JULY 2| Pasian le Thaulawng-teSouth Sudan
Gina Wahlen
South Sudan gam in a lauhuai mahmah gam khat hi, ci-in ka za hi. Ahi zongin hih gama om Adventist thu-uppih sanggam ulenau-te kiangah vahawh ding pen phamawh kasa kei-a, Pasian nasepna khatin ka ngaihsun hi.
South Sudan khuapi Juba ka va tung hi. Earley Simon in hong dawnpah hi. Amah pen Mission Spotlight video camera-man khat hi-in, Mission 360 program aa dingin nasem hi. Tawl khat ka taam sungun khua sung mite tawh kimu-in thudotna ka nei kawikawi uh hi. Pasian in amaute nuntakna a kepzia hong gen uh hi. Lauhuai-na tuamtuam hangin inn sung bekah thudotna ka nei uh hi.
Khualzinnate
Ka ciah madeuhun Earley zawnin Juba khua sung ka kawikawi uh hi. Pastor, Dr. Fesaha Tsegaye ( Health Ministries Director, East-Central Africa Division) in zong hong zui hi. Maan kilak ding kiphal lo ahih manin ka laknopna munteh uh mi muh loh kaalin phone tawh ka la sim uh hi. Camera golte ka zang ngam kei uh hi. Juba khua sung ka vakna uah, UN mawtaw tampi ka mu uh hi. Kumpi zum innte sikling sangpipi tawh ki-um ka mu uh hi. Nile gunpi zong ka en uh hi. Juba khua sunga gun tua bek mah hi pah hi.
Galkapte in hong ngak: Nile gun gal lam ka pai uhleh galkapte in hong pang uh hi. Kileh kik dingin thu hong pia uh hi. Gunkuang neu tampi in hong ngak deudau uh hi. Mawtaw sung pan pusuak khia-in gunkuang tungah a tuang dingin thu hong pia uh hi. Tua panin giahbuk khat ah hong paisak uh hi. Innsungtawng lam ah ka pai suak uh hi. Galkapte in hong tu-sak sak uh a ka sum uh le ka phone uh hong laksak hi. Ko hong makaih Earley Arabic pau tawh tawnggawp uh hi.
Thudotna:
Galkapte in khat khit khat thu hong dong uh hi. “Nang kua na hiam? Bang hangin hih tengah hong pai na hiam? Bang hangin man la kawikawi na hiam? Thukante na hiam? Kua thu tawh hong pai na hiam? ci-in thu hong sit uh hi.
General Conference in hong piak phalna lai ka lak uh hi. Galkapte in hong laksakin hong paihkhiatsak uh hi. Khiatna nei kei, na passport hong pia in, ci-in hong ngen hi. Ka passport ka pia hi. Ka hem et leh galkapte in thau tawi-in innkhan sung khat ah hong paipih uh a, ka lungsim in hong kaplum ding uh hinteh maw, ci-in ka patau hi.
Topa khut sungah ka om:
“ Topa aw, na khut sungah ka om hi, ci-in ka lungsim ah thu ka ngen hi. Pasian hong ompihna ka phawk a, bang bang piangta leh, Pasian in hong ompih ahih manin hong hoih ding hi, ci-in ka lungmuang thei hi. Ka lung hong nuam mahmah hi. Tua leh Pasian in hong hopih hi. Galkapte tawh thungen khawm ding cih ngaihsutna khat hong lut hi. Koi bangin amau tawh thu ngen khawm ding,cih ka ngaihsun pah hi. Tua leh bang ngaihsutna hong lut kik hiam cihleh, amaute tungah thuman gen kei lecin, kua’n gen ding hiam, ci-in ka ngaihsun hi. Tu-in gen kei leng bangci bangin amau Pasian thu za ding hiam, cih ngaihsutna hong lut hi. Ka kim ka paam ka etleh galkapte simloh kuamah om lo hi. Lauhuai peuh mah hi. Thuman gen kei leng, amau bang lametna nei ding uh hiam, ci-in ka ngaihsun hi. Tua leh ka ip sungah laibu neu “Leitung aa ding khuavak” ka puaklam ka phawk a, Adventist min kigelh ballpen nga galkapte ka pia hi.
Ama nunna a hu mi in a nunna taan ding a, keima hangin a nunna a sup lawh mi in nunna ngah ding hi (Matt. 16: 25).
South Sudan pen leitungah gam khangmoi penpen hi. 2011 kumin gam khatin kiciamteh hi. 2011 a kipan South Sudan gamah kidona tampi piang hi Hih gam ah kampau nam tampi om hi. A tam zaw in Christian biakna zui uh a, Khanglam Sudan gam mite in Islamic Sharia biakna zui uh hi.
2015 kumin guahtui menciim hangin Tuikhingzang kisiatna hangin a khua buppi-in mun dangah kituah uh hi. Tu quarter 13 Sabbath School sumpi in Tuikhinga biakinn lamkik nadingin kipuak ding hi.
