MUC

Print Friendly and PDF

Monday, June 20, 2016

LESSON 3 | JULY 9 – 15

LESSON 3          JULY 9 – 15
   THU CIAMLUI SUNGA THUMANNA LE HEHPIHNA: THUSINA MASA




TU KAAL SUNG SIM DING: Pai. 22: 21 – 23; 23: 2-9; Amos 8: 4-7; Isa. 1: 13 – 17; 58: 1- 14; Sawl. 20: 35.

KAMNGAH: “ A kinengniam mite a’dingin thumanna semkhia a, gilkialte an a vak hi. Topa in thongkiate a khahkhia hi. Topa in mittawte khua a musak hi. Topa in niamsakna a thuak mite sangtosak a, Topa in thuman mite a it hi. Topa in peemtate kem a, meigong numeite le pa nei lote a huh hi.

Ahih hangin amah in migilote’ vaihawmna a suksiatsak hi.” Late 146: 7 -9. Hun khat lai-in New York ah phalbi khuadam mahmah laitakin kum

10 a pha tangval no khat in khedap kizuakna sai sung mu nuam mahmahin kongkhak kawm panin en kieukuau hi. Tua bangin a om laitakin nupi khat hong pai-in naupang hong hopih hi. "Bang hangin sai sung en na hiam" ci-in a dot leh, naupang in khedap khat ka ngah nadingin Pasian kiang a ngen hing, ci-in dawng kik hi. Nupi nu in zong naupang a khut pan kai-in sai-pi sungah lutpih hi. Nupi nu in vanzuakte kiangah khedap le mawza kop guk le kuang sungah tui a hong paipih dingun vaikhak hi. Tua leh nasemte in zong tua bang mahin hong paipih uh hi. Nupi in naupang khe silsakin, dial tawh a nulsak khitteh khedap bulhsak hi. Naupang zong nuam lua mahmah hi. Nupi nu kiangah bang ci hiam cihleh, “Nang, Pasian’ zi na hiam? ci-in dong hi.


Naupang in a theih thu sang thuthuk zaw pulaak hi. Pasian’ pawlpi in Ama zi hi. Pawlpi in a pasal, Pa Pasian, a ngakin om hi. A pasal om zia Late 146: 7-9 ah kimu thei hi. A kikhel mite in Pasian’ gamtat pulaak ding uh hi. Pasian’ ta taktak i hih leh cimawh, genthei, dongtuakte hehpih lo, huh lo-in i om kei ding hi.

SUNDAY JULY 10

HEHPIHNA LE THUMANNA:  PASIAN’ MITE KICIAPTEHNA

A kipatcil a kipan thumanna cih pen Pasian thukhamte le a mite omzia dinga Pasian in a geelkholhsa ahi hi. I nunzia dinga hong kikoihsaksa a hi hi. I khantoh nading, picing nunzia ding, le nopna tawh kidim nadingin a kisam thu ahi hi.

Koi bangin a nuai-a thute in khat le khat i kizopna ah thuman le hehpihna kisapzia pulaak hiam? Pai. 22: 21 – 23; 23: 2 -9; Siam. 19: 10; Pau. 14: 31; 29: 7.

______________________________________________________________________

______________________________________________________________________

Israel mite in hehpihna le thumanna a tel nadingun sabbath pawi tuamtuamte tungtawnin Pasian in na hilh hi. Pasian in sabbath pawi na pulaak hi. Koi bangin tua Sabbath le sabbath tuamtuamte in hehpihna le thumanna pulaak uh hiam? Pai. 20: 8 – 10; 23:10; Siam. 25: 8 – 55

__________________________________________________________________________

__________________________________________________________________________

1.    Piansak ni sagih ni, Sabbath ni-in mihing banah nasem (sila), ganhingte le khualzin mite zong tawlnga ding uh hi.

2.     Kum (7) sialin sabbath kum hi ding a, mizawng, sila cihite hehpihna hangin, tua kumin leibate kimangsak ding a, sila kisuakta-sak ding hi.

3.    Kum 50 cin sialin jubilee kum hi ding hi. Jubilee kumin leitangte a neite tungah kipia ding a, leiba khempeuh kimai-sak ding hi. Jubilee kum in mi khempeuh, a hau a zawng cih deidanna beisak uh hi. Nunzia thak tawh nuntak kipat kumin kiciamteh hi. A hau, a zawng om lo ding hi. Ellen G. White, The Ministry of Healing, 185

Hebrew mite in cimawh, genthei-te tungah thuman thutakin, hehpih uh hi.

MONDAY JULY 11

LEITUNG MUN KHEMPEUH TUNGAH

Pian. 2: 1- 3 sim in. Sabbath in mun le mual khenlo-in mi khempeuh tungah hong kipiak ahihzia bang pulaak hiam?

___________________________________________________________________

___________________________________________________________________

Sabbath ni-in a tawlnga takpi mite in nasepna pan tawlngakna, tatkhiatna le leithak thute banah Pasian in na khempeuh a Piangsak Pa, kitangsapna khempeuh hong pia Pa hi, ci-in pulaak hi (Pai. 23: 12; Thkna. 5: 12 – 15; Isa. 66: 22, 23). Pa Pasian in mi khempeuhte Pa hi, cih thu Sabbath in zong hong hilh hi. Sabbath in mi khempeuh, a hau a zawng, i kibatna pulaak hi.

Piansak ni sagih Sabbath a kipan kum sagihna sabbath le jubilee kum cihte in in mihingte khat le khat kizopna ah kisam thumanna pulak hi ( Siam. 23 – 25). Piansak ni sagih Sabbath in na khempeuh kipatcilna nungkawkin, Khrih hong sihna le leithak thute zong hong hilh hi. Khrih in hehpihna tawh kidim Piangsak Pa le Honpa ahih mah bangin Sabbath in Khrih tawh i kizopna banah midangte a hehpih thei ding le huh theihna hong guan hi. Jubilee kum le kum sagih sabbathte in a kip tawntung thuman pulaak uh hi mah taleh tua pawi sabbathte tu-in zat ding kisam nawn lo hi. Piansak ni sagih Sabbath in ahih leh mawhna omma-a om kipiangsak khin hi-in, pawi sabbath tuamtuamte ahih leh Khrih’ nunna le sihna pulaak hi bek hi. Pawi sabbathte in cimawh genthei mite tawh i kizopzia ding thuguipi hong hilh uh hi.

A kitankhia minam ahih mah bangun Israel mite in leitung khuavak ding, deidan neilo Pasian’hehpihna mite tungah a hawm dingin kisawl hi. Pasian’ zia le tong a thei nai lo mite tungah Pasian’ zia le tong kilangsak ding uh kisam hi.


Amos 8: 4 – 7 sim in. Bang thupiang hiam? Koi bangin eite zong tua bang mawhna tawh kipelh ding i hiam? Koi bangin “Amaute ka mangngilh ngei kei ding hi,” cih thu in man nei hiam?

TUESDAY JULY 12

GENKHOLHNA: Khen Khatna.

Thu a gen thei lo mite a’dingin thu gensak inla, a huh ding a om lo mite panpih in. Amau a’ding thu genin thu a tangin khen inla, a zawng a cimawh mite amau a’ dingin a kilawm hamphatna ngahsak in.” Pau. 31: 8, 9. Koi bangin hih thu na nuntakpih hiam?

______________________________________________________________________

_______________________________________________________________________

Pasian in hehpihna, thumanna tawh kidim hi. Tua bang mahin a mite in zong hehpihna nei-in, thuman ding hong deih hi. Pasian in a kinengniamte, cimawhte hehpih hi, ci-in kamsangte in pulaak uh hi. Aituam hamphatna zong lo-in thumanna pen biakna man ahi hi.

Isaiah 1: 13 – 17 sim in. Koi bangin Pasian in biakna man a muhzia pulaak hiam? Koi bangin tu-in zong biakna man nei ding na hiam?

___________________________________________________________________

___________________________________________________________________
 Kamsangte in kum tampi khitteh thupiang dingte pulaak uh hi mahta leh a pulaak thute un amau hun sung mah in zong kipuahpha, kikhel a kulzia pulaak uh hi. Biakpiakna tuamtuam tawh Pasian bia napi uh a kim a paam om cimawh dongtuakte a don loh uhteh kamsangte in amaute thuhilh hi. Huh ding kisamte huh man lo liangin Pasian biakna sangin a siahuai zaw thuzuihna om lo hi. A huh huai mite i va huhna in Pasian’ nasem i hihna a kilangsak ‘biakna man’ hi lo hiam?

WEDNESDAY JULY 13

GENKHOLHNA: Khennihna

Isaiah 58 pen Pasian in Isaiah hun lai-a mite hi taleh tuhun a eite a hong thuhilhna ahi hi. Pasian in a mite tungah a hehna a pulaak khitteh (Isa. 58: 1) koi bangin tua bang mite’ nunzia kipulaak hiam?

______________________________________________________________________

______________________________________________________________________

Pasian in amaute ‘bangci aw suah’ tawh hopih cih i theih loh hangin Pasian in amaute upna, thuzuihnate santhamcingsa lo hi. Bang hang hiam cihleh Pasian in amaute’ thuzuihna, biakna pen Ama deihna bang hi lo hi. “Amaute pen thumaninn a gamta, amau’ Pasian’ biakna ngeina kipte a nusia lo minam bang keekin nisimin amaute in kei hong zong uh a, keima lampi a thei nuam uh hi. Amaute in keima kiang panin thukhenna man hong ngen uh a, Pasian’ kiang hong nai nuam uh hi.”

Isaiah 58: 3 – 14 sim in. Pasian in amaute’ biakna, antanna sang zo lo hiam? Biakna, antannate sangin a thupi zaw bang pulaak hiam?

_________________________________________________________________________

__________________________________________________________________________

I phawk ding a kisam a thupi mahmah thu in: mihing bulphuh biakna - “ Topa aw, tua hong hihsak in, hong tua cihsak in” cihte hi. Mimal kitangsapnate ah Topa i nget ding hun om mah hi. Ahi zongin biakna man i cih in, tuate banah, cimawh, genthei, gilkial mite va huhna kihel hi. Tua bangin i gamtat leh a lamdang mahmah khat ah, i huhte banah ei a vahuhte in zong thupha ngah hi. Pasian’ kamciam a om mah bangin tangtung takpi hi lo hiam?


Mi i va huh ciangin lungdamna, lungkimna ngah hi lo i hiam? Tua sangin Khrih ii zia le tong kilangsak ding a om diam? Sawl. 20: 35 sim in. Koi bangin tua thute na tuak hiam?

THURSDAY JULY 14
 THU HOIH A TAWSAWN

Bang zahin hoih mah taleh thuman neih bek kicing lo hi. Israel mite in ngat takin um uh hi. Kip mahmah uh hi napi a up thu-te nuntakpih lo uh hi. Kamsangte in Pasian’ zia le tong kilangsak ding a gen tawntung mah bangun, Pasian in tu-in zong Ama zia le tong kilangsak dingin nang le kei hong sam hi.
A nuai-a teng sim inla, na khuatual pawlpi hi taleh leitungbup a huampi-in hi taleh Pasian in bang hong sawl hiam?

Late 82: 3 ____________________________________

Isaiah 1: 17 _____________________________________


Pawlpi omna khuapi khat kithatna, siatna tawh kidim hi. 2011 kumin tua khuapi ah pastor khat in nasia takin Pasian thu tangkohna nei hi. A gen thute lak ah bang thute kihel hiam cihleh, “ Thu-um mite in siatna i khawlsak kul hi. Khua sung hih zahin siatna a tam laitakin Pawlpi in bang mah sem lo-in a mawk om mawkmawk ding hi lo hi,” a cih khitteh a pawlpi mi khat thu dong hi. “pawlpi’ nasep in si vui ding bek maw? Bang hangin Pasian in siatna hih zahin phal hi ding hiam? ci-in dong hi. Tua hun a kipan hih pawlpi khua sung khantoh nading nasem hi. Kum 7 sung bang pawlpi in lampi ah lasakna nei kawikawi uh hi. Huh theih huh mawh huh uh hi. Tua pawlpi in khua sungah kilamdanna tampi piangsak hi. Hih pawlpi eite etteh ding hi. Pawlpi in kim le pam, khua sung khantoh nading na tampi sem thei, puah thei hi.


FRIDAY JULY 15
SINBEH DING: Ellen G. White, “The Law Given to Israel” 307 – 314; “ God’s Care for the Poor,” 530 - 536 in Patriachs and Prophets.

Thuciam Lui in hehpihna, thumanna limgen mahmah hi. Gentehna-in Thkna. 24: 10- 22 sim in. Pasian in mizawngte, nasemte, leiba neite a hehpihzia pulaak hi. Pelh ding le sep dingte kiciantakin hong hilh hi. Israel mite zong namdangte’ khut nuai-ah om ngei, peemta, khualmi-in om ngei khin uh ahih manin, “Egypt gamah na saltanna uh phawk unla, cimawhte a panpih dingin thu kipia hi (Thkna. 24: 22).

Hau taleng, zawng taleng koi dinmun, koi dinmun tawh i nungta zongin Pasian in a hong hehpihna le kilawmlo i ngah Ama maipha i phawk tawntung kul hi. Khrih’ hangin mite huhin Ama hong tatna i gen ding kisam hi.

KIKUP DING DOTNATE:

1.              Koi bangin Sabbath ni-in na inn sunga nasemte zong nasep khawl ding cih thu in Topa mai-ah mi khempeuh i kikimzia pulaak hiam? Koi bangin na nuai-a nasemte, na nasemte tungah na lungdam kul ahihzia pulaak hiam? Koi bangin Khrih a hong sihna in mi khempeuh i kikimzia pulaak hiam?

2.              “ Khrih in a neih lungsim eite in zong i neih takteh, Ama nasep eite nasep a suah ciangin i antante in Isaiah in a pulaak Topa'deih antan hong bang thei pan ding hi. “ Kei’ deih antanna hih bang pawl ahi hi: Gitlohna khaute phelin, hakkol savun khaute phel a, a kinengniam mite khahkhia-in thuman lohna hakkol khempeuh suktan ding ahi hi” (Isa. 58: 6). Mizawng, a kinengniamte’ kitangsap thei inla, itna, hehpihna tawh huhin, Pasian hong piak thuphate hawmin, thapia inla, lametna le lungmuanna hilh hi. Ellen G. White, in, Pacific Union Recorder, July 21, 1904. Koi bangin hih thu zangkhia thei-in, koi bangin mite aa ding thupha hi ding na hiam? 

To get the latest update of me and my works

>> <<