MUC

Print Friendly and PDF

Wednesday, July 6, 2016

Khangno leh Makai


KHANGNO LEH MAKAI

Thupatna:
" Khangno Kahlei" cih laibu sungah ''Khangno le Makai"cih thu gelh theihnadingin laibu bawlpa leh Topa Pasian tungah lungdamna kako hi. Hi lai a sim mimalkim tungah makai siamna thupha hong tungta hen.

Mihing laka pilpen Israelte' kumpi Solomon in mailamah kumpi za luahin makai asemding khangno pawlkhat a omna kaphawk hi.(Thuhilhna 4:15) naci hi. Solomon gen mah bangin mailamah makai dingte pen tulaitaka khangnote hi uh hi. Pawlpi sung leh kipawlna tuamtuamte ah khangnote panmun piak siam ding thupi mahmah hi. Tu laitaka makaite in mailama makai ding khangnote gimneih ding huunei kammalte zat ding hilo hi. Sen kumpi Mao Zedong a neulai-in nipi sangkahna- ah sangmangte in minam vai-in guunei kammal tawh khasia sak kha uh ahih manin, agol ciang kumpi hong suakin Christian asuah gen loh sangmangte leh Christiante tampi that sak zawsop hi. Piangthak makaite in mi deidanna minamvai, bawngpai, khua pai, behpai, cihte tawh hailawh liang apai khialh ding hilo hi. Mipil, mihai, mihau, mizawng deidan neilo a Kha Siangtho makaihna tawh makai hoih ahi dingin thungen tek ni.

Sum leh paai, pilna siamna, hoihna, phatna, hatna, liatna leh a kiplo leitung muan in neilo-a Pasian bek a muang makai-a anei makai kisam hi. Pasian makai-aa a neilote ngaihsutna pen muatciim ahih manin -a nasep nate uh gah hoih gah theilo hi. Mi khempeuh in hong pawlpih laitak Pasian ompihna a om kei leh amawkna hi. Mi khempeuh in hong muhkhialh laitakin Pasian in hong muh khialh loh makaite kuamah in mukhial paisuak thei lo uh a gualzawhna ngahin, a ki-it pen makai suak veve uh hi. Bangbang a piang zongin na makai pen Pasian hi sak tawntung in.

Makai icih kua Hiam?
Mi khempeuh makai ki ut tek a, ahi zongin makai i cih kuahiam cih kitello hi. Leitung in i kisap penpen in makai hoih, makai gualzo, makai pil, makai ciim ahi hi. Tua leitung kisap makaite kumpi,kumpite' topa, topate' Pasian a khial theilo Christiante makaipa pen Topa Zeisu ahi hi.
Makai suahdan kibang kimlo hi. Pilna, minthanna, hauhna, hanciamna, pu-le-pa gui zui, amah utlo pi-a mipite telte, Pasian tel ngiat cih bangin makai suahna pen kibang ki sinsen theilo hi. Makaite gensiat a ol mahmah hangin makai hoih suah ding haksa mahmah hi. Bangzahin haksa taleh mai anawt ngam letmah khat zong a nungkiklo-a nungzui anei makaite pen makai hoih ahi uh hi. Makai hoihte in a nungzuite a taisan uh sangin sawmvei si nuam zaw mi hi ding hi.

Makai i cih in mite ngaihsut khak nailoh ngaihsut khiat na, a madawk pilna tawh mite pai ngam loh phut ngamlohna munnawk a mipite makaih ngamna pen makai dinmun ahi hi. Kei makai hoih hi'ng ci-in atangkoko kei zongin mite in makai-in koihin zuihtak sa-in muang mahmah uh hi. A mite lungsim thuzawhin a ma paina munah a tonpih zote pen makai kician ahi hi.

D.E. Hoste China Inland Mission Director in " mikhat pen makai hi maw hilo cih i theih nop leh nungzui nei maw neilo cih et masak ding thupi hi," ci hi.

J.OSWald Sanders in"makaihna i cih in mipite thuzawhna hi," ci hi. Makai khat in amite a thuzawh nak leh anungzui ding mi hong tam semsem ding hi. Mipi lungsim a thuzawh pen Kha Siangtho vangliatna ahih ding kisam hi. Zeisu lungsim puak zia leh Zeisu geelna teng ama ngaihsutna pan mipite lungtang tawngah lut sakin amite lungsim a thuzawh leh makai gualzo suakzo bek ding hi.

Makai dingin Kiging khol in

A sungpan launate maizumnate lakhia in makai dinga a kiging khol den Abraham Lincoln pen U.S.A te makai hoih pen nga a telna vuah kihel hi. Makai dinga kigin kholhna in gualzawhna thusim hi. "Kei na kiging khol den peuh leng khatvei
hun hong tung ding hi," a cipa Abraham Lincoln in U.S.A kumpi ngah takpi hi. Tuni-a makai dinga kigingkholte khut sungah zingciang om hi. Na kigin kholh nak leh nang hun hong tung takpi ding hi.

Cidam lohna zawnna, haina, mawlnate, kicin lohna tuamtuam, thaang-ah awk kenla Pasian muangin na ki-ap nak leh nang hun hong tung ding hi. I theihloh lam theih khiatna pen makaite kisap masak pen ahi hi. A theihloh lam a theilo makaite sangin a lauhuai zaw omlo hi. Makai min pua nuam pong lel a min-le-za thu neihna vik nop pong lel tawh a kiging kholte makai suak zolo uh hi.

Ama hoihlohna in mi a ngawh thei aki puahpha nuamlo pi-a makai ding a kigin pong mawkna pen zuaupi hi. Pilna khempeuh i thei khin zo kei zongin ama theih ding a kilawm ciang makai khat in a theih loh phamawh ahi hi. Makai ding a kiginkholh nangin, makai hoih makai pilte tawh kithuah masakna pen kham leh ngun sum leh pai te sangin manpha zaw a, laibu tampi simna sangin zong hong ciim sak zaw thei hi. Makai pilte makai hoihte tawh na kithuah na hunte pen mawk bei hilo-in hun manpha mahmah zang na hihi.

Na dot nop a tam mahmah hangin na dot ding makai om nawnloh hun hong om ding hi. Na makaite na siate hazatna leh gensiatna tawh en cik ken la, etteh zaw in, makai langpang makai gensia a mipil khat zong om ngeilo hi. Hazatna leh gensiatna tawh makai ding a kigingkholte pen nungzui dingin zong kideih lo hi. Pasian in makai pil, makai hoih tampi khangsak lai ding hi, lungsim hoih leh thungetna tawh nang na kiging khol nai hiam?

Makai Hoih

Makai hoih khat in mipite a hoihsak zawh mah bangin, makai ginalo khat hangin mipite kha gilkial in kithehthang thei hi. Makai hoih lote hangin tuute gawng gawpin bah uh hi. Makai lutangte tungah gualzawh ding leh gual lelh ding kinga hi. Tua ahih manin na sapna khat peuhpeuh ah makai hoih kisam mahmah hi.
A ginalote a gina sak ding, ahaite apilsak ding, amawlte a tathiam ding, anungtolhte a tawsawn ding, alungkia baihte a thakhauh sak ding leh meigong tagahte akhawmtuah ding makai hoih kisam hi. Mikim sep theihloh nasep asem thei ding, maban a bin cip hun ciang pai nading kongvang amu veve ding, mipite lungkia in dinkhawl laitak amanawt ngam veve ding leh sih nading nangawnah paulap a zonglo makai hoih kisam hi. Mite'n hi thei kenteh a cih laitak un, hithei ding hi, ci-a a mite gualzawhpih vingveng makaite pen makai hoih ahi hi. Lametna a om loh laitak lametna a pia thei ding leh a mite ama tanga makaih ding makai hoih a hunhunin Pasian in khangkhia sak hi.

Na siam tawp-a na hanciamna nangawn ah hong gensia- in hong langpan geihgeih mi hong om ding hi. Tua pen na galte hilo-in, nang hong lamto dinga Pasian phalte ahi uh hi. Langpan na leh gensiatna a thuak ngeilo makai pen makai hoih hilo hi. Makaite a dingin pualam gal sangin sunglam galte thuakhak zaw thei hi. Makaite in mi khempeuh lungkim sak ding sangin Pasian lungkimsak ding hanciam masa ding hi.

" Kei pen Pasian teel tuam ka hihi. Makai ka sepna-ah a gualzo den ding pa ka hihi, Pasian in kei hong zang hi" a ci ngam makaite pen makai hoih ahi hi. A khang akhangin makaite a hawmthawh den alangpang den, a gensia den, makai langpang khaici pen Dawi - asih mateng a om ding ahi hi. Langpang na huihpih lakah a nungzuite kiptakin a paipih makaite pan makai hoih Pasian zat ahi hi.

Makai Piangthak Pasian teel

Piangthak makai pen Kha Siangtho ompihna kilangh hi. Ama tha muanglo-in Kha Siangtho kimakaih sak hi. Cithak vei bangin kha mangthang vei-in Gospel nasepna mainawt nang hanciam hi. Kuama hilh ding kisam lo-in, pilna kicing Kha Siangtho in hilh hi. (IJn.2:20,25,27) Kha Siangtho makaihna simloh mihing bek makaihna pen muanhuai ngeilo hi. Makai piangthakte pen a sunguh a teeng (Gal.2:20) Zeisu khazih pen amaute siapipa ahi hi.
Piangthak makai Paul in thahatna tawh hong dimsak pa hangin na khempeuh ka hih thei hi. (Fil.4:13) ah ci hi. Makai pa in makai nei sawn a tua in Zeisu Khrist ahi hi. Zeisu pen vantung siapipa ahih manin amite amakaihna ah khial thei ngeilo hi. Makai piangthakte pen Pasian teel hi-a, makai piangthak lote pen mihing teel ahi hi. Makai piangthak David pen Pasian teel (ISam.13:14) hi-a makai leh taai Sawl pen amipite teel ahi hi. (ISam.8:6,7). Pasian teel makaite pen a kisimmawh theilo, aki zo theilo vangliatna akipia hi-in Pasian laptoh ahi hi. Mihingte teel makaite pen mihingte bek pahtawi zah val lamet omlo hi, Makai ding a om loh man a donghuu pak zong hithei hi.

Makai piangthakte in amakaipa uh Pasian muangin thungen tawntung uha, makai piangthak lote in amah ateel mite muangin om liauliau-in ama hoih sak bangin gamta ing-engh hi. Pasian teel makaite a teel pa in ompihin, mihing teel makaite mihing bek mah in ompih hi. Makai piangthakte in sepkhiat ding hanciam uh-a, makai piangthak lote in paulap zongin nitum uh hi. Makai piangthakte in a makaipa Pasian minthan nading tup leh sep in nei uha, makai piangthak lote in amau minthan nading leh thuneihna nang bek tup leh sep in nei uh hi. Pasian aw na zawhsa leitungah nang hong langpante in kei zong hong langpan uh ahih manin akizo theilo, makai gualzo Pasian teel cih mi muhna in hong ki langh sak in.


Makai leh Muh Kholhna

Makai khat hihna tawh bangmah a om nailoh laitak mah in muhkholhna neih ding pen athupi masa ahi hi. Muhkholhna nei makaite in tuni a amuh kholhte uh zingcianga agualzawh nang uh ahih lam tel takin thei cian uh ahih manun hanciamin mainawtuh a, gualzo takpi uh hi.

Topa Zeisu in asihma in a gualzawh ding amuhkholh mah bangin muhkholhna nei makai te in a gualzawh ni dinguh mukhol khin uh hi. Gualzawhna mukhol khin makaite bek mah mipite in zuihtak, muantak sa uh hi. Lametna in hong sikdo sak aa muhkohna in hong thahat sak hi.
Mihingte anlo tawh ni 40, tuilo tawh ni 4 leh huihlo tawh minute 4 kinungta a lametna muhkholhna lo tawh second 4 bek kinungta hi. Zawnna, haina, pilloh siamlohnate leh hih zawhlohnate bebek amumu Canaan gam en makai 10 te in Pasian piaksa gualzawhnate mukhol theilo uh ahih manun mihonpi khat tawh sihlawh hilheel uh hi. Leitung piancil-a kipan Zeisu in a zawhsa mawhna leh aguu, Dawi leh langpangte Joshua leh Caleb in amuh kholhna (Gam.13:30) uh tawh hanciamin Canaan gam luahin amite uh zong tunpih takpi uh hi.

Hampheeng buk sungpan kumpi inn sung dong leitung kualkhum, vanpi kantana Gospel gualzawhnadingin muhkholhna kisam hi. Tehpih bei vangliatna leh a kizongkhia zolo pilna anei mongneilo Pasian hong gualzawhpih ding muhkholhna nei makaite adingin, Zeisu zawhsa masuanah lau nang omlo hi.


Makai leh Thungetna

Vantung leh leitungte' makaipipa Zeisu Khrist simloh thungetna kisamlo makai omlo hi. Thunget kisamlo Zeisu Khrist pen thunget hat pen makai hoih pen pa ahi hi.

Lai Siangtho thak sungah thungetna-a kizang phadiak kammal 2 oma, Greek ten; proseuche-thungetna ahih keh proseuchaomai-thungen cih 85 vei leh deomai-thuum, kun, thungen cihna 30 vei kigelh hi. A deihna bulpi pen mihing septheihna kihello nasep gualzawh nanga Pasian kiangah thuum, ngen cihna ahi hi. Thunget ngah nangin degree, hauhna hoihna, kammal hoih nono leh kamsiam suaisuai khawng kisam masa lo hi. Nisa mu khuainuun a tuisuak bangin Zeisu tawh kimu a thunget lungtang tuisuak ding hi. A tui suak lungtang thungetna pen akammal aki za kei zongin Pasian in za hi.

Lungsimah tuiciin bangin Kha Siangtho guah a zusak makaite thungetna Pasian in za in ciangtan omlo in zang hi. Amau hatna, pilna suang a nasem makaite galpa in zawhnop sa hi. Makai tampite in thunget ding pen vai masa ah koih khalo uh ahih manun, mazanglo thei uh hi. Nasep haksa zawh nang, pilna sum leh paai hi masa lo-in, thungetna hi masa hi. Honpa Zeisu
siahdongpa thungetnate leh galzawh nang ahih leh Elijah thungetnate pawl etteh ding ahi hi.

Makaite' makai, kumpite' kumpi, topate,Topa, pasiante' Pasian Topa Zeisu in zan tawntung thungen hi. (Luka 6:12); zingtung phalvakma in thungen den hi. (Maku 1:35), Mipite kiang pan paikhia in gamlak-ah thungen hi. (Luka 5:16). Zeisu sanga muanhuai zaw makai omlo ahih manin thungenlo amakai sem ngamte sang a lauhuai zaw omnawnlo hi.Thu angen den Zeisu in thu a ngenden makaite mihing sepzawh loh gualzawhna pia tawntung hi. Thungetna tawh mipi a makaih makaite Pasian in panpihin gualzo sak hi.


Thukhupna:

Nekkhop nuam, puakkhop zang, Thangho leh Liando te in zong tang tang phelhawm cih paunak mah bangin makaite in minphatna, pahtawina, leh letsong tuamtuam a ngah uh ciangin lawmte tawh a hawm liailiai ding uh kisam hi.

Dr Billy Graham in pahtawina medal a ngah na-ah alawmteng a min uh lo deudeu-in , "hi pahtawina pen kei a hilo-in kalawmte a zong hi ci hi. Amau hong huh kei le uh kei bek in gualzawhna ka ngah zo kei ding hi" ci beh lai hi. Mi khempeuh in minphatna deihtek uh ahih manin min phatna om sunsun hum lo in hawm liailiai leng angsung bek a thei makaite pen gualzo ngeilo ding uh hi.

Kuama huh ding akisam lo Pasian bek in "KEI" cih theihna nei bek hi. Lucifer in "KEI" cih ngaihsutna tawh Dawi suahlawh hi. Makaite in "KEI" cih nopna pen a lungsim sung pan si sakin muat sak ding ahi hi.
Lucifer lungsim anei Saul in min phatna teng uun-nuam ahih manin David mudah hi. A galpa Goliath thah sak, David pen minphatna teng hawm nuamlo hi. Hazatna in a lungtang tuiciin bangin tumcip ahih manin Saul sung pan Kha Siangtho paikhia hi. (ISam. 16:14) Tua akipan Pasian sathau nilh pa David langpan geihgeihin thah ding hanciamta hi.

Mikhat nensuk lecin nang zong naniam sukkul-a kaito lecin nang zong na sang to ding hi. Na nasep pihte minphatna pia
lecin, nang akilamsang na hi hi. Pasian sathau nilhtelangpan leng kilunggim lel a, pawl bawl ziau leng, kidaupaizaw hi. Leitung-a makai gualzo khat suah nadingin van leh lei a uk Pasian makai aa anei makai kisam hi.

By Pr Paulek



2 page of 18 << 1 2 3 4 5 6 7 8 9 10 11 12 13 14 15 17 18 >>



Note: Hih atunga Article pen Sia Naa Mung laibu sungpan kila ahi hi.





To get the latest update of me and my works

>> <<