MUC

Print Friendly and PDF

Sunday, June 19, 2016

LESSON 13 SEP. 17 – 23

LESSON 13 SEP. 17 – 23

 KOI BANGIN NGAK DING I HIAM?


                                        
TU KAAL SUNG SIM DING: Matt. 24: 35 – 25: 46; 2Pet. 3; James 2: 14 – 26; John 4: 35 – 38; 
1Kor. 3: 6-8;Mang 21: 1-4.




KAMNGAH: “Nasep thadah lo-in lawpna lungsim tawh Topa na sem un. Lametna tawh kipak un. Haksat hun ciangin thuak keikai un. Thungetna ah citak un. Mi siangthote kisapnate huh unla, zindo

thanuam un” ( Romans 12: 11 – 13).

1906 kum San Francisco ah zinling ma-in San Francisco khuapi-a om SDA thu-um mite lawptakin nasem uh hi. Cinate veh, dongtuakte huh hi. Tagahte om nading bawlsak uh hi. Nasep neilote nasep guan uh hi. Inn khat khit inn khatah pai-in Lai Siangtho sinpih uh hi. Laihawm tuamtuam zong nei uh hi. Cidamna thu tawh kisai thusinna zong nei uh hi. Laguna Lampi-a inn khat naupangte sanginn dingin zang uh hi. Cina etna, nasemte omna inn tuamtuam nei uh hi. Tuipi gei mun tuamtuam ah zong thugenna innte nei uh hi. Khua sung mun tuamtuam ah thuman tangkona nei uh hi. Zeisu a dawn dinga kiging mite in hih bangin nasem dingin Zeisu in hong deih hi. Ellen G. White in zong tua dingin hong hanthawn hi (Ellen G. White, Advent Review and Sabbath Herald, July 5, 1900).


Topa hong pai ding hi ta hi, cih thu i theiciat hi. Ahi zongin i kidot ding a thupi mahmah in: Topa hong pai ding na ngak kawmin bang na sem hiam? Na nasep in i tun nading mun hong lak ding hi.

SUNDAY SEP. 18

ZEISU I NGAKKAWMIN

Nungzuite in nitumkuan a nitang in Jerusalem biakinnpi tan a muh uhteh biakinnpi vangliatzia pulaak uh hi. Zeisu in tua biakinnpi hoihna sangin Amah a um mite thuak ding bawlsiatna le hun beikuana thupiang dingte a lungngai dingun hilh hi.Zeisu in a nungzuite kiangah “ Hih biakinnpi tungah suang khat tungah suang khat a kiciannawn lo hun hong tung ding hi” ci-in hilh khol hi (Matt. 24:2). A nungzuite in zong tua bang thu a zak tak uhteh lamdangsa uh hi: “Tua ahih leh na gen thute bang hunteh hong piang ding hiam? ci-in dong uh hi (Matt. 24: 4- 31). Jerusalem biakinnpi kisiat hun ding tawh kisai-in, Zeisu in Amah nih vei a hong pai kik ding hun ciangin a piang ding thute genkhol hi. Tua thute a gen ciangin “ a bei hun hong tung lai ding hi,” ci-in pulaak hi. Minam khempeuh aa ding teci dingin “ Leitung mun khempeuh ah Lungdamna thu kihilh ding hi.” Tua khit ciangin beina hong piang ding hi. Zeisu hong hilh hun beikuan a thupiang dingte awlmawh loh ding hi lo hi. Amah i ngakzia ding zong a hong hilh hipah hi. Khualzin ding lampi ah mawtaw ngak bangin, om mawkmawkin Zeisu hong pai ngak ding hi lo hi. Topa nihvei a hong pai ding a ngak mite in Topa hong paima-in sep ding tampi i nei hi.


Matt. 24: 36 – 25: 46 sim in. Gentehnate in Nihvei Kumkikna dingin Pasian mite kiginkholhzia ding hong hilh hi. Khrih in bang pulaak hiam? Mimal khat ciat i kidot ding banah pawlpi in bang sittel ding kisam hiam? Koi bangin gentehna tungtawnin Topa hong hilh thute na nuntakpih hiam?

________________________________________________________________________

_______________________________________________________________________

 Khrih in a hong paikikna dingin Nungzuite kiginkholhzia ding hilh hi. Tua bangin amau nuntak sungin kiging takpi pah uh hi. Mite tungah itna lakin, mite thudon uh hi. Lungngai khuadaksa-in nungta uh hi. A piang ding thute hangin kithawi uh hi. Amau dinmun kisittel pha uh hi. Pasian piak thuphate pungsak meetbawl uh a, itna tawh kidim Pasian zahtak uh a, naupangte dongin cingin huh uh hi.


MONDAY SEP. 19

I NGAKKAWMIN KIPUAHPHATNA LE KHANLAWHNA


2Pet. 3 sim in. Kipuahphatna le khanlawhna bang pulaak hiam? Koi bangin tu quarte sunga i sin thute tawh kizopna nei hiam?

__________________________________________________________________________

__________________________________________________________________________

Pasian in mi khempeuh a kisik ding hong deih hi (Matt. 3:9). Kha Siangtho nasep in mawhna hong phawksak hi. Mihing in Kha Siangtho dinmun ah omin na sem thei lo hi mah lehang, mite kiangah tatkhiatna thu a vapuak dingte i hi hi. I gen thute a um mi kisik ding hi. Kisikna in kipuahphatna le khanlawhna piangsak hi. Khanlawhna in nunna tawh kizom hi; hong thaksuaksak hi. Kipuahphatna in kibawlphatna, thaksuakna piangsak hi ( 2Kor. 5: 17). Pasian deihna tawh kituakin khanlawhna in eite kitangsap pipen hi. Khanlawhna i sep, i zon masak pen ding hi. Ellen G. White, 1SM., 121.

Khanglo-in a kipuahpha mi in koi bangin Khrih dawn ding kiginkholh zia ding theithei hi. Nungak sawmte a vekun ihmutna pan khanlawhna kisam uh hi (Matt. 25: 1-13). A hai nungakte in a nuntakna uhah Kha Siangtho kisam uh hi. I kiniamkhiat ciangin, aituam a ding nungta lo-in, huaihamna tawh thungen lo-in, Lai Siangtho simin, itna tawh a gamtang mi in guah nunung ngah ding a Kha Siangtho in ompih ding hi. Ahi zongin huaiham angsung ding bek ngaihsunin Lai Siangtho simin thungen mi tampi om kha ding hi. Tham lo-in tua bangpi mah tawh khanlawhna ding le kipuahphatna dingin thungen kha ding hi. A kipuahpha mi in aituam hamphatnate nialin mite aa dingin nungta hi. Kha Siangtho tawh i kidim ciangin Topa aa ding lungsim takpi tawh nasem nungzui i hi ding a, kipuahpha mi i hi ding hi.

I thungetna ah, Lai Siangtho simnate ah kipuahphatna le khanlawhna i kisam hi. Kha Siangtho guah nunung i ngah nadingin Topa kiang i ngen ding kisam hi. Pawlpi in zong a nasepna, a ngaihsut ah kipuahphatna, khanlawhna kisam hi. Cimawh dongtuak mite a kipan naupangte tawh i kizopna ah kipuahphatna le khanlawhna kisam hi. Tu quarter sung i thusin ngimna bulpi zong hih thu mah ahi hi.

Koi bangin Khrih nihvei a hong pai ding kinlo-in na om kha hiam? Topa hong pai baih mahmah ta ding hi, ci-in lawpin, ngaklah in a nungta na hiam?

TUESDAY SEP. 20

I NGAKKAWMIN PAWLPI SEP DING

James 2: 14 – 26 sim in.Kua hi hang a, bang hangin nungta i hiam?

__________________________________________________________________________

__________________________________________________________________________

Sunday ni-a thusinna ah nungzuite in Jerusalem biakinnpi hoihna pulaak uh hi, cih thu i mu hi. Tua ciangin Jesuh in pawlpi omzia le hun nununga a mite tangko ding thuman thute ngaihsun zaw dingin hilh hi. Sep ding om ahih manin pawlpi a om hi zaw hi. Pawlpi om ahih manin nasep om hi lo hi. General Conference Working Policy in pawlpi nasep ding hih bangin pulaak hi: “mi nam khempeuh nungzui suaksak ding, mun khempeuh ah Lungdamna thu puak ding hi” ( Matt. 24: 14). Vantungmi thumte thupuak in (Mang. 14: 6-12), Khrih Honpa le Topa-in sangin, a cianlai Ama pawlpi sungah omin, mi namte nungzui suaksakin, Khrih hong pai kik nadingin mite kigingkholsak ding hong hilh hi. Hih thute thugenna, thuhilhna, cina damsakna tungtawnin kisem khia hi. Cina damsakna tawh kisai-in “ Lai Siangtho hong hilh bangin Topa tawh pangkhawmin lungsim, pumpi cidamna mitsuanin cidamna kepsiam kul, cinate donin, cimawhte huh, a kinengniam mite honkhia ding i hi hi. Piangsak Pa in na khempeuh puahpha-in bawlpha kik nuam hi.

Jesuh in mihingte sungah Ama lim le meel hong guan kik nuam hi. Kimlepaam puahpha dingin a nungzuite mah hong zang nuam hi.” Leitung in tu-ma kum zalom 19 hun lai-a Jesuh Khrih hong hilh thute tu-in zong i kisam hi. Kipuahphat ding kisam hi. Khrih hehpihna bek mahin pumpi, lungsim, ngaihsutna le upna hong puahpha thei hi” Ellen G. White, The Ministry of Healing, 143.
Jesuh nasepzia thusinna khit ciangin pawlpi mi khat in “ko ka pawlpi ah thuthak tuamtuam, sepzia thak cihte ngaihsun kei ung. Jesuh nasepzia i sin thute zong thuthak hi lo hi. Theihsa vive hi-in a kimangngilh khin hi bek hi,” ci-in pulaak hi.

Gamtatna om lo upna in a si upna hi.Koi bangin upna le

gamtatna kizom hiam? Koi bangin gamtat in upna khangsak hiam?

WEDNESDAY   SEP. 21

I NGAKKAWMIN BUH AT DING KIGING

Zeisu in lokho mite kammalte zangin Pasian Gam thu hong hilh hi. Thakhat thu-in buh ki-at thei hi lo hi. Khaici tuh a kipan lungduai takin buh at hun ngak kul hi. A mun, a hun, mi nunzia tawh kizui-in nasepzia zong kibang lo hi. Kha Siangtho in a hong makaih nadingin na lungsim kongkhak hong in. Khaici tuh nading leitang bawl a kipan a at hun dong Topa hong makaihna kisam hi.

John 4: 35 – 38 sim in. Bang limciinna kimu hiam? Midangte aa ding sepzia bang hong hilh hiam?

__________________________________________________________________________

__________________________________________________________________________

Mihing lungsim ngaihsutte i thei kei hi. Kha Siangtho in amaute sungah nasem khin hiam cih mihing in i thei kei hi. Mihing muhna ah mi khat in Khrih a up takpi theih nading hun kisam lai hi, ci-in kingaihsun kha thei hi. Ahi zongin Kha Siangtho in tua mi lungsim ah nasem khin ahih manin Khrih tungah ki-ap ding khensat hun a cingkhin hi kha thei hi. Mihing in koi zaw khensat ding, ci-in ngaihsut kul a, Topa Pasian a teel zawk theih nadingun huh kul hi.

1Kor. 3: 6-8 sim in. Pawlpua nasep tawh kisai bang hong hilh hiam?

_________________________________________________________________________

__________________________________________________________________________

Paul in zong Zeisu hong hilh thute mah hong hilh kik hi. Pawlpua nasep pen lokhote nasep tawh kigenteh thei hi. Mi khat in a vekin sem lo hi. Tua mah bangin mite kiangah thuman tangko nasep zong mi khat bek nasep hi lo hi. Mi khat ii sep in tua nasepna sungah kihel hi. Pasian in a nasem dingin eite hong zang hi mah taleh, a taktakin mi khat hong kikhel theihna pen Pasian bek in sem thei hi.

Bang bangin Pasian in hong zang hi mah taleh koi bangin kiniamkhiat thei ding na hiam? Bang hangin kiniamkhiatna pen eite hamphatna hi zaw hiam?

THURSDAY SEP. 22

I NGAKNGAK MIPA HONG PAI-NA

Hun khatlai-in Charles Dickens in “ A Tale of Two Cities” tangthu khat gelh hi. Tua khuapi nihte pen London le Paris khuapi hi. Lamkhat panin Lai Siangtho zong ‘khuapi nihte thu’ kici thei hi. Tuate in Babylon le Jerusalem hi.
Mang. 14:8; 18 cihte ah Babylon khuapi tawh kisai kigelh hi. Babylon khuapi in dawite omna, kha gilote tenna khuapi hi. Minam khempeuh sia-sak khin hi. A siat hun ding kipulaak khin hi. A puk, mawhnei hi, ci-in kitangko zo hi. Babylon khuapi in siatna, Pasian langpanna limcing khuapi hi. Ni khat niteh Pasian in hih khuapi susia maimang ding hi.

Mang. 21: 1-4 sim in. Koi bangin Jerusalem Thak le Babylon kilamdang hiam?
______________________________________________________________________

______________________________________________________________________

Mang. 21, 22 sungah Jerusalem khuapi tawh kisai thu kigelh hi. Jerusalem in ama deihna a nial, mopi ding tangvalpa, Satan le a nungzuite a langpan limcing khuapi hi. Hih khuapi sung om ding mite in Pasian hehpihna siksanin a thupiak zui-a Zeisu a upna uh a kilangsak mite hi ding uh hi (Mang. 14: 12). Amaute thuakna le Zeisu nasepna sungah a kihelna hangun leitungah vantung nopna ngah mite ahi uh hi. Amaute in Zeisu Khrih a upna uh tawh kihonkhia khin hi. Zeisu Khrih dikna bek mah in tawntung nunna sungah lutpih hi. Upna nei taktak uh cih pen naupang khat nangawn hoih tak a donzia in pulaak hi.

“Tuuno sisan hangin pawlpi nasepna pen lungdam kipahna pawipi hong suak hi (Mang. 5: 13, 14). Tua khuapi siangtho sungah “ Pasian in amaute khitui khempeuh nulsak ding a, tua munah sihna, kahna, dahna, natna cihte om nawn lo ding hi. A lui na khempeuh phawkin kinei nawn lo ding hi” (Mang. 21: 4). Tua hun ciangin lungnopna taktak tawh i ngah ding hi. A kicing Pasian lim le mel i nei kik ding hi. Ngaihsutna, lungsim, pumpi a vekpi-in Amah i suunkhin ding hi. Siatna kici nuntakna nei hi taleh nuntakna nei lote hi taleh, a vekin, beimang ding hi. Pasian in hoih hi, itna hi, nuamna hi, ci-in na khempeuh in pulaak ding uh hi.” Ellen G. White, The Great Controvery, 678.

FRIDAY SEP. 23.
SINBEH DING: Matt. 5: 6; Kol. 3: 17; Heb. 13: 15, 16; Ellen G.White, “ On the Mount of Olive” in Desire of Ages, 627; “ The Least of These My Brethren” in Desire of Ages, 637 – 641.

Khrih in a hong pai ma-in a piang ding thute hong hilhkhol khin hi. Gal, kidona, pulnatna, cihte hong piang ding hi. Siatna om manin Pasian um lo ding hi lehang, Pasian i upna ding om lo hi. Hun beikuanin siatna hong tam semsem ding hi. Tua hi-in Pasian a um mite in siatna lakah mite in Pasian hong itna a muh nadingun Ama zia le tong kilangsak ding thupi semsem hi.” Pasian mai-ah kiniamkhiatin, lungnemin, hehpihna tawh kidim hi lehang, tu laitakin a nunna kikhel mi khat bek omna munah a kikhel mi 100 bang om ding hi.”Ellen G. White, 9T., 189.

Hih in mi tungah thuman tangko nasepna ah thuneu tawh a kibat hangin vanglian mahmah hi. Khrih hong pai ding a ngak mite in Lungdamna thu tangko-in a nuntakpih dingin Topa in hong lamen hi. Topa in na neih khempeuh Ama aa ding a zang dingin hong lamen hi. Mite itin, zahtakin, don dingin hong lamen hi. Topa in a Kha Siangtho tawh kidim dingin na lungsim kongkhak hong dingin hong lamen hi. Tua hi leh kuamah in a nial zawh loh Topa teci na suak ding hi.

KIKUP DING DOTNATE:

1.     ” Babylon khuapi” a teng ding mite le “Jerusalem khuapi” a teng ding mite kilamdanna ngaihsun in. Amaute kilamdanna lianpen in bang hi ding hiam? Tua kilamdanna koi munah kimu thei ding? a mun maw, ahih kei leh mite nunzia ah maw?

2.      Gamtatna in upna thu ah mannei mah hi. Gamtat in hong honkhia thei lo ahih leh, gamtat in bang dinmun nei hiam? Mi huhna le thuman tangko na-ah koi bangin gamtatna tawh kisai na hilh ding hiam?

3.     Koi bangin Zeisu hong pai kik ding ngak ding i hiam? Koi bangin na nunzia, gamtat in Khrih hong pai kik takpi mah ding hi,cih upna pulaak hiam? Bang hangin kumkikna a um lo mite le a um mite nunzia kilamdand ding hiam? 

To get the latest update of me and my works

>> <<