MUC

Print Friendly and PDF

Tuesday, June 28, 2016

INNKUAN SUNG NOP NADING THU 6 TE:


Tu kumin Pate ni phawkna kibawl ciat kha ding hi. Tua hun sungin, innkuan sung nop theih nading thu 6 te gen ding hihang. Hih thute i zuih theih khit ciangin a beisa hun sangin i innkuan sung ciat hong nuam zaw ding a, tua innkuan nopna in i pawlpi ciat hong lawh ding hi. Tua banah, innkuan le pawlpi hong nuamin, hong thahat ciangin, i gam sungah zong nopna hong om thei pan ding hi.

1. Pate tavuan: (Ephet 6:1-4)


Innkuan sung a nop theih nadingin, Pate in, Pa tavuan mah hoihtak a alak ding kisam hi. Ephet 6:4 na sungah, Pate aw, na tate uh hehna ding leh thangpaih nadingin phin kei un la, Pasian thu tawh pantah zaw un..." na ci hi. Pasian thu bek hilo-in leitung thu tuamtuam, innkuan sung, khua sung vai leh a tuamtuamte ah Pate in, Pa tavuan mah la in, a makaih ding kisam hi.Tua mah bangin, tate in zong, nanu napate uh THU MANG UN, na ci hi. I nu leh i pate sangin hong deihsak zaw ding kuamah om lo kha dinghi. I hoihna ding deihna tawh hong kigen thute i zuih theih ding i man theih ding thupi kisam hi. Tua bek thamlo-in, ZAHTAAK UN, na ci lai hi. Innkuan pawlkhatte ah nu leh tate kipawlin, Pa pen simmawh bawlin, langdo cih khawng zong om thei hi. Tua pen thupha ngah lohna leh Lai Siangtho tawh kilehbulh mahmah khat ahihi.

Pasian in Pate innkuan sung lutang dingin a sehsa ahihi. Bang zahtakin pil zaw siam zaw ta se leh Pasian in Nute innkuan lutang dingin tavuan napia lo hi. Pate in, innkuan sungah PA TAVUAN la in, hoih taka a om diamdiam innkuante a hampha uh hi. Innkuan pawlkhatte Nu in thu khempeuh ukcip zaw-in, Pa pen bang vak khia ding hi leh "Ka bus saap ding 20 hong pia ve," ci-in a zi kiang peuh ah a ngen om thei hi. Bus saap ding i neih kei leh nget ding mah hi a, a hi zongin Pa pen in a ngen ding pa hi lo-in a piakhia ding pa hi zaw ngeel hi.

2. Innkuan sung uk zo ding. ( ITim.3:4)

Innkuan nuam leh Pasian thupha piak ding innkuante pen, innkuan sung ki-ukna leh kithuman diamdiamna innkuan ahi hi. Innkuan sungah thu kiman diamdiamna a om ciangin, Pasian lungkimna om hi. Zi leh pasal kilemlohna, tate in nu leh pate thu man' lohna leh ut bangbang a om zelzulna pen a kilawm hetlo leh Pasian thupha san' lohna khat hi gige hi. I nu leh i pate hawmthawhhuai hi phial mawkta leh zumpih hetlo-in amau thu mangin i kalsuanna pen Pasian deihna hi. Pate in zong innkuan sungah thu neizo a, innkuan sung Pasian deihna bangin ukzawhna pen thupha ngahna khat ahi hi.  Sum bawlna leh nasepna khat peuhpeuhah meetna leh supna pen nasep siamna hang ahi hi. Nasep siamna geel siamna hangin meetna leh supna a om mah bangin, innkuan sungah zong ki-uk siamna leh vaihawm siamna hangin, Pasian maipha ngahna om thei hi.

3. Hun zat khopna kisam hi. ( Deut 6:4-9)

Hih Lai Siangtho sungah Pasian in Judah mite tungah thu pia in, a tate uh ahilh zia ding leh pattah zia ding uh gen hi. Inn sungah a om uh ciangin a gen ding thu pen Pasian thu hi ding hi. A lup khit nangawn uh ciangin Pasian thu mah gen ding ci hi. Lam pai kawmin zong hilh ding cih vaikhak hi.

Lai Siangtho sungah Judah mite tawh i kilamdanna na mu thei uh hiam? Inn sungah i tutkhop ciangin i gen thu bang hi hiam? Nipini kikhop khit ciang inn i tun kaal ding bang ngaklah zawzen a i omna pen i gen nop bang ahihiam? Biakinn a lasa khat peuh thuhilh khat peuh leh kikhawm mite sungah nungak khat tangval khat peuh om ziate peuh hi thei hi. Tuate hoihna gen i hiam? hi lo zaw-in hong kicial hetlo a hoih lo na leh kilawm i sak lohna teng na gen ngeingai uh ciangin, thu tam a thei nai het lo nata neute in na kiangah na za gige uh hi.

Khat vei, innkuan khat in, amau innkuan kia a om hunin pawlpi upate om zia khat gensia gawp uh hi. Ni khat ni ciangin tua pawlpi upa pa hong hawh a, thu tel taktak nailo, ta neu khat in ,' zan lam a ka nu leh ka pa in , upa pa in an a neek teh vokpi anne tawh kibang a cih pa nang na hia? ci-in hong gen khia hi. A gen khia masa nu leh pate a dingin maizum huai pian hi. Innkuan sung a i gen thute naupangte'n lungsim sungah ciamteh uh ahih manin, upmawh loh hun khat ciangin, hong pulaak khia ding uh hi. Tua hun ciangin i lungkim ding hiam? Tua tanote gen pen Lai Siangtho lot ngah cih khawng, labu sungah late sa hi leh bang zahtakin i lungkim ding a hihiam? Tua ahih manin, innkuanin hun zang khawm a, Pasian thu leh thu hoih genkhop ding kisam hi.

4. Etteh hoih hih ding kisam hi. (Titus 2:7)

Sawltak Paul in Titus kiangah, gamtat hoihna leh cihtakna ah etteh hoih na hih ding hanciam in ci hi. Innkuan sungah Pate in etteh hoih ahih ding kisam mahmah hi. Naupangte in a golsa te gamtat zia hong enin tua bangmahin hong gamta pah uh hi.Na khekhap hong zui ding uh hi. Innkuan sungah motor neite tate motor hawl zia khawng kineih uh hi. Zato lam nasemte cina veel khawng hong kineih uh hi. Ki mawlna lam uukte a tate un kimawlna lamah hong kineih pah ding uh hi.

Tate a neu tungin, a etteh ding uh (hero) kisam hi. Thupi asak ding uh kisam hi. Pasian nasemte thupi sa hiam? A hih kei leh TV sung khawng na muh zelzel kineihsiamte peuh thupi sa hiam? Kimawlna lam a siam a minthangte thupi sa hiam? Pasian leh Pasian kammal Lai Siangtho mah thupi sa in, tua bang zui a nuntak ding hanciam nopna lungsim a neih ding uh kisam hi.Tate in hong etteh dingin bang i nusiat hiam? Zateep, tuibuuk muam, kuva hai, khaini muam, laithai kaap, zu neek a kipan thu hoihlo tuamtuamte peuh ahihiam? Pate in innkuanpihte tungah ngongtatna ahi zongin hamsiatna ahi zongin i neih khak leh tuate tate lungsim sungah kiptakin kiciamteh ahihi.

5. Innkuan sung khat leh khat ki-it ding ( I Cor. 14:1)

Innkuan sung nop nadingin khat leh khat ki-itna pen a bulpi hi. Ki-it theih nading, mihing i hih manin kimaisakna zong kisam hi. Sawltak Paul in Korin pawlpite kiangah "ki-itna na neih nading na hanciam un. " na ci hi. Pasian in a teel tuam Israel mite kiangah itna thukham lianpen dingin na koih hi. Lai Siangtho thak sungah ki-itna mah bulphuh a kalsuan ding hong vaikhak lai hi. Tua hi-in, "Ki-itna in Pasian aa hi...." cihte ahi zongin a it thei mi in Pasian lungkimsak hi cihte ahi zongin kimu thei hi.


6. Inn sungah Pasian liansak pen ni. ( Late 127:1)

Topa in inn a lam kei leh a lam mite nasepna a mawkna hi ci-in Late aphuakte in zong hong hilh uh hi. Leitungah bang zahtakin siamin, pil in, hau-in, hi ta lehang, Topa tawh i om khop kei leh amawknapi ahi hi.

Src: Upna lai Gil Vol-10, No-4 pan Lakkik

Conferencete kithuzakna Vol 2, April 2016...

To get the latest update of me and my works

>> <<