MUC

Print Friendly and PDF

Monday, June 20, 2016

LESSON 1 JUNE 25 – JULY 1

LESSON 1   JUNE 25 – JULY 1

                    NA KHEMPEUH KIPUAHPHATKIKNA


SABBATH NITAK: TU KAAL SUNG SIM DING: Pian. 1: 26, 27; 3: 8 -19; Thkna. 6:5; 12; James 4:4; Gal. 4:19; Mk. 2: 1- 12; Jn. 10: 10.

Kamngah: “Tua ahih ciangin Pasian ama lim bangin mihing piangsakin, Pasian’ lim bangin amah a piangsak hi. Amah in pasal le numei a piangsak hi.” Piancial 
1:27.
Kim le paam, leitung omzia, nate omzia, mihing’ nunzia, ei mahmah ki-en lehang mawhna hangin siatna kimu pelmawh hi; langpanna, a kimu thei lo ‘kido-na lianpi khat’ om den hi, ci-in kimu thei hi. Tua hi mah taleh siatna, mawhna cih pen a tawntung a om ding hi lo hi, cih thu in lungdamhuai thu ahi hi; a sawt lo-in mawhna kici khempeuh beimang ding hi. Hih leitungah Khrih in mihingin hong nungta-in, mawhna hangin hong si banah, ‘ka hong pai kik ding hi,’ cih kamciam hong tun ciangin hih leitung na khempeuh kikhelmang ding hi. Leitung thak, Ama Kumpi Gam hong hi ding hi. “ Tua kumpite a maan laitakun vantung Pasian in a bei thei ngei lo ding kumpi gam a hong phut ding hi. Tua kumpi gam kuamah in zo lo ding a, tua gam in gamdang khempeuhte zogawpin a kip tawntung ding hi.” Daniel 2: 44.


Lamdanglua ding tua kipuahphatna! Khrih hong pai kik ciang bekin kipuahphatna kipan pan ding hi lo hi. Khrih sungah a nungta mi nahih leh na nunzia khempeuh a thak a suak hi (2Kor. 5:17). Tu mahmah a kipan Zeisu a suun dingin hong kigeelkholhsak hi (Rom 8: 29). Khrih in hong sam hi; vangliatna hong guan hi. Tua hi leh midangte zong a puahpha thei ding i hi hi.

SUNDAY JUNE 26

PASIAN' LIM LE MEL

Mihing a hong kipiansakcilin Pasian’ lim le mel sunin hong kipiangsak ahi hi ( Pian. 1:27). Liimlang ah ki-en lehang liimlang tungah i mel kilang hi. Liimlang pan i paikhiat khitteh i mitkha-in i mel i sa puakzia mu hi.

Pasian’ lim le mel in bang pulaak hiam? Piancil 1: 26, 27 sim in. Koi bangin Lai Siangtho in hong hilh hiam? Pian. 1: 31; Thkna. 6:5; 1Thess. 5: 23.

___________________________________________________________________

___________________________________________________________________

Adam le Eve a kipiansak a kipan numei le pasal nunzia ding om khin hi. Mihing in zawng panin a piang khia i hi kei hi. Pasian’ lim le meel sunin Ama hong piansak i hih manin ganhingte tawh a kilamdang i hi hi. Mihing in Pasian’ piansak hi, ci-in a nial mi in mihing’ manphatna a nial hi pah hi. Pasian in mipa bawlin Adam ci hi. Numei le pasal in kibatlohna tampi nei hi. Ahi zongin nupa-te in sa-khat, pum khat hi. Numei le pasal in Pasian’ lim le mel limcing hi. “Pasian’ lim le mel in nuntak buppi huam hi. Adam in Pasian khut sung panin pumpi taksa, lungsim ngaihsutna le amah a Piangsak Pa theihna tawh kidimin Piangsak Pa’ mel taktak a pua mi hong suak hi.” Ellen G. White, Education, 15.

Hebrew laimal 'tselem’ a khiatna in lim le mel cihna hi. Kisuun cih kammal Hebrew pau-in “Demuth” kici hi. Hih laimalte gel in a kimu thei pumpi taksa le a kimu thei lo lungsim ngaihsutna pulaak hi. Ellen G. White in “Pasian’ lim le mel sunin mihing kipiangsak hi,” a cihteh pumpi taksa, gamtat zia le tong in Pasian suun hi, ci-in hong hilh hi. Thuhilhkikna 6:5 ah mihing’ omzia le pianzia pulaak kammal pawl khat kigelh hi. ‘Kha’ cih kammal in ngaihsutna lungsim, 'hatna’ cih kammal in pumpi cihna hi. Paul in zong tua bang mahin gen hi. 1Thess. 5:23. Pasian’ lim le mel sun a kibawl mihing in pumpi le lungsim kigawm pum khat sa- khat hi. Hih nih kigawm ciangin mihing i hi hi.

Piansak nate le ganhingte tawh kilamdangin hong kibawl ahi hi. Bang mah dang tawh tehtheih hi lo hi. Bang hangin hih thu phawk tawntung ding thupi hiam?


MONDAY JUNE 27
MAWHNA LE MAWHNA OM A KIPAN

Mawhna om kipat le na khempeuh a kipiansak khit zawh kikal bang tan hun sawt cih pen Lai Siangtho in hong hilh lo hi. Ni bang zah, kal bang zah, kum bang zah sawt a thei kuamah om lo hi. Ahi zongin a kithei thu khat om a, tua in: mawhna om takpi a, mawhna om a kipan na khempeuh in siatna manawh pah hi. Adam le Eve in nek dingin kiphal lo thusia le thuhoih a phawk sak thei singgah a nek manun guaktangin a om lam uh kiphawk pah uh hi (Pian. 3:7). Pasian muhna panin kisel uh hi. Amaute pumpi a tuam khuavak in taisan hi (Ellen G. White, Patriarchs and Prophets, 57). Siatna nungzui-in mawhna tawh kikhawlkhawm uh ahih manin Pasian tawh maitang kimu-in kikholhkhopna taan pah uh hi. A bawl uh mawhna hangin a piang thute tu-in tuakkha pah uh hi. Tua pen Pasian in a thuhilhna ahi hi.

A nuai-a Lai Siangtho munte sim inla, Adam le Eve in a tuahpah uh siatnate pulaak in.

1.               Pian. 3: 8 – 10: ___________________________________

2.               Pian. 3: 12   __________________________________

3.               Pian. 3:13    __________________________________

4.               Pian. 3: 16   ___________________________________

5.               Pian. 3: 17 – 19 _________________________________

Mawhna om takpi hi; bangci bangin mawhna hong om thei cih i tel

loh hangin mawhna hangin siatnate thei lo-in i om kei hi.


Ni khat ni ciangin mawhna, siatna khempeuh beisiang ding a, mawhna, siatna om kik ngei nawn lo ding hi, cih kamciam in bang zahin lungdam huai hiam?

TUESDAY JUNE 28

KILANGNEIHNA LE KILEMNA

Pian. 3: 14, 15 sim in. Pasian in Gulpi tungah “ Nang le numei kikal na suanlekhakte le ama suanlekhakte kikalah kilangneihna ka omsak ding hi. Amah in na lutang hong sunim ding a, nang in ama khetul na sunim ding hi,” a cihteh a khiatna bang hi ding hiam? Bang lametna hong guan hiam?

____________________________________________________________________

____________________________________________________________________

Hebrew laimal in ‘kilangneih’ cih kammal in ‘mudah’ cih kammal tawh kibang hi. Adam le Eve in sia le pha theihna singgah a nek manun mi khempeuh in Pasian tawh kilangneihna hong tun hi (Rom 5: 10; Kol. 2:21; James 4:4). Pasian tawh kizop kik theih nading kamciam hangin Pasian langpan nawn lo-in Satan tawh kido i hi hi. Pasian in Ama kumpi gam thukhun thuman siksanin mawhna pan i suahtak nading lampi hong bawlsak hi. Eite in Pasian gal ahi kim lai hong kilemsak hi. Mawhna hangin mihing in i sup, Pasian tawh maitang kimu-in kithuahna a ngah kik ding i hi hi.

Koi bangin a nuai-a Lai Siangtho in Pasian tawh kilemkikna pulaak hiam? Siam. 1: 3, 4; 1Kor. 5:7; 1Jn. 1:9.
____________________________________________________________________

____________________________________________________________________

Hih thu tawh kisai-in Lai Siangtho thuthuk kan mi pawlkhat in sepkhialh bawlkhialh khat puahpha, bawlpha ci-in pulaak uh hi. Mi khat in siatna a sep leh, a sep bangin thaman ngah ding hi. Mi khat in midang khat tungah a piak ding leiba a neih leh a leiba a piak kul hamtang hi. Mi mawh i hih manin Khrih’ sihna in mawhna thaman, sihna pan suahtak nading lampi hong bawlsak zo hi. Ei thuak ding khempeuh Zeisu tungah kisuanin Khrih in hong thuaksak hi. Mawhna tawh a kidim hi mahta leng i mawhna khempeuh hong maisak hi. Ama mai-ah mawh nei lo-in hong hi sak hi. Hih thu siksanin mawhna om ma hunlai bang mahin na khempeuh kibawlpha ding hi (Sawl. 3: 21).

WEDNESDAY JUNE 29 
JESUH SUNGAH KIPUAHPHATNA

“Taneute aw, note in Khrih’ pianzia bang na neih dong uh, naupaii nupi in ta a suah ding a gimpih bangin note ka hong lunggimpih ding hi.” Gal. 4:19. Mihing a hong bawlcilin kicinna tawh kidim-in kicinna tawh kidim leitungah kikoih hi. Tua hi napi mawhna hangin tu-in leitung le na khempeuh sihna, natna, lau-na, gimna tawh kidim hi. Mihing in a Bawl Pasian mangngilh hi. Mawhna pan tatkhiatna in piancil lai hun hong ngah kiksak ding hi. Pasian tawh maitang kimuh theihna, sih nawnlohna i ngah nadingin Khrih in leitungah hong pai hi.

“Pasian in mihing a hong bawlin Ama mel bang linlianin hong bawl hi. Siamna, hih theihna tuamtuam tawh hong tuam hi. Mihing in a ngaihsutna khempeuh kicingin, siatna kici khat beek nei lo hi. Ahi zongin mawhna in kicinna khempeuh susia hi. Mawhna in mihing tunga om Pasian’ mel mualsak, melhemsak hi. Si nawn lo ding nunna ngah theih nading lampi hong kibawlsak khin hi. Pasian hong hehpihna hangin nunna hong kipia khin hi. A kicing nunna, mawh nei lo nunna i ngah kik ding hi. Na khempeuh a hong kipiansakna thu in zong hih thumah ahi hi. Ellen G. White, Patriarchs and Prophets, 595. Khrih hong pai kik ciangin a si lo ding nunna hong om pan ding hi. Tu-in tua nunna tawh a nungta dingin a kipan pan i hi hi.

Gal. 4:19 sim in. Paul in bang lunghimawh hiam? Bang thu hong hilh hiam?

______________________________________________________________

______________________________________________________________

Khrih in Pasian’ lim hi (Heb. 1: 13). Mihing a hong kipiansakcil lai-a Pasian’ lim a kingahkik theih nadingin Khrih in eite tawh hong nungta khawm nuam hi. John 14:9; 2Kor. 4:4; Kol. 1:15 sim in. A lungsim kongkhak a hon mi khempeuh sungah Khrih omin, Pasian tawh minthanna ngah khawm ding hi (Kol. 1: 27). Khrih hong pai kik ciangin Pasian’ lim le mel i suun taktak ding hi (1Kor. 15: 49; 1Jn. 3:2). Tua ni hong tun nai loh hangin, Khrih in eite sungah omin, eite in Khrih sungah i om leh tua nunna i sungah a hong kipan pan hi.

Tu-in tua tawntung nunna tawh i nuntak nadingin a kipanpanta a hih leh, bang hangin Khrih hong pai ciang bekin tua nunna tak tawh nungta pan ding i hiam?

THURSDAY JUNE 30  
PUAHPHAT NASEP IN PAWLPI’ NASEP HI


Na khempeuh a kibawlcillai-in kicinna tawh kidim hi mah taleh mawhna hangin na khempeuh kisia hi. Ahi zongin Pasian in eite a kisiacip dingin hong koih lo hi. A taktakin na khempeuh kipiansakma nangawnin eite a hong kitatkhiatna ding geelsa-in om khin hi (1Peter 1:2). Eite a hong kitatkhiat nadingin Khrih mahmah in hih leitungah hong kumsukin, singlamteh tung khailupna thuak hi. Sihna pan thokikin “ ka hong pai kik ding hi,” ci-in hong kamciam hi. Na khempeuh beimang ding hi. Mawhna, siatna khempeuh beisiang ding hi. Tua khitteh na khempeuh a thakin kibawl kik ding hi. Tua bawlphat nasep sungah kihel dingin Pasian in nang le kei, pawlpi hong sam hi.Hih in lamdang mahmah hi lo hiam?

Mark 2: 1- 12 sim in. Pumzaw mipa Khrih kiang a tunzawh nadingin bang zahin hanciam uh hiam? Hih thu in puahphat nasep le tatkhiat nasep tawh kisai-in bang hong hilh hiam?

_______________________________________________________________________

_______________________________________________________________________

Inn sung khempeuh mi dim hi. Bang hang hiam cihleh tua munah Khrih om hi. Khrih in itna tawh kidim ahih manin tua bangin mite in ama kiangah om tawntung nuam uh hi. Cina pa in pumpi , lungsim, upna cidam nadingin mi li in innkhum zang vangsakin Khrih mai san tak ah cina pa koih suk uh hi. Tua leh, Khrih in cina pa mawhmai-na, lungnopna pia-in, a lupna pan tho-in lampai dingin thupia hi. Mawhmai lo-in kua mahmah in damna ngah lo hi, ci-in Khrih in pulaak hi.

Koi bangin John in leitungah Khrih hong pai-na thu pulaak hiam? Vantung kamciamte in bang lametna hong guan hiam? John 10: 10; 1Jn. 3:8 sim in.

______________________________________________________________________

______________________________________________________________________

John 10: 10 in SDA thupuak hi. Khrih hong sawl thute, Khrih’ pumpi ahi pawlpi masuan, Khrih nungzui-te’ sep dingte,sihna pan nunna hong pia thute pulaak hi (Sawl. 10: 38; 1Jn. 2:6). Pumpi, lungsim ngaihsutna le upna ah mihing in mawhna om ma a neih ngei Pasian’ lim le mel a nei kik nadingin Khrih tawh kopin pawlpi in nasem hi.

Kua bang mi in tu mahmahin na huh zawh dingte huhna kisam hiam?

FRIDAY JULY 1
SINBEH DING: Rom 8: 29; Kol. 1:15; 3: 9-11; 2Kor. 3: 18; 5: 17. Patriarchs and Prophets “ The Plan of Redemption,” 44 – 70.

Tatkhiat nasem ding, thupha bawl dingin Pasian’ sapna ngahte i hi hi. Lametna, upna nei-in mawhmai-in a kipuahpha dingin Khrih kiangah mite a va paipih dingte i hi hi. Pasian in lampi tuamtuam zangin Ama nasem dingin hong zang thei hi. Pawlpi kim khat in khua sung khantoh nadingin nasem uh hi; cidamna tawh kisai thusinna le zato cihte tawh nasem uh hi. Laisim theilote laihilh, phattuamna pia thei nasep tuamtuamte a kipan, cimawh dongte khantoh nading nasep tuamtuam tawh nasem pawlpi zong om hi. Hih bang dan nasepnate tungtawnin mite in tatkhiatna thuman mu thei-in, tua bangin pawlpi’ nasep in leitung kipawlna tuamtuamte sangin a bucing nuntakna, gamtat zia le tong hoih, kipuahphatna kisap lam phawk thei ding uh hi.

KIKUP DING DOTNATE:

1.      Tu laitakin na tual pawlpi in mite aa ding pumpi, lungsim, upna cidam nading a septe pulaak in. Kim le paam puahphat nasepna ah pawlpi in makaih ding hi.

2.      Koi bangin kim le paam puahin khangto cih thu na teel hiam? Bang zahin kim le paam puahin sep theihzah semta zongin Khrih hong pai nai kei leh tua nate in siatna veve manawh hi. Bang hangin Khrih hong pai ciangin na khempeuh kipuahpha ding hi, cih thu thupi semsem hiam?

3.      Tu laitak mahin eite sungah Pasian’ lim le mel puahphat a hong kipatzia cih thu na lawmte tawh kikum in. Tu laitak hun mahin Pasian’ lim le mel sun zaw semsem ihih leh koi bangin ki theithei ding i hiam? Tua bangin a hong kipuahphat nading bang hangin Pasian muhtelna kisam mahmah hiam? Dawimangpa in hong ze-etin gualzota leh lungkia lo-in koi bangin Pasian kiang lamzuanin mainawt ding na hiam? 

To get the latest update of me and my works

>> <<