MUC

Print Friendly and PDF

Monday, June 20, 2016

LESSON 10 | AUGUST 27 – SEP. 1

LESSON 10                     AUGUST 27 – SEP. 1

                   ZEISU IN MITE MUANNA NGAH




SABBATH NITAK

TU KAAL SUNG SIM DING: Pian. 15:6; Gam. 14: 11, 14; 1Kor. 3: 1-9; Dan. 6: 1-3; Neh. 2: 1-9; Thkna. 4: 1-9; Sawl. 2: 42 – 47.

KAMNGAH: “ Ahih hangin Ama thu kizel semsem a, thugen ngai dign le a natnate uh ama damsak ding ut in mi honpi a hong kikhawm uh hi” (Luke 5: 15).

SDA pawlpi khat in sanginn khat ah sangkah hun sungte sangnaupangte zingan vak hi. Gam sung thukhun in biakna le gam ki-ukzia gawm lo ding ci uh hi napi, sangkah sangnaupangte biakna tawh kipantah ding phal bilbel uh hi. Tua bangin hih sanginn ah biakna tawh sangnaupangte pantah dingin SDA sia sim loh kuamah dang phal lo uh hi. Hih sanga nasem sia pa in sangnaupangte in lungsim ngaihsutna, pumpi cidamna, biakna a kin nadingun pantah hi.

“ Sangsiapi pa in pastor kiangah “ na pawlpi tawh nasepkhop nuamsa mahmah ing. Hampha kisa ung. Pawlpi dangte zong no bangin nasem le-uh ut ing,” ci-in SDA siapa a pahtaakzia pulaak hi. Pastor pa in zong Sabbath ni ciangin biakinn ah kikhawm dingin sangsiapi pa zawn hi.


SUNDAY AUGUST 28

MITE MUANIN NUNGTA

Zeisu in deihsakna nei-in hehpih a kitangsap uh huh ahih manin mite in muang mahmah uh hi. Muanna tawh kisai Lai Siangtho sung mun tampi ah kimu thei hi. Hebrew laimal ‘amn’ kizang a, hih kammal panin ‘amen’ hong piangkhia hi. Kip tawntung, kikhel ngeilo, muanhuai cih pulaak hi. A muanhuai, a up ngam huai thu cihna hi. Pasian upna, muanna ahih kei leh thuman thutak a pulaak kammal in zong kizang hi. Khrih nunzia en lehang mi honpi in Khrih tungah a lungsim uh kinga-in amah bek mah muanna, lunghiang lo-in Ama tungah cihtak uh hi. Bang hang hiam cihleh Khrih in mite lakah kihelin hehpih, itin amaute huh hi.

Pian. 15: 6; Gam. 14: 11; Isa. 7: 9; Hab. 2:4 sim inla, koi bangin muanna le upna pulaak hiam?

____________________________________________________________________

___________________________________________________________________

Hebrew laimal “amn” le Greek laimal ‘pistis’ in upna, muanna, lungkipna, lametna, muanhuaina, thuciamkip a pulaak kammal hi. Tua bang mahin mi honpi in zong Zeisu tungah muanna, upna, lametna, cihtakna nei uh hi. Bang hangin mite in Zeisu tawh bang kizopna nei hiam cih leh Khrih in amaute hehpih, it, huh, amaute nasem hi. Muanna, upna i gen ciangin a hoih lo thute muanna, upna zong hi kha thei hi (Micah 7:5; Late 118:9). Pasian tawh kizopna a pulaak ciangin kammal hoih hi thei hi. I Topa nunzia bangin a nungta ding, mi tawh kikhawl, hehpih ding, huh, lainat dingin Topa hong sawl i hi hi. Tua bangin i nuntak ciangin mite in hong muang ding uh a, mi muanna na ngah tak ciangin Zeisu Khrih le a nasep kilangsak zaw in.


Mi khat in upna man i cih in bang tawh kibang ding hiam, ci-in hong dong leh, bang na dawng ding hiam? Bang hangin tua ci dawn ding na hiam?

MONDAY AUGUST 29

A SIA, A PHA KHENTEL THEI

Africa gamah SDA pawlpi khang mahmah hi. Bang thusim hang hi ding hiam? Pawlpi makaite in bang mu khia uh hiam cihleh SDA thu-um mite in kimlepaam tawh kizopna hoih nei-in khua le tui aa dingin deihsakna tawh na hoih tampi sem hi, cih mukhia uh hi. Gam makaipi president in SDA pawlpi nasepzia hong za hi. Amah zong Adventist kikhopna khat ah va kihel hi. SDA pawlpi nasepziate hangin pawlpi a pahtaakna pulaak hi.

Zeisu Khrih a kilangsak dingte i hi hi. Ama sawltakte i hi hi. Tua hi-in mite in hong muan ding, hong up ding uh kisam mahmah hi. Amau hong muanna, hong upna panin amaute Zeisu kiang i va tunpih ding kisam hi. Eite pen Pasian khutzatte i hi bek hi. Mite in i nuntakna ah Zeisu nunzia –itna, deihsakna, hehpihna, kiniankhiatna, a pha bawlna cihte mu ding uh hi. Tua hi leh amaute in a zak thute um thei ding uh hi. Ei le ei kisittel lehang mawhnei kicinna nei lo vive i hi hi. I sungah mite deih loh zia le tong i nei kha zel hi. Tua hi-in Zeisu kiang tun nading lampi i hilh tawntung ding kisam hi. Amah bek mahin kuamah lungkia sak ngei lo hi. Mihing ahih leh mite lungkia-sak pah hi.

1Kor. 3: 1-9; 5:1 sim in. Paul in pawlpi tawh a kizopzia bang pulaak hiam? Pawlpi mite pawlpua mite samin, kikhawm uh henla, tua munah Paul thugen a za uh hileh kikhawmte in bang a mu uh diam?

_______________________________________________________________________

_______________________________________________________________________

Pasian na a sem dingin kicinna nei i hi kei hi. Pawlpi zong kicinna tawh kidim hi lo hi. Ahi zongin mite muantheih, upna theih mi picing i hih ding kisam hi. Zeisu bangin hehpihna nei-in, mite aa ding nasem lehang, mite in hong muang ngamin, i gen thute za thei pan ding uh hi. Kimlepaam ah Khrih hong itna pulaak hi lehang pawl sung buaina, khat le khat kitot kiselnate veng ding hi.

Pawl pua mi khat na biakinn ah hong kikhawm leh bang a mu diam? Teci hoih na hi zo diam?

TUESDAY AUGUST 30

GUALHUAI-NA

“ Hauhna sangin min hoihna deihhuai zaw a, kham le ngun sangin mi’ hong thusimna deihhuai zaw hi” (Pau. 22: 1). Hih kammal in koi bangin kimlepaam mite aa ding teci hoih hihna tawh kizopna nei hiam?
_________________________________________________________________________

_________________________________________________________________________

Sumkholna munte ah sumkhol lehang summeet khangkhang hi. Sum bek hi lo, mihingte khat le khat kizopna, thupha bawlna cihte zong sum tawh kilei zo lo-in manpha mahmah hi. Khua sung upa makaite tawh khua sung kitangsapnate kikum khawmin pawlpi in a huh theihzahin mapan ding kisam hi. Sumkholna muna sumkhol bang mahin mite kician takin kizopna zong manpha mahmah hi. Mi tawh kizopna a kip zaw semsem dingin hanciam kul hi. A kip, a kho kizopna in sum tawh kilei zo lo van mahmah khat hong suak hi.

Church Manual ah “ SDA thu-um mite in gammi hoih khat hi, ci-in mite hong muh dingin, a hoih nate semin, gamtat zia le tong hoih nei in” ci-in hong hilh hi. Kimlepaam hoih nadingin neih le lamh, sum le paai tawh nasem dingte i hi hi. A thuman ding, a thutak ding mite i hi hi.” Standards of Christian Living, 137, 138.

Lai Siangtho sungah Zeisu nunzia banah eite etteh dingin Pasian mite nasepzia kimu thei hi. A nuai-a Lai Siangthote sim inla, thu-um lo mite tawh kikholhna hoih bang pulaak hiam?

Sawl. 7:9, 10; Pian. 41: 38 – 45___________________________

Dan. 2: 46 – 49; 6: 1-3 __________________________________


“Amaute bangin i nungta kei zongin Lai Siangtho hong hilh thu lianpi bel in: mite aa dingin gamtat hoih, gamtat pha nei dingin hong hilh hi. Pasian a bia lo mite in i sungah, i nuntakna ah diktatna, cihtakna, thumanna, a sia a pha khentel theihna, kulhkalna, cihte a muh tak uhteh a nungta Pasian mu-in bia thei ding uh hi.” Ellen G. White, Patriachs and Prophets, 217, 218.

WEDNESDAY   AUGUST 31


MIHING MANPHATNA

Pawlpi in kipiak khiatna le sumpi tawh nasemin mainawt hi. Pawlpi nasepna ah mihing in manpha mahmah hi. Mi ngah nading nasep in pawlpi nasep lianpen hi. Lokho mite khat le khat kikhawhlawm uh hi. Hih in sepkhopna ahi hi. Tua bang mahin pawlpi sungah zong nasepkhopna kisam hi. Tua hileh pawlpi in matun ding hi.

Neh. 2: 1-9 sim in. Kumpi Artaxerxes in Pasian piak lungmuanna a ngah manin bang thu kimu hiam?

_____________________________________________________________________

____________________________________________________________________

“Nehemiah in a nasepna ah a kitangsapnate a pia zo ding mite kiangah ngen hi. Thuman thutak nasepna dingin Topa Pasian in mite lungsim ah piaknopna lungsim na guan hi. Topa aa ding nasemte in piakkhiatna ah kulhkal, citak uh hi. Piakkhiatna a hat mi kimkhat Khrih upna nei-in, a kammalte a thei uh hi pah khol lo uh hi. Ahi zongin tua bangin a kipiaknate uh nial ding hi lo hi.” Ellen G. White, Prophets and Kings, 634.

A lamdang mahmah thu in Ama nasep a kizawh nadingin Pasian in amah a bia lo mite sawl hi. Hih in a thupi thu khat hong hilh hi. Upna kibang hi ta kei leh mite tawh nasepkhopna in Khrih nasep mainawtsak hi. Ahi zongin kimlepaam aa ding upna kibang lo mite tawh na hoih sepkhopna-ah kidawmin, Topa tungah ki-apna tawh mapan ding kisam mahmah hi. Kumpite, khua sung makaite, sumbawl nasemte in zong tua bang nasepte ah kihel uh hi. Tua bangin huhna hong kipiate sangpah ding, nial pah ding cih pen kidop kul hi. Khensatna khat peuhpeuh na neih ma-in, a mun le a hun, a thu tawh kizui-in khensat siam ding kisam hi.



Khua le tui aa dingin mi tawh nasepna in bang zahin manpha hiam? Koi bangin kimlepaam mite tawh nasem khawm thei ding na hiam?

THURSDAY SEPTEMBER 1

MITE MAIPHA NGAH

Topa in thuman tampi hong pia hi. Singlamteh, biakbuk, misite omzia, Sabbath, Kidona Lianpi cihte a kipan Pasian in thuman hong lak hi. Midang tungah hopsawn ding cidamna, damsakna tawh kisai thuman i ngah hi. Cidamna thuman in kimlepaam mite kiangah thuman teci panna dingin vanglian mahmah hi. Pawlpi thu up thute a awlmawh kei zongun cidamna thute hong sang thei uh hi. Cidamna tawh kisai thute in upna thuman pulaak theihna ding lampi hoih hong suak hi. Zeisu in “ Tampi a kipia mi tung panin a tam zaw kisikkik ding a, tampi a ki-apte tung panin a tam zaw a kingenkik ding hi” ( Luke 12:48). Eite tungah tampi hong kipia hi.

Thkna. 4: 1-9 sim in. Topa in tua hun a mite zuih ding bang thu piak a, tuhun aa dingin bang hong hilh hiam?

___________________________________________________________________

_____________________________________________________________________

Hun khat lai-in SDA pawlpi khat in bang kidong uh hiam cihleh “zan khat thu-in i pawlpi beimang leh, i kim i paam mite in hong phawk (hongh) uh diam? Hong phawk, hong hongh kha mahmah kei unteh, ci-in kidawng kik hi. Tua mite in hih pawlpi sungah muanna nei lo hi. Tua leh mite kizopna a khaktan thei na khempeuh susia-in mi tawh kizopna hong hanciam uh hi. Tua bangin mipi tawh nasepna tawh kidop ding thu-te zong phawk huai hi. Thuman thuman niamkoih ding hi tuan lo hi. Kimlepaam mite aa ding nakpi-in nasep hong kipan uh hi. A sawtlo-in hih pawlpi hong kikhel hi.

Sawl. 2: 42 – 47 sim in. Koi bangin pawl sungah thu-um mi kibehlapna le mi khempeuh ii maipha ngah cih thu kizopna nei hiam? Sawltakte hun lai pawlpi le tuhun na pawlpi enkak in.

FRIDAY Sept. 2
SINBEH DING: Mark 5: 18- 20; Luke 8: 38; Sawl. 5: 12 – 16. Ellen G. White, “ Our Example” in The Ministry of Healing, 17 – 28; ‘ The Grace of Courtesy” in 3SM., 236 – 240; “ Blessing the Children” in The Desire of Ages, 511 – 517; “ Relieve the Oppressed” in My Life Today, 242. Kimlepaam hoih nading, mite aa dingin mimal, pawlpi hi taleh midangte tawh na sepkhop theihna ding lampi tuamtuam om hi. Kimlepaam, khua sung in bang kisam pen a, pawlpi in bang ciang sem zo ding cihte theih masak ding kisam hi. Koi bangin pawlpi in mite’ muanna ngah zo ding hiam? Pawlpi in mite muan, zahtakna a ngah ciangin kimlepaam tawh kizopna hoih thei pan ding nasepna picing thei pan ding hi. Pawlpi in Zeisu khekhap a zuih laisiah a nasep khempeuh ah gah hoih at lo-in a om kei ding hi.” Ellen G. White, The Ministry of Healing, 144. Pawlpi in na hoih sepna tungtawnin mi bang zah in thuman mu thei din cih pen Pasian bek mah in thei hi.

KIKUP DING DOTNATE:

1.    Zeisu hong hilhkholh thu siksanin, Matt. 10: 22 – Keima min hangin mi khempeuh hong muhdah ding uh hi. Ahi zongin a tawp dongin a kip mi in hotkhiatna ngah ding hi, cih thu le min hoih ngahna le kimlepaam tawh na hoih sepkhop, koi bangin tonkhawm hiam? A kibang lo hih thunih koi bangin pomkhawm thei ding na hiam?

2.    Upna man i cih in koi bang hiam? Zeisu Khrih sungah upna man taktak nei i hih leh, upna man nei lo mite tawh i kilamdanna a om diam?
3.    Upna kibatpih lo mite in huhna hong piak uh leh kidop kul hi. Ellen G. White in zong upna kibatpih lo mite tung pan pawlpi in maipha ngah ding zong kisam hi, ci-in hong hilh mah hi. Ahi zongin pawlpi in zu zuakna, nasep hoih lote tung pan huhna langpan hi. Tua bang huhna in hamsiat kihel hi; sisan baang sum hi. Na hoih sep nading ngimna tawh hong kipia sum hi phial mah taleh, koi bangin sanhuai le sanhuai lo (a hoih le a hoih lo) khentel thei ding na hiam? 

To get the latest update of me and my works

>> <<