sim in. Zo Lai siangtho in a gen khak loh om hi. I lungsim puak bangbang i mihing hihna hipah hi. Asia lam bekbek ngaihsutna hong gol semsem ciangin sep khiat tawh kizom hi. (Jeim 1:15). David bangin' mawhna bawlnopna lungsim hong nei sak kei in,' ci-in thunget ding kisam hi. (Late 141:4). Lungsim puakzia bangin gamtatna in zui ahih manin lungsim hoih lungsim pha neih ding Pasian deihna hi. Lungsim siangthote in thupha ngah ahi uh hi. Bang hang hiam cih leh Pasian amu ding uh hi. (Matt. 5:8)


Bangci Bangin Nuntakna Siangtho ding:

David bangin, Pasian aw, ka sungah lungsim siangtho hong piang sak in, ci-in nget kul hi. (Late 51:10) A siangtho tawh lungsim kidim sak un, ci-in Paul in hong vaikhak hi. (Fil. 4:8,9). Nungak, tangval khatin ama gamtatna a siangtho in bang ci kep theih ding ahi hiam? Pasian thuzuihna tawh a gamtat siangtho sak thei ding hi. Psian tungah na khialh khak loh nadingin na lungsim sungah Ama thu khol kul hi. (Late 119:9,11)


Thukhupna:

I gen thu in a kimu theilo sunglam siangthona in a kimuthei pualam nate ah siangtho'na hi. I neu lai, khangno hun mahin siangtho lehang i khantawn kimang ding hi. Khangno in siangtho kei lehang teknung guai nungah siangtho ding baih lo semsem ding na hi hi. Khangnote asiangtho dingin Pasian sapna ngah na hi hi. ITim.4:12

Niin hahte in khua sung-a niinte a hepkhiat mah bangin leitung nitna khempeuh hahsiang hun hong tung ding hi. Tua hun ciangin, hepkhiat niin na hi kha diam? Na nuntakna sawpsiang akul hiam? Pasian' kammal tawh siansak akul hiam? Na nuntakna ah Pasian' deihloh a om hiam? Pasian' ukna tawh kilawm kituaklo ding a om khak leh zekai lo-in sawp siang in.



By Dr Mungpi
MMCC Principal


3 page of 18 << 1 2 3 4 5 6 7 8 9 10 11 12 13 14 15 17 18 >>


Note: Hih atunga Article pen Sia Naa Mung laibu sungpan kila ahi hi.



To get the latest update of me and my works

>> <<