MUC

Print Friendly and PDF

Tuesday, May 3, 2016

Mothers' Day


NUTE’ Ni

A hong tung ding Nute’ ni ( Mothers’ Day) ah Nute khempeuh a dingin,, ..
“ Zan in tho zel zel inla, Pasian tung ah kiko in. Na tate in hehpihna a ngah na dingin na lungsim khempeuh pia in. (Jeremaih Kahla 2:19)
Nute aw,, na tate adingin kap un:

1. France gam in a kisap pen pen bang hiam ci in a dotna pen Napoleon in.. ‘French gam kisap pen pen in “ Nu Hoih” a hi hi,’ ci hi.
2. H. Benson in “Nute pen gam adingin galdo te sang thupi zaw lai hi” ci hi. 
3. Theologian minthang St. Aufustine in , “ Nute hong pia un, amaute zang in leitung ka lamdang sak ding hi” ci hi.
4. Abraham Lincoln in, “ Nupi biakna lam hahkat mah mah innkuan sung pan in tate migilo leh migenthei a suah lam ka thei nai kei hi” ci hi. 
5. Thugen siam minthang DL. Moddy te innkuan pen genthei mah mah uh hi. A pa si baih ban ah a unau uh tam lai sawn sawn uh hi. Mite in a nu kiang ah a tate pen tagah kepna ah koih ding in ngaihsut pia thei uh hi. A hih hangin DL. Moody nu in , “ ka tate pen keima tate a hih man in, kei ma pattah pen hoih pen pen hi” ci hi. Genthei mah mah taleh Pasian muang kawm in a tate hong pattah a, a tate mi thupi suah khin zo hi. Pasian thu gen minthang a hih khit uh ciangin zong a nu kiangah lai a khak uh ciangin, “Nu aw ka neulai a Lai Siangtho sung a tangthu nong hilh te hong hilh kik in” ci uh hi. A nu hong sih ciangin a vuina ah DL Moody in , “ Mi khempeuh in ka nu bang nu nei kim tek zo hi leng, hih leitung ah Thonginn omlo ding hi” na ci hi.
6. Judah te Talmut laibu ah, “ Pasian pen mihingte bangin kimu thei in a om ding lem kim lo a hih man in , a ma’ tangin Nute hong koih a hi hi ‘ ci hi.
7. Electric bulb bawlkhia masa pen Thomas Edison in, “ Kanu bang a lungkia mawk mawklo nu na nei lo hi leng , tu-a bang dinmun ka tung peuh mah kei ding hi” ci hi. A mah pen a naupan lai in sangkah mah leh lai siamlo lua a hih manin, a sangsia mah nu lungkia in, Edison nu kiang ah laikhak in “ Thomas Edison pen sang hong kah nawn kei leh amah adingin in hoih pen ding hi” cih lai khak hi. tua ni a kipan in Thomas nu in, a nasep hun khiam in, lungkia het lo in, a tapa lai a hilhna pan in hong picin suah to in, leitung a mi minthang mah mah hong suah hi. 

Nute aw, na nek tawm ding a om sung teng in, na nak zawh liai liai lai sung in lungkia peuh mah un la , pan hong la san un. Na hun tamzaw na tate ading in pia in pan hong la le uh the, Topa note tawh hong om khawm den hi. Na nuntak sung in na sem thaman a gah sang lo zong hi kha cing hi teh.. A hih hangin hong pai ding leitung ah khua hong vak ciangin, na sepna a gah na mu ding hi.

Nute aw, na tate adingin Pasian tang a a dingte na hihna uh phawk un. Leitung minthanna leh sumte a bei hun om mah leh mang hetlo a vantung ciangdong na tonpih dinguh Pasian in thupha laigil Na tate hong piak pen na thupha lianpen a hih lam phawk tawntung un. Na tate adingin nah un manpha pen pen zang in, naupangno a hih lai Pasian thuman ah kalsuan pih ding thupi sak pen pen un la, Zeisu muh sak sawm ham tang un.

Na ta te ading in na khitui luang khempeuh te Vantung a Pasian ih tano te kem leh pantah ding a mawhpuakna hong pia pa in mangngilh ngei lo ding hi. Na khitui malkhat nangawn a mawkna suak lo ding hi. Kumpi David in, “ Nang in belhding neilo a ka vakthapna te na ciamteh a, ka khitui te zong na savum um sung ah hong thun sak in, na laibu te ah hong khum sak hi lo na hi hiam” na ci hi. Pasian mizat mithupi khat in Pasian’ kha sawlna tawh hih thu ten a at hi. Hih thu ka sim ciangin ka khitui luang den hi. 

“ Hun khat ciangin Inkuan kimuh khopna hun hong tung ding a, tua ni ciangin Leitung in Pasian a it Nute tung ah pahtawina a piak ng hun hong tung ding hi. Thukhenna thutphah hong ki nga ding a, laibute hong lem in, Thkhenpa thukhenna kicing te hong ki tangko khiat ciangin, mi tampi in mipi te mai ah a khamlukhute lamto in , a nute kawkin zahtakna pia ding uh a, “ Pasian hehpih na tawh hih gualzawhna lukhu ka khuk theihna a hang pen Kanu’ hong thungetsakna leh hong pantahna hang a hi hi” ci ding uh hi. Tua hun ciangin lungdamna genzawh loh tawh nu leh pate in a tate kiang ah puantualpi leh khamlukhu a kipiak lai pen en ding uh a, tua hun ciangin tate adingin in lungkham patauhna leh lungkiatna khempeuh bei ding hi. Thugnetna leh khitui tawh a tuh uh khaici pen a mawkna suakding a bang phial zong in, a tawpna ciang in a gah a at kik uh ciangin bangzah takin lungdam ding uh hiam?” ,, na ci hi. ( Maranatha,p 308)

Lunglen huai mah si Nute aw, lungkia peuh mah kei un..khitui tawh a patna pan kipan kik ni. Zeisu in zong Jerusalem nute aw kei adingin kap kei un, na tanu na tapate ading in kap zaw un,,(Luke 23:28) na ci hi. Khitui tawh khaici tuh un.



Khitui luang kawm a khaici a tuhte in lungdamna tawh buhlom pua in hong ciah ding hi,,,.. (Late 126:5,6) Na tate ading in na thungetna leh na khaici tuhte amawkna suakding bang phial mah leh hunkhat khat ciang in hong po khia ding a, hong gahkhia pelmawh ding hi.. Tate a ding a gimtak a nasem Nu khempeuh te Topa Thupha hong pia ta hen.. Amen..


Source: Zomi Adventist facebook page



Who is Mother?—NU ih cih kua hiam?
Hebrew pau in “AME”, “Ah-May”-“ The bond of the family”-“ Inn sung a lenkip,a thakhauh sak nu.” A kitamte a khuituah,a ki khen te agawm tuah,a ki tawng te a lemtuah,inn sung a lenkip nu. NU te mah in inn sung nuam sak in lenkip zo pen hi.
MOTHER-  cih laimal 6 khiatna le M - tawh kipan laimal 6 a pha, huup theihna anei bang ahia?
Magnet- M A G N E T –Siik huup.
Mother—M O T H E R —NU –Siik huup bang a ei te it na tawh hong huup NU a hi hi.
M = Many things she gives.—Tampi a pia khia nu.
O = Others, live for others — Mi aa ding in a nungta nu.
T = Tears for children ——– Tate aa ding in khitui a luang nu.
H = Heart for Love ———- Itna lungtang a nei nu.
E = Eyes to see —————- A ki sam te a mu thei den nu.
R = Right to do and say.——-Pau khuan/ sep khuan a nei nu.
Dotna khat: Banghang in naungeek khat a nu khut tung pan lakhia leeng kap ahiam?           
1. Nu’gimnam thei hi.
2. Nu’khut thei.
3. Nu’meel [maitang]thei.
4. Nu’awging thei.
5. Nu’puakdaan thei.
6. Nu’kheging thei.
7. Nu’nawizu limna thei.
Naupang te lungdamna leh lungsim puak zia:
1. Nu’vak na ah zuih mah lungdam pen.
2. Nu’ inn a, om mah nuam sa pen.
3. Nu inn a, a na om mah lungdam pen.
4. Nu’ mehhuan mah limsa pen.
5. Nu’ lama, pute inn hawh mah nuam pen.
6. Nu’thunget sak mah lawh cing pen.
7. Nu’ tangthu gen mah zaknop pen.
8. Nu’thugen mah ki um pen.
9. Nu’ aanglum mah muanhuai pen.
10. Nu’ meel mah hoih pen.
Ih Kum tawh kizui in lungsim puakzia:
1. Kum 8 phak teh—-ka nu in na kheempeuh hihthei cih um.
2. Kum 12 phawkteh—-ka nu in na kheem peuh thei khol saam kei.
3. Kum 14 phakteh—ka nu in bang mah theih nei kei.
4. Kum 16 phakteh—ka nu in thu naktheih kei lua zen.
5. Kum 18 phakteh—ka nu bel ki man na meel om kei mai.
6. Kum –25phak teh—ka nu in hoh thei kha sawp in the aw’
7. Kum –35 phakteh—Hi thu ih khensat ma in, ih Nu dong dih ni”
8. Kum –45 phakteh –ih nu om hi leh a bang ci ngaihsut tam maw?
9. Kum –55 phak teh –ih nu ih dotnop tam keei e,a man lah ih hopih hang za meel non kei.
10. Kum—65 phakteh– ih nu om lai hen la, thu tampi kikum hiat-hiat thei zen leng utmah sing maw.
Nute tung ah Pasian piak theih nate:
Pa te in, theih theih na [5-senses] nam 5 nei hi. Nu te in nam bang zah hiam nei hi. Mit muhna,Bil tawh zaakna,Lei tawh limsak na,nak tawh namzaak na,khut tawh lawnna,cih te banah:
1. A ta geek a gil a kial teh thei hi, a nawi zu phuul khia hi..
2. A ta aw a hih leh hih lo thei,nau pang a kap aw tam pi lak ah.
3. A ta a ci nat teh thei, a nawi gui na sa hi.
4. A ta te lungnop loh na a neih teh thei, lungsim ah ki langh.
5. A ta te gamtat zia a man loh teh thei,a hopih na pan thei.
NU a kikheek thei diam?
[Nu in tate a itna a kikheel ngei loh mah bangin,Nu zong kikheek thei lo. eg. England Prince Charles leh Princess Diana ten ta pasal William leh Harry nei uh a,1996 kumin nupa ki khenna bawl uh hi. 1997 kum in Lady Diana car accident in si a, a ta ten a zak ciangun a pa kiangah a gen leh, a Pa in ka zi hi non kei, kei tawh ki sai non kei a cih ciang in, a ta pasal 2 te in, a pa kiang ah “Na zi ahih nonloh hang ko ka Nu uh hi” ci a hih manin a pa in, a tate’ Nu aluang vui sak hi. A sivui ni in Tv pan Live in a kipat pan a tawpdong ka en hi.
A taten a Nu uh a itna a lakna, thupi ka samah mah hi. A pa in zong a tate lungkim na a zuih na,ka muh ciang in thu pi ka sa mah mah hi. Zi a kheek om kha mah in teh, ih pian na Nu bel ki kheek theilo cih ih theih ding ki sam hi.
Tulsa khua ah inn saap daan:[kha khat aai ]
1. One bed room–Inn khan khat bek [ —$ 450.00
2. Electric bill – mei bill ———————$ 100.00
3. Waterbill —-Tui bill ———————–$ 50.00
4. Food ———-An lei na———————-$ 150.00
5. General ——A neng neng —————–$ 50.00
6. Car & Insurance — —————-$ 150.00
7. Health—cidam nang zato/zatui ——-$ 50.00
–One month—Kha khat— Total —$1000.00
Ten months-kha 10 –Total—$ 10000.00 [ Ten thousand dollar]
Nu a telkhial te a ding lungngaih huai thute:
1. Leitung inn saap kha 10 ai, tuul sawm khat a hih leh, 
- Na NU gil sungah na om kaal 40= kha 10-sung inn saapman -$ 10000.00 [ tuul sawm khat ]
- Na suak na zato bill –——————— ——————————$ 5000.00 [ tuul nga ]
- Cidam in na suak ni dong sum bei zah—Total——–$ 15000.00 [ tuulsawm leh tuul nga]
Leitung ah mi hing in na suak khiat ni dong Nu tungah,na leiba—-tuul sawm leh tuul nga ahi hi. Nu tel khial in, Nu’ it na thei lo in, it lo in mu dah na hih zenzen leh hih lei ba te na loh khin hiam? Nang le nang ki dong in la, loh khin mah ing na cih leh, na ut bang bang in na khensat in.
Kum khat ih phak ciang dong NU te hong kepna:
1. Nau kep man—1 hour=$5, –24 x 5=120 hi leh, Nau kep man - 1day= 120, —365 x 120 =43800—kum khat———– $ 43800.00 Nu tung ih lei bat pen ki tuat zo lo a hih man in tuat non kei ni, Nu tung a ih bat lei ba kheem peuh lai in ciamteh ni in, a file min in, “ HONG KI NGEN LO LEI BA “ ci ni. Sai pi khat in zawhgeu khat kawl lukhu khuh leh zawh ngeu in a khuh kik zo diam?
Note: May 10,2015 Nute ni- Rev. Vung Za Niang @ Siamah Niangh i Thuhilhna pan kitomlak kik ahi hi. 

Ref: FGA Tulsa

Posted: Tongsan Media Group

To get the latest update of me and my works

>> <<