MUC

Print Friendly and PDF

Monday, June 20, 2016

LESSON 11 | SEP. 3-9

               LESSON 11            SEP. 3-9

                     “ KA NUNG HONG ZUI UN” CI-IN ZEISU IN AMAUTE SAM





















SABBATH NITAK

TU KAAL SUNG SIM DING: John 10: 1-5; Luke 9: 2; 19: 1-10; Sawl. 26: 11- 27; Mang. 14: 6, 7; 3: 20.


KAMNGAH:“Tuu in midangte’ nung zui lo uh hi; midangte’ aw theithei lo uh ahih manin lau-in taisan zaw uh hi,” a ci hi (John 10: 5).


AD 362 kumin Roman Emperior Julian in a gam sungah dawi biakna pankik hi. Christian biakna in Roman gam sung khempeuh zel khin ahih manin dawibia makaite lunghimawh uh hi. Julian in siampite kiangah bang hangin Christian biakna khang mahmah hi ding hiam? ci-in a kankhia dingin sawl hi. “Dawibia siampite le makaite in mizawngte thudon lo, nawlkhin uh hi. Ahi zongin Galilean Khristiante in nawlkhin pampaih mite huhin panpih mahmah uh ahih manin amau biakna zui uh hi, cih mukhia hi. Rodney Stark, Cities of God (San Francisco: Harper & Collins, 2006), 31.


Zeisu a thahlup khit uhteh Khristian biakna kiam tektek hi, ci-in ngaihsun uh hi. Ahi zongin tua ci lo-in thu um mi khang zaw semsem hi. Koi bang hang hi ding hiam? Zeisu nungzui mite in cimawh dongtuak mite huhin Zeisu hong itna kilangsak uh hi. Leitungah Khrih a om lai-in zong tua bangin hong nungta hi. A nungzui khempeuh in zong tua bangin a nungta ding hong deih hi. Zeisu nung zui ding sapna a za mi tampi in Ama nungzui pah uh hi.

SUNDAY SEP. 4

AMA AW ZA


John 10: 1-5 sim in. Zeisu sawltakte i hihna tawh kizui-in bang hangin kimlepaam mite Zeisu kiangah va paipih ding thupi hiam? Koi bangin mite in Zeisu sapna aw a zak nadingun huh thei ding na hiam?

__________________________________________________________________________

__________________________________________________________________________

I theih ngei lo mi khat a awt awging sangin i lawmte’n hong hauisim ngaih zaw hi. Amah tawh kilawmtatna i neih khitteh muanna hong nei thei pan ding uh a, amaute in eite tungtawnin Tuucing Hoihpa hopihna aw za-in Amah nungzui thei ding uh hi. Mi khat peuh in Zeisu hopihna a zak nading i va huh ma-in ei mahmah in Zeisu aw i zak masa kul hi. Satan hong hopihna aw le Zeisu hong hopihna aw khentel siamna i kisam hi. Satan in Zeisu langpan tawntung hi. Satan in Zeisu tawh i kizopna khaktan nuamin nasem tawntung hi, cih mangngilh loh ding kisam hi. Ahi zongin mite in Pasian sapna aw a zak theih nadingun Pasian in eite hong zang thei hi. Siatna tawh kidim hi taleh, Pasian in a piansak nate, thupha tungtawnin Kha Siangtho tungtawnin mihingte hong hopih hi. Zeisu hong hilh bang mahin a lauhuai kidop ding thu in mittaw in mittaw lamhilh i bat khak ding kisittel kul hi (Matt. 15:14).

Bang hangin mi tampi in Zeisu kiang vazuan hi ding hiam? Bang hang hiam cihleh Zeisu mahmah in ama aa dingin nungta lo-in ama deihna nialin sila-in hong nungta hi. Amah bangin a nungta thei dingin a nunna hong guan hi. Tua hi leh mite in i sungah Zeisu mu ding uh hi.

Tuucing Hoihpa in amah kilangsak dingin hong sawl hi. Midangte in zong Ama nung a zuih nadingun mi zawn ding i hi hi. Kineihkhem lo gamtatna, itna in eite aa dingin a hong kipia Ama nunna kilangsak hi. Tua itna in pawlpi le mite tawh kizopna nawngkaisak kideidanna, kilangneihna khempeuh susia hi.


Koi bangin mite in Tuucing Pa aw a zak nadingun lampi na honsak hiam?

MONDAY SEP. 5

MI A ZONG DINGTE I HI HI

Luke 19:10; 9: 2; Mark 1: 17; Mang. 14: 6, 7 sim in. Hih tengin bang thupi khat pulaak ciat uh hiam? Bang sem dingin hong kisawl hiam?

________________________________________________________________________

__________________________________________________________________________

Kum tampi sung SDA pawlpi in hih bangin thungen hi: “ Topa aw, ka pawlpi sung uh leh nangma kiangah mi tampi hong lut ding in thu kong ngen uh hi.” Sepna khat zong om lopi-in sik-hup bangin pawlpi in mi hup dingin lamen kha uh hi ding hi. Pasian lunggulhin Amah mu dingin Ama makaihna tawh pawl sungah hong ki-ap mi om mah hi. Ahi zongin pawl sung pan a paikhia mite le na kimlepaam pan kuamah in na biakna hong zui omlo ahih leh bang sem ding na hiam? Na pawlpi khan nadingin thungetna simloh bang mah dang semlo na hihleh Zeisu hong sawl bangin nasem lo mi na hi pah hi. Zeisu pen mi lakah kihel hi. Mi tawh kikhawl hi. A hot ding mi zong hi. Mi hong zuat ngak ding hi lo hi. Amau om omna munah i pai kul hi. Amaute kiangah i va pai kei leh hotkhiatna thu za ngei lo ding mi tampi om hi.”Ellen G. White, Christ’ Object Lessons, 229.

Hotkhiat nasep tawh kisai gentehna tuamtuamte:

( 1). Tuucingpa in tuubuk sunga om tuute nusia-in a mangthang tuu zongin paikhia hi (Matt. 18: 10-14). Tuute lam a khialh loh nadingun dal kul hi. Tuu i cih ciangin naupang zong hi thei, u hamte zong hi thei hi. A nungtolh tuute,Zeisu mah bangin, eite in a va zongin itna tawh Tuuhuang sung tunpih kik ding kisam hi. A mangthang mite zong dingin sawlna ngah i hi hi. I hanciam kul hi. “ Zeisu sep bangin sem lehang a gah at lo cih om lo ding hi.” Ellen G. White, The Ministry of Healing, 144.

Khritian thu-um hi khin mite kiang bekah a pai na hiam? Khristian hi nai lo Buddist, Muslim, Hindu cihte kiangah va pai-in Pasian thu gen ding hamsa hi lo hiam? Pawl dangte kiangah SDA thu va gen ding hamsa lua hi lo hi. Ahi zongin thu-um mi hi nailote kiangah zong va pai-in i gen ding kisam hi.

TUESDAY SEP. 6
LEI KIDAWH

Khat veivei pawlpi in kimlepaam aa dingin a sep theih bang a sep kul hi. Gentehna-in cidamna thu genna, innkuan sung kimakaihzia, sumzon zia, anhuan, puankhui cihte nei zelzel ding kisam hi. Pawl pua mite le pawl sung kizopna a om kul hi. Koi bangin kizom thei ding cih pen ngaihsut kul hi. Nang mahmah in nasep kul hi. “A vanglian mahmah Pasian aa ding nasepin mite itna le mite hong it theih ding omzia ahi hi.”Ellen G. White, The Ministry of Healing, 470.

Midangte in i pawl sung a lunglut nadingun pawlpi in geel kul hi. Mite lunglut theih ding na khat peuh geel kul hi. Pawlpi mite in Pasian it-in, mi tawh kilawmtatna a neih kul hi. Na biakinn ah lengla hong kikhawmte kin lo, don lo-in om lecin, kua mah hong kikhawm kik nuam lo thei ding hi. Pawlpi in a tangko thuman thute kuamah in pom ding thei lo uh hi. Bang hang hiam cihleh pawlpi mite in kikhelna taktak nei nai lo uh hi. A kikhel khat le nih a om sunsunte pawlpi sungah kimu nawn lo hi. Kikhelna nei lo pawlpi mite in pawl hong lut thak mite tungah koi bangin huzaap uh hiam? Vantung thuman thutak in amaute aa dingin bang mah kilamdanna nei lo hiam? Ellen G. White, 6T., 371.
Luke 19: 1-10 sim in. Bang hangin Zacchaeus in Zeisu mu dingin theithek tungah kahto ding kisamsa hi ding hiam? Hih in nuntakpih ding bang hong hilh hiam?

_________________________________________________________________________

_________________________________________________________________________

Zeisu pai nading lampi a khak mite in Zacchaeus in Zeisu mu ding a lunggulh bangin amau zong lunggulh uh henla, Honpa kiangah Zacchaeus “mawhnei mipa” va paipih uh hi zaw leh, bang a ci diam cih ngaihsun in. Zeisu kiangah a om mite in Zeisu neih itna in a lawh kul a, tua itna in midangte hawnsawn nuam hamtangsak hi. Pasian hehpihna kisam mawhnei mi i hihlam kitel taktak a, Pasian hong itna a phawk mi in a mangthang mite don lo-in a om kei ding hi. Zeisu kiangah mi va puak hamtang ding hi.

Koi bangin pawl hong lut thak mite tawh kizopna na nei hiam? Amau hong hopih masa kei taleh, nang na hopih masa hamtang hiam?Ahih kei leh a thei lo na kineih lel hiam? Kei tawh kisai kei, ci-in kipengsakin midang khat peuh na khiat hiam? Hih tawh kisai-in na kipuahphat ding a om hiam?

WEDNESDAY     SEP. 7

SAPNA AW

Jesuh le a nungzuite in natna neite a damsak khit uhteh tawntung thute hilh uh hi. Ellen G. White, The Ministry of Healing, 20. Mark Finley in hih bangin hong hilh hi: Pasian thu i hilh kei leh i Pasian thuzuihzia a khial hi.” Jesuh in mite kitangsap lian pen tawntung nunna pia hi. Hih in Ama nasepzia ahi hi. Hih in damsakna taktak hi. Pumpi taksa damna bek in damna taktak hi lo-in, Khrih sungah nunna ngahna in damna taktak hi. Khrih damsakna ngah dingin mi a sam hi bek lo-in damna ngah takpi pah uh hi. Jesuh hong piak thuphate ngah dingin itna tawh mite hilh in. Thupha, damna ngah ding pulaak nuamsa-in Jesuh nung a zui ding pulaak nuam lo cih pen thuman hi lo hi. Mite kiangah Jesuh thu hawmsawn lecin Ama nungzuih nopsakna na nei ding hi.

Midangte tawh na kimeltheih khit ciangin na upna thu le Topa na neihkhak thu pulaak ding ngaihsun in. Pasian thu kup ding lampi zong in. Amau innkuan thu, a nasep uh, a biakna uh cihte dong lecin tua in holimkhopna kipatna hong hipah ding hi. Mimal kimu-in kikupna in vanglian mahmah hi. Thugen zuahzuah cih bang hi lo-in, a thu-in genkhiatna ahih manin mite in ngai thei zaw uh hi. Jesuh in na nuntakna ah a nasepzia, nang mahmah in na thuak khak thute pulaak masa hamtang in.

Sawl. 26: 11- 27 sim in. Paul in a thuak khak thute Kumpi

Agrippa tungah pulaak hi. Hih thupiang in midangte tungah Jesuh thu pulaak ding tawh kisai bang hong hilh hiam?

__________________________________________________________________________

__________________________________________________________________________

Paul in Jesuh a theihma a nunzia pulaak masa hi. Tua khitteh a kikhelna thu le a kikhel khit Pasian in ama tungah a piak thute pulaak hi. Tua teng khitteh Agrippa tungah thuumna khat nei hi.


Paul bang na hi kei zongin na nuntakna ah Zeisu Khrih na tuahkhak thute midang tungah bang hunin na hawmsawn hiam?

THURSDAY SEP. 8

ZONG IN. NA ZON LEH NA MU DING HI

Mang. 3: 20; Matt. 7: 7, 8; John 1: 12 sim in. Koi bangin hih mun thum teng in kizopna nei hiam? “Topa a zong mi in Topa mu hi’ cih thu a khiatna bang hi ding hiam?

________________________________________________________________________

______________________________________________________________________

Khrih sungah hong nuntak nadingin nget kul, zon kul hi. Lamkhat panin Zeisu in kongkhak ah dingin kong ka hong kiu hi, ci hi (Mang. 3: 20). Kongkhak ah dingin kongkhak kiu cih thu in lungsim kong khak i hon ding kisam hi, cih hong hilh hi. Hih thunihte a kitukalh hi lo hi. Mihing in a phawk kha kei zongin Ama kiang zuan dingin Kha Siangtho in mihing lungsim ah nasem tawntung hi. Mihing in hih leitung' piak theih loh nate lunggulhin kizong ciat hi. Tua i zon thute mu dingin lampi hong kihilh ahih manin a hampha mahmah mite i hi hi.

Mite in Zeisu a muh theih nadingun Zeisu in nangma tungtawnin kongkhak hong kiu hi. Kongkhak a hon mi khempeuh in Zeisu le a thuphate ngah ding hi ( Mang. 3:20; John 1: 12). Tham lo-in a nungzui khempeuh tungah ‘ngen un. Zong un. Kongkhak kiu un. Tawntung Gam thupha na ngah ding uh hi, ci-in hong hilh hi (Matt. 7: 7, 8).

Mi khat in Zeisu aa dingin a lungsim kongkhak hon hi, cih Kha Siangtho tungtawnin theihtelna na neih leh, tua mi tawh thungen khawm in. Tui kiphum dingin kuppih in. A nuai-a bangin amah tawh thungen khawm in: “ Topa aw, mawhnei mi ka hihlam ka thei hi. Mawhmaina ka kisam hi. Ka mawhna hangin nong si hi. Ka mawhnate ka nusia nuam hi. Ka sungah nungta dingin Nang kong sam hi. Nang mah ka Topa, Honpa, kong muang hi. Kong zui nuam hi”ci in.

Tui kiphum hun le a hun lo khentelsiam dingin Kha Siangtho makaihna kisam hi. A hun nailo hi kha leh lauhuai hi.Topa aa ding khentatna mimal in a neih ding kisam hi. Ahi zongin Topa itin Ama nung zui dingin a khensat nadingun makaih kul hi. Mi kimkhatte in tawntung sihna le nunna khen zo lo uh hi. Tua dingin Pasian piak tavuan i nei hi.

FRIDAY SEP. 9

SINBEH DING: Late 77: 20; Hosea 11: 4; 2Kor. 5: 11 – 21; Ellen G.White, “ Tuaching and Healing” 139 – 146; “ Help in Daily Living,” 469 – 470 in The Ministry of Healing.” This Man Received Sinners,” 185 – 197; “ Go Into the Highways and Hedges,” 228 – 237 in Christ’s Object Lessons.

Topa a it, mi tungah Ama thu gen nuam a sa mahmah khangno khat om hi. A kikhel, a lawp ahih manin picing takin teci pang hi. Mite in ama thu gen zaknopsa uh hi. Ahi zongin hih khangno in kisapna khat nei hi. Mite in Zeisu umin tui kiphum dingin a khensat theih nadingun makaih thei lo hi. Pawlpi mite in zong lamdangsa uh hi. Bang hang hiam cihleh amah pen hangsan takin thugen hi-in, laulo-in a upna a pulaak ngam khat hi. Bang hangin khensatna ngen lo na hiam, ci-in a kidot takteh “tua bang siamna ken nei keng,” ci-in dawng kik zel hi. Khaici tuh ding bek a ut, midangte in at uh hen, cih lungsim nei hi. A taktakin hih thugenpa in tua bangin khensatna ngen henla, mite in nial kha leh, ci-a lau manin khensatna ngen ngeilo hi gige hi. Topa aa ding a nasepna lawhcing kisa lo ahih manin ( Ei le ei kicing kisak loh bel thu hoih hi na ven) Jesuh kiang ki-ap ding ngenin kuamah ki-ap kei leh cih ngaihsun kha den hi. Mi kim khat in Zeisu aa ding nasep i cih pen ei mihingte thu a gen hi lo-in Zeisu thu hi zaw hi, ci-in hanthawn zel uh hi. Mihingte i hih leh a kicing kuamah om lo hi. Mi aa ding thu i ngetsak thei-a, Zeisu tungah a ki-ap nadingun itna tawh mite i makaih theih hangin Kha Siangtho sep ding mihing in i khengkhia thei kei hi. Kha Siangtho bek in lungim khelin, upna guan hi. Mihingte i hih leh Pasian itna mi tungah kilangsak dingin Pasian khutzat i hi bek hi.


KIKUP DING DOTNATE:

1. Zeisu Khrih tungah ki-ap dingin mi khat ii khensatna a ngen ngam lo mi khat tungah bang thu na pulaak diam?
2.   John 1: 9 ah “ Tua Khuavak in leitunga piang mi khempeuh a taankim Khuavak taktak ahi hi.” Koi bangin hih kammal in Zeisu in mi khempeuh honkhia nuam ahihzia pulaak hiam?

3.   Kikhop hong sim mite hoih takin na pawlpi in a don hiam? Koi bangin lengla, kikhop sim cihte tungah na lungdamna pulaak ding na hiam?

4.   A vakthap mi khat biakinn ah hong pai ngei hiam? Koi bangin pawlpi in mu hiam? 

To get the latest update of me and my works

>> <<