MUC

Print Friendly and PDF

Monday, June 20, 2016

LESSON 9 | AUGUST 20 – 26

LESSON 9          AUGUST 20 – 26

                    ZEISU IN MITE’ KITANGSAP SIKSANIN NASEM



TU KAAL SUNG SIM DING: Mark 5: 22- 43; 10: 46 – 52; 2: 1-12; Sawl. 9: 36- 42; John 5: 1-9; Late 139: 1-13.

KAMNGAH:“ Tua bangin khuapi khuata kici tengah Zeisu vak kawikawi-in amaute kikhopna innte ah thu a hilh hi. Pasian kumpigam lungdamna thu tangko-in cina le natna tuamtuam

a nei mi khempeuh a damsak hi.” Matt. 9: 35.

African gam ah SDA pawlpi pan pension a lak khit hangin nasep khol ding hi lo hi, ci-in numei khat in pulaak hi. A omna khua ah AIDS natna nei tam lua mahmahin, tagah naupang tampi om hi. 2002 kumin hih numei in a pawlpi tawh mapangin tagah naupangte kaal khat in ni guk sung naupang 50 an pia uh hi. 2012 ciangin naupang 300 anvak uh hi. Tu-in hih naupangte lak pan 45 in sangkah theita uh hi. ADRA panin zong puansilh, mehteh mehgah tuamtuam cihte zong kipia hi. Numeite zong khutsiamna tuamtuam hilh uh a, tua bangin nasepna tungtawnin sum thalawh thei uh hi. Hih bangin pawlpi in itna tawh a sep manin pawlpi mi zong kibehlah hi. A kipatcilin mi 5 tawh kipan ahih hangin 2012 ciangin mi 160 bang kikhawm hi. Pasian in lampi honsakin tu-in biakinn le tagah kepna khat zong nei zo uh hi.


Khua sung, kimlepaam a tasam mite huhna in a vanglian mahmah Pasian nasepna khat a hi hi.

SUNDAY AUGUST 21

ZEISU A NAWNGKAI-SAK HUH NGETNA

Zeisu in gunkuang tuangin Capernaum hong tung a gunkuang tung pan hong tuakkhia hi. Decapolis a dawivei a damsakna thu hangin mite in lamdangsa-in a om laitak uh ahi hi. A ngeina bangin mihonpi in Zeisu lam hong zuan uh hi. Zeisu gei-ah om dingin mun kituhin mipi gamlum mahmah hi. Tua leh biakinn ukpa khat in Zeisu kiangah huhna va ngen hi.

Mark 5: 22 – 43 sim in. Biakinn uk mipa inn ah a pai laitak mahin bang thupiang om a, koi bangin Zeisu in tua thu dawng kik hiam? Hih thu in bang hong hilh hiam? Na khat peuh in na maban hong nawngkai-sak ciang koi bangin kalsuan ding na hiam?

__________________________________________________________________________

__________________________________________________________________________

Kuamah in hong nawngkai-sak kei leh i ut ciat hi. Nasep manlah, kitaaklah mahmah, sep ding tampi om kawmkal ah nasep hong nawngkai-sak thei na khat peuh i tuak kha zel hi. Manlah mahmah, hun neihloh kawmkal ah huhna khat peuh hong kinget ciangin huh manlo-in, mi hun ding sangin i nasep thupisa zaw-in kuamah huhloh hun zong om hi. Khat veivei ciangin i nasep nusia-in i huh hun zong om thei hi. Ahi zongin tua bangin nasep hong dongkolhsak hi mah taleh, huhna hong kingente huh hi lehang nang aa dingin a manpha mahmah hun le huhna hi thei hi. Nasep maban zawh ding hanciamin na i sepna a hong nawngkai-sak a deih kuamah om lo hi. Ahi zongin Zeisu in nasep a manlah mahmah laitakin huhna ngen mite nial lo-in huh tawntung hi.

Ngaihsun lehang i sep ding taktak nate pen lamet loh laitakin hong huh in ci-in hong kingente hi kha thei hi. Samaritan mihoihpa thu en lehang, mi huh ding a tua lampi ah a vapai hi lo hi. Mun khat a pai ding kimlai, lampi ah cimawh dongtuak khat va mu kha-in tua mipa huh pah hi. A tun nading mun zekai-in tung hi. A lampai a nawngkai-sak cimawh dongtuak mipa hi.

Nasep na kin mahmah laitak huhna hong ngente koi bangin na dawng kik hiam?

MONDAY AUGUST 22

KOI BANGIN KONG HUH THEI DIAM?

Mark 10: 46 – 52; John 5: 1-9 sim in. Bang hangin Zeisu in thudong hi ding hiam?

_____________________________________________________________________

_____________________________________________________________________

Zeisu in amaute deih theikhol hi mah taleh amau deih dong masa hi. Tua bangin a dot masak photna a hangin Zeisu in amaute a thupisimna theisak nuam hi. A gen thute uh Zeisu in a ngaihnoplam thei le-uh ut hi. Zeisu in amaute kin takpi mah hi, cih amaute theisak nuam hi. Khat veivei ciangin bang mah huhta kei lehang a gen nop bang bang uh i vangaihna zong huhna lianpi mah hi. A hamsatna nuamtuamsak thei hi. Gentehna-in siavuan khat kiangah na pai ciangin bang mah hong kidongse lo-in, hong kivel ziau lelin, na nek ding zatui hong kipia-in hong kiciahsak ziua hi leh, na lungkim lo ding hi. Ahi zongin na gen nop bangbang hong kigensakin hong kingaihsak hi leh, na lungkim zaw ding hi. Tua mah bangin tatkhiatna sepna ah zong pawlpi in mite kitangsap i theihsa hi, cih kammal kiza zelzel hi. Mi tawh i kiho ciangin amau aa ding i lunghimawhpihna, i deihsakna hong mu thei ding uh hi. Tua hi leh i sep na khat peuh hong sang thei ding uh hi. Tua banah amau tawh kimeltheihna hong suak pah hi.

“Mi khat in bangzah in a hong langpan hangin ama aa dingin na deihsak nak leh tua langpanna na zo thei ding hi.” Leitungah mihingin Khrih a hong nuntaklai-in mi khempeuh aa ding na hoih deihsak tawntung hi. A paipai-na ah natna khempeuh damsak hi, puanneilote puanguan hi, a dahte hehnem hi.” Ellen G. White, Welfare Ministry, 162.

TUESDAY AUGUST 23
KITANGSAPNA TAKTAK


Ei le ei i kitheihna sangin i Topa Zeisu in a hong theihna kicing zaw hi. Zeisu in i ngaihsutna khempeuh a beisa hun a kipan tu laitak dongin a theihloh khat beek om lo hi (Mark 2:8; John 4:18).

Late 139: 1-13 sim in. Topa kammal in bang hong hilh hiam?

_____________________________________________________________

_____________________________________________________________

Zeisu in mite kitangsapnate thei-in tua tungtawnin nasem hi. I lungsim ngaihsutnate zong a theihloh om lo hi. Pumzaw mipa in pumpi cidamna sangin a lianzaw damna khat kisam ahihlam Zeisu in pulaak hi. A lupna pua-in ciah ding thupiak banah “ na mawhna khempeuh maita hen,ci-in pulaak hi (Mark 2:5).

Mark 2: 1- 12 sim in. A kimu theilo a lungsim ah bang thu om hiam? Mi kiangah hotkhiat nasepna tawh kisai-in bang thu hong hilh hiam?

___________________________________________________________________

_____________________________________________________________________

Zeisu in pumpi taksa cidamna sangin a thupi, a manpha zaw damna kisam ahihlam pulaak hi.

_____________________________________________________________________

_____________________________________________________________________

“Zeisu in pumpi taksa kitangsapte sangin a lian zaw a kisam thute pulaak hi. Tua mipa in mawhna pan suahtak ding phawklo-in pumpi damna ding bek lunggulh hi. Hih mipa in Zeisu theician hileh, Khrih kiang pan hong pai mawhmai-na um hi leh, a nungta a, a si zongin Pasian deihna hi, ci-in pulaak ding hi.” Ellen G. White, The Desire of Ages, 267.

Zeisu in mite lungsima om thute a theih bangin mihing ngaihsutna i thei kei hi. Ahi zongin a kisam i theih ding thu in mawhna in mihing ngaihsutna siasak khin hi. Hehpihna, lungmuanna, mihingte hong it Pasian, eite aa dingin a hong si, eite aa ding a hoih penpen a sem Pasian khat om hi, cih phawk tawntung ding kisam hi.

Bang zahin totkhiatna kamciam na lunggulh hiam? Eite hong it Pasian na thei nuam semsem hiam? Koi bangin midangte in zong tua bangin a lunggulh nadingun na huh diam?

WEDNESDAY     AUGUST 24

JOPPA KHUA-A DORCAS


Sawl. 9: 36 – 42 sim in. Koi bangin Joppa khua-a Dorcas in a kim a paama om mite kitangsap mu-in huh hiam? Sawl. 9: 41 ah “ Thu-um meigongte” in bang pulaak hiam?

________________________________________________________________

_________________________________________________________________

Dorcas in a upna bangin a nungta nungzui khat hi. Joppa khua ah Tabitha thu-um mi khat om hi (Sawl. 9: 36). Hih bangin gelh in: ( na omna khua min) ah ( na min) kici nungzui khat a om hi. Amah in mizawngte huhin thupha bawl tawntung hi. Thu-um mite in pawlpi mite hi.”Meigong” cih kammal in pawlpi mite a kipan pawlpi mi hi lote zong huamkha hi. Dorcas in a kibangin amaute kisapte huh hi. Nang aa dingin “ Joppa” in koi teng huam hiam? Pawl sung pawl pua a huam hiam? Pawl sung mite kitangsap hoihtakin na huhna in Pasian nasepna khat hi. Tua bangin nasepna hangin pawlpua mite in “ en dih! "SDA thu-um mite ki-it, kideihsak taktak uh hi," ci-in mu ding uh hi.
John 13: 34, 35; John 15: 12 sim in. Hih munte in bang thu pulaak hiam? Bang hangin pawlpi in tua thute zuih ding thupi hiam? Bang hangin tua thute zuih ding hamsa hiam?

__________________________________________________________________

__________________________________________________________________

Pawlpua mite kiangah Pasian nasep ding na geel ciangin bangci bangin sem ding cih limtak ngaihsun in. Amy Sherman in tua tawh kisai-in phawk ding thu thum pulaak hi.(1) Biakinn kim a om mite, cimawh gentheite a kipan AIDS natna nei mite zong mangngilh kei in. (2) . Na veng na paamte kiangah nasepna: gentehna-in a khawnkhongin annekpihna cihte a kipan na khat peuhpeuh geel in. (3). Tuucingte danin mun khat bek bulphuh nasep hi lo-in mi hon tungah nasepna cih bangin khenin na kisem thei hi (Ronald J. Sider et al., Churches That Make a Difference: Reaching Your Community with Good News and Good Works (Grand Rapids: Baker Books, 2002), 146.

THURSDAY AUGUST 25

NASEPNA MUNAH PAWLPI/ BIAKNA

Na sepna khempeuh Topa ap in. Tua hileh na geelna khempeuh Topa in hong tangtunpih ding hi (Pau. 16: 3). Na omna pawlpi in khua sung kimlepaam ah nasepzia ding geel hen. A geel bangin pawlpi mimal khat ciat kihelin nasem uh hen. Makai na hih loh hangin nasep theih om hamtang hi. Pawlpi mi khempeuh in pawlpi masuan le a nasep a theih ding uh kisam hi. Pawlpi in nasep ding a geel ciangin thu thum siksan hamtang ding hi. (1). Lai Siangtho le Kha Siangtho hilhkholhna (Kamsangnu hong hilhkholh thute (2). Kimlepaam kitangsap (3). Pawlpi mite panpihna cihte kisam hi. Pawlpi kim khatkhatte ah pawlpi mibup tawh kikumin vaikhawm uh hi.

Luke 14: 25 – 35 sim in. Pawlpi in a sepna khat peuhpeuh a tangtun nadingin cihtakna, geelkholhna cihte tawh kisai-in bang thu hong hilh hiam?

____________________________________________________________________

____________________________________________________________________

Kimlepaam kitangsap i theih nadingin hun le kipiakkhiatna tampi kisam hi. Nasepna khat peuh lamdawt kizui nuam hamtang hi. I sep khat peuhpeuh tung tawnin Pasian in thu hong khen ding ahih manin lopthop bawl lo-in Khrih nungzui picing mah bangin i sep ding kisam hi. Nasep ding gelkholhna, sepsate sittel ding zong kisam mahmah hi. Tua in nasem citak hihna hi. Luke 14: 34 sunga ci in biakpiakna limcing hi. Biakpiakna om kei leh i nasep, nungzui i hihna in a mawkna suak ding hi. Topa tungah citakna, thumanna kisam hi. Tua hileh nasepna ah zong citakin thumanna hong om thei pan ding hi.

Kimlepaam ah Pasian nasep na kipatma-in pawlpi in koi bangin geelkholhna kisam hiam? Koi bangin mimal in mapang ding na hiam?

FRIDAY AUGUST 26
SINBEH DING: Thkna. 15: 11; Job 29: 11- 17; Pau. 14: 31; 19: 17; Sawl. 3:6; James 1: 27 – 2:5; Ellen G. White, ‘ Pionering in Australia” in Welfare Ministry, 327 – 338.

Zeisu mah bangin Paul zong mi lakah kihelin mite kitangsap huh hi. Paul nasepzia Athens khua-a om Mars Mual tunga thupiang tungtawnin kimu thei hi. Athens khua sung vanzuakna munte le khua sung a vak kawikawina mun khatah milim biakna tau khat mu hi. Tua thu tawh kisai khua sung upa makaite tawh thukupna tampi nei hi. Tua tungtawnin Paul in khua sung mite kitangsap mukhia thei hi. Athens khua mite in a theih loh uh Pasian bia hi, cih Paul in mukhia hi. Hih thu siksan in Paul in Gentiles le Jew mite kikhopna inn ah pai-in a nungta Pasian biak ding hi-in, milim le nate biakna in a mawkna hi, cih thu hilh hi (Sawl. 17: 17). Paul in Pasian thu a hilh ding a hun mawk beisak lo-in thuman thutak hilh tawntung hi. Paul in amau omomna munah pai-in, kongzing lampite banah biakna innte ah thuman hilh tawntung hi. Athens khua mi a tamzawte in vangliatna nei khat om hi, cih um uh hi. Biakna tau tungah “ A kithei lo Pasian” ci-in gelh uh hi (Sawl. 17: 23).

Hih thu siksanin Paul in a nungta Pasian thu hilh hi. Paul in a thuhilhna ah Athens khua mi laigelh minthang khat ii gelh “ eite zong Ama suan le khakte i hi hi” ( Sawl. 17: 28) cih siksanin thu hilh hi. Paul in amaute dinmun milim biakna panin sihna panin a nungta kik a nungta tawntung Pasian bia dingin domto hi. Paul in amaute kiangah thu a gen nadingin amaute kitangsap bangin huh masa phot hi.

KIKUP DING DOTNATE:

1.    Mite kiangah tawntung lungnopna, muanna thu a hilh mite in mite nisim kitangsapte a huh uh banah upna thu tawh zong pantah uh hi. Ellen G. White, The Desire of Ages, 365. Bang hangin thuman tangko hi bek lo-in i tangko a za mite kitangsapte zong huh ding thupi hiam?
2.    Bang hangin mi kiangah i thupuak tangko ciangin i mungtup tawpkhak mangngilh loh ding thupi hiam? I mungtup tawpkhak in bang hiam?

3.    Na nasep hong nawngkai-sak thute hangin kibuaisak lo zaw-in, Pasian in ama nasepna dingin koi bangin a lampi hong honsak hi, ci-in ngaihsun zaw thei ding na hiam? 

To get the latest update of me and my works

>> <<