MUC

Print Friendly and PDF

Sunday, April 10, 2016

Khenpi 6 | Seth leh Enok


ADAM kiangah tapa dang, Abel taang ding, khat kipia hi. Tua tapa in Pasian thuciam gamluah dingpa, tapa upa za luah ding pa ahi hi. Amin "Seth" kici a, akhiatna in "Sehtuam" "Leiba lohna" cihna hi. Anu in "Pasian in Kain thahsa Abel taang dingin adang khat hong sehtuam sak hi" ci hi. Adam ta dang te'n Adam a sut saangin, Seth in Adam sunn zaw hi. Gamtat hoih gamta mi hi a, Abel kalsuan bangin akalsuan hi. Ahih hangin pumpi meelhoihna ah a u Kain zah bang zo lo hi. Bang hang hiam cih leh "Adam a kibawlin Pasian meel suunin kibawla, ahih hangin a tuuk khit teh, a taten amah (Adam) meel suunin hong piang uh hi." Seth in zongh thumaan lam hilhna leh Gumpa thute theihna nei hi. Pasian hehpihna tawh amah in Pasian naseeem in, Pasian pahtawi hi. Abel nungta lai hileh Abel sep ding bang teng lian seem in, mite lungsim Pasian lamah a ki hei nadingin hanciam hi.
"Seth"in zongh ta hong nei a, amin Enose kici hi. Tua a kipan miten Jehovah kiang thu hong ngen ta uh hi." A thumaan miten Pasian bia den uh hi; ahih hangin, mihing hong pung seemseem ciangin a thumaan leh a thumaan lote kikala kideidanna hong ki lang seemseem hi. Pawlkhat te in a kilang tanga Pasian a upna uh a ki muhsak uh hong kula, tua mah bangin, sawlmang nuam lote leuleu in a uplohna uh kilangh sak ta uh hi.
Amawh ma-un ih pu leh pi masa ten Sabbath na tang uh hi. Tua Sabbath pen Eden huana kiphut ahi hi. Pazadih pan a ki hawlkhiat khit nangawn in zongh tang lailai uh hi. Tu-in, amaute in a sawl manloh manun bangbang haksatna thuak uh hiam cih kithei uh a, kuamah peuhmah in Pasian thukhaamte laka khat bekbek zongh a palsat leh a palsatna thamana thuakzia ding thei ta uh hi. Pasian thukhaam in siangtho in, ki kheel ngei lo hi. Pasian tunga thumaan Adam taten Sabbath pahtawi uh hi. Ahih hangin Kain leh a suan akhak te'n Pasian tawlngak ni pen zahtaak bawl het lo uh hi. Jehovah thupiak neu seh in amau ut bang lel khat in tawlngak hun leh nasep hunte seh lel uh hi.
Pasian in a samsiat khit caingin, Kain pen Adam innkuan sung pan hong inntuan khia hi. A nasep dingin lokhawh teel masa hi. Tu in khawpi khat sat a, a tapa upa pen mi pua sak hi. Amah in Topa maitang pan paikhia in, a om kik ding Eden huan nuam kamciam te nusia in, hih sim leitung samsiatna nuaiah amah duh leh dieh zong ding lam dingin aom hi. Tua ahih manin, hih leitung deihna a zui, mi kigualnuam sak, dawi bia mite makai pipa hong suak hi. A suan leh akhaakte in hih leitung sum leh paai, neihsa lamsate bek lunggulhmi hong hi uh hi. Pasian awlmawh lo in, mite hoih nadinga Pasian vaihawmnate a langpan den uh hi. Kain ini mi thahna lamah na makai khina, a khang ngana Lamech in zi tampi nei in, kiphatsakna tawh Pasian tawng gawpa, Kain kibawlsiatna phu laak sawm tazen hi. Ahih hangin Abel in bel gan cing nasep seema, buuk sungah teengin kiniam khiat mahmah hi. Tua bang lian mah in Seth zongh hong om a, "Hih leitungah khualzin bang lel in kingaih sun in, a hoih zaw vantung gam nuam lamen" in a om hi. Heb. 11:13,16.
Tawlkhat sung hih mi pawlnihte hong tuam om ciat uh hi. Kain minamte in amau teen masakna mun pan hong kithehkhia uh a, Seth minamte omna zangkuam, zaang laiteng hong tung uh hi. Tua ciangin Seth minamte in Kain minamte tawh om khawm ding ut lo uh ahih manun, zaang gam pan mual dawn lamah taai to uh hi.
Hih banga kikhen lai teng uh Seth minamten hoihtakin Pasian bia thei uh hi. Ahih hangin, hun hong sawt seemseem ciangin Seth minamten zaanggama om Kain minamte tawh hong ki thuah kik uh a, a tanute uh hong teenpih mawk uh hi. Seth minamten Kain minam numeite uh hong teenpih manun Pasian lungkim sak lo uh hi. Pasian bia mi tampitakte mawhna sunga a kikheemlut manin a siangthonba, a pahtaak huai gamtat hoihna teng uh bei mang hi. Pasian kihta lo awlmawhlote tawh akithuah manun, thukhaam sagihna zongh phamawh sa nawnlo uh a, a deih peuh peuh uh teenpih kawikawi ta lel uh hi. Seth minam te zongh Kain minamte mah bang hong hita uh hi. Jude 11. Pasian thupiakte phamawh sa lo in leitung gualnopna leh hauhsakna bek hong lunggulh ta mawk uh hi. Mihingte in Pasian thei nuam lo uh a, a ngaihsutnate uh siatna bekbek tawh kidimin, a lungtangte uh hai gawpin mialcip hi. Rom. 1:21. Tua ahih manin, "Pasian in thukhentat theih lohna lungsim amaute pia hi. aneu 28. Mawhna in alip khap huai phaaknatna bangin hih leitungah hong ki zeel hanhan hi.
Kul tul khat phial Adam in a suan a khaakte lakah hong om in mawhna thaman hong theih pih hi. Thumaan takin naseema, siatna sunga alut loh nadingun makaihin hanciam pih hi. A suan a khaakte kiangah Topa lampi hilh dinga kisawl ahih mah bangin, amah'n zongh thupi sa-in khang khat khit khat hilh suksuk hi. A khang kua na donga a suan a khaakte kiangah pazadih a nuam taka a om dan akipan mawhna a bawlna hun uh taangthu te gen kikik hi. Pasian thukhaam pen paupeng se lo a, zuih ding ahihna thu leh amaute gupkhiat nading a Pasian hehpihna vaihawmnateng teltakin geen suksuk hi. Ahih hangin, mi tawmno khat bek in a thu gente ngai uh hi. Tam veipi, a suan a khaakte'n Adam pen naakpi takin mawhsak thei uh hi.
Tua hi a Adam nuntaakna pen dahna, niam khiatna , leh a mawhna hanga kisuangtaakna bekbek tawh kidim hi. Eden huan a nusiat laitakin, a si ding bang liana kingaihsutna hong nei hi. Ahih hangin sihna omzia taktak pen Kain in Abel a thah tak ciangin hong thei phasaan hi. Ama mawhna, Abel sihna leh Kain in Pasian a nialna teng haangin Adam dah lua kisa in kha kuun hi. Siatna hanga tuiciin a hong om dan dingte mukhol pah hi. A tuungin, Bawlpa'n si ding hi uh teh ci a a thu apiak pen Adam in lauhuai lua sa hi napi, kul tul khat phial mawhna thaman a hong muh suksuk takciangin, sihna in Pasian hong hehpihna hi zaw mawk veh cih hong thei cian zaw hi.
Tuiciin tun ma a miten nuntaakna saangtak leh khua pilna saangtak a ngah theih nadingun kiphal hi. Amaute in pumpi cidam mahmah sensan uh a, a khuak uh pilvaang mahmah, tei mahmah ahih manin biakna lam leh leitung pilna lama a thu theih khiatte uh kuama dem zawh bang ding hi dek suai lo hi. Kum tampi nungta uh ahih manun, a khuak uh khang khin hak hi tuanlo hi. A khuak ngaihsut theihnate naupang ahih lai phet uh a kipanin khang paha, Pasian kihta in A deihna a zui nuamte bang, akhan tawntung sung a khuak pilna uh khang toto mai ta zen hi. Tua hi a, theihna leh pilna thuk mahmahte ngah khia uh hi. Tu laia, mi pil mahmah ih cihte, tuiciin tunma a, mite lakah va om thei uh hi leh khuakpilna hi ta leh, pumpi thahatna lamah hi ta leh naupang bang hi lel ding uh hi. Mite nuntaak hun sung hong tom seemseem ciangin, pumpi thahatna zongh hong kiam paha, khuak pilna leh ngaihsut siamnate zong tawm seemseem pah hi. Tu hun ciangin, mi pawl khatte in kum 20 pan kum 50 tawntung sung bang pilna, siamna sinin om uh a, tua bang mite kinaak thupi et mahmah hi. Ahih hangin tuiciin tun ma a mite tawh enkaak leng tu huna ih mipilte bangmah tham ahi kei uh hi. Tuiciin tunma a mite'n a khuak pilna uh a saang zaw leh pumpi thahatna saang zaw pek ahih ban ah kum za a tampi sung pilna, siamna sin mawk uh hi. Tua te lakah naungek bang mah thei lo bang ih hi lel ding hi.
Tu laia mite'n amau mai ua mipilte laibu bawlte leh nasepnate panin pilna leh siamna muh beh toto uh hi. Tuiciin tunma miten laibute a neih loh zenzen uh hangin, a pu apate uh pilna leh siamte muhpih theihpihin amau muh tawm tawh, tu lai a te saangin niam zaw peuhmah lo uh hi. Pasian mahmah in a bawl khit ciana hih leitung tawh kisai pilna theihna khempeuh a muappa Adam pen, tuiciin tunma mite tawh khang sagih tawntung om khawma, amah in ama theihna, pilnate a suan a khaakte tungah muam sawn hi. Adam theihna leh pilna saanga kician zaw koi ah om tuan ding hiam? Amaute in a telloh, a theih loh uh a om khaak leh Adam dong thei uh hi. Tu hun a mipilten aki bawlsa laibute simloh dot theih ding kuamah ih nei kei hi. Tuiciin tunma a miten laibu aneih loh uh hangin, a pumpi thahatna uh leh khuakpilnate uh thupi lua ahih manin, amauten ciapteh theihna khauh mahmah nei uh a, kigeenkhia peuhmah ahi bang lianin ciamteh bek hi lo in, geenkhia kik thei lai uh hi. Tua bangin khang khat khit khang khat thu tampi tak na ki muam suksuk uh a, bangmah kicinlohna cih bang omlo hi.
Hua hun laia miten Pasian bawlsa nate pana pilna leh theihna a ngah theih zahun, kuamah in ngah thei nawn lo hi. Hua hun pen khuavaak hun kici thei hi. Bang hang hiam cih leh mi khempeuh in Adam kiangpan mahmah in thuhilhna ngah thei uh hi. Topa a kihta te sia dingin Khrist mahmah leh a vantung mite om tawntung uh hi. Tua banah, amaute muh theihin, Pasian huan zongh kum za tampi hih leitungah ki om sak lai hi. A kicing pazadih kongpi ah Pasian vaang hong kilangha, tua munah Pasian bia ding ten a va bia uh hi. Eden huan lut nading a kongpi pen vantungmi in cing gige hi cih ki gaal muh theih niloh ahih manin kuamah in Eden huan om ngei kei ci thei lo hi. Bawlsa nate omzia dimdiamte, huan sung om zia te, nuntaakna singkung leh sia leh pha theihna singkungte, kuama nial theihloh thute ahi hi. Pasian ini om a, na khempeuh a Ukpa ahih lam leh A thukhaamte zuih ding ahih lam kuamah in Adam hun sungin thudotin nei pakpak lo uh hi.
Mawhna a om zezen hangin, misiangthote na om veve a, tua misiangtho nam pen (Holy line) kici hi. Amaute in Pasian tawh kizom uh a, vantung kithuahpihte ahi uh hi. Pil mahmah uh a, a nasepnate uh lamdang thei mahmah hi. Nasep theupi khat nei uh a, a nasepnate siangtho neih ding leh Pasian deih bang om zia neih theih nadinga mite thuhilh ding ahi hi. Tua bang misiangtho tampi lak pan laisiangtho in tawmno khat bek hong thei sak hi. Tua tawmno khatte mah khang khat khit khang khat, a kizom suksuk a, Pasian thumaan keemte ahi uh hi.
Enock tawh kisai in a kigelh in ah Kum 65 a phak ciangin tapa khat nei hi. Tua khit ciangin kum 300 sung Pasian tawh lam a pai khawm hi. Amah in Pasian it in, lau a, A thukhaamte keem hi. Amah pen nam siangtho, mi siangtho gui pan ahi hi. Adam kam panin mawhna hong lutnate za a, Pasian kamciam a muangpa khat hong suaka, hong pai ding Gumpa lamen in a om hi. Enock in a tapa upa pen a suah khiat ciangin, a thu theihna hong khang zaw a, Pasian tawh a kizopna hong kinai zaw hi. Pasian tapa khat ahihna tawh ama dinmun leh anasep dingte hong thei cian zaw hi. Tano in apa a itna leh apa amuannate a muh ciangin Pasian in a tate (leitungmite) bangzah in hong it in, hong hehpih hiam cih mu hi. Tua a kiteh thei lo Pa hong itna in Khrist tungtawn bek in kithei thei a, tua thu pen enock in suun leh zaan in ngaihsutpi pen in nei hi. Enock in Pasian tawh lam pai khawm hi ih cih pen mang peuh leh mangmuhna peuhah hi lo in, a nisim nuntaakna ah ahi zaw hi. Amah in gampalakah amah guaka omte bangin om lo a, Pasian in hih leitung mite ading a vaihawmnate seppih hi. A innkuan sungah hi ta leh midangte tawh hi ta leh a om na peuhpeuh ah, mi khat pasal ahih na, mikhat pa ahih na , mi khat lawm ahihna, leh gam mi khat ahih na ah muan huai a, Topa deihna tawh kithuhual hi; tua hi kei leh "lung ki tuak lopi in minih bangci pai khawm thei ding uh hiam? Amos 3:3. Pasian tawh a lampaina pen kum 300 sung tawntung a kizom ahi hi. Khristiante tawm khat bekin Khrist hong pai nading hun tom mahmah ahih manin nuntaak siangtho nungta uh hi. Ahih hangin Enock in bel kum za khat khit kum za khat a nuntaak tohtoh ciangin, a upna kiam seemseem cih thadah, khang seemseema, Pasian a itna hong nasia seemseem hi.
Enock pen khuak pilna saang mahmah nei khat hi a, a theihna zongh zia mahmah hi. Pasian kiang pana thungah pa ci-in mite'n pahtawina ngah dena, mite lakah akiniamkhiat pen khat ahi hi. Pasian tawh a kinaih seemseem ciangin, amah tha zawngkhaal in kicinglo ahih lam kithei seemseem hi.
A lungsim sungah Pasian kihtaaklohna, gitlohna leh thumaan lohnate in Pasian a zahtaakna akiam sak khak ding lau in,, mite tawh kithuah ding sangin, amah guaka thugeenna Pasian thu a ngaihsut hithiat ding ut zaw hi. Tua bangin Topa ngak gige a, Pasian deihna taktakin bang hi mawka, bang ci sep theih ding ka hi hiam ci -in Topa deihna zong hi. Ama a dingin thungetna in nuntaakna dinga huih dik tawh ki banga, amah in vantung gam nuntaakzia ciam kha hi.
Vantung mite tungtawn in Enock kiangah Pasian in hih leitung pen tuiciin tawh a suksiat ding vaai leh gupkhiatna vaihawmte lak hi. Pasian in Enock kiangah tuiciin khit ciang a mite zia om dingte, nih vei paina tawh kisai a thu piang dingte leh leitung bei hun thute hilh hi.
Misi thu tawh kisai in Enock pen bua thei hi. Amuhna panin midik leh migilo te anih un si uh a, leivui suak khawm lel in, tua pen a tawpna hi lel hi. Amah in hankhuk gaal khat lama nuntaakna thu ana thei kha lo hi. Tua ahih manin, mangmuhna tawh ama tungah Khrist sihna, Khristian a misiangtho te han khuuk sung pan gumkhia dinga, vantung mi khempeuh tawh vanglian taka hong painate kimu sak hi. Amah in Khrist hong pai huna hih leitung ii kisiatna akiphasak, zuauphuahhat, amau thu bang bek thu sa mite, Jesu Khrist nial thukhaam a khe nuaia sikcipte, Khrist tatkhiatna a zahpihte omzia khempeuh mangmuhna tawh na mu khol zo hi. Amah in misiangtho ten kumpi lukhu khu a a kipah tawi nate uh mu in, migilote, mei tawh hallup ding Topa kiang pan a kihawl khiatnate zongh mu hi.
Enock pen thumaan tangkopa hong suak hi. Pasian in ama tunga alah thute midangte tungah hilh sawn hi. Pasian thu za nuama a zui nuam miten Enock thuhilhna leh a thungetnate theih pih dingin Enock hong zuan uh hi. Amah in zong taangpi lak mahah Pasian thu hong taangko pah hi. A taangkona pen Seth suan leh khaakte lak bekah hi lo hi. Kain minamte lakah zong Pasian kiang pana amuh mangmuhnate hilh veve hi. Ën dih un, Topa in mikhempeuh thukhen dinga, migilote a thaman tek uh pia dingin a misiang tul sawm tampite tawh hong pai hi." ci hi. Jude 14,15.
Amah in amite mawhna haang taka a kawk ngampa ahi hi. Khrist tungtawna Pasian itna thu a mite lakah a taanko kawmin, a miten a mawhna lampi pan a pai khiat nadingun thuumpih lai hi. A mawhnate uh kawkkhia in, amaute taai gawpa, kisik lo a, thukhaam a palsat teitei te tungah Pasian thukhenna daan hong tung ding hi ci-in hilh ngitnget hi. Tua banga a paupau pen amah hilo zaw hi. Tua hi a, Pasian misiangtho te in a zaknop huai nono thute bek geen lo uh a, kitaaina thuhilhnate zongh geen zeel uh hi. Pasian in a sawltak te lungtang leh amukte uh ah a thumaan koih a, amaute in tua thumaante a geen uh ciangin langnih hiam namsau bang hi.
A za mite in Pasian in Enock ompih ahih lam theithei uh hi. Pawlkhatte in um in kikheel pah uh a, pawlkhatte in bel zahpih in kosia uh a, a gamtat siatna uh ah uang seemseem uh hi. Enock mah bangin, hun nunung cianga Pasian naseem mite in Pasian thumaan tangko ding uh a, zahpihna leh uplohna tawh aki kosiat dongun na seem ding uh hi. Tuiciin tunma a mite'n Pasian tawh lam a pai khawmpa Enock, thuhilh nate a nial uh mah bangin hun nunung ciangin Pasian kamtaaite thuhilhnate mite'n awlmawh lo ding uh hi. .
Tua bangin na asep mahmah laitak mah in Enock in Pasian tawh a kizopna kip sak veve hi. Na a naak sep seemseem ciangin, a thungetnate pen adeihna taktak tawh kidim seemseem hi. Khat veivei mite kiang pan paikhia in, amah guakin om a, tua hun sungin Pasian kiang pan khalam pilna, thahatna sin hi. Hih banga Pasian tawh hong kikop seemseem ciangin Enock in Pasian lim leh meel hong pua khuavaak siangtho tawh Enock mai zongh taang hi. A thungetna pan a hong ciah kik ciangin, amai puak hong ki lam dang lua ahih manin Pasian thu umlo mite nangawn in zong lamdang sa uh hi. Mihing te gitlohna in nasia lua ta ahih manin siatna a thuak ding uh kilawm hi ci-in Pasian in geenkhia zo hi. Kum hong beibei a, mihing te gitlohna hong ki beh lap toto ahih manin, Pasian thukhenna zong hong khauh seemseem hi. Tua kawmkalah, Enock in mite kisik kik nading bek naseem thapai hi. Mimawhte in a thuhilhnate uh a saan nop loh hangin, khawl tuan lo in hilh teeiteei a, mawhna tawh a kidim hih leitung pan vantung nopsakna ngah dinga Pasian in a lak ni dong lungkia lo in mi mawh te lakah na seem hi.
Enock in akhanpih mite kiangah hih leitung sum leh paai ngun leh khamte a lunggulh loh nadingun a geen ciangin, miten mihaipa ci in nuihsan lel uh hi. Enock in akisa ngeilo tawntung hauhsakna ngaihsun gige zaw hi. Amah in vantung khuapi lunggulh zaw hi. Zion khua lai zangah kumpipa a Vangliatna tawh a om pen mu hi. Tua ahih manin, a lungsim, angaihsutna, akampau nate khempeuhah vantung bebek tawh kisai thu ahi hi. Mawhna a tam seemseem mah bangin Pasian kham khuapi hong lunggulh seemseem hi. Hih leitungah a om lai mahmah in zong upna tawh, vantung khuavak gamsungah a om khin zo hi.
"Lungsim siangthote in thupha a ngah ding uh hi. Bang hang hiam na cih uh leh amaute in Pasian amu ding uh hi. "Matt. 5:8. Vantung tawh a kilungtuah theih nadingin Enock in kum 300 sung tawntung lungsim sianthona zong niloh hi. Kum 300 sung Pasian tawh lampai khawm hi. Ni khat khit ni khat Pasian tawh kinaih semsem a, a tawpna ah Pasian in van ah la to hi. Hih leitungah a om lai a Pasian tawh a lampai khop pen tu-in vantungah a zomto hi a, vantung khuapi siangtho kongkhakpi ah hih leitung pana lut masa penpa ahi hi.
Enock a om nawn loh tak ciangin a om loh lam ki thei mahmah hi. Nisima thuhilha, kikoko aw pen tu in om nawn lo pah hi. A ki laakkhiat laitakin mipawl khat in mu a, nidanga a pai pahpah na gamlak mun khat peuh ah a ki paipih dingin ngaihsun uh hi. Amah a it a ngai mahmah ten mun citengah zong kawikawi uh hi. Ahih hangin mu lo uh hi. Enock a om kei hi. Bang hang hiam cih leh Pasian in van ah a la to hi.
Sihna ciam kha lo a, Enock van ah a kilak tohna panin Topa in ih theih ding thu phamawh khat hong hilh hi. Adam mawhna thaman thuak ding hanga lungkiatna om thei hi. Pawlkhatte bangin, Topa kihtaakna leh a thukhamte zuih man bang om hiam, mi khemepeuh si maimang cip ding ih hi leh? ci uh hi. Adam mawhna hangin sihna om mah hi. A hih hangin Gumpa tungtawn in eite in nuntaakna leh sihtheihlohna ih ngah ding hi. Satan in mihing te a hong kheemna ah misiangtho te ngah ding thaman leh mimawhte thuak ding mawhna thaman cih bang om se lo a, kua mahin Pasian thukhaamte zui zolo hi ci hi. A hih hangin, Enock tungtangah, Pasian in Amah a zongte thaman a piapa ahih lam kilangh sak hi. Heb. 11:6. Enock tung ahih mah bangini a Thukhaam a zuite tungah zong ahih ding hi ci-in a hong lak ahi hi. Tu-in ahih leh Pasian hehpihna tawh mihingte in ze-etna nang zo in, mawhna, siatna leitungah nuntaak lai mahmah in Pasian thukhaam zui zo thei hi cih kilak khia hi. Enock nuntaak siangtho omzia kimu khia hi. A kikheelna in ama hilhkholh thute taangtung takpi dinga, sawl mang mit'en nopna, vangliatna leh sih theihlohna ngah in, thukhaam palsatte in mudahna, gaalbawlna leh sihna a thuak takpi ding uh hi, cih lak hi.
Upna tawh Enock in sihna ciam kha lo in ki kheelna angah hi. bang hang hiam cih leh amah in kikheelna angah ma in Pasian lungdam sak hi. Heb. 11:5.
Siatna tawh kidim leitungah aom lai mahmah in zong Enock in Pasian tawh kizop denna nei ahih manin, sihna gu nuaiah sihna a thuak ding kiphal lo hi. Hih Pasian kihta kamsaangpa nuntaakna in Jesu hogn pai cianga "hih leitung pana gupkhiat" (Rev. 14:3) ahih dingte siangtho dan ding limla ahi hi. Tua hun ciangin, tuiciin tunma mah bangin kihhuaina, mawhna in leitung zel gawp ding hi. Amau lungsim ngaihsutna leh kihilhna manlo tuamtuamte zui-in mite'n vantung ii thuneihna langdo ding uh hi. Ahih hangin, Pasian mite in, Enock mah bangin Pasian deihna zongin a lungsim uh siangtho sak in, Jesu liim leh meel, gamtat hoihna a neih dongun thumaan ding uh hi. Enock bangin, amaute in Topa hong paikik nading thu hilhin, thukhenna tawh a kipelh nadingun hansuah ding uh a, amau gamtat kampau siangtho tawh mi mawhte mawhna lakkhia ding uh hi. Tuiciin tawh hih leitung a kisuksiat madeuh a Enock in vanah lakna a ngah bangin, anungta lai misiangtho te in zong hih leitung mei tawh a kisuk siat madeuh in vanah lakna a ngah dinig uh hi. Sawltakpa in Ëite in ih vekpi in ih mu ding ih hi kei hi. Pengkul nunung a kitum ciangin, hun tomno khat sungin, mit phiat kalin, ih kikheel ding hi." "Topa mahmah vantung pana kikona aw tawh, vantung mi Mangpa kikona aw tawh, Pasian pengkul aw tawh; "pengkul a ki tum ciangin, misite in siattheih lohna ah a tho ding uh a, eite zong ih kikheel ding hi". "Khrist sunga misite a tho masa ding uh a; tua ciangin ei a nungta lai te tawh meeilom te lakah hong kilato in Topa ih dawn ding a, atawntung in Topa tawh ih om den ta ding hi. Tua ahih manin hih thu tawh note khat leh khat na kihan suah un." 1 Cor. 15,52. 1 Thess. 4:16-18.

Source: Vantungmi Thumte Tangkona





To get the latest update of me and my works

>> <<