MUC

Print Friendly and PDF

Monday, June 20, 2016

LESSON 4 JULY 16 - 22


LESSON 4                  JULY 16 - 22

              THUCIAM LUI SUNGA THUMANNA LE HEHPIHNA: THUSINNA NIHNA



TU KAAL SUNG SIM DING: Pai. 22: 21 – 23; 23: 2-9; Amos 8: 4-7; Isa. 1: 13 – 17; 58: 1- 14; Sawl. 20: 35.


KAMNGAH:“ Hih tui a luanna mun peuhpeuhah ganhing namkim le ngasa tampi om hi. Hih tui in Si Tuipi tui siangsakkikin, a luanna peuhpeuhah nuntakna omsakkik ding

hi.” Ezekiel 47:9.

1950 – 1960 kum sungin nuamsa mahmah napi 1960 – 1970 galphual hong suak mawk hi. Siatna namcin hong tung ahih manin mi tampi tak in inn le lo nusia-in galtai uh hi. Ten nading mun nuam nawn lo hi. 1986 kumteh Christian innkuan khat in a omna mun nusia-in hih munah hong peem uh hi. Mundang pan pastor khat zong hong peem hi. Inn kisia khat a amau om nadingin hong puah uh hi. Hih innkuan nihte inn khat khit inn khat ah hawh uh hi. Pasian in hih innkuan nihte zang ahih manin khua sungah kikhelna lianpi hong om hi. Hih innkuan nihte nasepna hangin mi tampi’ nuntakna hong kikhel uh hi. Tua bang mahin lamet bei a pawlpi aa dingin Pasian in a hong hilh nop thu om hi.

Tu kaal sungin Pasian in Ama kamsangte tungtawnin a pulaak Ama zia le tong thu i sin ding hi.

SUNDAYJULY 17          
KHRIH SUNG AH NUNGTA

Pasian’ hehpihna in mawhna sungah a si mite hong puahpha hi. Ezekiel 37 sungah mawhna thu kician takin kigelh hi. Ezekiel in a mangmuh sungah Kha Siangtho in Ezekiel misi guh kithehthangna lakah paipih kawikawi hi. Hih guhte in Israel khempeuh limcing hi. Pasian in, “Mihing tapa aw, hih guhte a hing kik thei diam? ci-in Ezekiel thudong hi (Ezek. 37: 3). Hih guhte tungah kigen thute bang mahin hong tangtung hi.

Ezekiel 37: 1- 14 sim in. Pasian in a mite aa dingin bang sem dingin khensat hiam?
_______________________________________________________________________

_______________________________________________________________________

Thu kipiakna tungtawnin tua guhte hong nuntak kik uh a, galkap honpi hong suak uh hi ( Ezek. 37: 10). Nihna ah, Pasian in a mite amau gam mahah puak kik ding hi (Ezek. 10: 14). Thumna, tua bangin a makaih Topa hi, cih mite in phawk thei ding uh hi. Ahi zongin kipuahphat bek tawh kicing lo hi. Pasian’ mite in Ama nasem dingin kipuahphat kul hi; masuan khat neih kul hi. Israel pen nam dangte aa dingin khuavak ahih kul hi.

Ephesian 2:10 sim in. Bang hangin Khrih sungah thaksuakkikin, hong nungtakiksak hiam?

______________________________________________________________________

______________________________________________________________________

A Tapa hangin Pa Pasian in eite hong sang kik hi. Mawhmaisakna panin gamtat hoih hong gah khia thei hi. Eite kisialh ding om lo hi. Mihing gamtat hoihna in hong honkhia zo ding hi leh Khrih kisam lo ding hi. Khrih in a hong tatkhiat manin Pasian in tatkhiatna a khawnkhonga a hong piak ahi hi. Khrih sungah upna nei khempeuh in mawhmaisak lungnopna ngah hi. Tua pen gamtatna in hong pia thei lo hi.

“ Tua ahih leh gamtat hoih in mannei lo hiam? Nisimin mawhna sungah nungta den mi khat le Khrih sungah omin a upna tawh a nungta mi pen Pasian’ muhna ah kibang ding hiam?”Eite a hong bawlpa pen Pasian hi a, Jesuh Khrih tawh i kipawl ciangin i nuntakna-ah gamtat hoih a nei dingin a hong bawl ihi hi. Hih pen eite’ omzia dingin a na ngaihsut kholhsa ahi hi.” Eph. 2: 10.


“Pasian in Ama hehpihna tungtawnin i gamtatna bangbang thaman hong pia dingin a na geelkholhsa ahi hi. Khrih’ dikna hang bekin Pasian’mi dingin a hong kisang ahi hi. Lungsim hoih, gamtatpha in upna panin a hong gahkhia ahi hi.” Ellen G. White, 3SM., 199, 200.

MONDAY JULY 18

A LUANG GUNTUI

Ezekiel 47: 1- 8 sim in. Ezekiel in a mangmuh biakinn a thupiang bang pulaak hiam?

_________________________________________________________________

_________________________________________________________________

Biakinn pan tui luankhiatna khat om hi. Hih mangmuhna sunga biakbuk pan tuiluangkhia cih pen a thuhoih hi bilbel hi. Tua tuiluangin nisuahna lam manawhin luangkhia hi. Jerusalem nisuahna lamah Ci Tuipi (Dead Sea, SI Tuipi) om hi. A omna mun pen tuipimaitang sangin niamsuk zaw hi. Jerusalem le Tuipi Si pen tai 21 bang kigamla-in sehnel gam Arabah om hi. Tua Tuipi sungah bang mah nungta zo lo hi. Bang hang hiam cihleh a tui al lua hi. Ahi zongin tua mangmuhna sungah tua tui pen Jerusalem biakinnpi sungah a luankhiat teh natna tuamtuam damsak hi. Hih pen Pasian’ pawlpi limcing hi. Pawlpi in mawhna sunga a si mite hingkiksak, damkiksak hi (1Pet. 2: 4, 5).

Matt. 5: 16 sim in. Leitung mite in Khrih Jesuh a muh nadingun koi bangin Amah kilangsak theihzia ding bang hong hilh hiam?
____________________________________________________________________

___________________________________________________________________

Zambia gam sunga Zambeizi gunpi kipatkhiatna a naak pen singkungnuai khat hi. Hih gun in Victoria Zeu ah luangsukin khuk tan, kawng tan tua panin a thuk mahmah gunpi suak hi. Tua mah bangin biakinnpi sung paa kipatna a neu mahmah hangin tua tuiluang pen a mannei gun tuipi hong suak hi (Ezekiel 47: 5).
Na pawlpi in gina lo, cihtak hi mah taleh kim le paam aa dingin thupha lianpi hi thei hi. I pawlpi’ nasep kipatcilin cihtham lo hi mah taleh tu-in na lianpi a sem pawlpi hong suak hi. Ellen G. White, 7T., 171.

Khuavak, tui cihte in Pasian’ nasepzia limcing uh hi. Koi bangin tangzai takin huh huai mite huh ding na hiam?

TUESDAY JULY 19

PAWLPI: NUNTAKNA NAAK

“ Hih tui luanna mun peuhpeuhah ganhing namkim le ngasa tampi om hi” (Ezekiel 47: 9).

Ezekiel in a mangmuhna sungah Pasian’ biakinn sung panin a luangkhia gun khat mu hi. Tua in nuntakna hi. Kamsangpa in lamdang a sakzia pulaak hi (Eze. 47: 10). Bang zahin lamdang! Bang mah a nungta thei lo tui sung pan thakhat thu-in ngabengten ngasa tampi man thei uh hi ven! Pasian in mihingte tungtawnin na a hong septeh a si khat pen hong hing kik hi. Pasian in na a sepna munah lamet nei lo mite in lametna tawh kidimin, lungzinna panin lungnopna, mawhna panin mawhmai-na hong om hi. A lamdang Pasian’ hong hehpihna a sang mite aa dingin a lamdang na tampi hong piang hi. Lungdamna Thu i cih in hih thu mah ahi hi. Lungkia lamet bei, a si nuntakna panin pumpi hi taleh nuntakna hi taleh hong damin hing kik hi.

Ezekiel 47: 12 le Mangmuhna 22: 1,2 simkak in. Khrih’ pawlpi tungtawnin Jesuh in a damsak, a nuntakkiksak mite ngah ding thute bang pulaak hiam?

________________________________________________________________________

_______________________________________________________________________

Aituam hamphatna zong lo-in thu-um mite’ nunzia, nasepna tungtawnin nuntakna thu sung a lut mite in ni khat ni ciangin leithak ah nungta tawntung ding uh hi. Tua munah Pasian’ tokhom panin a luangkhia gunpi om ding hi. Tua munah sehnel gam, kawgaw gam, sihna cihte om lo ding hi. Tua munah i nuntakma-in Topa Pasian in a pawlpi, nang le kei in a luangkhia gun bangin mite aa ding thupha dingin hong deih hi. Amah in eite hong tungtawnin thaksuakkikna , bang mah a hin lohna sehnel gam panin na khempeuh a nuntakna Jesuh sungah a nungta dingin hong deih hi (Jn. 10: 10). Hih in Adventist thu-umte’ tangko thu ahi hi.

Kamsang Amos in zong Ezekiel mah bangin nunna thu pulaak hi. Amos 5: 24 sim in. Koi bangin kim le paam aa dingin na dinmun le na pawlpi dinmun pulaak hiam? Koi bangin na pawlpi in damna gunpi bang hi thei hiam?

WEDNESDAY      JULY 20
 JUBILEE KAMCIAMTE

Sum le paai haute hi taleh upna kip neite in a nei lote huh ding cih pen Thu Ciamlui in limgen mahmah hi.

Isaiah 61: 1 – 11; Lk. 4: 18 sim in. Pasian in bang thu gen hiam? Koi bangin tua thute nuntakpih ding na hiam?

_____________________________________________________________________

______________________________________________________________________

Isaiah in a genna-ah Topa’ Sathaunilh Mipa in a zawng mite tungah lungdamna thu puak ding, lungsim kitamzan mite a damsak ding, salin kimante tungah suahtakna thu gen ding, thongkia mite suahtakna lampi a hilh ding le khuamial sung om mite khuavak ah paipih ding hi, ci-in pulaak hi (Isa. 61: 1). Hih kamciamte Topa maipha ngah kum – jubilee kum a cinteh tangtung hi. Jubilee kum a cinsialin cimawhte huh uh hi.Tua hun ciangin Zion a om a dahte kihehnemin a dah mi in nopna ngahin a lungkhamte in nuamna tawh kidim uh hi. Tua bang mite in puahpha-te ahi uh hi (Isa. 61: 3). Jubilee thupha hangin khuapi sung in nopna tawh kidimin, a kisia munte kipuahpha hi (Isa. 61: 4).

Pasian’ sila-te siampi ahih kei leh nasemte ci-in kiciamteh a, kim le paam a om a hau namdangte in amaute huh hi. (Isa. 61: 5, 6).

Isaiah 61 sunga kipulaak Pasian Sathau nilh mipa in Topa piak thuphate tungtawnin mite tungah hotkhiatna thu pulaak hi (Isa. 61: 8, 9). Tua bang mahin tu hunin zong Pasian nasemte in mite kiangah tatkhiatna thu tangko uh hi. Topa dikna, hoihna, tatkhiatna in mihing nunna hong khel hi lo hiam? ( Isa. 61: 10, 11).

Isa. 61:9 sim in. Pasian in a mite tungtawnin na lian pipi sem hi. Bang hangin tu-in zong a lamdangtakin Pasian in na hong sem lai hi lo hiam? Ahih kei leh tua bang om nawn lo hi, na ci hiam?

THURSDAY JULY 21

PAWLPI – KIKHELNA A PIANGSAK

Micah 6 sim in. Topa in bang thute deihlo hiam?

______________________________________________________________________________

_______________________________________________________________________________

Kamsang dangte mah bangin Micah in zong lungsim sangin a kimu thei gamtatna manpha zaw hi, ci-in hilh hi. Hehpihna, itna, niamkhiatna kihel lo biakpiakna pen Pasian mai-ah santhamcing lo hi.

Micah 6:8 in bang thu laigil pulaak hiam?

_______________________________________________________________________

_______________________________________________________________________

Biakpiakna man pen nuntakpih ding ahi hi. Pasian i biakna sungah piakkhiatna tuamtuam kihel hi. Biakna thu i gen ciangin nek ding le nek loh ding an tuamtuamte hi masa lo-in annek ding neilote a nek ding uh i va piakna thupi masa zaw hi. Thuman thutak nuntakpihna in siatna hangin Pasian thukhenna tawh hong kipelhsak ding hi (Matt. 25: 34 - 46). Ellen G. White, The SDA Bible Commentary, vol. 4, p. 306.

Micah 6:8 sunga thute kihel lo biakna Pasian in tu ni dongin deih lo hi. Biakna i cih in mungtup, ngimna khat nei hi-in, biakna in a mong hi lo hi. Biakinn in Khrih hong theitelsak hi. Biakna in i nuntakna ah Khrih hong kilangsak ding hi. Innkuan nih in lamet bei mite kiangah Pasian nasemin om uh hi. Tua innkuan nihte in lawm le gual kaikhawmin kimlepaam mite in khanlawhna a neih nadingun lungsim takpi tawh thungen uh hi. Khantohna tawh kisai nasem mi kim khat tawh kipawl khawmin kimlepaam innte puahsak uh hi. Tua bangin a sepna panun khua sung hong khangto hi. Kimlepaam tungah Khrih’ itna a kilatsak manun khuapih tuipihte in khanlawhna nei uh hi.


Micah 6: 6, 8 sungah Topa in a mite tungah a gen thute mi khempeuh tungah a gen hi-in, kei tungah a hong gen hi, ci-in kingaihsun in. Pasian in mimal khat ciat hong hopih hi. Koi bangin na nunzia in thuhoih pulaak hiam?

FRIDAY JULY 22

SINBEH DING: Jer. 22: 1- 16; Ezek. 16: 49; Zech. 37: 9, 10. Ellen G. White, The SDA Bible Commentary, Vol. 4., 1165, 1166; 6T., 227, 228. “Mipa aw, amah in a hoih hong lak zo hi. Tua hi-a Topa in nang tungah bang hong kal ahi hiam? Thutangin gamta inla, lainatna it-in, kiniamkhiatin na Pasian tawh kalsuan khawm in” (Micah 6: 8). Hih sangin Topa in a mite tung pan a hong kalh thu om nawn diam? Amah in thu hoih hong lak khin hi. “ Hoih” cih kammal in na khempeuh kipiansakcilna, mawhna omna leitung a omzia pulaak kammal hi. Tua hi-in Khrih hong pai kik ciangin eite aa dingin Pasian in a bawl nate i ngah taktak ding hi.

Topa in eite sung panin bang hong kal hiam? Khatna ah, thuman thutak tawh gamtang dingin hong kal hi. Koi bangin thuman lopi-in gimthuak mite na huh diam? Nihna ah Topa in hehpihna it dingin kal hi. Khat veivei teh leitungah khat le khat kihehpihna om lo tawh kibangin i nungta hi. Mite hehpihin, mite it hi lehang tua in vanglian mahmah hi. Thumna Topa mai-ah kiniamkhiat dingin hong kal hi. Micah 6: 4 sunga thute in Egyt gam panin suahtakna ngahna hangin kiniamkhiat ding, upna nei ding ahih leh Zeisu sisan tawh a hong kitankhia eite in bang zahin kiniamkhiatin, itna i neih ding kisam zaw kanlai hiam? Eite a hong kitatna dingin a kipia khia nunna le Singlamteh hangin Pasian mai-ah hong kiniamkhiatsak hi.

KIKUP DING DOTNATE:

1.               Cimawh mite huh ding tavuan i neihzia Thuciam Lui bang munte in hong hilh hiam? Amos 5: 21- 24 sunga thute in Pasian mahmah in a bawl biakpiakna tuamtuamte sangin mi tawh kizopdan manpha zaw ahihzia hong hilh hi lo hiam? Biakpiakna maw ahih kei leh thuman, itna, hehpihna, kiniamkhiatna cihte i masak zawk ding hong hilh hi lo hiam?

2.               Mi khat i huh ciangin vantung thute sangin leitung nate tawh mite i huh ding masak zawk pen lauhuai ahih manin koi bangin vantung thute masak zawk ding na hiam? Pasian thu zong hilhin amau kisapte zong huh ding hi lo hiam? 

To get the latest update of me and my works

>> <<