MUC

Print Friendly and PDF

Monday, June 20, 2016

LESSON 6 JULY 30 – AUG.4

LESSON 6          JULY 30 – AUG.4

                        ZEISU IN MI TAWH KIKHAWLKHAWM 


TU KAAL SUNG SIM DING: Matt. 1: 22, 23; 9: 10- 13; John 1: 14; Luke 15: 3 – 24; Late 51: 17; 1Jn. 2: 16; Phil. 2: 13 – 15.

KAMNGAH: “ Khatvei, Jesuh’ thugen a ngai dingin siahdongte le mawhneite tampi tak a hong pai uh hi. Farisi mite le Thukham hilh siate phun uh a, “ Hih mipa, mawhneite tawh

kikhawlin an nangawn nekhawm hi,” a ci uh hi” ( Luke 15: 1, 2). Deacon khat in khangno khat kikhoppih dingin puteek


piteekte omna inn khat ah paipih den hi. Khangno khat in amaute na muakin, kikhopman ma dong puteek khat in deacon khut khah lo-in len tinten hi. Kikhawm den uh a, ni khat niteh khangno hon khat kikhawm dingin hong pai uh a, puteekpa mu nawn lo uh hi. Koi ah om hi ding hiam ci-in a va zon uh leh a omna inn sungah khuaphawk lo-in na om hi. Deacon pa in puteekpa khut lenin ‘ Topa aw, nuntak tawntungna sungah a lut thei dingin a nuntakna hong huh in” ci-in thungen hi. Puteek in za hi ding hi ven, deacon pa khut khuahtakin lenin hong hiatthia khia hi. Khitui luangsa-in deacon pa zong pusuak khia-in innpua lamah a pusuah leh numei khat in “a tanu hing. Nong pai ding hong ngakngak hi ung” ci-in hopih hi. Numei in deacon pa kiangah bang gen hiam cihleh “ Ka pa in kha khatin khat veita Zeisu hong hawhin ka khut hong len hi. Khat vei a khut len kik lo-in ka si nuam kei hi,” ci-in gen hi.Khristian biakna in mi khat in nang hong muh ciangin nang hong mu lo-in Zeisu a muh ding hong deih hi.

SUNDAY JULY 31

KHRIH’ SEPZIA BEK


Mi khempeuh in hotkhiatna a ngah nadingun Zeisu nasepzia Ellen G. White in hih bangin pulaak hi: “ Hotkhiat nasepna ah Khrih’ sepzia bek mah gualzo ding hi. Mite hoih nading bek a deih Khrih in mite lakah kihelin nungta hi. Khrih in mite a hehpihna amaute theisak hi. A kisapte uh huh hi. Mite muanna ngah hi. Tua khit ciangin amaute kiangah “ Ka nung hong zui un” ci-in sam hi. Ellen G. White, The Ministry of Healing, 143.


Khrih nasepzia in a nuai-a thute hong hilh hi.

1.  Khrih in mite hoih nading deihin mite lakah kilim hel mahmah hi. Mimal kizopna bawl hi.
2.  Khrih in mi hehpih hi. Mi tawh kizopna kip nei hi.

3.  Mi kisapnate huh hi. Mi tawh kizopna kip a neihna hang hi.

4.  Khrih in mi hehpihin, amaute kisapnate huh ahih manin mite lungsim zo mahmah hi.

5.  Tua khit teh ‘ Ka nung hong zui un,” ci-in sam hi. Mite Ama nungzui suaksak hi.

A tunga thute in a kicing Lungdamna thu hilhzia a hi hi. Kicingtakin tatkhiatna thu i pulaak theih nadingin lam hong lak thute ahi hi. Zeisu in mite kitangsapnate nawlkhin hetlo hi. Amau kisapnate huhin, Ama nungzui dingin sam hi. Khrih sepzia bangin a sem mite lawhcing lo-in om lo ding hi.

Matt. 1: 22, 23; John 1: 14, 15 sim in. Pasian Tapa in mi lakah hong kihelzia koi bangin pulaak hiam?

_____________________________________________________________

_____________________________________________________________

Mawhna hangin gimna, natna i thuak hi. Mawhna hangin na khempeuh kisia khin hi mah taleh Pasian in Zeisu Khrih tungtawnin mawhnei mite tawh kilemna hong bawlsak a, mihingin a hong nungta Zeisu in tatkhiat nasep hong sem hi. Zeisu in mi lakah hong nungta-in mimal khat ciat hoih nading le minam khempeuh hoih nadingin hong nungta hi. A sia penpen zong a hoih dingin hong puahpha hi.

Na khempeuh a Piangsak Zeisu Khrih in mihingin hong suakin, mihing mahin mi lakah hong nungta hi. Koi bangin hih thu in lametna hong guanin, tatkhiatna thu hong

um sak thei hiam?

MONDAY AUGUST 1

MANGIN TU-IN KIMU KIK

Zeisu in mawhneite lakah omin anne tuidawnin om a muh uh ciangin Farisi mite le thukhamhilh siate in mawhsak uh a, Zeisu in tua bangin a mawhsaknate uh thugentenna nam thum zangin dawngkik hi (Luke 15:2)
A nuai-a te sim inla a kimawhsaknate Zeisu dawnzia ciamteh in: Luke 15: 3-7 _________________________________________

Luke 15: 8 – 10 ________________________________________

Luke 15: 11 – 24 ________________________________________

Hih thugentehna khat ciat in a mangthang le a kimu kik manin nuamna pulaak ciat uh hi. Hih thugentehnate Pasian hong itna le eite tankhia dingin a sep khempeuh kilangsak hi.

Pastor khat in Voice of Prophecy (Lai Siangtho sinna) a lunglut mi khat tawh va kimu hi. A inn ah a vahawh leh a innkuanbup phialin Lai Siangtho sinna nei nuam uh hi. A nu, a pa le a naute thum in Khrih Honpa-in um ahih manun a inn uhah pastor vahawhin Lai Siangtho sinpih ding lunggulh uh hi. A u pa khat un ahih leh Khristian biakna langpan mahmah hi. Pastor pa a vahawh sialin Lai Siangtho sinthei lo dingin nawngkai-sak zel hi. Kal (6) sung Lai Siangtho sinpihna a neih khit uhteh tui kiphum dingin pastor pa in pulaak hi. Vai tuamtuam hangin a u nau thum in tui kiphum ding ut nai lo uh hi. Tua leh lamet het lohpi-in a u pen uh inn sungah hong lutsukin tui kiphum ding hong pulaak khia hi.

Lai Siangtho simin tawl khat sung inn sungah hong tu hi. Kal nih khitteh a u pa tui kiphum hi. Kha khat khitteh a innkuanun tui kiphum uh hi. Lai Siangtho hong hilh mah bangin tua bangin mi khat in Khrih Honpa Tanpa-in a san ciangin vantung in nuamna tawh kidim hi.
Jacob tuikhuka Samaritan numei, Rome galkapmangpa, kum khat thaman tawh kikim ding sathau tawh a khe a nulsak numei a kipan Zeisu kiang om dingin amau le amau kilawm a kisa lo nawlkhin thuak mite tungah Zeisu in hih leitungah a hong pai-na thu theisaklo-in a om kei hi.

Mi khat peuh na pawlpi sungah hong lut ding kilawm lo nasak khak a om ngei hiam? Tua bang mi na nawlkhin kha ngei hiam?

TUESDAY AUGUST 2

MAWHNEITE TAWH AN NEKHAWM

Matt. 9: 10- 13 sim in. Amah a langpante tungah koi bangin Khrih in dawng kik hiam? Hosea 6:6 sim in. Zeisu in nawlkhin thuak mite tawh sabuai-ah tukhawmin an nekhawm hi. Na kimlepaam ah kua bangte in nawlkhin thuak uh hiam?

_____________________________________________________

_____________________________________________________________________________________________________________________________________________

Zeisu in nawlkhin thuak mite lakah kihelin a om a muh ciangin Farisi mite in mawhsak uh a, Zeisu in biakpiakna sangin hehpihna deihhuai zaw hi, ci-in amaute dawngkik hi. “ Ganhing tawh biak ding ka deih kei a, migitna ka deihzaw hi. Mite in a zahtak mihoihte a sam dingin a hong pai ka hi kei a, mite in a pampaih mite a sam dingin a hong pai ka hi hi,” a ci hi (Matt. 9: 13). Biakna makaite nunzia dahhuai mahmah hi. Thuciam Lui hun lai-in zong biakpiakna sangin a mipihte tungah a bawlzia uh thupi zaw hi, ci-in Pasian in hilh tawntung hi (Hosea 6:6) Khrih in biakna makaite a thuhilh ciangin kamsangte gen thute mah siksanin thuhilh hi.
Matthew inn sung pawibawlna ah Khrih in a deihloh nunzia tu-in zong mi tampi mah tua bang mahin nungta lai veve uh hi. Vantung Pa kiang pan hong pai thuman thutak zuih ding sangin amau hoihsak thu pasian bangin ngaihsunin zui zaw uh hi. Amau hihna kimuangin, mihing pilna siksanin Pasian mai-ah hehpih huai ahih lamuh kiphawk lo uh hi. Amah le amah dik a kisa mi’ antan thungetna Pasian in kihhuai-sa hi. Ellen G. White, The Desire of Ages, 280.

Ei dinmun khat tawh mite nunzia tungah thu i khen pahpah hi. Kiniamkhiatin Kha Siangtho hong makaih dingin ki-ap kul hi.

Late 51: 17 sim inla, mawhnei cimawh na hihlam na kitheihna in koi bangin tua thute hong telsak hiam?

WEDNESDAY     AUGUST 3
 PIL VANGTAKIN MI TAWH KITHUAH


Thugensia khat in a pawlpi mite kiangah SDA hi lo lawmlegual bang zah na nei uh hiam? ci-in dong hi. A nunglam pan khat dingto-in ‘ khat zong nei keng,’ ci-in kisialhtuak hizen hi. Tua pa in a cihtakpi hi kha thei ding hi. Ahi zongin tua bang mi in a khuavak tangsak lo hi.

Eite in ci bangin a sal dingte i hi hi. Ahi zongin ci a alna beimang thei hi( Matt. 5: 13). Sidon gama sumbawlte in leilakah ci khol thei uh hi. Ci in leitang tawh kisukha ahih manin a alna bei thei hi. A al nawnlo ci kipai-in lampi zepna-in zang uh hi.

Leitung mite tawh kikholhna-ah kidop ding kisam hi. Leitung a ki-uksak na hi hiam? Leitung mite bangin a nungta na hiam? Koi bangin leitung tawh kipawl lo-in nungta thei ding na hiam? Pian. 13: 5 – 13; 19: 12 – 26; Gam. 25: 1-3; 1John 2: 16.

________________________________________________________________________

________________________________________________________________________

Leitung mite in manpha a sak nate in a hong huzaap khak loh ding thupi mahmah hi (1John 2: 16). Upna pan lamphial khak ding patauh huai kei, ci-in ngaihsutna in zuau khemna a hi hi. Lamkhat panin thu-zui mi hi napi-in leitung mite tawh kilamdanna na neih tuan kei leh na thuzuihna in a mawkna pi suak ding hi.

“Khrih sungah a nungta mite in leitung mite kiang panin a kihepkhiat ding uh hi lo hi. Khrih nungzuite in leitungah om ahih uh hangin leitung mite ahih lohlam uh a kitel ding kisam hi. Amaute in leitung mite bangin nungta lo ding uh hi. Khrih nungzuite in leitung mite lakah a kihel uh hangin, amaute in Khrih nungzui a suah nading uh deihna ahi hi.” Ellen G. White, 3SM., 231.


SDA hi lo lawm le gual bang zah na nei hiam? Amau tawh na kizopzia koi bang hiam? Amau hong huzaap hiam, ahih kei leh nang amau na huzaap zaw hiam?

THURSDAY AUGUST 4

LUNGSIMSIA MITE LAKAH


Leitung in Khrih kiang pan i ngah thupha khempeuh a ngah ding uh kisam hi. Khrih kiang pan i ngah thuphate hang bekin eite in mi manpha i hi thei bek hi. I ngah thuphate tawh mite kiangah Ama hong hotkhiatna thu a hilh dingin sawlna ngah i hi hi. Hotkhiatna thu thei i hih manin tua thu a thei nailo mite tungah a theisak dingin Pasian in hotkhiatna thu hong theisak hi. “ A khawnkhongin na ngah mah bangun man ngen lo-in a khawnkhongin na pia un” (Matt. 10:8).

Phil. 2: 13 – 14 sim in. Bang kigelh hiam? Siatna pelin ,thu-um lote lakah kihelin koi bangin tatkhiatna thu amaute theisak ding na hiam?

______________________________________________________________________

______________________________________________________________________

Thu-um lote lakah kihelin tatkhiatna thu i pulaak ciangin amau nunzia zuihpih loh ding kisam hi. Ama dinmun tawh lungkim lelin tatkhiatna a thei nailote lakah kihel nuam lo-in, eima ut thu tawh om nuam kisa kha thei hi. Hih bangin a nungta mi in amah le amah kimuanna tawh a nungta mi a hi hi. Tua bang mahin pawlpi in pawlpua nasep ding sangin pawl sung vai tuamtuamte thupi ngaihsut zaw kha zel hi lo hiam?

Robert Linthicum in a gelh laibu Empowering the Poor sungah pawlpi omzia nam thumin pulaak hi. (1) Khuapi sunga om pawlpi: hih pawlpi in khua sung tawh kizopna bang mah nei lo hi. Pawl sung nasep, pawlpi mite kitangsap huh ding bek thupi ngaihsut hi. (2) Khuapi ah nasem pawlpi. Pawl pua ah nakpi takin nasem hi. Pawlpi in hoih a sak, kisam a sak bangin nasem hi. Pawlpi in a nasep khua sung mite theisak lo, bang kisam uh cihte kanlo-in nasem hi. ( 3). Khua sung mite tawh nasemkhawm pawlpi: khua sung mite omzia, amau kitangsap kantel masa photin, a kisam bangin pawlpi in nasem hi. Khua sung in bang kisam cih pawlpi makaite in khua sung upa hausa-te dong masa phot uh a, amaute tawh nasem khawm hi. Khua sung’ kitangsap bangin pawlpi in nasem ahih manin khua sung mite in pawlpi nasep manpha-sa, pawlpi nasepzia muang uh hi. Khua sung kitangsapna bangbangin pawlpi in nasem ahih manin pawlpi nasep in lawhcing thei hi.

Pawlpi kitangsapte khua sung makaite in huh thei pah uh a, khua sung kisapnate zong pawlpi in panpah thei hi. Tua bangin khat le khat kihuhin nasemkhawm uh hi.

FRIDAY AUGUST 5
SINBEH DING: Ellen G. White, “ Our Example” in The Ministry of Healing, 17 – 28; “ Levi-Matthew” in The Desire of Ages, 272- 280. Pawlpi in tatkhiatna tawh kisai nasem dingin a kipiangsak ahi hi. Mite nasem dingin pawlpi om hi. Pawlpi khat in midangte biakinn mai khat-ah hih bangin laisuan nei uh hi: “SILA MI’ LUTNA.” Pawlpi nasep pulaak hi lo hiam? Mite sila dingin pawlpi a om hi zaw hi. A mangthangte lakah nasem kei lehang bangci bangin amaute in tatkhiatna thu theithei ding hiam? Zeisu pen mite lakah tualbual mahmah hi. Pasian in tuhun pawlpi zong tua bang dingin hong deih hi. Pawlpi mite in mite aa dingin ci bangin al ding a hi hi.

Pawlpi in gam sung gamsate kiangah thuhilh dingin a kisamkhia ahi kei hi. Nawlkhin thuak mite, it huai lo mite, mawhnei mite lakah nasem dingin Pasian’ sapkhiat ahi hi. Zeisu in mawhneite lawmin om hi. Amau tawh anne tuidawnkhawm hi. Zeisu in amau omna munmunah vapai hi. Ahi zongin Zeisu in amaute nunbangin nungta lo hi. Zeisu kiangah om nuamsa penpente in mawhnei mite hi. Amau le amau midika kingaihsun mite in Zeisu kiang nuamsa thei lo uh hi. Ahi zongin Zeisu in tua bang mite tawh kinawngkaisak lo-in a sep dingte semin mainawt hi. Zeisu in mawhnei mite honkhia dingin hong pai ahi hi. Tua in hih leitungah a hong pai-na bulpi hi-in, midik a kisate hehin thangpaai taleh eite nasep bulpi zong tatkhiat nasem ding mah a hi hi.

“SDA pawlpi in mite lakah nasep ding pen hamsa sa hi. Kum sawtpi sung SDA pawlpi in leitung mite tawh kigamla theithei-in om hi. Ahi zongin tua bangin om theih hun hi nawn lo hi. Mimal hi taleh pawlpi-in hi taleh mite lakah nasep hunta hi.” Russell Burrill, “ How to Grow an Adventist Church, (Fallbrook: Hart Books, 2009), 50.

KIKUP DING DOTNATE:

1.“Mite lakah kihel lo-in tang omna in thuman langpann hi” cih thu ngaihsun in. Hi mah hiam? hi lo hiam? Lai Siangtho siksanin na dawnna ngaihsun in.

2.Mite lakah kihelin nasep ding thupi mahmah hi mah taleh pawl sung nasep zong sep veve ding mangngilh kei in. Koi bangin leitung mite lakah nasemin leitung nunzia bangin nungta lo thei veve ding na hi hiam?

To get the latest update of me and my works

>> <<