AUGUST 27| MAWHMAISAK ZAWH LOH DING MAWHMAISAK
Bang hangin Jesuh hong kum kik ding a ngak na hiam ci-in kidong leh pastor Isaac Ndwaniye in gen ding hau mahmah hi. A zi le a tate 9, a pa le a nu, a sanggamte le a sungte khempeuh 1994 kum Rwanda tualgal sungin kithatsak mangkhin ta leh aman thuk kik lo hi. Jesuh hong kum kik ciangin ka innkuanpihte khempeuh ka mu ding hi, ci-in pulaak hi.
Buai-na lianpi:
Rwanda gam ah nuamtakin ka teng uh hi. Ahi zongin 1994 kumin ka veng ka paam mite in hong that uh hi. Tua a kipan dawi gilo om takpi hi, ci-in ka thei hi. Tua hun laitakin kei pen South Rwand Field ah Publishing Director (Laibawlna lamah makai) ka hi hi. Ka omna khua pen Kibuye hi-in mission huan sungah biakinn, sanginn, nasemte le zato om hi. April 6, 1994 ni-in Kigali ah Rwanda Union Misson omin tua khua ah thukikhopna nei dingin ka pai hi. Tua zanin Rwanda kumpi pa a khualzinna vanleng tung pan kikap lum hi. Tua a kipan tual gal hong kipan pah hi. A zingsangteh Mugonero zato panin thu hong kiza sak a, ka tapa kum 14 a pha, Paul hong kithatsakin, ka zi le ka tate tengin biakinn ah bu uh hi.
Mi tampi takin pawlpi huang in muanhuai dingin ngaihsun uh ahih manin huang sung bel uh hi. Pastor a kipan, pawlpi mite in biakinn sung ah kibu uh hi.
April 16, 1994, Sabbath ni-in biakinn ah mission president, a tapa ( zato a sem siavuan lian mahmah) in mithatte tawh hong pai uh hi. A bangci mawk? Ka pa pen pastor hi-in, ka neu lai-in ka pa tawh nasem khawmkhawm hih president pa, kei tawh zong nasem khawm, tu-in mithat dingin hong pai, a lungsim ah bang ngaihsut mawk hi ding hiam? Ka lungsim hong sukha penpi in bang hiam cihleh, tua bangin migilote hong pai ka muh uh takteh, biakinn sunga om pastor pa le ka zin le ka tate in Rwanda Mission president laikhakin hong hon khia in. Congo lamah ka pai nading uh gunkuang khat hong vaihawmsak in, ci-in biakinn cing galkap khat ka piasak uh hi. Rwanda Mission President in lai hong thuk kik in, kuamah in hong honkhia zo nawn lo ding, Pasian nangawn in hong honzo kenteh, ci-in hong thuk kik hi. Mun tuamtuam pan a kikaikhawm migilote in temta, bomb, cihte tawh hong pai uh hi. Tua mithat migilote a vek pi-un Adventist hi khin sam kei, pawl khat Adventist thu-um kihel hi.
Biakinn sungah:
Biakinn sungah kikhawmin a om laitak uh, thugen laitak a om pastor pa kaplum masa pen uh hi. Tua khitteh a banbanin kaplum uh hi. Ka zi le ka tate Rwanda Mission President kiangah tai-in huhna ngen a, a mawkna suak hi. Mi pawl khat zato lamah tai khia uh a, ahi zongin a taikhia ding a pang mi kim khat in na man uh hi. Tua biakinn huang sungah ni tampi sung khat khit khat kithat ngekngek uh hi. A hing lai a hiam kha hiam, cih a theih nadingun ui khat tawh zong kawikawi uh hi.
Tu-in ka phawk kik khat om a, ka innkuanpihte le pastor le pawlpi mite in thahna a thuak ma, biakinn sungah bu-in a om sungun Lai Siangtho simin om uh hi. Biakinn sungah a om sungun khat le khat a mawhnate uh kithuumin, khat le khat a mawhnate uh kimaisak uh hi. A hun neih sunteng uh thungetna le ki-apna-in zang uh hi. Hih thu hangin tha ka ngah mahmah hi. Bang hang hiam cihleh a sawtlo-in amaute tawh kimu kik ding cih lametna ka nei hi. Pasian ka mawhna zong om
Mithatte om lai ahih manin inn ka ciah ngam kei hi. Gamsung mi gilote kimkhat hong makaihna hangun Kigali I panin mi kim khat tawh ka suakta thei uh a, Rwanda gam khanglam mun khat ah ka om uh hi.
Pasian in hong ompihin, Friday ni khat galtaite omna mun khat ah ka vak kawikawi leh, Catholic biakinn kinusia khat ka mu hi. Tua biakinn sungah thu ka ngen thei diam, ci-in ka ngen a, ngen thei mah citeh, hong kicih ciangin kei zong biakinn sungah lutin thu ka ngen pah hi. Galtaite omna ah ka pai kik a, ka lawmte samin Sabbath ni-in biakinn ah kikhawmin thungetna ka nei uh hi.
Ka omna galtaite omna mun ah kei kia bek pastor ka hih manin a beisa a dahhuai thute ngaihsut hun ding ka nei man kei hi. Na hoih khat i sep takleh kitaklah ihih manin thu hoih lo thute ngaihsut hun ding ngaihsut hun om man lo hi. Tua bang hun ciangin Pasian in tha hong guan hi.
Mai Sabbathteh zop kik ding.
