MUC

Print Friendly and PDF

Tuesday, June 28, 2016

PAWLPI II NGIIMNA




Pawlpi in leitung tawh kikhena sap khiatna a ngah mite kigawm khopna hi-a, Christ' adinga anungta dingleh Christ' a kilang khia sak ding ahi hi. Tupna nam nih om hi. Khatna ah, Christ' duang zila pawlpi mite a khantohtheih nadingin pawlpi sungah kha an kivakna ding ahi hi. Nihna ah, amaute in pawlpi pua lamah Christ' thu a gen dingte ahi hi. Hih pen sawltakpite' nasep ahi hi. Amaute bang ciang tung uh hiam cih a kitheih nadingin hih tupna nihte bulphuhin pawlpi-in a nasepna khempeuh uh a ki-et kik zelzel ding uh kisam hi. Akhatna pen pawlpi mite kha lama a khantohna uh tawh kisai hi a, tuucin nasep a thupina hong lak hi. Church Pastor pen tuucing ahih tei hangin , tua nasep pen elderte, deaconte leh deaconesste tawh a sep khop ding uh ahihi.

NASEM/MAKAI : Lai Siangtho sungah, makaite pen sila (nasem) te peuh na kici zel hi. Mite' na a sep sak zaw ding a hong pai a hihna thu Zeisu in hong gen hi. (Matt. 20:28) . Zeisu akipan nungzuite, Paul leh hun masa-a pawlpi mite in khat leh khat' ading na kisep sakna lungsim nanei tek uh hi. Sila cih kammal in kiniamkhiatna lungsim hong lak masa hi. Ama hihna zah sanga kuamah a kisang ngaihsut zawk loh nading, Paul in hong gen hi. (Rom 12:3-5) . Hih thu in amau' panmun bang hiam cih pastorte, elderte, deaconte leh deaconesste hong phawk sak ding hi. Sila cih kammal in pawlpi sunga pawlpi mi khempeuh zong huam hi. Pawlpi mite khat leh khat a lianzaw a neuzaw om tuan lo-in , mihing citciatin kingaihsunin khat leh khat ki-it in nakise sak (kihuh) ding ahi hi.

KIKHOLHNA: Pawlpi mite khat leh khat' ading na kisepsaka pumpi khat bang a omna in kikholh theihna hong lak hi. Pasian' hehpihna leh Kha Siangtho' nasepna tawh seiniam seisang ngeina leh tat leh heek a tuamtuam, minam leh pau a tuamtuamte, ki-itna leh ki pumkhatna tawh kikholh theihna sung tung thei hi. Pawlpi mite a tua dinga a ki-ap ciang bek mahin, tua bangin piang thei hi.

KI PUMKHATNA: Mi khempeuh sittelna ding haksatna hunnunung hong nai semsem ahih mah bangin pawlpi mite akineh semsem ding uh, khat leh khat akipan pih dinguh, thu a kinget sak ding uh, a ki hansuah ding uh thupi semsem hi. Upna kibang neihna in Christ' deih ki-itna leh ki pumkhatna pawlpi mite hong neisak ding hi.

PAWLPI MITE KIHELNA

Khawtual pawlpi ciat ah Pasian' nasepna a kizawh nadinga thupi thu khat in pawlpi mite nasepna ah hong kihelna a hi hi. Ellen G White in teltakin hong hilh hi. "Sawltakpite' hih khempeuh tuni a pawlpi mi khempeuh in ahih ding uh ahi hi. Siatna a khan semsem mah bangin kisiikkik nading sapna zong akician zawsem kisam a hih manin, nakpi taka na i sep zawk ding, Kha siangtho in a nasia zawa hong panpih ding i kisam hi. Tu-in na khempeuh a tawpna hong naita ahih mah bangin tu-a pawlpi-in sawltak pawlpi hun lai sangin a kin zawk kaan ding uh kilawm hi." 7 Testimonies, p.33

CHRIST' PUMPI : I Corinth 12:12-17 ah pumpi tungna khempeuh a thupina Paul in gen hi. Khete, bilte, mitte leh khutte in amau' masuan ciat asep mah bangin pawlpi mi khempeuh in zong amau' sep ding ciat a sep ding uh ahi hi. Amau' masuan ciat semin, pumpi bup' adingin pang uh hi. Pumpi cidama gamtat theih nadingin pumpi tung nate in na sem kim ciat uh ahih lam kilang hi. Pasian in ama thuzuite kha lam silpiak hong piaciat hi. Pawlpi tungtawn a Pasian' deihna a picin theih nadingin Kha Siangtho in tua silpiakte tungtawnin na sem hi.

KHA LAM SIL PIAKTE: Pawlpi makaite in pawlpi nasepna a mainawtna dingin amau' ngah kha lam silpiakte thei-a a zat dinguh, a sep khempeuh uh pawlpi' khantoh nading ngaihsunin sema, Pasian in pawlpi mi khat ciat a piak kha lam silpiakte tawh kizui-in pawlpi mi buppi nasem dinga a zat ding uh ahi hi. Pasian' piak masuan pawlpi makaite leh pawlpi mite in a picin sak zawh nadingin pastorte in a panpih ding uh ahi hi. Pawlpi makaite in zong pastor te ahuh( Haakdom) ahih lam uh a kitheih ding uh kisam hi. Tua pen pawlpi ki-ukna thuguipi ahi hi. Pawlpi mi ciat khalam a a khantoh theih nading leh pawlpi bup mai anawt theih nading amau zong a kihel ahih theih nadingin, hilhna leh kihel theihna piak ding kisam hi. I Corinth 12 leh Ephet 4:11,12.

GOAL SEHNA: Hun tom leh hun sawt goal-te seha, tua goal-te tun zawh nading sep khiatna a thupina i gengen zo hi. Mihing pen bangbang hita zongin, ngaihsutna khat, geelna khat, sepkhiatna khat peuhah i kihel nak leh kithanuam ciat ahih lam i theihsa ahi hi. Tua goal-te pen Lai Siangtho leh Kamsang laite siksana leitung bup SDA pawlpi-in a geelna sa tawh kituaka hih ding ahi hi.

GEEL SIAMNA: Khawtual pawlpi-in a tuamin geel ding hi. Ahi zongin local Mission i thukimpihna kisam hi. Pawlpi khempeuh leh Christian khempeuh in a sep ding a thupi pen in kha ngahnading ahi hi. Pawlpi sung ahong lut masasa zong midangte' adinga nasem thanuam a suah ding kisam hi. Midangte na a sep sak dinga hotkhiatna a ngah uh ahi hi. "Pawlpi khat aki phuh khit phetin, siapa in pawlpi mite na sem sak pah hen. Upna sung a hong thak khempeuh tungah, midangte in hotkhiatna a ngahna dingin mikim in masuan leh sep ding nei ahihlam hilh kul hi."Evangelism, pp. 353,354.

"Elderte leh pawlpi sunga panmun lente in nasep khiatna ding limtak a ageel ding uh ahi hi. Pawlpi mi khempeuh a kihel dim nading leh, amau' hih theih zahciat uh tawh kizui-a zawhna angah ciat nading uh ageel sak ding uh ahi hi....... Angsung bek ngaihsun lo-a Pasian' nasem dinga akipia khia zo a suah nadingun pawlpi mite tua bangin hilh pil ding kisam hi. Tua bangin gah nei lo leh si lo a a om nading pawlpi ki hu thei bek hi. "Christian Service, p. 62. Pawlpi sung a department (pansan) a tuamtuamte in lungdam thu tangko nopna lungsim a neih nading pen tuni a pastorte leh pawlpi makaite' masuan ahi hi. Khawtual pawlpi makai khat nahihna tawh hih thu na ngaihsut lianbel, na thungetna leh na hanciamna hi sak in hih tupna thupi a tangtun na ding pen nangma huzap leh sepna tawh kisai pha mahmah hi.

SEPKHOPNA: Pawlpi makaite in a sep khop diamdiam ding uh ahi hi. Hun tom leh hun sau' a dinga kiseh goal-te zong church board meetingah kikum khawm ding, bangci leng kitangtun zo ding cih zong kikum khawm ding hi. Mailam a sep dan ding siam zawk sem nadingin sepnasate zong en kik zel ding hi.

PHAWK KIM DING: Pawlpi sung panin pawlpi mite leh lenglate tungah itna leh ngaihna kam a ginkhiat ding kisam hi. Thu-um thakte leh a um nailote phawk kawmsa in biakna hun khempeuh geelsiam kisam hi. Hun geelna sung khempeuh ah lenglate zong nuamtak a hong kihel theih nadingin siang takin gen kul hi. Ahih ding mel uh theilo a a om loh nadingin limtakin amaute pawl bawl ding kisam hi.

SABBATH HUN ZAT DAN: Sabbath hunte pen kaal khat sunga hun thupi pen ahi hi. Lai Siangtho sina, kikholhna leh biakpiakna hun manpha ahi hi. Tua hunte a nopci theithei, a lawp huai theithei ding a ahi thei zaha hanciam ding ahi hi. Biakpiakna hun tawh kisai-in E G White in, " Pasian bia ding a i kikhop khawmna panin thupha i ngah dinga kilawm seh za zuah seh khat zong ingah kei thei hi." ci hi. Testimonies, vol, 6. p. 362.

Biakpiakna hun zat dan pen pastor' masuan buppi a hita zongin, amah zong hong om den thei lo ahih manin, tua hun ciangin elder in ahih ding ahi hi. Hih pen lungsim takpi tawh sep ding ahi hi. Sabbathschool hun, Personal Ministry hun leh biakpiakna hunte, Pasian' lungkimna ding leh hong kikhawm khempeuh in thupha angahna ahih nadingin nabawl theih nadingin pastor tawh kikumin na siamtawp in sem in. Biakpiakna huna masuan anei khempeuh in zong mau' masuan ciat a hi ding banga hoih pen ahi dingin hanciam ciat ding kisam hi.

SABBATH HUNTE CHECKNA: Hun geel masuan a neite in a hoih theithei dingin hanciam den ding hi. Laidal leh laikung pua in la, hun zat zia khempeuh encikin, ciamteh in, Na phawk ding thu pawl khatte hih anuai-a bang hi.

1.     Biakinn asung apua kisaktheihpih tham dingin a om hiam? Biakinn leh ahuang hoih takin akipuah hiam? Labute leh lailbu tuamtuamte , paakte leh tutphah sabuaite amau' mun ciat dingah hoihtakin akikoih hiam? Hun man ciangin hoih takin aki seng hiam?

2. Biakinn sung hong lut masasa limtakin aki dawn hiam? Adawnte a maitai a ngaihbaang uh hiam?

3.   Sabbath School hun maanin akipan hiam? Lenglate aki dawn hiam? Hun hoih takin akigeel , akisemkhia hiam? Kuamah peuh nuamtaka a om theih nadingin huih siangtho leh khawvak hoihtakin a kingah hiam?

4.Biakinn sungah khat leh khat kingaihna leh biakinn sung zahtaakna a om hiam? 

5. Sabbath School memberte class akikhen ding ciangin, lenglate in a pai nading meel uh theilo a a buailoh nadingin, superintendent in hoih takin a gen hiam?

6.   Personal Ministry hun akizat laitak leh thu zaksakna akineih laitakin lenglate akiphawkkha hiam?

7.  Phat nopna leh ki-ap nopna taktak tawh la akisa hiam? La lamah Adventistte' san dan tawh kituakin la akisa hiam?

8.  Maikahte alu ataw, asilh aten siangtho in hi sinsenin a om hiam? Pulpit sianthona a nit sakloh nadingun puansilh nikteen akidop mahmah ding uh kisam hi. Khepheek dan zong kidop ding kisam hi. Zahtak lohna leh leitungvaite peuhmah biakpiakna sungah pelh ding kisam hi.

9.  Hun man ciangin biakinn sung pen kidawm takin hi diamdiamin a kipusuak hiam?

Hih te in Sabbath ni hun nuam leh hun thupi asuah theihnading thu tawmno khat ahi hi.

Hih bang i gen ciangin pawlpi makaite in , college pilna khawng pilna sangpipi khawng leh thugen asiam kisinna khawng aneih ding kisam hi cihna hi tuanlo hi. Apawlpi ita, pawlpi' ading nasepna nengnengte nangawnah zong ahoih theithei ding a Pasian' huhna tawh asiam tawp asep ding kisam hi, i cihna hizaw hi. Hun amaan ding, asiantho ding, gual ahuai ding leh mi' muan a hih ding kisam hi. Sep ding akisawl peuhpeuh thupi-in thuneu ta leh hoih takin sem ding hi. Christian ki unauna lungsim taktak a om theih nadingin a hih theih zahin hanciam ding hi. Tuni asepna pan a hoih thei pen a hi phial zongin puahphat ding om to den ding hi. Sabbath ni sialsialin puah phat nading koilai om hiam? ci-in na bil pil sak inla, na mit vaak sak in. Pastor tawh kikum unla, ahoih semsem dingin geel un. PAU KHIA IN: Mihon mai-a thu gen ding peuhmah in bang gen ding ngaihsun hamtang ding uh hi. Ahi zongin BANGCI gen ding cih kingaihsun khalo thei hi. Bangzahta in akigingkhol a, bangzahta in a kammal te a puahpha ta zongin, mipi-in athu azak kei a atel kei leh a phattuamna bangmah omlo hi. Akigen thu atel loh bek uh thamlo in nuammawh peuh sazaw thei lai uh hi. Thungetna a hi a, thuzaksakna ahi a thugenna ahi zongin , paukhiatna khempeuh ah mi khempeuh in za a atel theih dingin pau ding kisam hi. Kammal kician tak tawh pau khiat den ding kisam hi. Thugente in lungsim takpi leh lawpna tawh agen ding uh kisam hi. Thuzaksak dan, la nambat gen dan leh thungetdante in zong hun zatna lawphuai sak hiam, thadah huai sak hiam khat suak sak thei hi. "Lungsim taktak lo pi leh lawp tak lopi a hun zatna in kikhop na sunga lawpna alang that hi. "Counsels to Teachers,pp. 246,247.

AW LIAT NA: Tuhun ciangin biakinn neu nonote nangawn ah zong aw liatna ki zang hi. Tua bang a a kizatna munte ah hun kipat ma in microphone limtakin check masak dingkisam hi. Microphone a hoih mahmah phial zongin kammal a siangin kiza kim thei tuanlo hi. Tua a hih manmin thugente in kammal kician tak leh siangtaka pau ding kisam veve hi. A aw ging kiza napi, amal kitello thei hi. Awliatna in aging zaw ding a ahuh theih bek hi a, kammal kician lo pen puahpha thei tuanlo hi. Tua ahih manin awliatna a kizang a, akizang kei zongin kammal siangtak teltaka pau ding kisam tawntung hi.


Source: SEVENTH-DAY ADVENTIST PAWLPI

Conferencete kithuzakna Vol 2, April 2016...

To get the latest update of me and my works

>> <<