MIHING
puukna in vantung khempeuhah dahna tawh kidim sak hi. Pasian bawlsa leitung in
mawhna tawh kidimin, atungah gentheihna leh sihna ngah ding mite a om uh hi.
Thukhaam palsatte a suahtaak theih nading uh lampi a omlo tawh kibang hi.
Vantung mite'n phatna la sa nawn lo uh hi. Van khuapi a dung leh a vaai ah
mawhna hanga piang siatnate hangin kithuumin kitaau hi.
Vantung
gaalkap Maangpa ahi Pasian Tapa in a puuk minamte hehpih mahmah hi. A mangthang
leitung adingin dah mahmah a, itna beingei lo tawh bangci gupkhiat ding cih
ngaihsun hi. Mite kigupkhiat theih nading lampi hong mukhia hi. A kipalsat
Pasian thukhaam in a palsatpa nuntaakna ngen hi. Tua ahih manin, tua a palsatpa
ahonkhia dingin, ama taanga si thei ding pen leipi vanpi ah khat bek om hi. Pasian
thukhaam in Pasian mahmah bangin siangtho ahih manin, a palsatpa mawhmaina ngah
nadingin Pasian tawh a kiza kim khat bek in seem thei hi. Khrist simloh midang
kuamah omlo hi. Amah bek in a puuksa mite kaaito-in vantung tawh a kilem dingin
bawl thei hi. Tua ahih manin, Khrist in mawhsakna leh maizum nate pua-in a
thuak ding hi. Mawhna in Pasian tawh kilem lo lua ahih manin Pa leh Tapa a hong
kikhen uh kuul ta hi. Mihing te gupkhiat nadingin, Khrist in gentheihna,
Lunggimna haksa pen dong a hong thuak ding ahi hi.
Amah in,
mimawhte taangin a hong pai theih nadingin, Pa kiangah ngen hi. Vantungmite'n
hih thu a theih nop dan uh kam in zongh kigeen thei lo liang hi. Pa leh Tapa
kikupna in hun sawtpi tak la hi. Tua pen "Muanna kikupna" (Zech.
6:13) kici hi. Gupkhiat nading vaaihawmna pen hih leitung kibawl ma pekin kinei
khin zo hi. Bang hang hiam cih leh Khrist in "Leitung pian ma akigo Pasian
Tuuno" (Mang 13:8) ahi hi. Vantung kumpipa nangawn in mite a dingin a Tapa
a hong sihsak ding pen haksa sa mahmah hi. Ahih hangin, "Pasian in hih
leitung it lua ahih manin, A tapa khat bek a neih sun hong pia a, amah a um
khempeuhte in kisia lo in nuntaak tawntungna angah ding uh hi.." John
3:16. Oh! Gupkhiat nading vaaihawmna kithei khia zolo thusim; Amah a itlo
leitung ading Pasian itna! Kua in hih itna ii thuukzia thei zo ding hiam? Kum
tawn, kha taw-in a si theilo misiangthote'n hih itna lamdang thei nuamin zong
ding uh a, lamdang sa-in a bia ding uh hi.
Pasian in
Khrist tungtawn in hong kilangh dinga, "Leitung tawh kilemna hong om sak
kik ding hi." I Cor. 5:19. Mawhna hangin mihing kiniam kiat lua a, amah
leh amah thu in, a siangtho Pasian tawh kilem kik thei lo hi. Khrist in
thukhaam mawhsakna pan mite a hotkhiat khit ciangin, mihing tha leh Pasian tha
kituah kik sak hi. Tua ahih manin a kisikkik Adam tate in, Khrist a upna uh
tawh "Pasian' tate" suak kik thei uh hi. 1 John 3:2.
Mite
gupkhiat nadinga kivaaihawm thu in vantung khempeuh leh a bei theilo
kipiakzawhna kisam sak hi. Khrist in gupkhiat nading vaaihawmna thu a pulaak
ciangin, vantungmite lungnuam thei lo uh hi; bang hang hiam cih leh a lawhcin
nadingin a it mahmah, a Gaalkaap Maangpa uh, a sih kuul ding hi. Dah pipi,
khitui kia kawmkawm in leh lamdangsa pipi in amakaaipa thugeente angai uh hi.
Khrist in vantung sianthona, muanna, nopsakna, vangliatna leh sih theihlohnate
nusia in, kiniam khiat sak leitungah dahna, zumna, leh sihnate thuak dingin a
hong pai nading thu ahilh hi. Amah in mi mawhte leh mawhna thaman kikalah hong
om ding hi napi, mi tawm cik in Pasian Tapa hi ci in a saang ding uh hi.
Vantung Ukpa ahihna nusia in mimawkmawk khat bangin hong piang dinga, amahmahin
dahnate leh ze-etnate hong thuak ding hi. Mite kheemna pan a hotkhiat theih
nadingin, hih bang thuaknateng a thuak ding kisam ahi. Heb. 2:18. A sia nasep a
zawh khit ciangin, migilote khut sungah ki-ap dinga, Satan bawlsiatna tuamtuam
thuak dingin kinusia ding hi. Sihna lipkhaphuai pen tawh si-in, mi mawh bangin,
van leh lei kikalah akikhai ding hi. Vantung mite et ngam loh khop in lunggimna
leh haksatna hun sawtpi a thuak hi. A kha dahna, A Pa maaitang pan kiliahnate a
thuak dinga, leitung buppi mawhna a pua sawnsawn ding hi.
Vantung
mite'n a Makaaipipa' khe ah bokin mihingte gupkhiat nadingin kipia nuam uh hi.
A hi ta zongin, aki mansuah nuntaak tawntungna pen vatung mite nuntaakna in lei
zolo a, mihing a bawlpa' nuntaakna bek in tankhia thei ding hi se citciat hi.
Bangbang ahi zongin, vantungmite'n hih gupkhiatna vaaihawmna ah panmun nei veve
ciat uh hi. Sihna thuak dingin Khrist pen "Vantungmi saanga neu zaw deuh
in a hong pian kuul hi. " Heb. 2:9. Khrist in mihing bangin hong piang leh
vantungmite thahaatna zah zongh nei nawnlo ding ahih manin, tua munah a thuak
dingte a thuak zawh nadingin vantungmite'n huhna a pia ding uh hi. Vantungmite
pen gupna ngah ding mite tunga huhna piate zongh ahi uh hi. Amaute'n thu um
mite dawite kheemna leh khuamialna, siatna bek a om sak nuam Satan khut sung
pan a keem uh hi.
A Topa uh
thuakna amuh uh ciangin, vantungmite'n dah in heh si-in, a thatdingte khut sung
pan honkhia nuam mahmah ding uh hi. Ahih hangin, amaute kiphal lo ding hi. Bang
hang hiam cih leh gupkhiat nading vaaihawmna ah Khrist in mite geensiatna
cilphihna leh zahpihnate a thuak kuul hi. Tua hi leh mite Gumpa hi thei pan
ding hi.
Khrist in a
sihna tawh mi tampi gum khia dinga, a sihna mah tawh sihna makaaipa susia ding
hi cih vantungmite hilh hi. Mawhna hanga a kitaan gam pen amah in va tankhia
kik dinga, tua gamah a misiangtho te tawh a om khawm tawntung ding hi.
Mawhna leh
mawhneite kibei mang sak dinga, vantung leh letung ii lungmuanna susia dingin
bang mah hong om kik ngei nawnlo ding hi. Khrist in a vantungmite kiangah hih a
Pa thukimpihsa vaaihawmna ah lungkim lel un ci-in a sawl hi. Bang hang hiam cih
leh Ama sihna hangin a puuksa mite in Pasian tawh a kizom kik thei ding uh hi.
Tua tak
ciangin, a kigeen zolo lungnopna leh nuamna vantungah om hi. A kigumkhia
leitung ii minphatna leh vaangneihna in nuntaakna Kumpipa thuaknate khengvaalin
lian zaw in thupi zaw hi. Vantung mun khempeuh ah, Bethlehem khua tunga kisa
ding, la hong gingkhia a: "A saang pena om Pasian minthang ta hen, leitung
a deih mite tungah nuamna om ta hen." Luke 2:14. kici hi. Leitung kibawl
lai a nuamna saanga lianzaw nuamna tawh "Zingsang aksite in lasa khawm uh
a, Pasian tate lungdamna tawh awng uh hi. "Job 38:7.
Mihing
tungah gupkhiat nading hilhkholhna thu leh Satan kisamsiatna Eden huansungah
kegeen khin zo hi. Topa in: "Nang leh numei, nang suante leh ama suante
kikalah kimuhdahna ka koih dinga, amah in na lu hong tuan peek dinga, nangin
ama khitul na tu ciau bek dinga, amah in na lu hong tuan peek ding hi" ci
hi. Gen. 3:15. Ihi pu leh pite kiangah hih thu a kigeenkhiat lai-in amau
adingin thuciamna na hi mai hi. Mihing leh Satan kikaal ah kidona om ding ci-a
ageen kawmin, Satan pen a tawpna ah kizo ding hi cih hilh kholhna ahi hi. Adam
leh Eve te'n Pasian tokhom maaiah migilote bangin thusitna thuak dinga din
laitakun, lametna aneih theih nading un hih thu hong hong kigeenkhia hi. A
gaalpa kiang panin haksatna a thuak ding uh hangin, a tawpna ah gualzawhna
kingah kik ding cih lametna anei ta uh hi.
Satan in
amah leh numei, a suante leh numei suante, kikaal ah kigaaldona om ding cih a
zaak ciangin, mihingte a suksiatna nasepna ah kinawngkaai sak bek thamlo in, mi
pawlkhatte'n a khemna do zo ding uh hi cih thei pah lian hi. Ahih teei hangin,
gupkhiat nading vaaihawmna a kician zaw akilah tak ciangin, Pasian Tapa a din
mun saang panin hong kiniam khiat ding hi cih thei in nuam mahmah leuleu hi. Tu
ciangciang a nasepna lawh cing mahmah ahih teh, Khrist in mihing bangin hong om
thei peuh mah leh amah zongh kizo thei ding hi. Tua hi leh a puuksa mihing te
gupkhiat nading vaaihawmna pen kidaaltan zo ding hi ci hi.
Vantung
mite'n Adam leh Eve te kiangah a kigupkhiat theih nadinga kibawl vaaihawmna
kimtakin hilh uh hi. Amau pen Satan zawh dingin kipum nusiat lo ding hi ci-in
khaam lai uh hi. Amau mawhna maaisak theih nadingin Pasian Tapa in Ama
nuntaakna mahmah tawh hong kithoih ding hi. Tua hi a, amaute akisik kik theih
nadingin hunpha kipia dinga, Khrist a upna uh tawh Pasian tate hih theihna
kipia ding hi ci-in hilh uh hi.
Amawhna uh
hanga kisam kithoihna in Pasian thukhaam omzia kilangh saka, mawhna ii
kihhuaina leh a cikziat huaizia hong mu thei uh hi. Kisikkikna leh dahna tawh banbang
hi ta leh amau mawhna thaman pen Khrist tungah tung kei henla, amah leh a suan
a khaakte tungah tung zaw hen ci-in thuum uh hi. Thukhaam in Jehovah Kumpi gam
kiphuhna bulpi ahih manin, vantungmite' ki thoihna ngawn saan tham kisa lo hi
ci-in ki hilh hi. Bang hang hiam cih leh tua thukhaamte laka khat bek zongh
mihing te tawh kituak dingin a kikheel thei hi lo a, tua ahih manin, Pasian
Tapa, Mihing Piangsakpa, mahmah ahong ki thoih kuul hi. Adam mawhna in
gentheihna leh sihna hong om sak mah bangin Khrist kithoihna in nuntaakna leh
sih theihlohna hong ngah sak ding hi.
Mihing bek
hi lo in, a leitangh ngiat mahmah zongh gilopa khut nuaiah hong om ahih manin,
a leitangh ngiat mahmah nangawn zongh gupkhiat ding ahi ta hi. Adam a kibawl
tuungin leitunga om khempeuh uk dingin kikoih hi. Ahih hangin, amah a mawh tak
ciangin, ama khutnuaia om khempeuh Satan khutnuaiah hong om pah hi. Tua ahih
manin, Satan pen hih "Leitung ii Pasian" hong hi ta hi. 2 Cor. 4:4. A
dam ukna gam khempeuh suhsakin Satan in uk hi. Ahih hangin, Khrist in mawhna
thaman loh nadinga akithoihna tawh mihing bek hilo, hih leitung mahmah zongh a
tankhia ding hi. Adam masa ii mansakteng Adam nihna in ngah kik ding hi.
Kamsangpa in, "Tuucingte taausaang leh Zion tanu kulhpi aw, kumpi gam masa
pen nang hong kipia ding hi."ci hi. Micah 4:8. Sawltak Paul in zong Ä
kileisa neihsa tatkhiatna " kawkin na geen hi. Eph. 1:14. Pasian in hih
leitung pen a siangtho, a nuamsa mihingte a dingin a bawl hi. Topa in,
"Leitung bawl in a kip sak hi. Amawkna in bawl lo a, mihing te' teen
nadingin a bawl hi. " Isaiah 45:18. Pasian tokhom leh Tuuno a om hi. A
Misiangtho ten Ama na a seem ding uh hi." Ps. 37:29, Rev. 22:3.
Amawh ma-in
Adam in amah a Bawlpa tawh maaitang kimu-in kiho thei hi. Ahih hangin, mawhna
in pasian leh mihing te kikhen saka, tua pen Khrist kithoihna bekin lemtuah kik
thei hi. Piangsakpa tawh Khrist leh vantungmite tungtawn in mite a hopih hi.
Tua ahihmain
Adam kaingah hih leitunga hong tung ding na thupi tata, ama hun a kipan Tuiciin
dong, leh tua pan Pasian Tapa hong pai khiatna dong kilak hi. Khrist kithoihna
in gupkhiat nadingin kicing mahmah ahih lai nangawnin mitampi in kisikkik lo
in, mawhna mah a teel ding uh hi cih thu zongh kilak hi. Siatna leh giitlohna
pung seemseem in, samsiatna in mihing, ganhing leh leitangh tungah tam seemseem
hi. Mawhna a zuih manun, mihingte a nuntaak hun sung tom seemseem dinga,
leitungin gentheihna namkim tawh akidim dongin, mite cidamna leh thuakzawhna,
khuak pilna leh sia leh pha theih telnate kiam suksuk ding hi. Ann nek tuidawn
lamah kidop zawh lohna leh lanna, huuknate hangin gupkhiat nading vaaihawmna
pen mite'n lungdampih het lo uh hi. Upna tawh Amah zuana a hong pai peuhmah huh
dingin a om den hi. Mawhna kihhuaina tampi lakpan Pasian thumaan a keem nuam cinten
pawlkhat bel om veve den ding hi. Kithoihna gangawh biakna ih cih pen Pasian
phuhsa kithoihna hi a, mite'n a mawhnate uh kisiikin, pulaakin, a kiciam Gumpa
a upna uh a kilat sak nading uha kipiakna ahi hi. Tua akigo ganhing' sihna in
mawhna hang hi cih a theih nading uh zongh ahi hi. Adam in, gangawh biakna a
bawl masakin cikziathuai sa mahmah a, thuakhak a sa mahmah hi. Pasian bek piak
theih nuntaakna la dingin a khut a lap toh ding hi mawk hi. Sihna amuh masak
pen zongh hi a, amau thumaan paisuak hi le uh ganhing hi ta leh mihing hi ta
leh sih kuul lo ding hi cih thei hi. Mawh baanglo ganno a gawh laitakin, ama
mawhna in pasian Tuuno sisan luang sak ding hi cih mukhola, dah lua in liing
gawp hi. Mawhna pan a suahtaak theih nading lampi a kihon sak pen nuamin
lamdangsa mahmah hi. Aksi banga taang lametna hong nei-in a maailam ading a
lungkhamnateng kiam hi.
Gupkhiat
nading vaaihawmna in mite' gupkhiat nading bek saanga a zaizaw leh a thuuk zaw
ngimna nei hi. Khrist in mawhnei mite tankhia ding bekin hong pai hi lo hi.
Pasian omzia leh a gamtatzia leitung te leh vantungte maai-ah lak dingin hong
pai hi zaw hi. A ki thoihna hanga piang thu mukhol in Honpa in akikhai lup
madeuh in : "Tu-in hih leitung thu kikhen ta a, hih leitung ukpa
kihawlkhia ta hi. Kei in hih leitung pan ka kilaptoh leh mikhempeuh ka huup
ding hi," ci hi. John 12:31:32. Mite gupkhiat nadinga Khrist sihna in mite
vantung tungsak thei bek hilo in, bawlsa nate maai-ah Pasian leh A Tapa pen
dikin Satan in khial hi cih zongh lak lai ding hi. Thukhaam ii kip tawntungna
kilangh sakin, mawhna omzia leh a thamante kilangh sak ding hi.
Buaina om
kipatna zongh Pasian thukhaam tawh kisai ahi hi. Satan in Pasian pen diklo hi,
A thukhaamte zongh khial hi. Tua ahih manin vanpi leipi hoih zawk nadingin tua
thukhaamte kheel kuul hi ci hi. Thukhaam a dona tawh thukhaam neipa a zo gawp
nuam hi gige hi. Ama deih bang hi dek lo-in, Pasian thukhaam in kicing in
kikheel theilo ahih lam kilangh zaw hi.
Vantung pan
akihawlkhiat ciangin, Satan in hih leitung pen ama gam hih sak ding khensat hi.
Adam leh Eve te kheemna a zawh tak caingin, hih leitung a ngah kisa hi. Bang
hang hiam cih leh, "amaute'n a kumpi dingun hong teel uh hi.," ci hi.
Mimawhte mawhna kimai sak thei lo ding hi, tua ahih manin, mimawhte ama neihsa
hi a, leitung zong ama aa hi, ci hi. Ahih hangin Pasian a kikimpih, a Tapa
mawhna thaman thuak dingin hong pai sak , a umte Eden inn nuamah ki paipih kik
ding hi. Satan khut sung pan mite leh a leitangh ngiat mahmah honkhia dingin
khrist hong ding khia hi.
Khrist in
kiniamkhiatna tawh hong pai a, mimawhte a hotkhiat ding pen leitung, vantungin
lamdang sa mahmah uh hi. Khrist in aksi khat pan aksi khatah , leitung khat pan
leitung khat ah, pai kawikawi in, uka, kisapna nei khempeuhte akisapna bangin
pia hi. Hih zah a lian thupi leh a vaangnei pa in a Vangliatna nusia-in mihing
bangin hong om ding cih pen leitung danga om mite' theihnop pen thusim khat ahi
hi. Tua hi a, Khrist in mihing bangin a hong pian takpi ciangin, leitung danga
mite'n lamdang sakna tawh bawngkuang sungpan Calvary dong na en gige den uh hi.
Amah a kibawlsiatna leh akizahkonate vantung in Satan nasep hi ci-in ciamteh uh
hi. Khrist thuakna khempeuh a neng a tawngin kiciamteh sitset hi. Amaute in
khuamial leh khuavaak kikaala kidona en gige uh hi. Khrist in singlamteh tung
pan Ä zozo hi."(John 19:30) ci-a akiko ciangin leitung dang khempeuh leh
vantung mahmah nuamna, gualzawhna la kisa hi. Sawtveipi kidona a om pen kizo ta
a, Khrist in a gualzopa ahi hi. A sihna in Pa leh Tapa in mihing te bangzah in
it uh hiam cih a dawnna ahi hi. Satan pen zuauphuakpa leh tualthatpa ahihna
hong kilangh ta hi. Mihingte a uk theihna vangliatna kiphal hi leh vantungmite
nangawn zongh a uk nuam hi. Tu-in ahih leh vantungte in aw kihual takin Pasian kumpigam
kip ahihna teci pang uh hi.
Thukhaam in
a kikheel thei ziauziau hi leh Khrist sihna kisam lo ding hi. Khrist sihna in
thukhaam in amawh peuhmah pum khahkhiat het lo ding hi cih teci a pang hi. Tham
lo-in mawhna thaman in sihna hi cih kilangh sak lai hi. Khrist sihna in, Satan
pen kisisak takpi ding hi cih teci a pang hi. A zenzen in, mitampi geen bangin,
thukhaam pen singlamteh tungah kibei sak hi ci leeng, hih leitung khuamial
kumpipa in gualzo dinga, Pasian gam a geensiat nate a maan hong suak mawk ding
hi. Ahih hangin tu-in, Khrist sihna in thukhaam pen kikheel thei ngiatlo a,
Pasian in dikin, migi-in, thutang leh hehpihna tawh akumpi gam uk hi cih teci
panna a suak hi.
Source:
Vantungmi Thumte Tangkona
