MUC

Print Friendly and PDF

Monday, June 20, 2016

LESSON 7 AUGUST 6 – 21

LESSON 7              AUGUST 6 – 21

ZEISU IN MITE' HOIH NADINGIN NASEM


SABBATH NITAK: John 3: 4 – 4: 6; Luke 19: 38 – 42; Matt. 5: 43 – 47; 1Kor. 13; Mark 8: 22 – 25; Phil. 2: 3-5; James 2: 14 – 17.


KAMNGAH: “ Jerusalem, Jerusalem aw, kamsangte na that a, Pasian’ sawl kamtaite na denglum hi. Akpi in a kha tawh a note a huai mah bangin na mite ka huainuam

tawntung a, ahi zongin na ut kei hi” ( Matt. 23: 37).

Sabbath zingsang sialin skate (Tuikhal tungah kimawlna nam khat) tawh kimawl khat in Adventist biakinn mai-ah hong khawl hi. Bang hanga khawl hiam cihleh hih pawlpi in khangnote kimawlna phualpi gei-ah biakinn a om lamdangsa hi. Hih khangnote ngawngkai-nasak khak uh leh ngaihsunpha kik in.


Khua sung mite aa dingin nasem lo pawlpi in kimanna nei lo pawlpi ahi hi. Khua sunga khangnote in siatna sungah kidiah khin uh ahih manin khua sung makaite in khangnote kipuahphat theihna ding kimawlna khat lamsak uh hi. Tua inn gei ah biakna tawh kimakaih thei ding biakinn khat om leh lunggulh uh hi. Biakinn gei-a kimawlna ah a vapai khangnote biakinn in huzaap thei dingin lamen uh hi. Pawlpi tuamtuam a sap khit uhteh kua mahin tua kimawlna gei-ah biakinn lam ding thukim lo uh hi. Ahi zongin SDA pawlpi in Sabbath niteh biakpiak neihtheih nading biakinn khat lam uh hi.

SUNDAY AUGUST 7
NINEVEH AH JONAH


Jonah 3: 4- 4: 6 sim in. Kamsangpa ngaihsutzia bangzahin sia hiam?

___________________________________________________________________________

________________________________________________________________________

Kamsangpa Jonah in Nineveh khuapi panin nisuahna lamah tawlnga hi (Jonah 4). Pasian thupiak bangin Nineveh khuapi kisiat ding tangko khin hi. A nasepnate ngaihsunsun hi. Nineveh ah a pai noplohna, Pasian sawl a manlohna, Pasian in a sawl teitei-na, ngapi gil sungah ni thum sung a omna, tuipi gei pan Nineveh zuanin a paina cihte a mitkha ah suak deudeu hi. Hih thupiangte in bang ngimna nei hiam? Pasian in a hehpihhuai lo Nineveh khua mite tungah a hehpihna lak nuam hi. Mite kisik uh hi. Ahi zongin ka tungah Pasian in a kamciam pel hi. Pasian in ka mai hong zumsak hi, ci-in ngaihsun hi. Pasian theilo mihing 120,000 khempeuh kisia ding a lamen Jonah in Pasian’ teel mite maipha pia-in, Nineveh mite kisikna hangin Jonah’ thangpaihna langdo ahihlam Pasian in Jonah theisak nuam hi.

Luke 19: 38 – 42 sim in. Bang thu piang hiam? Zeisu in Jerusalem bangci muh hiam?

____________________________________________________________________

__________________________________________________________________

Jonah khit kum 800 bangteh Jesuh in la-no tuangin Jerusalem khuakim khuapam mual tung teng khempeuh en kawikawi-in khuapi sung hong lut hi. “Pasian min tawh hong pai Mipa in phatna ngahta hen. A sangbelna ah nopna, vangliatna om ta hen” ci-in otna aw khempeuh in mualthawn hi (Luke 19: 38). Tua bangin mipi otna awging tawh Jerusalem khua hong lut ding hita, Jesuh khawlvatin a kahkawmin, “Nopsak tawntung theih nading bang kisam hiam, ci-in thei lecin ut mahmah ing. Ahi zongin na theithei kei hi” ci-in pulaak hi (Luke 19: 42).

Jonah in Pasian sawl mangnuam lo hi; Nineveh khua mite hoih nading thudon lo hi. Jesuh ahih leh Jerusalem khua mite aa dingin lunggim mahmah hi. Kisiatna tawh a kipelh nadingun a nunna a pia ding Pa hi, cih thei le-uh ut mahmah hi. Amau suahtak nading lampi khuansak khin hi. Khuapi nih: Nineveh le Jerusalem; thupuak mi nih: Jesuh le Jonah. Amaute geel kilamdanna gen kul kenteh! Mite nopsak nading, hoih nadingin Jesuh in amah le amah hong kipiakhia hi. Pasian hehpihna in i sungah Jesuh lungsim hong neithei-sak hi.

Koi bangin hotkhiatna thudon lo mite hehpih lo-in amaute nusia kha zel thei i hiam?

MONDAY AUGUST 8

“AHI ZONG” CIH THU SIKSAN

Miphak khat in damna ngah dingin Zeisu kiang zuan hi. Mite muhna ah hih miphak in khua sungah om ding kilawm lo hi, ci uh hi. A siangtho Zeisu in miphakpa lawngin a natna damsak hi (Matt. 8: 1-4). Zeisu in thusit a thuak laitakin Peter in a Topa thum vei nial hi (John 18). Sihna pan a thawh khitteh Zeisu in Peter kiangah Ama nasem dingin sawl hi (John 21). Korin pawlpi in Paul thuneihna le a thuhilhte nial uh hi mah taleh Paul in amaute kiangah nasem veve hi (2Kor. 12: 14, 15).

Bang bangin migina lo hi mahta lehang Zeisu in mihing hoihna ding bekin nasem a, ama nunzia kilangsak dingin eite mah hong teel hi. Mi tulza tampi in siatna lam manawh uh hi. Mawhna in amaute hencip hi; Pasian phawk lo uh hi. Pasian in amaute a itna amaute in theikha lo uh hi. Amau dinmun ah a om hi lecin nang aa dingin bang hong sepsak le uh na deih hiam? A mangthang mite aa dingin na nungta thei hi. Eite nunzia ding Khrih in hong hilh hi: Note tungah a hong kibawl ding na deih uh mah bangin midang tungah na bawl un. (Matt. 7: 12) Hih thupiak in i nunzia ding hong hilh hi. I sepna khempeuh hih thupiak tawh siksan ding kisam hi. Ei aa ding sangin mi aa ding i masak zawk ding hong hilh hi. Ellen G. White, The Desire of Ages, 640.

Matt. 5: 43 – 47; Lk. 6: 27, 35; 23: 34 sim in. Zeisu in nawlkhiin thuak mite tungah i lungsim puak zia ding bang hong hilh hiam?

____________________________________________________________________

___________________________________________________________________

Zeisu in ei hong mudahte, hong langpante, hong do den mite tungah itna lak ding hong sawl hi. Tua bang lungsim in Pasian zia le tong tawh kituak hi. “ Na galte uh itin amaute tungah thupha bawl unla, lohkik ding lamen loin leitawi pia un. Tua hi leh na thaman uh lian ding a, a Lianpen Pasian’ tate na hi ding uh hi. Bang hang hiam cihleh lungdamna mel a theithei lo mite le a huaiham mite tungah amah migi hi” (Luke 6: 35).

Koi bangin Pasian in migilote le a lungdamthei lo mite hehpih hi. Bang hangin migilote duaipai hiam? cih thu koi bangin na tel hiam? Koi bangin Roman 2:4 na tel hiam?

TUESDAY AUGUST 9
                  ITNA GUALLEL NGEI KEI

A lian penpen thukham in Pasian itna le vengte itna hi (Luke 10: 27, 28). Veng i cih kua hi ding hiam cih zong hong hilh hi (Luke 10: 29 – 37). Zeisu a suah tung a kipan a sih dong, a nuntakna khempeuh in Pasian itna, Pasian mahmah in itna ahihzia kilangsak hi (1Jn. 4: 16). Tua ahih manin eite in Pasian zia le tong i neih a leh, mite in Pasian a muh theih nadingun i huh a leh, Pasian in kua hi cih pulaak banah mite zong a it thei ding i hi hi. Zeisu a sang nuam lo mite, Khristian biakna a nial mite siksan kampaute ngaihsun in. Khristian kici napi gitlohna tawh kidimin, Zeisu min paulapin siatna namcim a bawl thu-um mi kimkhatte hangin i biakna mindai hi. Daniel in zong tua bang lauhuai thute hong hilhkhol hi (Dan. 7: 24, 25; Romans 2: 24). Nidang lai a kipan tuhun dongin mi tampi in Khristian biakna langpan uh hi. Tua hi-in i nunzia mahmah in Khrih kilangsak zia le tong a hih kul semsem hi. Zeisu in eite a hong it bangin itna i leh, tua itna sangin a lian zaw itna om lo hi.

1Kor. 13 sim in. Paul in itna thu bang pulaak hiam? Bangte itna kici lo hiam? Itna in bang sem hiam? Itna in bang nate sem lo hiam? Koi bangin i nuntakna ah itna kimu thei ding hiam? Koi bangin mite in na sungah itna mu thei uh hiam? Tua itna nei dingin na kipuahphat ding a om hiam?

4 9

WEDNESDAY    AUGUST 10          
A NIHVEI  LAWNNA


Mark 8: 22 – 25 sim in. Khrih in a khatvei lawnna tawh mittawpa in khuamu thei pah lo hi, cih thu in bang hong hilh hiam?

_________________________________________________________________________

Jesuh in mittaw pa mit a lawnsak khit ciangin, “ Bang na mu hiam” ci-in dong hi ( Mark 8: 23). Bang hangin Zeisu in cil zang hi ding hiam? Tua hun lai siavuante in cil pen zatui bangin zang uh hi. Hih thu ma-in Decapolis ah Zeisu in bengngawng khat le a pau thei lo mi khat damsak hi (Mark 7: 31 – 37). Ahi zongin damsakna dangte le hih mittawpa a damsakzia kibang lo hi. Damsakna dangte ahih leh khat vei thupiak tawh dampah uh a, mittawpa ahih leh dawlnih kimu thei hi.

Mark 8: 23, 24 sim in. Zeisu in bang na mu hiam, ci-in mittawpa a dotteh mittawpa’ dawnna bang na ci muh hiam?
___________________________________________________________________________

“Singkung bangin mite lampai ka mu hi” (Mark 8: 24) Mittawpa in khua a muhteh mihing le singkung kilamdanna pen lampai-na tawh khentel hi. Upna thu tawh kisai bang hong hilh hiam? Zeisu in vantung thute muhtheihna a hong piakkhit nungah kikhelna taktak i nei zo nei kei hi. Mihing mihing bangin mu lo-in na bangin a ngaihsun mi tampi om hi. Amau kitangsap taktak va muhkha nai lo cihna hi. Mihing pen mihing bangin mu lo-in na bangin a ngaihsunte in pawlpi sungah mimal tam ding bek deih uh hi. Mimal tam peuh leh lungkim uh hi. Tua bangin aituam minphatna ding bekin a kisep manin pawl sung hong lut mite in pawl sungah kip zo lo uh hi.

Mark 8: 25 sim kik in. Bang hangin Zeisu in mittawpa a damsak nadingin nih vei lawng kul hi ding hiam?
____________________________________________________________________

Jesuh in mittawpa a damsak ma-in a dang mittaw khat damsak hi. Zeisu in a nungzuite kiangah Farisi mite le siahdongte silngo na pelh un, ci-in a gen takteh nungzuite in lamdangsa-in Zeisu pulaak nop thu theithei lo uh hi (Mark 8: 15). Nungzuite in, ‘nek ding moh bei khin hi,’ ci-in nungzuite in ngaihsun uh hi. Zeisu in mit nei napi khuamu lo, ci-in a thumuh theihlohna uh hilh hi (Mark 8: 18). Pawl pua om mite bekin Zeisu kiang pan hong pai khuamuhna kisam hi lo hi. Pawl sung a om khin mite in zong tua bang khuamuhna kisam hi. Khuamu thei lote in pawl sunga om mite mihing bangin mu thei lo-in , a nungtolh mite thudon lo uh hi. Tua bangin mi awlmawh lote Zeisu’ lawnna khat vei kisam uh hi. Tua hileh Zeisu in a hong it mah bangin amaute in midangte zong it thei ding uh hi.

THURSDAY AUGUST 11

MIDANGTE BULPHUH PAWLPI

“Huaihamna lungsim le kisialh nopna lungsim tawh bangmah gamta kei un. Kiniamkhiat ciat unla, midangte thupi ngaihsut zaw un. Note’ phattuam nading bek ngaihsun kei unla, midangte’ phattuam nading ngaihsutsak zaw un. Note in Jesuh Khrih lungsim puakzia na nei un” (Phil. 2: 3-5). Hih thu i nunzia in pulaak hiam? Koi bangin hih thu in pawl sung hi taleh pawl pua hi taleh huzaap hiam?

Khrih in mihingin a hong nuntaklai-in Ama aa dingin nungta lo hi. Midangte hoih nading bekin nungta-in nasem hi. Mi huhna-in a hun zang hi. A si khin numei no kiang a pai laitak lampi ah Jairus in huhna na ngen hi. Tua bang kawmkal lak mahah kum 12 tawntung siluang natna nei numei khat in Zeisu buaisak leuleu hi ( Mark 5: 21 – 43).

Pawlpi in leitung aa dingin Jesuh’ khut le khe ahi hi.Jesuh in na dangdangte sangin mite mah hong it zaw hi. Tua mah bangin pawlpi in zong Jesuh deih bangin a nungtak ding kisam hi. Pawlpi in a sep ding nei hi. Mi it ding sangin na dangdangte thupi-sak zaw lo ding kisam hi. Bang mah in Pasian’ hong itna kheng kei hen. Pawlpi kim khatte ah tuiphum ding masak penpen uh hi. Tuiphum pen hoih hi. Matt. 28: 19 . Ahi zongin bang ngimna tawh pawlpi in tuiphum hiam? Mimal minphat nading maw? Pawlpi min hoih nading maw? Pastor in minphat ngah nading maw? Ahi kei leh na pawlpi in pawlpua mite kiangah tawntung nopna thu a hilh hiam? (John 10: 10). Pawlpua mite aa ding na hoih na sem hiam?

Pawlpi khat in a lungkia mi tamna mun khatah mehbawlna anbuk khat lamhsak uh hi. Pastor pa in,“kuamah tui hong kiphumtuak kei uh, hih i nasep khawl ni,” cih za hi. Pawlpi dang khat in tua mun mahah biakinn khat lam hi. Tua mite zong kipak mahmah uh hi. Pastor in pawlpi mite kikhawm ding mite zawnin , Lai Siangtho sinna, cidamna tawh kisai thusinna cihte neihpih dingin geel hi. Pawlpi mite in biakinn thak ah mi hong kikhawm le-uh biakinn nin inteh, sual a kipan biakinn sung vante kisia ding hi, ci-in kuamah sam nuam lo uh hi. Hih pawlpi le biakinn gei-a kimawlna ding a kilam ( Sabbath Nitak en kik in) inn enkak dih in. Koi zaw in Pasian na sem hiam?

Tuni-a Lai Siangtho simte ngaihsun in. Mi khat tungah na lungsim puakzia bang pulaak hiam? Khrih zia le tong i neih nadingin angsung huaihamna cihte a kipan bangte hemkhia ding na hiam?

FRIDAY      AUGUST 12

SINBEH DING: Ellen G. White, “ Our Example” in The Ministry of Healing, 17 – 28; “ One Thing Thou Lackest” in The Desire of Ages, 518 – 523; “ A Social Life” in My Life Today, 186 – 188, 190 – 192, 194 – 196.

Minam khempeuhte kiangah Topa na sep theih nadingin mi omomna munah i va pai kul hi. Ei kiangah mi hong pai khollo ding uh hi. Biakinn sung pulpit tung pan a thugen a za mite bek tatkhiat mi hi lo uh hi. Khrih in mi lakah kihelin amau hoih nading nasem hi. Nisim amau nasepna munah kihelin, amau mah tawh thu kikumkhawmin anne tuidawn khawm hi.” Ellen G. White, My Life Today, 186.
Tuhunin zong mi tampi in amau aa ding bekin nungta uh hi. Ahi zongin Khrih in mimal khat ciat dinmun ah hong om mah bangin Ama nungzui eite in zong mite omna munmunah va paak ding kisam hi. A taktakin tua bangin i om ding a hamsa lua hi lo hi. Mi tampi in nang le kei huhna kisam uh hi. Lunggimna thuak, na thapiak ding a ngak mi tampi om hi. Pawlpi in tua bang mite huhin Topa sungah a panpih ding kisam hi. James hong hilh mah bangin “ upna ka nei ci napi a upna a kimuh kei leh tua upna in a mawknapi ahi hi.” SDA thu-um mi nuntakpih ding annek tuidawn, nikteen puansilh hi ta kei leh, huhna kisam mite a huh lo mi in thuzui taktak hi lo hi ( James 2: 14 – 17). Mi khat peuh in upna ka nei hi, cikha ding hi. Na vengte na huhna in na upna a pulaak ahi hi.

KIKUP DING DOTNATE:

1.    James 2: 14 – 17 sim in. Koi bangin James in a gen lauhuai thute tawh kipelh ding na hiam?
2.   Lai Siangtho sunga mite aa ding a nungta, angsung hamphatna a zong lo nunzia ngaihsun in. Joppa khua-a Tabitha (Dorca) numei in na hoih tampi sem, mi huh tawntung hi (Sawl. 9: 36). Na omna ah bang na hoih na sem hiam?

3.   Mi pahtawi, minphat ngah dingin na hoih sem ding hamsa lo hi. Ahi zongin kuamah in hong theihkhak loh ding, hong muh khak loh ding na hoih kisem nuam takpi diam? Mi khat in Khristian thu-um mi khat kiangah “ Na nuntakna in bang ngimna nei hiam? ci-in dong hi. Tua mipa in “Pia khia ding, ngah kik dingin ngen lo ding” ci-in dawng hi. Khristian nunzia ding tua mah hi lo hiam?


To get the latest update of me and my works

>> <<