MUC

Print Friendly and PDF

Tuesday, June 28, 2016

PAIKHIATNA ( Exodus)



By: Sia Kham Sian Kim


Mihing kipiansak cil a kipanin khat guak sangin kipawl theihna tungtawnin Pasian in leitung puah dingin mihingte vaipuak napia hi. Pian.1:27-, 2). Pasian amaute thupha pia in, note in leitung nadim unla na puah un ci-in, 'no' cih kammal na zang hi. Leitungah mihing a i piankhiat akipanin, ' ei' cih kipawlna panin kikhangkhia hi a, khat guak khangkhia cih om ngeilo hi. Leitung vannuai ah kei bek khangkhia ning cih theihna omlo-in i pianzia khempeuh 'Ei' cih sung pan a kilangkhia gamtatna a hihi. Tua 'Ei' cihna sungah a limlang aa hong ki tel pen in kipawlkhop theihna, thasan khopna leh ki piakkhiatna tawh mungtup khatah kibang lo pianzia tek tawh kalsuanna ahi hi.

Tua 'Ei'cih i khankhiatna mah in i mungtup lampi hong puah in hong picingsak a i pianzia lim or mel hong sek hi. Tua pianzia khempeuh le lim le mel khempeuh i gawmtuah theih ciangin Ei cih lim in etteh huai maw etteh huai lo le, picing le cinglo hong kilang sak hi. Tua 'Ei' cih sungah kei vaipuak peng ing cih theih mi khat le na khempeuh nei theilo-in ahoih le ahoihlo bek kilamdangin vaipuak i pua tek hi. Tua vaipuak i puak pen in 'Ei' cih kipawlna sungah ahoih lam maw a sia lam maw khat zawzaw ah thapia in susia a hih kei le thakhauh, zungkha, khangcing, phungpha sak hi. Khua khatah thuneihna kibang lo bekin vaipuak neihna ah akikim vive ahihi. Hausa khat in khuazang ai-in thu nei bekin khuazang sep ding khempeuh sem thei lo zelin a thu thei pen ding kitel ahih man a a huam a ngaihsut kak theih ding cih hi bekin, tua khua ah amah bek om leh hausa teel kullo hi. Cihnopna ah khua khat 'Ei' cih vaipuakna a vekin kikim cih a deih hihang a, tua vaipuak a luankhawm ciang bekin, khua khangto hipan ding ahihi.

MOSES HANG MAW, ISRAEL MI KHEMPEUH HANG?

Israelte Eggypt gampanin suahtak nading uh pen Moses a om manin Pasian geel hiam cileng ahih loh lam i vekin i thei tek hi. Bang hanghiam cih leh Israel cih min a om ma Abraham hun laipek in Pasian kamciam sa ahi hi. Israel mi khempeuh suahtak nading a Pasian geel hi-in, Pasian le Israel minamte kikal kalsuanzia ahihi. Cihnopna ah Pasian in Moses a ding bek geello-in Israel minam bup khempeuh a ding a geel ahih manin Israel khempeuh tungah hih suahtakna kamciam pen om ahih manin suahtakna pen mimal tek tung kinga-in, vaipuak nei tek uh na hipah cih a gen nuam i hi hi.

Ahi zongin suakta nuam teng bek hi-in kuamah omlo-in Moses bek a ut hileh Pasian in Moses bek suakta sak kha ding hi. Pasian in Israelte sal hihna panin hotkhiat ding vai hangin Moses a teel hi a, Moses pil lua, siam lua, hat lua ahih manin Israel minamte hotkhiat ding a geel hilo hi. Pasian geelna lampi-ah Moses pen makai picing theih nadingin Pasian in lam hon sak cih a hi zaw ahi hi. Suahtak theih nading geelna ah Moses vaipuak khat tek a neihna vuah Moses a pen Egypt kumpite tawh thu kikum thei ding, kumpi lam a phu ding cih geelna ahi hi. A tatakin Pasian in Egypt minamte leh kumpite tawh bangmah buai se lo in thudam takin suahtak ding pen Pasian geelna ahi hi.

Tua ahih manin Moses pen kumpi inn sungah khangkhiasak hi. Tua bek hilo-in mailam Israelte pilna alak theih teng la-in tua tawh gam sung thu leh la teng vaihawm thei ding cihna ahi hi. Moses vaipuak pen in Israelte suahtak nading mungtupah vai khat hi-in, suahtakna bup ama vaipuakah a vekin kinga hilo hi. Makai vaipuak nei hibekin amah pen suahtakna hi pah lo hi. Suahtakna mungtup tun theih nading lam zong bek hi-in, ama khut sungah suahtakna om nahilo hi. Suahtkana lampi a tel loh uh hi leh thu hamsa mimal vaipuak a kikimin nei tek uh hi.


MUNGTUP AH THU LUANG KHAWM THEI LO

Moses pen a neu tung a kipan suahtakna ding lampi vaipuak nei dingin Pasian sap ahih zahkhat, Pasian thu leh Egypt te pilna khempeuh thei khawm hi. Pasian thu pen a nu tungpanin kumpi inn
sung pilna a va sin dong pen kihilh ngiatngiatin tua sung Israel te suahtak nading vai pen tam kihel pen kha ding hi. Pasian in kamciam a piakna, Pasian in amah a lamdang a anuntakna a hotna akipan, a minamte thuaksiatna khempeuh a nu in khetpi-in khen kha ding ding. Moses in zong a ma vaipuak neihna ah muanhuaitak le citaktakin sem ding mahin zong khensatin lungsim khempeuh tawh sem hi.

Moses mahmah in zong ama vaipuak thei-in, ama makaihna tawh suahtakna vai kipan khia ding cih tel mahmah hi. Ahi zongin suahtakna nasepna Pasian geelna lampi leh suahtakna lampi zuihdan pawlkhat hong kitukalh gawp hi. A suahtak nading dan zia pen sisan naisan omlo a thudam a suahtakna ngah ding pen Pasian geelna leh a hoih pen lampi hi-in, ahi zong Moses ii a khengval lungtang puakzia, geelna sawmna ah ahun tung nailo aa ama thu aituam mawk tawh asep man leh Israel mite tawh lungsim luan khop theihna a om loh manin, suahtak nading hun pen kum tampi kisot to in, a thuaksiatna uh khangin lamet bei-in suahtakna ding kamciam nangawn Israel te lakah a bei tawh kibang hi. Moses khialhna ah, Egypt mi khat in Israel mi simmawh in sat gawp amuh teh a sintang na-in thuaklahin thuh kikna tawh vathat mawk hi. (Pai. 2:11,12) .

Moses in hih a mi thahna, gamtatna nengno khat hangin mailam bang piang ding cih thu ngaihut theihna pen ahehna tawh khup nelhin gamta mawk hi. Moses khialhna nihna ah, Pasian in amah pen makai ding a a teel cih pen man hi, ahi zongin ama Pasian piak kamciam pen aituam lakin lamtawnin gamta kha lo hi. Tua mi thahna ah a dang lampi tawh thudamin a vaihawm theihnading tampi om hi. Ahi zongin Moses in ama gamtat pen aman penin ngaihsunin gamta hi.

Moses in suahtakna angah nading mun uh pen Egypt te kiang pan hi-in, tua Egypt te kiangpan suahtak nading lampi totzia man lo-in gal vai tawh pan kha hi. Amah leh amah kimuang gawpin Pasian in hong ompih ding hi cih Pasian ompihna ama aituam geelna ah kai-in gamta hi. Moses khialhna thumna ah aminam leh Egypt mite tawh buaina uh bang ci bangin ahoih penin geel ding cih amuibun geelna nei lo-in suahtak nading lamah amah bek in aituam lak hi. A tatakin cileng suahtakna ding pen Egypt te sal hihna pan hi a, kumpi no khat ahihna tawh thudam theithei sal uk dan leh buaina laigil a vensak theih nading thu tampi om hi. Tuate en lo-in amah sangin a thahat zaw keel leh sai a bang aa kikhai agalte namsau tawh do sawm hi.

Amah leh amah kipum muanin, gal do zia nangawn tel napi,a hat zia uh thei napi, ama lungsim hang leh a kipummuanna teng hang tua teng sumelh hi. Moses khialhna lina-ah , Moses in a mipite tawh kipumkhat zo lo. Pai.2:13,14 en leng Moses thanemna tampi om ding ahi zongin amah leh mipite kithuhual loh lam ki dawk hi. Moses in ki tawng a mite a va thu khen ciangin a mipite in nang ko tung a thukhen dingin kuan hong koih hiam na ci giap mawk uh hi. Hih munah Moses leh Israelte kikalah kithuhuallohna hong dawk hi. Tua panin Moses in Egypt mi a thahna hong kipholakin vai tampi hong ki songsawlawi gawp hi. Moses in Israelte suahtak nading makai ahih na pen amipihte tungah a zat dan kisap na ciang omin ka um hi. Tua mah bangin mipi in a makaipa uh a muhna khat uh kilam tuam khat kha ding hi.

Moses in a mipih a khialpa kiangah na lawm, na mipihpa banghangin hi ci bawl na hiam ci hi. A kammal i et ciangin hih pen mipite buaina a bul va lemtuah ding sangin, no leh no ki ngaihdam un cihna lamah valemtuah kha hi. Moses in a mipihte buaina a bulpi te va lem tuah thei siam hileh amipihte in amah pen makai picing ci in muang ding uh hi. Israel mite lam pan en leng, Moses pen amau makai ding cih a theilo kuamah omlo ding uh hi, bang hang hiam cih leh sal pan suahtak nading vai pen sihkam vaikhak leh kikhopna munte ah zong genpi pen hi-in, Moses mahmah zong Israel mite tawh hih vai pen kikum den kha ding uh hi. Ahi zong mipite in amau ang sung khual khialhna khat Moses in a va kawk ciangin mungtup lampi khial-in makai Moses amuhna uh sawi-in mimal kilang neihna ultungsak zaw in a vai puak uh khuplet in a mailam lampi khak tan nading gamta kampau uh hi. Bangzah ciangin siahuai hiam cih leh tua buaina hangin Moses mithahna kumpa kiang dong kitai-in Moses nangawn thong kia-in Egypt gam pan kihawlkhia hi. Koi ci bang sal pan suakta ding ngaihsut huai mahmah hi.

Ni dang Egypt pa a thah laitak un Egypt mi a thei kuamah om lo-in amau Israel mite bek ii theih hi, hoih takin minam a it na hang uh tawh iim cipin om uh hi napi, mimal buaina hong om ciangin khat leh khat tangtel sihtan bang phial valvalin,kimawhkawk gawp uh a, tua mithahna a makai Moses in thuak lawh hi, sal suahtak nading geelna minam itna tawh sem khial a hih tei hangin a sia huai pen khat leh khat thu hong kibat loh ciang bei dong lian uh hi. A tatakin ci leng mungtup khatah sal pan suahtak nading luang khawm thei uh hi leh Pasian in ama uh tutpih dektak nahi hi. Ahih hangin mungtup lampi kithuhual lohna hangin kum 30 bang sal nuntakna ah thuaksia takin thuaklai uh hi. A suk zawah, Moses Egypt kumpi innah a om lai-in ama hih theih zahin amipihte ahutnate Moses a om loh khit teh a en ding a gum ding omlo a ganhing zah mahin kizang zaw kan lai hi. Moses leh Israel mipite in amau mungtup thei napi uh vaipuak lak na-ah kipawl khop theihna leh mungtupah ahoih pen geelna nei khawm thei lo-in ei cih sang "Kei"cih tam lua ahih manin mungtup kamciam kician a neih hangin thakhat thu-in tungpah thei lo uh hi.

Conferencete kithuzakna Vol 2, April 2016...

To get the latest update of me and my works

>> <<