Mothers' Day

NUTE' NI (MOTHER'S DAY)

Nute’ Ni (Mother’s Day) i cih pen leitung bup mun tuamtuam ah hun tuamtuam in Nute zahtakna Ni in a kizang hi a, hih ni in a diakin Nute tungah lungdam lahna bang hiam khat kipia zel hi. ‘Nu’ cih kammal a kigen khak ciangin lungsim sungah lungdamna om in i neu lai pana hong kem Nute ngaihsutna kinei in “Topa aw, lungdam ing” cih i kam pan hong ging khia thei zel hi.

Nute’ Ni hong kipat khiatna gam tuamtuam in a theih dan kibang lo ahih manin a kizat ni zong kibang kim lo hi. Rome ah Cybele festival ci-in Greek pasian nu biakna hun a kizang pen paito denin March 15-18 kikal hun khat Mother’s Day dan in na zang uh a, tua loin Matronalia cih min phuakin holiday khat Juno zahtakna in zang uh a, hih ni in Nute letsong piakna hun in zang uh hi.

United Kingdom leh Ireland ah ‘Mothering Sunday’ pen Mother’s Day ci in Easter Sunday tun ma kal thumna ah zang uh hi. Hih hong kipatna pen kum zalom 16 hun lai a Khristiante’n ciindan khat a neih uh, kum khat a nupite in a khankhiatna biakinn tek uh a veh ni uh hi a, hih ni in Nute leh a tate uh kigawmkikna/ kimuhkhawmna ni ahi hi. Tua hun ciangin nupi mun tuamtuam a sum thalawh a nasemte zong a innkuante a veh theihna dingun a nasepnate un a khuan(suty) pia uh hi. Pawlkhatte’ ngaihsutna ah Mary, Jesu Nu zahtakna hanga kibawlkhia pawi danin ngaihsun in March ni 1 (Easter Sunday March 22 ni-a a tun ciang) leh April ni 4(Easter Sunday April 25 ni-a a tun ciangin) zang uh hi.

United States ah Nute’ Ni pen May Nipi nihna in zang uh hi. United States ah Julia Ward Howe in American Civil War zawh in kidona tawh kisai a om nawn loh ding deihna in numeite kipawlkhawmna khat ana pan a, ama thupi paipih ahih leh galvan kiamsakna ding leh muanna omna dinga nute’ panlakna ci-in 1870 in Mother’s Day Proclamation a na gelh a, ahi zongin hih pen tampi in theihpih lo hi. Julia Ward Howe in Nute’ Ni tawh kisai ngaihsutna a neih pen 1858 huna Anna Jarvis a kici numei khatin Civil War hun lai a kidote nih sianthona lama pattahna hun ana zatpihna ah Mothers’ Work Days ci-a ana gen pen pana hong piang ahi hi. Jarvis in 1868 kumin Civil War a kido Union leh Confederate kilemna dingin nakpi in pan na la hi.

1907 in Anna Jarvis si a, a tanu Anna Jarvis mah a kici in a Nu’ nasep phawk tawntungna dingin nasep hong pan hi. Apianna Nu Anna Jarvis in Sunday School Sia ana sepna biakinn Grafton, West Virginia ah May 10, 1908 in a masapen Nute’ Ni zat in om hi. Tua ahih manin leitung bup in a theihpih bangin Grafton pen International Mother’s Day Shrine cih a theih in om a, tuamun a kipanin hih ciindan (Nute’ Ni zatna) state 45 ah zat in om hi. State tuamtuam ah 1912 ciangin hih ni pen khawlni(holiday) a zat in om a, 1914 in United States of America President Woodrow Wilson in hih ni pen American nupite a tate uh gal a site zahtakna ni hiding in genkhia hi.

Nute’ Ni zatna hun masapen pan kum 9 a cin ciangin United States ah Nute’ Ni pen mite’n sum muhna a zang (commercialization) ahih manin a pankhia Anna Jarvis nangawn hih ni bawl nawn loh ding a deih masa pen hi leuleu hi. Nute’ Ni pen tuni ciangin zong U.S. ah sum tam kizat hun pen hilai phial in gen uh a, National Restaurant Association-te’ muh dan in hih ni pen US ah kum khat sung ading a nithupi pen hi in restaurant a an ne a tam hun pen hi in ciamteh uh hi. Gam khempeuh ah Nute’ Ni pen Americate’ ciindan etton na hi a ngaihsun pawl zong om hi.

Bang teng ahita zongin, hih Nute’ Ni in summuhna/sumzuakna tawh kisai lam hi loin Nute’ manphatna, gam mi hoih hiding leh PASIAN ta hi dinga tate a pattahna uh phawkna hun a i zat ding hizaw hi. Nute pen innsung ah kumpinu bang hi a, khamuanna, lungdamna, huhna leh itna hong tungsak Nute ahi hi. Nu pen i gamtatzia ding hong sinsak leh hong pattah (discipline) Sia masapen ahi hi. Nu dinmun pen haksa mahmah leh kipumpiakna na hinapi in a sepna uh a mualsuah ciangun lungdamna lianpi ngahna hi zaw in amau mahmah in zong a ngaihsut kikkik uh ciangin amahmah Pasian pana tate adinga letsong kipia ahihna uh hong kiphawk khia kik uh hi.

Nu hihna pen hih leitung paito zel dinga poimawh Pasian ngimna omsa hi a, naungek hong pianga mithak khat a hong om ciangin Pasian’ Min phat a om in PIANGSAKPA ahihna kiliansak hi. Tua ahih manin mihingte pen ‘Cipha a tampi pha a leitung a dim ding’(Pian.1:28) a Pasian in a deih ahi hi. Hibang Pasian deihna a tunna dingin Nu leh Pa in mawhpuakna kibang nei hi. Khrstian Nu hihna tawh kisai in Nu in tate Pasian nungzui (Christian disciple) hiding a pattah ding a mawhpuakna ahi hi. Tua manin Nu in tate Pasian ngimna atung dingin seek in lam a, Nute pen khalam leh salam a tate pattahna a semte hi uh hi. Nu in mong nei lo tate itna nei in tate a dingin khamuanna hi a, Pasian thu tawh kituak lo leh ama gen banga a tate a gamtat loh uh ciangin lungtang sut pailet banga na a sa Nute ahi hi. Khatveivei ciangin tate’ hoihna dingin Nute in eima hatna leh ngaihsutna tawh tate pattah hun om kha thei hi. Tua ahih manin, “Kha Siangtho makaihna lo tawh Nu dinmun bang ci-in lawhcing takin kizang thei mawk ding?” cih ngaihsut huai mahmah hi.

Vantung Pasian in leitung Nu Ama TAPA pianna ding a zang in Nu’ tungah zahtakna lianpi pia hi. Vantungmi in Mary pen leitung a honkhia ding Pasian Tapa pianna ding hi ci-a Mary a hilh lai in lamdang sa in, “Kei pasal tawh a lumkhawm ngei nai lopi hih thu bangci pian’theih ding ahi hiam?”(Luk.1:34) ci-in lamdang sa mahmah a, Vantungmi in, “Nangma tungah Kha Siangtho hong tung ding a, nangma tungah Pasian’ vangliatna hong om ding hi. Tua ahih manin a hong suak ding a siangtho naungek pen Pasian’ Tapa kici ding hi. Na behnu Eilizabeth zong thei in. A ciing hi, kici napi-in a teek mahmah zawh nungin nau paii a, tu-in a naupaii zawh kha guk pha ta hi. Tua ahih manin Pasian in a bawl theih loh khat zong om lo hi”(Luk.35-37) ci-in dawng hi. Pasian in Nute zahtakna pia takpi hi. Nu hihna pen letsong bek hi loin Pasian sapna zong ahi hi. Hih hihna pen biakpiakna ah kimuthei hi. Numei khangham khempeuh lam tuamtuam in Nu hihna dinmun neite ahi hi. Pianna Nu hihna nei ki-om a, khalam Nu hihna nei Nute ki-om hi. I vekpi in lungsim sungah Nu hihna tawh kituak a leitunga i om sunga Pasian deihna tawh kituak a ama minthanna ding a i sep dingte mangngilh loh ding poimawh mahmah hi. Naupangte in zong salam leh khalam a nute zahtak a athu uh man ding mawhpuakna lian mahmah ahi hi. I Topa Jesu Khris Pasian’ Tuuno in leitung mite’ ading a a hinna pia a singlamteh tunga a kikhai lai nangawn in a Nu zahtakna pia a, A nungzui a it mahmah John kiangah a Nu kem dingin mawhpuakna guan hi.

Nute’ Ni in tate in Nute’ tunga lungdamthu puakna leh itna latsak theihna hun ahi hi. Itna kammal khat, bang hiam khat letsong piaka thunget khawmna neih cih bang thupi a, ei adinga hong sepsak zozaite hanga lungdam puakna hun ahi hi. Pawl khatte pen Nute a tawlnga khin omkha ding hi-tuate in zong Nute in a dam lai a a maute adinga a a sepsakte ngaihsun in phawkkik in lungdam puak in itna kilangsak thei hi hang. Nute’ Ni tawh kisai in Rev.Job. Nang Khaw Thawng in a gelh A Etteh Huai leh a Etteh Huai Lo Nupite cih tawh i thugelh zo ni.

A ETTEH HUAI LO NUPI TE :

1. Eve : Eden huan sunga innkuan nuntakna dinga Topa’ piak pen zahtak loin mitmuhna lam kep zawh lohna tawh a pasal lam pialpih hi. A suahtakna dingin a pasal thu zong mang lo ahih manin leitung khempeuh in siatna ngah lawh hi (Pian.3:6).

2. Job Zi : A innkuan sungah haksatna a tun ciangin Pasian ko lo-in a deihna thei kha lo-a, “Na Pasian samsia in la sisuk in” ci-in a pasal kiangah gen hi. Innkuan nop laitak biakna mi mahmah a, haksatna a tun ciang phun nuam mahmah in Pasian nangawn langpan nuam a om pen Job i zi tawh kibang hi (Job 2:9).

3. Lot Zi : Pasian in a innkuan in a sapkhiat hi napi innsung Nu pen nunghei kik ahih manin cikhuampi suak hi. Innkuan sungah Nu pen hi-in pa i thuvaihawmte palsat a biakna hanga leitung taisan ding haksa a sate Lot zi tawh kibang hi (Pian. 19:26; Lk.17:32).

4. Mikhal: A pasal David Topa min phat a alam laitak panpih a lampih ding cih gen thadah maizumin taisan zawsop hi. I pasalte Pasian ading a kipiak laitak dongtangsak den a, nupa kal a Jesu om ding nangawn a hazate pen Mikhal bang ahi hi (IISam.6:16; 20-23).

5. Jezebel: Ama huang sungah huaihamna tawh om a, a veengpa Naboth huan laksak dingin a pasal kun hi. Israel kumpi Ahab a lawmpa hangin kisathei hi. Pasalte’ nasep theihna khawng suanga mite tunga zawh thawhna tawh gamtat pen pasalte a buaisak, kitapkhapna a bawl Jezebel tawh kibang hi (IKum. 21:1-29).

6. Zeresh: Mordekai a hazat manin a kikhailupna ding tong 50 a sang singkhuam bawl dingin a pasal hanthawn hi. Pasian in tua numeinu vaihawmna lungkim lo ahih manin Mordekai kikhaina ding ah Haman kikhai lumsak hi. Midang khat hazat man a pasalte holhthawh den pen Zeresh bang hi (Esther 5:17;7:10).

7. Herodias: Ngeina lopiin Herod tawh kiteeng in Tuiphumpa Johan in tai a, tua thu lungkim loin a pasal kiangah Johan lutang ngenin a lu tansak hi. Ei i thuman lohna hong hilh dingin Pasian’ hong sawl mite tungah thuhkik nopna lungsim neih pen Herodias dinmun hi (Mk. 6:14-29).

8. Saphira: Pasian tungah vante piak ding selin sawltakte’ mai-ah zuau genna tawh a nupa un sihlawh uh hi. Innkuan sungah Pasian thupha sangin Topa’ ading iksik a, innkuanpihte piakna khawng a gensiate Saphira dinmun hi (Sawl. 5:7).

A ETTEH HUAI NUPI TE

1. Sarah: Sapna kiciantak thei kei taleh a pasal Pasian sapna ah muangtakin zui hi. Pawlpi kitangsap bang thei zo kei taleh Pasalte Pasian in a sapna zuih theih pen Sarah bang hi (Pian. 12:1-3).

2. Rebekah: Pasian thupiak um ngam a, a pasal mel mu kei ta leh kiteen ding ut in a pasal zuan ngam hi. Kiteenna thukhaam upna tak tawh a lente pen Rebekah bang hi (Pian. 24:57-60).

3. Ruth: A pasal sih khit nangawn in a teeknu’ thu len kip a, a pasal bek hi loin a pasal’ innkuanpihte it hi. A pasal bek ci loin pasal innkuanpihte a it mi in numei hoih Ruth tawh kibang hi (Ruth 1:14-17).

4. Abigail: Pasal gilo zukham Nabal tawh kiteng hi. A pasal’ gitlohna hangin David in a innkuanin thah sawm hi. “Ka innkuan gitlohnateng uh kei tungah om ta hen” ci hi. Tua manin a innkuanun suahtak lawh uh hi. Nabal ahih leh si veve hi. Innkuan siatna ah mawh pua ngam Pasian kiangah innkuan siatnateng a thuumpih ngamte pen Abigail bang hi. (ISam. 25:24).

5. Hanah: “Pasian aw, ta nong piak leh nangmah kong pia kik ding hi” cingam hi. Tua pen Siampi Samuel hong pianna hi. Vantunggam tunna dinga piangthak bek hi loin a nuntakna Topa ading pia ngam pen Hanah bang hi (ISam. 1:9-10).

6. Marka’ nu Mary: Jesu leh a nungzuite paisan pawi an nekna dingin a inn phaltakin pia hi. Inndei tungnung awngsak hi. Innkuan sunga nu pen in Topa tawh kipawl a holim dingin mun bawlsakna innkuan-ah Jesu hong tenna hi (Mk. 14:12-16).

7. Bethani khua Mary: Sathau namtui manphate it loin Jesu lutungah buak ngam in a sam tawh a khe zut a, tua innsungteng sathau manpha namtui kizelsak hi. Topa maiah Nu pen kitamkham a, neih manpha penpen Jesu piak ngamna Mary dinmun hi (Joh.12:2-3).

8. Mary (Jesu Nu): A nuntakna ah deih huai leh kiniamkhiatna hangin Pasian’ lungdamna ngah hi. Innkuan sungah Nute in Pasian deih lam a om manun tate’n thupha ngah lawh uh hi.