MUC

Print Friendly and PDF

Sunday, June 12, 2016

KA MIDIK IN SAGIHVEI A TUK HANGIN THOKIK











( Jesu leh Satan kidona sungah Christian mimal khatbeek penglo hi. Hih taangthute pen lesson hoih ingah nangaa kagelh ahi hi. Kei computer in laituisan neilo hi. Tamlua a sate aading A, B ci-in khenbawl pong)
                                           A
Khalam tukna pen mikhempeuh sukkhak ahi hi. Mikhempeuh muh-a tuk om hi. Mi muhloh-a tuk zong a tamzaw hikha ding hi.   Pukna pen nakpi-in puktawh kibang napi puahkikna ol pawlkhat om hi. Mawhna pen ngeina bang aa nei Christian kitam mahmah hi. A thokiklo pukna khempeuh sihna Hell sung tunna ngentang ahi hi. SDA Signboard liimbel napiVantung Pawlpi laibu sazianah omlo tamzaw hi.
Ko kiangah 6:00AM simin Amazing Facts sermon Doug Batchelar in nei tawntung hi. Biakinn sung sangin kitelzaw ahihmanin kha-an  kivakna-in kanei den hi. Jesu pen Biakna makai khempeuh muitum ahi hi. Ama-thuhilhna a ngaite nangawn in mudahna thuaklawh hi. Ama teelsa Pawlpi or Minam sungah tazo lo hi. A gamtatna khempeuh kizuizen hi. Singlamteh atun dong khawllo hi. Mawhzong siamte pen Satan khutzat hi-a, mawhna teti pangngam thalakik ngamte pen Pasian tate ahi hi. 
Kawk baanglo vantung panin hong pai Pasian tapa ahi hi. Tua ahihmanin tua mipa kamuh kanuam a, kei thanemna kicinlohna , pholakin teti pang dingin kamaizum kei hi. Tua mipa khahsuah lo-in kadelh tawntung hi.
Laisiangtho pen Pasian leh satan kidona taangthubu cileng khiallo ding hi. Satan lungsim zuauthu leh angsung khualna tawh minam khempeuh huzaapin a suksiatna thu hong lak hi. Alanglam panin Pasian sianthona, thumaanna, itna leh hehpihna kidim a dikna tawh hong gualzawhpihna hong lak hi.  Lamkhat panin mihingte hoihna pen leikaang kizuut hankhuk bangin genteh hi. Mihingte siatna thaman pen lipkhaphuai Calvary singlamteh sihna tawh Jesu in hong lak hi. Jesu omlo hizenzen leh mikhempeuh Calvary sihna a thuak ding ihi hi. Eitaangin tua sihna kizozo hi. Tua thu simloh leitung nate EEK bangin kangaihsun hi, cise hi.
Paul in ama thanemna  panin Jesu hangaa gualzawhnate muibuntakin teti pang hi. Misiangthote kilamkikna hanthotna hoihpen suak hi. Khalam thuthuk theilote in mawhna alian leh aneu khen thei uh hi. Pasianmai-ah mawhna neulua omlo hi. Sawpsiang zawhloh ding mawhna lianlua zong omlo hi. A kisel khinkhian mawhna khempeuh Hell sungtunna hikhin siksek hi. C sungah bangzah M sungah bangzah ci-in ganaan tawh simtheih zong hizenzen lo hi.
Pasian maitang mutawh kibang
Cimawh zawngkhal takin kakawivak hi. Kei kawivak sungin kasanggam nihte pen Pasian naseem dingin na kicial khin uh hi. Ka khalam dinmun hong muh uh ciangin lungnuamlo-in lai hong khak uh hi. Lawm aw, lungneu kei in. "Mithumante in sagihvei a tuk hangin sagihvei thokik hi,"  kici hi, hongci den uh hi. Lungsim ut mahmah napi leitung silehsa in hong mengcip ta ahihmanin katho zo mahmah kei hi. Tua hanthotna awgingte zaza kawmmahin Lawki gualnopna sungah nuamtakin ka om hi. Zolaam kici khempeuh kalaam thei hi. Khuangtum cileng Lawki pupa ngeina khuangtum namkim katum loh omlo hi.
Zupi nunna munah khuangtumin laamin, lasa-in pukngaiingaii--in ka om laitakin, huansak lampi panin, Sia Elisha leh Pr Rualchina hong dingin kigal etkawmin kanui uh hi. Pasian maitang  bangin kamu hi. Kagei aapa kakhuang pia-in kadelh hi. " Pasian in naseem din hong deih hi, zingciang hong kikhawm in," ci-in hongzol hi. Ka kikhawm pah hi. Nipi kik ciangin, tui kiphum in, hong ci ngiau leuleu hi. Ka kiphum pah hi. Laisiangtho sangkah in hong cileuleu hi. Ka kithawi pah hi.
                                                   B
                                 KIHEHNEPNA HOIHTAWH.
Laisiangtho Saang katuak ngawngaw hi. Kasep nang munpen Yangon Alone ahi hi. Lawmte Yangon omnuam kituh uh hi. Keipen laucihtakin kalau hi. Amaute in  Yangon thupina leh omna-nuam  en uh hi. Ken kanasep masuan ding ka-en hi. Minam-neu, pilna neu Kawlkam nalzalzal lo khatpen bang suak ding citawh himawk. Pastor haute pen member khat cina-zatolum cihkhat omleh, neektheih cikhum bawngnawi tawi litliatin hawh uh. Thungetna sangin cinate lungsim malhsak zaw u. Ken bangtawh mai mu ding, ci-in kadah hi.
SDA sung katun aa kipan, Sia Phung Kai pen, Pa bang, Sanggam bangin thukohpen leh dotpen hong suak hi. Yangon paiding Tedimah kabang hi. Kikhop khit ciangin, hong ciahpih hi. Vaimiim hawp masa-in kaman uh ciangin thu hong ngetsak hi. Ama naseplai taangthu hong sutpih hi. A photo suante hong etpih hi. " Kei kipatna hibang hi ei. Hun khat ciangin kataten taangthu a mangngilh khak ding kalauna tawh hibangin a suang kahi hi," cingiat mawk hi. Midangte in, ahauh aliatna uh suang, aman kiniamkhiatna limte suang hi. A zi damlo hi. nau nih leh thum tawh hi. Vaimiim amahman su hi. Bawmlang tawh sing pua hi. Sunin kuan khia in Pasian naseem hi. Tudongin haksatna zawnna cihmawhna, simmawhna kathuak ciangin, tua hanthotna hangin khamuangtakin ka om hi. Christian te gualzawhna pen hibang hi hi.
Khalam thu-ah Layman leh Pastor kibang
Si leh sa tawh omlaiteng mikhempeuh thanemna kibang ciat lel hi. A tukte phong dingin atuktheite mah Pasian in zang zel hi. Kei thonuam aa kithawi laitakin, kalawmpa pen nasep nakhawl leuleu hi. Leilet-in buantang lakah lawi nungzui-in na om hi.  Sanggamte nih in a huhnuamin lampi zongzong uh hi. Haksaatna huntaktak ciangin sanggam silehsa kinaite mah lunggim masa teitei hi. Minamdangte lakah minampihte mah lunggim masa hi. Koikoi-ah gam leh minam tawh mapangin Pasian lungdamnathu taangko leeng muibunpen hi.
Tedim Circle Leader in Pr Kipzanang a omlaitakin sanggam nihte mahtawh kikumin nasep guankik hi. Pr Kip mahin Ordination hong forward ahihmanin Ordained Pastor kanih un kangah veva uh hi. Section Committee members in hong kikoih hi. Circle leader, Departmental Cih bangin kakhangto to uh hi. Pasian nasepna-ah thasiallo-in, kiseem a, Pasian ompihna leh hehpihna kangah tawntung uh hi. Hehpihna tam ngahte in Hehpihna thu taangko leh muibun zaw hi. A tukngeilo, hehpihna tawh a kiphongkik ngeilote teti pan ding omlo hi. Satan deih mithahaatte pen Pasian aadingin zong mithahaat ahi hi.
Section meeting hongsam uh hi. Union panin ulian nih tawh committee meeting katu uh hi. Sia KIpzanang Chairperson ahi hi. Kei aadingin sia dangte sangin amah zahtak piakhuai tampi om hi. Evangelist nasep leh thunget hanciamna kasim etteh tawntung ahi hi. Ordination zong ama hong forward hang aa ngah kahi uh hi. Meeting man ciangin sumkeempa innah zingan-nitakan kine tawntung hi. An pen a lim thei bel dingin kibawl a, lungdamtakin ciakhethaatin kane uh hi.
Awi, ci-in numei khat patau hong kiko hi. Pastor khat namsau tawi-in hehlua in muk lingdaldalin hong diang khia hi. Ko sanggam tengin a temsutin kalai lunglung uh hi. Sanggam tengmah kikham ngam hi. Kuamah a khongam omlo hi. Innteknu bang a kawngah luai-in a khut lang khat tawh atem sutvanvan hi. Thupi kasa mahmah hi. Siapite a mai-ah sisan teenglo uh hi. Committee pen eideih banglo thei a, guallelh hunin na kisa mahmah theimah hi. Siapite Yangon a tunsuk ciangin, SDA thuthang ci-in tua bekbek gen belin nei uh hi. " Da-mah-sia" acihleh amah kicihna hisese hi.
Kum kiheihei aa tua bang nangawn Pasian hehpihna lianzaw ahihmanin, Section officer ngentang, Union Departmental secratary dongah hong domto zel hi. Thanem thokikte aading teti panna khaupai semsem hi. Athokik thanemte hangin midangte in Pasian hoih telmuh thei semsem hi. "Hih Lungdamnathu hangin kamaizum kei hi."
 Conference move  kipathun.
Sumbawlte hong tuahpha-hon laitak ahi hi. Degree kiteh bang hielh 100* khawng hiding hi. Keizong evangelist kathahaat hunsung ahi hi. Tua hunin member hong mungeilo tawm mahmah kha ding hi. Laymember te khanlawh lawp mahma hunsung zong hipah hi. RB makaite nak thahaat mahmah uh hi. Conference utna pen mikhat bek hangtawh hitheilo hi. Khat leh khat kimuan laitak, kihuzapin ki-itna leh kimuanna tawh nopmahmah laitak ahi hi. Kithutuak  takin Conference Move ding kipankhawm ahi hi.

Pr Thang Siangh

To get the latest update of me and my works

>> <<