MUC

Print Friendly and PDF

Wednesday, July 6, 2016

Khangno leh Itna


KHANGNO LEH ITNA

Gam leh minam leh Pawlpi a dingin khangnote in nungzang guh tawh kibang uh hi. Khangnote thahatna mun leh
kithutuah na-ah kuama sukkhap zawh lohin thakhauh in kipumkhatna om hi. Khangnote gitnat loh na mun leh khangno om lohna mun pen sehnel gam tawh kibangin khantohna leh nopna zong omlo-in lametna cih zong omlo hi. Khangnote in banghun ciangin gam leh lei leh Pawlpi a dingin a muibun suak thei ding hiam? Pasian in leitung mi a bawl laitakin ngek lai, a hih kei leh a teksa in bawl lo-in khangno laitak mahin na bawl lian hi. Tua bek tham lo-in Pasian in mihingte sungah ama lim leh mel ahi, IT na hong guan sak hi. Tua itna za ah za khangno ten’ azat khiat uh teh Pawlpi leh gam leh minam a dingin khantoh na in piang hi. Tua itna in khangno tawh kisai khak nate ih kikum ding hi.

Pasian in mihingte a bawl lai-in Ama sung mah a om Ama itna mah mihingte sungah hong koih sak hi. Tua itna in, a buppi-in ama lim leh mel hi pah hi(Pian.1:27). Hih itna sungah leitung a om sungah leitung a om singkung lopate leh ganhingte it theihna (Pian 2:15),Pumpi a ding an leh tui ittheihna (Pian 1:29), leh leitung mihingte khat leh khat ki-it theihna(Pian 2:23). Hih it na li teng pen Pasian deihna bangin khangno te’n a zat theih leh tua itna hongpia pa Topa zong a it theite hi-in, gam leh minam adingin nungzangguh ahihna uh kitel takin hongdawk ding hi.

Ei hongbawl Pa ih it leh a piansak nate leh a bawlna khempeuh ih it theih ding a kisam pen ahi hi. Bang hang hiam cih leh, ih pumpi pianzia leh it theihna khempeuh Ama ahhi. Tua ban ah leitung a om singkunglopa leh ganhing namkim khempeuh it a ih puah ih zun ding khangnote vaipuak a hihna leh pumpi a hoih nading an hoih an phate nek theihna leh it theihnate zong khangnote vaipuak a hih na khangno ten’ tel kul mahmah hi. Tua ban ah mihingte khat leh khat ki-itna-ah, Pasian thupha lian pen, nu le pa itna, Pasian in khat leh khat kihuh nading itna ahi dingin a deihlian bel pen ahi hi. Huhna ih cihna sungah, nasep bek hilo in lungsim vai puak leh lungnop sak nading ciang kihel-in, tua it na atel siam leh a zat siam khangnote in leitung a ding khalam a lametna tawh hong kidim sak dingte ahih lam uplah huai hetlo hi.

En dih ni, ih it mahmah Zogam hoihna singkung lopa leh a it huai ganhing tuamtuamte ki suksiatna in Topa hong piak it na mah ih ci thei diam? Khatvei lungnop nadingin tawntung lungnop na a khek itna pen Topa hongpiak itna hi ih ci ngam ding hiam? Zolei leh Zogam it ing a ci khangnote’n ih itna bang ciang ahi ding hiam? Pumpi ading ah Pasian in bang ciang nek theih leh bang ciang pumpi ading cidamhuai cih nek leh dawn pumpi a ding it theih na e leh, tuhun ciangin, bang ciang pumpi adingin it na tawh ngaihsunin ih it thei hiam? Pumpi ading ngaihsun lo-in, zongsatna gawl leh nopsak na bek tawh pumpi cidam awl mawh lo-in khalam nunzia nangawn a selcip itna pen Topa hongpiak it na mah ih ci thei ding hiam? Duhna ngawl hang in,nek leh dawn, tep leh muam hangin Van gam kingahlo-in om kei ni ci-in deih kaih mawk mawk kha hi hang. Pum nangawn hoih takin a khan toh nading nek leh dawn it thei lo khangno khat in kha lam khan toh nadingin bangci bangin kikhual zo ding hiam? Duhna bek tawh pumpi it na awlmahlo- in amah leh amah ki- uk lah khangno khat bangci bangin gamkhangto sak ding leh pawlpi puah zo ding in ki muang zo ding uh hiam?

Numei leh pasal ki-it na ee leh, Pasian deih na mah ih ci hiam? Tuhun ciangin nu leh pa ki-itna pen duh am na lam a tam zaw hi ta hi. Ih pawlpi leh ih minam vang a kiam suk sak itna in, Topa hong piak itna mah ih ci ding hiam? Gam leh lei ading kiam sukna a piangsak itna pen, Pasian piak itna ahih loh lam khangno te’n ih tel ding kisam mahmah hi. Gam leh lei, minam leh pawlpi it ing aci khangnot'en, banghangin lui kawm, dai kawmah angduh na hang a piang naungek suak cilte banghangin pai thei ding ih hiam? Topa hong piak itna tua dan ding mah hiam? Gam leh minam a dingin khan toh na-in ih tuat mah hiam? Khat leh khat kihuhna itna pen hih dan ding mah a hiam?


Satan in hih it na thu tel sitsetin thei hi tua ahih manin, Topa langdo nading in leh zat ahih manin khangno te’n ih itnate a lam tawn mahin ih zat ding Topa hong deih ahi hi. Adiakdiakin Adventist khangnote tung hih vaipuak a lian penpen ahi hi.




By Sia Kham Kim


6 page of 18 << 1 2 3 4 5 6 7 8 9 10 11 12 13 14 15 17 18 >>


Note: Hih atunga Article pen Sia Naa Mung laibu sungpan kila ahi hi.



To get the latest update of me and my works

>> <<