MUC

Print Friendly and PDF

Wednesday, July 6, 2016

Khangno leh Lai Siangtho


“KHANGNO LEH LAI SIANGTHO”

THUBUL PHUH : 2 Timothy 3:16, 17 “Pasian’ na a sem mite mi cingtaak hi-in, nahoih namkim asep theihna dingin, Lai Siangtho pen Pasian’ lamlahna tawh a hong ki pia hi a, thuman thutak hilhna ding, a khialte tainading, amanlote a man in puahna ding, aman in nuntak theihna dingin, thuhilhna dingin, a manpha mahmah ahi hi.”


THUMASA:

PASIAN in khangno te apilvang dingindeih hi. A zahtaak kai na sep a sem ding kigingding deih hi. Pasian in lungsim asialo, ahaat, ahang leh atuah ding thusiate pasal tat dingin a khensa te sam hi . Tuate in Pasian vaang pia-in mihingte thupha tun ding hi. Thubuai khempeuh Lai Siangtho gen bangin ikhensat dinghi. Lai Siangtho pen upna khempeuh ki sittel na hi. Khangno te in khagal ado dingte ihi a, i hiam dingin langnih a hiam namsau sangin ahiam zaw ahi Pasian thute tawh i do ding hi.


A. PASIAN’ HUMOP LAI SIANGTHO:
Lai Siangtho pen Greek kamin “theopneustos” kici a, akhiatna “Inspiration” hi-in adeihna “Pasian’Humop”cihna hi. Pasian’Humopna tawh Pasian’ misiangthote tungtawn a, hong kipia hi a, Kha Siangtho sawlna bangin amaute in genin, gelh hi. Hih kammal sungah gupna ngah dinga, kisam, thu theih na Pasian in mihing hongpia hi. Lai Siangtho pen Pasian’ deihna hong ki lahtel na hi.


B. LAI SIANGTHO HONG PIANZIA

A masa penin Hebia pau, Aramaic pau, leh Greek pau-in kigelh hi. Mawsi in B.C 1500 kumlai khawnga, agelh hi a, a nunung pen A.D 96/97 hiam? laikhawnga, Zawhang’ gelh a hi hi. Lai Siangtho khempeuh alian1189 leh aneu 31,175 om hi. Lai Siangtho a lian (Chapter) bawl masa pen Stephen Langton (Arch Bishop of Canterbury) hi a, aneu (Verse) bawl masa pen Sir. Robert Stephen (Paris Printer) a hi hi.

C.LAI SIANGTHO’ EITE LAMLAK

Lai Siangtho pen i gamlim hi. I upna leh i gamtatna ding i thukhun hi. Citakin i zuih ding hi. Mitungah a gennop khempeuh kihel hi. I up leh i zatkhiat ding a khial theilo thu hi. Nisimin Lai Siangtho panin thuthak pawl khat nasin zel ding ahi hi.Tawntung nuntakna thu ahihmanin akisel sum bangin zong khia in.____5T, 266


D. LAI SIANGTHO I SIMTEH KI-AP MASA DING

Satan in Lai Siangtho itel siam loh nadingin lampi tuamtuam tawh hong nawngkaisak hi. Lai Siangtho hoihtak nasim kei leh hun nunung ciangin na buaipih ding hi. Limtakin thungetna tawh nisimin Lai Siangtho sim lehang, nisimin athak akician akitel zaw-in thuman a hoih nono i mu ding hi.


E. LAI SIANGTHO’ NGIIMNA

Lai Siangtho sungah a omte khempeuh pen eite in lamet na nei-in i thuak zawhna ding leh i thahat theih nadingin a kigelh ahi hi....Rom 15:4.


F. LAI SIANGTHO AKI DEIHZIA

Leitungah kampaunam 6809 om a, 2001 kumin nam 2261 tawh Lai Siangtho kitei khia khin zo hi. Leitungah aki khawng pen laibu nam 10 om hi. Tuate lakah Lai Siangthobu in, 1816 leh 1975 kikal bu 2,458,000,000 kibawl a, 1992 kum sung bekbekin bu 6,000,000,000 kibawlin kikhawng khin hi. Hih Laibu nam 10 lakah Lai Siangtho bu in aki tam khot pen laibu hi pah hi.


THUKHUPNA:

Lai Siangtho in laibute’ laibu hi. Pasian thu-uk a, na hun neih zahzah tawh nasim leh sumgil tampi anei hi-in, nasep hoih khempeuh asem thei na hita hi. Tuhun khangnote in i nuntakna hongsia sak thei ding, lam hong pialsak thei dingte sim in nei lo-in, Pasian’ kammal bek simin nei leng, i kha-an agil vah zaw dinga, ki lamthakna hong piang zo ding hi. Nisimin Lai Siangtho simleng, leitung ngun leh kham sum leh paai tawh lei theihloh tawntung lungmuanna , (khamuanna) i ngah ding hi. “Na thu in keilam honglak ding meivak hi a, ka paina lampi-ah khauvak ahi hi”.Late 119:105.




By Sia Nang Za Mung


8 page of 18 << 1 2 3 4 5 6 7 8 9 10 11 12 13 14 15 17 18 >>


Note: Hih atunga Article pen Sia Naa Mung laibu sungpan kila ahi hi.


To get the latest update of me and my works

>> <<