MUC

Print Friendly and PDF

Tuesday, June 21, 2016

SEP. 3 | MAISAK ZAWHLOH DING MAWHNA MAISAK 3Q 2016

Pawlpi committee ding ka geel uh hi. Sabbath nisialin ka kikhawm uh hi. Galtai ka hih hangun, ka ngei mah bangun sumpi le sawm-ah khatte khia-in ka kaikhawm uh hi. Uganda gam panin hong zin pawl khatte in huhna hong pia uh hi. Sawm-ah-khatte pen Rwanda pawlpi in hoih takin na a sep masiah ka khol phot uh a, sumpite ahih leh bel gal
sungah a liam a bai mite huhna-in ka zang uh hi. Galtaite omna phual ah Adventist thu-um mi honkhat ka om uh a, biakpiakna ah midangte zong hong kihel uh hi. Galbukna mun ah kha 4 bang ka om khit uhteh tui kiphum ding mi 300 bang hong om hi.

July 1 ni-in tualgal hong bei hi. Kei zong Kigali ah ka ciah kik a, Adventist biakinnte ah a kikhawm kua mah om lo hi. Kei zong pai kawikawi-in biakinn ah kikhawm ding mi ka sam hi. Tua bang teng tawh pawlpi mite zong biakinn lam hong zuanin kikhopna kipan kik thei hi. Rwanda Mission ah president kum 2 ka sep khitteh na nasepna ngei Publishing Department ah ka sem kik hi.

Kum nga khitteh ngaihsutna hamsa mahmah khat ka tuak hi. Ka zi ka ta le pawlpi mite kithahna pawlpi huang omna Mugonero ah makai dingin hong kisawl hi. Thugenin pai ding ka khensat hi. Ka innkuante le pawlpi mite a that mite tawh nasem khawm ding hi mawk ka hih manin hamsa veve hi. Amaute tawh bangci kiho ding cih ka thei tuan kei a, thungetna mah bulphuhpi-in ka nei hi. Ka nasepna mun ka tun nizan mahin zan thapaai thu ka ngen hi. Ka lungsim ah bang hong suak hiam cihleh pawlpi mi khempeuh sam inla, kimuhkhopna khat nei in, cih lung lut hi. Ka nasepna ding muna om mite hong pai kei leh, amau tawh bangci nasepkhop theih dingin cih ka ngaihsun a, ken ka makaih kul masa hi, cih ka phawk hi.


Ka lungsim konghong:

Amaute ka hopih masak kei leh amau hong hopih masa lo ding uh hi. Ken bel kuamah tawh nawngkai-na nei lo hing. Amau tawh ka na sepkhop ding Jesuh nasep bek mah ka nei uh hi. Hong kikhensak nate sangin hong kigawm khawmsak thei nate ngaihsut ding hi zaw hi. Sabbath ni kikhop ma-in mipi khempeuh kaikhawm in tua bangin thugena ka nei phot hi. Rwanda Union in hih tengah Lungdaman thu gen dingin hong sawl hi. Ka innkuanpihte a that a mi hong hilh kei un. Pasian a it khempeuh, Pasian’ na sepna ah kihel khempeuh ka sanggam u le nau hi. I vekin Pasian na semkhawm ding hi hang, ci-in ka pulaak hi. Hih munah kum 3 ka om khitteh Kigali ah hong kisawl kik a, tu dongin Kigali ah nasemin ka om hi. East Central Rwanda Conference sungah 2004 kumin pawlpi mi 65,000 om a, tu-in 110,000 thu-um mi omta hi.

THUKKIK LO

Lai Siangtho mun ka deih mahmah mun khat John 3:16 “ Pasian in a tapa khat neihsun a hong piak dongin leitung mite hong it hi.” Pasian in mimal khat ciat hong it lo hi leh, ka innkuante hong thahsakte ka that kik ding hi. Ahi zongin Pasian in amaute it hi; ki-sik kik hun pia hi.

Tual gal om sungin galtaite omna mun ah ka om sungin thu tuamtuam kaikhawmte hong pai-in dotna tuamtuam hong nei uh hi. Ka innkuanpih khempeuh hong kithatsak cih a zak ciangin, thuk kik ding na ngaihsun hiam ci-in hong dong uh hi. Lai Siangtho Hebrews 10: 30

– 31 sung ka sim hi. Thukkikna in Topa aa hi. Topa’ thukhenna in lauhuai mahmah hi. Tua bang ka cih ciangin thu hong dong pa’n lamdangsa mahmah hi. Ama ngaihsutna ah ken thukkik dingsa kha hi. Ahi zongin Lai Siangtho siksanin a nungta ka hihlam ka theisak hi. Tualthatte’ hoihlohna a kigen ciangin eite tungah a hong lungduai mahmah Pasian khat om hi, ci-in ka pulaak den hi. Mi khempeuh tungah Topa Pasian in lungduai hi. Pasian in kuamah a kisiat ding phal lo hi. Mi khat in a mawhna kisikin mawhmai ding a nget ngak leh Pasian in a mawhna maisak hamtang hi. Mawhmai sak lo Pasian om lo hi. Pasian aa dingin sihna in lauhuai hetlo hi. Pasian in sihna pan suahtakna ding lampi nei hi. 2015 kumin guahtui menciim hangin Tuikhingzang kisiatna hangin a khua buppi-in mun dangah kituah uh hi. Tu quarter 13 Sabbath School sumpi in Tuikhinga biakinn lamkik nadingin kipuak ding hi.

To get the latest update of me and my works

>> <<