MUC

Print Friendly and PDF

Tuesday, June 21, 2016

AUG 13| TUALTHATTE TUNGAH THUGENNA 3Q 2016

AUG 13TUALTHATTE TUNGAH THUGENNA

Rwanda gam pan Phodidas Ndamyumugabe’ thupuak.

( Tuni i zak ding thu in 1994 kum Rwanda gam sung tualgal kithatna thupiangte hi ding hi).

Phodidas min ii a khiatna in Topa ka bia hi, cihna hi-in amah pen Rwanda gam mualtung khua SDA innkuan sung khat pan a khangkhia pasal khat hi. A neulai a kipan biakna kin mahmah khat hi-in a ki-ap mahmah hi. A sangkahna ah laihahkatin, pawl sungah zong Pathfinders, AY cihte ah kihel den hi. Lawmlegual huzaap mahmahin sangkahna ah zingsang biakpiaknate ah zong thugen dingin kisawl zelzel hi.

A Lai Siangtho simbu sungah ciaptehna vive dim hi. Tua bangin a ciaptehnate tungtawnin 1994 kum, tualgal panin suakta ding cih theikhol het lo hi. Ama tuahkhak thute in ama tuahkhak thute hi.

Galte in hong thah ma-un, ka hankhuk ding hong tosak uh hi. Ka kiphum nading ka tawh kawmkawmin Topa tungah thu ka ngen hi. “Topa aw, hong honkhia thei hiteh”ci-in thu ka ngen hi.Kei hong that ding hih mite kiang pan hong honkhia thei hiteh. Humpikhua sung pan Daniel na hotkhiatna thu mite kiangah ka gen a, meikuang sung pan Shadrach, Meshach, Abednego cihte na hotkhiatna zong ka pulaak hi. Tu ni dong Pasian hi lai hi lo na hiam? Tu laitak nangawnin zong Pasian na hihna hong kilang in. Topa aw upna hong guan in” ci-in thu ka ngen hi.

Pasian in lenkhiat theihna ding kha hong guan dingin ka lamen hi. Ahih kei leh vantung pan meikuang hong kia suk ding ka lamen hi. Ahi zongin ka lametna bang lo-in Pasian in a tuampi khatin ka thunget hong dawng hi. Tua bangin ka hankhuk ding ka tawhkawmkawm laitakin kei hong that ding mi khat in, ka Lai Siangtho enin, hih na ciapteh ziazua-te bang na deihna hiam, ci-in hong dong hi. Ken zong “ ka deih zaw diak munte hi” ci-in ka dawng hi. Tua pa in lamdangsa-in theihbeh nuam tektek a, hih na ciamteh khempeuh simkhin takpi na hiam? ci-in hong dong hi. “ Sim khin mah ing” ka cihteh, tua pa in lamdangsa-in hong hehpih hi, cih ka mu thei hi.

Tua leh kei hong hopih mipa in a lawmte kiangah “ hih i thah ding mipa a hankhuktawh hong huh dih ning, ci-in a lawmten zong huh ve, ci-in hongtawh pih hi. Ka tawhkawmkawm-un, hih hankhuk zo baih ding hita, Topa aw, nang bang deih na hiam, ci-in ka lungsim ah thu ka ngen hi.

Pasian in Geelna khat nei

Pasian in ei aa ding geelna khat nei-a, i thunget hong sang dingin ei deihna bek cih tentan ding sangin Topa i muan ding kisam zaw hi.

Ka mankhit uhteh a lawmte kiangah, “ hih i theih ngeiloh mipa hankhuk ah bang hangin phum ding i hiam? Mun dang khat ah pai henla, to kik hen. Hih mun in kei aa hi, ci-in a denlam deuh a mithah khat uh kiphum nadingin zang uh hi. Tua misi a phumma-un, thungen phot uh a, “Mary, Jesuh nu aw, hih mipa na sang in,”ci-in apna nei uh hi. Kei hong phum na ding mun ah tua misa phum uh hi.

Tua leh ka ngaihsutna khat hong kikhel vat hi. “Topa aw, hih mite tungah nangma thu gen lo-in hong kikhensak kei in. Hih mite in nang hong thei ngei lo uh hi. Mi khat a thah khit uhteh thungetsak thei hi, cih upna nei uh hi. Hih bang upna khial ahih manin thuman ka hilh kul hi,” ci-in thu ka ngen hi.

A mi thahsa uh a phum khit uhteh mun dang khat ah ka pai-in hankhukto ding ka kipat madeuhin, ka Lai Siangtho tawipa in ka Lai Siangtho bu ka piak ding hong ngen hi. A lawmte khat in hih ko aa hi, nang aa hi kei, na deih leh na lei kul hi, ci-in hong dawng hi. Kha Siangtho in tua mipa’ lungsim lawngkha hi, cih ka phawk hi. Tua leh, lei ka tawhma-in Lai Siangtho kong sim phot deh, ci-in Lai Siangtho bu ka ngen hi. A lawmte in Lai Siangtho ka sim ding hong phal lo uh hi. Simsak ken, amah i galte hi, ci uh hi. Pawl khat in sim hen, ci uh, pawl khat in lah, sim kei hen ci-in khatlekhat hong buai ngeingai uh hi. Tua leh ka Lai Siangtho a tawi mipa in thu hong gen hen, ci, a dang khat in gen kei hen, amah i gal hi, ci leuleu hi. Tua bangin a kisel uh hong khuah semsem ahih manin, amaute lakah uham pen ding khat in i theih ngeiloh mi khat thu tawh bang hangin kisel kitawng tawng ding na hi uh hiam? Ama thugen a ngai nuam peuh in ngai hen. A za nuam lo ten ngai dah uh hen, na bil uh hum un. Ama thugen a man khitteh that ding hi hang, ci-in hong pulaak hi. A vekpi un hong dai-in ken thugen ka kipan hi.

Maikal ah zop kik ding!

To get the latest update of me and my works

>> <<