Bang hangin/ koici
bangin Jerusalem aa tuiphum sia Phillip a ki pan a dangdangte samlo in banghangin
Damascus khua mi Ananias in tuiphumna pia hiam?Saul in Jerusalem pan in Phillip
samlo hi. Bang hangin sam lo hiam? cih bel Laisiangtho in gen lo hi. Bang
hangin Damascus khua mi Ananias in tuiphum hiam cih bel kimu thei hi.
Ananias pen lamsak
lamkhang ah a vakvai mi hi lo hi. Nang le kei sangin thukham a limtak zuih mi,
biakna hahkat mahmah, mite in a zahtak mahmah mi khat hi. (Sawl. 22: 12)
Ananias in tuiphum theihna zaa nei hi, ci-in Laisiangtho sungah i sim khak loh
hangin, a pianthak zawh a sawtlo khat ciang, sawlna ngah biakna nasem, pawlpi
nasem khat hi hamtang ding hi. Ananias mangmuh dan lian mah Saul in zong mu hi.
Saul in mangmu lo
bang hi leh, Ananias tuiphum ding ut lo kha maithei hi. Tuiphum theih nang na
license hong lak phot in zong ci mai thei hi. (Sawl. 9:18,19). Laisiangtho bu
hoih mahmah khat tawi (thei kei leng pastor kisa ding), biakinn ah kikhawm khin
innlam ciahin laipi ah na pai laitak na kituak pih mi khatin ‘tui hong phum in’
hong ci bang hi zenzen leh Sawltak 9 bulphuh in tuiphum piak ziau ding pen,
tu-ma AD 100 lai-in hi thei kha ma in teh, AD 2000 hunah bel maan lo ding hi.
Kua tengin tuiphumna pia thei ding cih, pawlpi in thukhun nei khin hi. A thei
nuam te-in Church manual sim ni. Ordained minister le church elder te-in tui
phum ding hi. Church Manuel, p. 52, 2005 edition.
AG, Baptist sia
khat peuhpeuh in tui sungah kiphum na ngah khin mi khat tuiphum kik loh in zong
SDA pawlpi mi in kisang thei hi. (p. 41-42) SDA ahi lo sia khat ii tuiphum na,
SDA pawlpi in sang cihna hi. Ahi zongin, tui kiphum nailo SDA thu-um mikhat in,
SDA ahi lo tuiphum sia khat kiangah ‘tui kiphum nuam ing, ci-in ngen napi, SDA
pan pawl
tawp tuan kei leh
tua-nu tua-pa SDA hi a kici thei ding hiam? SDA pawlpi sungah, sum le paai
hangin, pawlpi nasem numei te zong tuiphum zaa piak ding hi, ci-in North
American Division in nasia takin mapang hi.
GC i zumpi pan
phalna tawh ahih loh hangin, SDA sung veve, mun tampi ah numei in tuiphum hi.
2010 General Conference session ah vote lak ding agenda te lakah kihel dingin
nasia tak kikupna om a, Kha siangtho in
i pawlpi makaih ahihmanin, 2010 GC session ah agenda in kiguang nailo dinghi,
ci uhhi.
Tuiphum piakna
pawlkhat:
Meeipi sung leh tuipi sungah Moses’ nungzui
ahi ding tui na kiphum uh hi. (Kor. 19: 2)Johan in mawkna kisiik mite tuiphum
(Mk. 1: 4-5) Johan in Zeisu tuiphum (Mt.
3: 15-16). Peter leh sawltak tein ni khat in mi 3000 tuiphum (Sawltak 2:41).
Samaria gamah Zeisu a um mite Phillip in tuiphum (Sawltak 8:12). Gaza ah
Phillip in mangpa tuiphum (Sawltak 8: 38).Caesarea ah Peter in Cornelius
tuiphum (Sawl 10: 48). Phillipii ah Paul in Lydia leh mi pawlkhat tuiphum (
Sawl 16:15). Corin khua ah Paul in mi pawl khat tuiphum (Sawl 18:8; 1Kor. 1:14,
16). Ephesus ah Tuiphum Johan ii nungzui pawl khat Paul in tuiphum
(Sawl.19:3-5). Laisiangtho sung khempeuh ah tuikiphum khin sa khat tuikiphum
kik(rebaptized) na mun khatbek ah nagen hi(Sawl.19:5).
Gin Lian Mung, PhD
Tahan
