MUC

Print Friendly and PDF

Sunday, June 19, 2016

LESSON 12 SEP. 10 – 16


LESSON 12  SEP. 10 – 16

 HUN NUNUNGA KHUAPI SUNG NASEP


                  
TU KAAL SUNG SIM DING: Sawl. 18: 1- 28; Pai. 2: 23 – 25; Matt. 13: 3-9, 18 – 23; John 15: 12, 13; 2Pet. 3:9, 12.

KAMNGAH: “ Note salin kong koihna khuapi’ phattuamna ding bawl unla, tua khuapi aa dingin  Pasian tungah thungetsak un. Bang hang hiam cihleh tua khuapi in phattuamna ngah leh no zong phattuamna a ngah mah na hi uh hi’

( Jeremiah 29: 7).

Vantungmi thumte thupuak in minam khempeuh, paunam khempeuh, mun khempeuh tungah Lungdamna thu tangko ding hong hilh hi (Mang. 14: 6). Mun khempeuh, a kipan khuapite ah i tangko ding hi. Khuapi ah nasep ding kitangsapzia kilang tektek hi. 2007 kumin UNO panin mi a tamzawte in khuapi ah teng hi, ci-in a khatveina genkhia uh hi. Tu-in SDA pawlpi in khuapi lian sunga teng mite in i thupuak a zak theih nading vaihawm hun mahmah hi.


Gam tampi ah khuapi liante sangin khuata, khuaneute ah Adventist thupuak kizel zaw hi. Khuapi-a om mi tampi in vantungmi thumte thupuak za kha ngei lo uh hi. Tua hi-in khuapi liante sungah nasep hunta hi.

SUNDAY SEP. 11

KHUAPITE OMZIA

Khuapi ah minam tuamtuam, ngeina tuamtuam, kampau tuamtuam, biakna namcin om hi. A tamzaw-in ah khuapi khat a hih hangin a veng a vengin kikhen ciat uh hi. Nidang bang nawn lo-in tu-in tua bangin kituam om ciat nawnlo-in veng khat sungah kitengkhawm mangkhin hi. Hih bangin a kibang lo tuamtuam kikhawm khin ahih manin supna, buaina tuamtuam hong tam hi. Ahi zongin lamkhat panin Lungdamna thu va puak theihna ding mun hoih khat hong suak hi. Tua banah a kibang lo muhzia, ngaihsutzia tuamtuam kigawmkhawm ahih manin a theih ngei loh uh biakna, ngeina khat zuih ding hamsa sa lo uh hi. Hih bang khuapi sunga teng mite in SDA thupuak a zak theihna dingin lampituamtuam kizang thei hi.

Sawl. 18: 1- 28 sim in. Koi bangin Paul in khuapi sungah pawlpi phut hiam? Ama nasepzia panin bang thu na mu thei hiam?

__________________________________________________________________________

__________________________________________________________________________

Tu hun mah bangin Paul hun lai-in zong khuapi sungah ngeina tuamtuam, kampau kibang lo, minam tuamtuam kimu thei hi. Paul in a nasepna ding mun a tuam vilvel mun khat khensat hi. Paul in Jew upna nei-in Roman gammi hihna nei-in puanbuk nasep tawh kivak sawltak khat ahih mah bangin amah tawh kibang mite lakmahah nasem hi. A tunna innkuante thu-um mi hong suak uh a, amau mahmah zong Pasian nasem hong suak uh hi. Paul in amaute kikhopna inn sung pan a kikaihkhiat mateng tua munah thuhihin om hi. Tua bang teng a piankhitteh inn khatah kikhawm uh a, tua inn phualpi-in nei-in tua innkuan in thu-um mi hong suak uh hi. Paul in thu-um mi thakte panpihin hilh ahih manin ama ciahkhiat khit nungah thu-um mite in amau le amau-in kalsuan thei pah uh hi.

Paul in minam tuamtuam, ngeina tuamtuamte lakah nasep nuamsa hi (1Kor. 9: 20 – 23). Paul in a mun, a mual tawh kizui-in nasem thei hi. Minam khempeuhte kitangsapte zong huh hi.

Koi bangin pawlpi hi taleh mimal hi taleh Pasian nasepna taizang zaw-in nasem thei ding hiam?

MONDAY SEP. 12

TAU-NA AWTE ZA

Khrih in Capernaum zuanin a pai-na ah Jerusalem le mun tuamtuam nawk kha hi. A pai-na khempeuh ah natna nei mite, cimawh genthei mite in zui uh hi. Ama lungsim in hih bang mite tawh omkhawm hi. Khuapi ah mi kibehlap tektek, mi nam tuamtuam, buai-na tuamtuam tawh kidim hi. Pawlpi in a nasep ding tampi nei lai hi,cih kidawk hi. Lungdamna thupuak tatkhiatna thu bek genin kimlepaam mite kitangsapte kinlo-in om lo hi. Tua hi kei leh i thugen a mawkna suak ding hi. I gamtat in itna, hehpihna, lainatna lak kei leh i gen thu in a hawmpi suak ding hi. Thumawkmawk kigen bang lel ding hi.

Pai. 2: 23 – 25; 6:5; Late 12:5; Romans 8: 22; Job 24: 12 sim in.

Nuntakpih ding thu bang hong hilh uh hiam?

____________________________________________________________________

____________________________________________________________________

I tenna leitung in siatna namcin tawh kidim hi. Mawhna hangin gimna, tawlna i thuak hi. Kuamah in gimna tawh kipelh lo hi. Hih gimna in eite aa dingin teci hoih khat hi thei hi. Pasian nasepna-ah i kidop ding thu khat in, thu-um lo mite in zong cimawhte huh theihzahin huh uh hi. Pawlpi in zong cimawhte huh hi. A kilamdanna a theih dinguh kisam ahih manin, pawlpi in tua a kilamdanna thu a mite a hilh kul hi. Kipawlna tuamtuamte in kum khat khat vei a pia zong om kha ding hi. Ahi zongin pawlpi in a thu puak thuman mite a theihsak kul hi. Pawlpi in kimlepaamte aa dingin deihsak takpi tawh nasem ahihlam mite a theihsak kul hi. Pawlpi nasepna-ah kipiakna, ki-apna lo-in a nasep in muibun zo lo hi.

Na pawlpi in kimlepaamah om cimawh, genthei-te huhin nasem

hi leh mite nuntakna ah kilamdanna om lo ding hiam?

TUESDAY SEP. 13

KHUAPITE AH KHAICI VAWHIN ANLAKNA

Matt. 13: 3-9, 18 – 23 sim in. Koi bangin khuapite a kipan kimlepaam ah sepkul ahihlam hong hilh hiam?

_______________________________________________________________________

______________________________________________________________________

Khuaneu mite nunzia siksanin thuhilhna ahihsam hangin khuapi khualiante ah sep ding kitangsapzia hong hilh hi. Bang hang hiam cihleh khuapi sungah mi namcin, pau namcin kigawm hi. Tua hangin khuaneute sangin khuapi sungah sep ding tam zaw, hamsa zaw tham hi. Leitang nam tuamtuam a om mah bangin mihing kibatlohna tuamtuamte in gah tuamtuam piang thei hi. Tua ahih manin bangci mun, koi bang mite cih sittel masak kul hi. Khaici hoihtak po-in a khankhiat zawh nadingin a nawngkaisak thei suang, lingkungte hahkhiat kul hi. Pasian nasep, thuman tangko-na dingin zong geelkholh kul hi. Tua in hoihtak na kisemin a lawhcinh theih nading ahi hi.

1Kor. 12; Romans 12;Eph. 4 cihte in Kha Siangtho silpiakte tawh kisai hong hilh hi. Silpiak tuamtuamte in nasep masuan khat bek mungtup ciat uh hi. Khaici thugentehna tungtawnin khuapi sung nasepna tawh kisai thu hong hilh hi. Khaici in leitang namcin tungah kia hi. Silpiak tuamtuam om hi. Khuapi sungah zong mi namcin om hi. Ahi zongin mungtup khat bek masuanin nasem khawm hi. Ellen G. White in “ Nasepzia thak kisam hi. Pasian nasemte in a hun le mun tawh kizui-in nasep theihsiamna kisam hi” ci hi (Ellen G. White, Evangelism, 70). Vantung lamlahna in nasep picingsak hi. Tu hunin zong nasepzia nam tuamtuam zat kul hi. Sepzia nam khat bek zong sawt kimang thei lo hi. Geelkholhna om lo-in nasep pen lawhcing zo lo hi. Nasep ma-in sepzia ding hoihtak geel kul hi.

 Na nasep nading mun le a mite omzia ngaihsun in. Koi bang hiam? Thuman khaici hoihtak a gah theih nadingin koi bangin leitang kisam hiam?

WEDNESDAY SEP. 14

MIMAL SEP THUPI

John 15: 12, 13; James 1: 27; Gal. 6: 2 sim in. Pawlpua nasep kisapzia bang hong hilh hiam?

_________________________________________________________________

_________________________________________________________________

Khuapi in mi namcin kigawmna ahih manin tua munah thuman tangko ciangin upna pen mimal tawh kisai ahihlam kimangngilh kha zel hi. Koi mun koi munah thuman nasepna ah Khrih tawh mimal kizopna a neih ding uh thupi pen hi. SDA pawl sung hong lut mi a tam zawte in lawm le gual, meltheihte tawh kizopna tungtawnin pawlpi mi hong suak uh hi, kici mu khia hi.

Mi tawh kilawmtatna ah ei aa ding sangin mi aa ding sepna, mi tung thupha bawl cihte kisam hi. Kimel theihna, kilawmtatna a om ciangin thuman khaici tuh theih nading mun hoih suakin, khaici zong hoih tak hong khang khia thei hi. Mi tawh kilawmtat theih ding kisin kul hi. Amau hong gen thute i ngaih kul hi. It ding kisin kul hi. Hihte in mimal kizopna kipsak ahih leh, khuapi sungah kuamah tawh kizopna neilo, lawm le gual nei lo mi tampi om ahih manin, tua bang mite tawh mimal kizop ding thupi mahmah hi.

Khuapi ah nih le thum kigawma biakpiak khopna, kimuh khopna, thunget khopna cihte in muibun mahmah hi. Sawltakte hun lai-in zong tua bangin nasem uh hi (Sawl. 2: 46). Inn nih, inn thum gawmin, mun tuamtuam ah tua bang mahin om leh, kimlepaam aa dingin na lian pipi sem zo veve hi. Ellen G. White, 7T., 21, 22 sim in.

Mihonpi tawh hi lo-in tua bangin kikhopna neuneute in pau tuamtuam, mi nam tuamtuam, ngeina tuamtuamte lakah muibun nasep khat ahi hi. Mun tuamtuam ah tua bangin kikhopna a om kei leh Khrih hong piak nasep kizo thei lo ding hi. Kikhopna neute kisam hi. Bang hang hiam cihleh khuapi sungah mihon kikaihkhop hamsa banah, kimlepaam huzaap lian lua ahih manin upna le thuzuihna hamsa hi. Thu-um mi kimkhat upna panin lampial uh hi. Kim khat leuleu biakna kin het lo, Zeisu aa ding teci ahihlam uh phawk lo uh hi. Amau hihna bang tawh lungkim lel uh hi.

THURSDAY SEP. 15    KHUAPI SUNG NASEP

Pasian nasep hamsa hi. A taktakin tua bang hi lo hi. Mihing in mawhna, khialhna tawh kidimin i pianzia mahmah in Pasian kin lo hi. Paul in ama pianzia hih bangin pulaak hi: “Bang hang hiam cihleh thukham in khalam thu tawh kisai hi cih i thei hi. Ahih hangin kei ka hih leh ci le sa tawh a om mi ka hi a, tua in mawhna nuai ah kei hong zuak hi” ( Romans 7: 14). Paul in hih bangin pulaak ahih leh Topa a thei nai lo, kikhelna neilote bang a ci zen diam?

I pianpih lungsim in sia mahmah hi. Khuapi sungah siatna tam deuh hi. Mi tampite in zia-etna sungah puk uh a, siatna in ukcip hi; siatna sila-in nungta uh hi. Khuapi sung a mite kiangah olno takin thuman tangko ngaihsut khak ding hi lo hi. Nasep ding sapna ngah i hih mah bangin pawlpi tungah kipia nasep a sem ciat ding i hi hi.

A nuai-a Lai Siangthote in pawlpua nasep kitangsapzia bang pulaak hiam?

1.2Pet.3:9________________________________________

2. 1Tim. 2:4   ___________________________________

Khrih in Adam le Eve a kipan mi khempeuh aa dingin hong si hi. Tua hi-in khuapi sunga teng mite in Khrih hong tatna thu a zak ding uh kisam hi. “Pasian in a thuman a tangko ding a hong sawl tuni ciang kikhel lo hi. Tu hunin khuapi sungah tua thuman tangko ding kisam mahmah hi. Khuapi in Pasian deih bangin kikhel uh hileh cikmah hunin a om ngei nai lo khanlawhna hi ding hi.” Ellen G. White, Medical Ministry, 304.

Khuapi ah thuman tangko ding nasep pen mimal tawh kisai, mimal in Khrih tawh i kizopna tungah kinga hi. Mimal kiginkholhna, geelkholhna kisam mahmah hi. Geelkholh bangin sepkhiatna thupi zaw lai hi. Khanlawhna le kipuahphatna siksanin thu kigente Kha Siangtho makaihna tawh kikhelna le kilamh thakna om takpi hi.

Romans 10: 14, 15 sim in. Khrih nungzui mite aa dingin thupaipi-in bang pulaak hiam? Koi koi ah i teng zongin koi bangin Topa aa ding teci hoih hi ding na hiam?


FRIDAY SEP. 16
SINBEH DING: 2012 kumin kibawl “Ministry to the Cities” Review and Herald zumpi pan kibawl laibu sim in.Ellen G. White gelhte kaikhawmin kibawl ahi hi.

Ellen G. White in a pulaak “khuapi panin paikhia un. Khuapi sungah sanginn, zato cihte koih kei un,” cih tawh kisai-in a laigelhte etkikna kinei hi. A laigelhte lak pan 107 sung panin 24 in khuapi pua ah om ding pulaak hi. Ahi zongin mun 14 ah khuapi sungah nasem dingin khuapi sungah om ding limtakin a gen hi. Mun 8 ah bel kician lo hi. Pawlpi makaite in Ellen G. White pulaak khuapi sung om ding le om loh ding tawh kisai hih bangin pulaak uh hi: sanginn tawh kisai-in khuapi pua ah om dingin pulaak hi. Ahi zongin pawlpi nasep, thuman tangkona tawh kisai-in khuapi sung mahah kipat ding hong hilh hi.

Khuapi sungah thuman tangko ding tawh kisai-in na pawlpi in bang geel hiam? Khuapi koi munah na biakinn om hiam? Kuamah in khuapi sungah thuman tangko kisam lo hi, ci kei uh hen. SDA thu-um mimal khat ciatin khuapi sungah thuman tangko ding mapan ding kisam hi. Khuapi sungah thuman tangko lo-in, khua neuneute bek ah i sep leh, Zeisu hong thupiak bangin a sem lo i hi hi. “Pawlpi tangko thuman a thei khin pawlpi mite bang hangin khuapi sungah teng lo ding uh hiam? Pawlpi mite in khuapi sungah tengin Pasian piak khuavak amaute in a omna munah tangsak ding uh hi.” Ellen G. White, in Advent Review and Herald, Sep. 29, 1891.

KIKUP DING DOTNATE:

1.   A hong kipia thuman thutak ngaihsun in. I lametna, kamciam, tawntung nunna cihte ngaihsun in. Zeisu sungah lametna hong guan na lungsim hong lawngdeuh Lai Siangtho munte ngaihsun in. Bang hangin tuate in nang aa dingin mannei phadiak hiam?

2.   Lamet khat beek neilo-in kingaihsun dih! Leitungah gimna, hamsatna, sihna, han sungah a muat maimangin na khempeuh a mawknapi hi, ci-in khuapi sunga om mitampi in ngaihsun uh hi. Koi bangin hih bangin a ngaihsut mite kiangah lametna thu puak ding na hiam? 

To get the latest update of me and my works

>> <<