Khenpi 5 | Kain leh Abel Kisittelna

ADAM tate nih, Kain leh Abelte, a gamtat luheekna uah kilamdang mahmah uh hi. Abel in Pasian tunga thumaanna lungsim nei hi. Amah in PiangsakPa thudikna leh hehpihna pen a puuksa mite adingin kicing hi cih mu a, lungdam takin gupkhiatna vaaihawmna thu na saang thi. Ahih hangin, Kain in bel langpanna lungsim nei hi. Amah in Pasian phuisam sam hi. Bang hang hiam cih leh leitung in Adam mawhna hangin samsiatna a thuak hang hi. Satan tuukna mah bangin a lungsim a ut bang lel khat in paisak mawk hi. Amah leh amah kiliatsak nopna lungsim nei-in Pasian thudikna leh nasep theihna vaang pen nial nuam mawk hi. Adam a kisittel mah bangin, hih unau nihte zongh thu-um in sawl amang uh hiam ci-in ki sittel ding ahi hi. Amaute in mihingte gupkhiat nadinga vaihawmnate thei uh a, bang ci bang biakpiakna Pasian in deih hiam cih zongh a thei uh hi. Amaute in hih biakpiakna ah Gumpa a upna uh kilangsak ding uh a, mawhmaina angah nadingun ki-ap ding uh hi cih a thei uh hi. Hih bangin ahih uh leh Pasian deihna banga sawlmang hi ding uh hi cih zongh a thei uh hi. Sisan luangkhia lo in, mawhmaina kingah zolo hi. Amaute in amau upna uh Khrist sisan ah a lah uh kul hi. Tua banah a khawhsate lak pana gah masate tawh Topa tungah lungdam a koh ding uh ahi hi.

Unau nihte in biakpiakna taau a kibangin bawl uh a, a biakpiakna ua zat ding tuak hong keng uh hi. Abel in a biakpiak nadingin, Topa lamlahna bangin, a tuute laka khat a pia hi. "Tua hi a, Topa in Abel biakpiakna zahtaakin saang hi. " Van panin meikuang hong kiasuka, a kithoihna kaangtum hi. Ahih hangin, Kain in bel Pasian in kician taka a lamlahnate awlmawh lo in, singgah bek tawh biakpiakna bawl hi. Ahih hangin ama biakpiakna kisaang hi cih limlahna peuhmah van pan hong kilangh lo hi. Tua ciangin, Abel in a u kiangah Pasian vaikhaakna banga biakpiakna a bawl nadingin va thuum hi. Ahih hangin Kain hong heh zaw mawka, amah a upa zaw kimlai anua zaw in tua banga thu ahilh ding ut lo hi.

Kithoih nadinga Pasian ngetna tawh kisai-in Kain pen a phunsa in Pasian kiangah hong pai hi. Ama biakpiakna in kisik kikna lim peuhmah pua lo hi. Amah in, mitampite cih mah bangin, Pasian cih penpen bek tawh biakpiakna bawl sese kuul ding hiam ci hi. Ama deihna bang zuui nuam zaw hi. Ama sep theih bangin sep sawm hi. Tua ahih manin, Tuuno hogn keng lo a, a nasepna pana angah singgahte hong keng zaw hi. Tua ciangin, Pasian kiangah ap in, Pasian in a saan sak dingin lamen hi. Kain in biakna taau lamna hi ta leh, biakpiak nading kithoihna van kengin sawlmang hi. Ahih hangin, a sawlmanna pen a lang bek hi se ciitciat hi. A kisam zaw lam ahi, Gumpa limlahna, gangawh biakna pen nusia se ciitciat hi.

Hih unau nihte in biakna lam kihilhna pen akibangin ngah khawm uh hi. A nih un mawhnei tuak uh hi a, anih mah un biakpiakna pia tuak uh hi. A pualam pan en leng, a biakna uh pen a kibatna ciang khat om hi. Ahih hangin a kilamdanna taktak uh bel lian hi.

"Upna tawh Abel in Kain kithoihna saanga manpha zaw kithoihna pia hi." Heb. 11:4. Abel in gupkhiat nadinga vaaihawmna thu mungpi pen thei hi. Amah in amah leh amah mi mawh ahih lam kimu a, a mawhna leh amawhna thaman, sihna in amah leh Pasian kikalah om hi cih mu hi. Tua ahih manin, a kithat tuuno hong paipih a, Pasian thukhaam kipalsat ngei hi cih hong lak hi. Gan sisan luangkhia tung tawn in a kithoih ding, Calvary muala kithat ding Khrist mu khol hi. Tua mun a kithoihna kibawl ding mu khola, amawhnate ki mai sakin, a biakpiakna kisaangin, misiangtho hi thei ding hi cih mu hi.

Abel mah bangin Kain in zongh hih thumaante a saan theih nadingin hunpha ngah hi. Ahih hangin amah pen ama deih bang lel khat a om nuam mi ahi hi. Abel in upna leh sawlmanna teela, Kain in uplohna leh langpanna teel hi. Amau teel bang tuaka kisaang uh ahi hi.

Kain leh Abel te-in, leitung hung bei donga leitunga mi namnihte limla uh ahi hi. Nam khatte in a kisawl bangin amau mawhmai nadingin biakpiakna nei uh a, nam khatte leuleu in amau siamna, theihna leh deihna bangin om lel uh hi. Amau biakpiakna in Pasian deih bang leh nget bang ahih loh manin, Pasian tawh kilem nading om lo hi. Jesu kipiakna hang bek tawh eite in mawhmaina a ngah ding ih hi hi. Khrist sisan kisam kei ungh, ci a amau sepna tawh Pasian saan ding a utte'n Kain tawh kibang ahi uh hi. Amaute a sawp siang sisan a saan kei uh leh samsiatna a thuak ding uh ahi lel uh hi. Mawhna pan a kisuah taak sak nading uh lampi dang omlo hi.

Leitungah Pasian bia hing a kicite lakah a tamzaw in Kain nungzui ahi lel uh a, biakna maanlo a kici peuhmah phial pen mihing in ama sepna tawh gupna ngah thei hi cih thu ah kiphut hi. Mi pawlkhatte'n mihing in gupna kisam lo in, khantohna kisam hi ci uh hi. Bang hang hiam cih leh khantohna in sawpsiangin, saangkhaanna, thak suaksak thei hi. Kain in sisan neilo biakpiakna tawh Pasian bia a, Pasian hehpihna a kilam et mah bangin, hih mitte'n zongh mihing dinmun pen Pasian tawh a ki zakim in koihto nuam uh hi. Kain in mite hong bang ci om ding uh hiam cih hong lakkhol hi. Khrist pan mite paikhia le uh bangci bang hi ding uh hiam cih lak hi. Mihing in amah leh amah ki thaksuak sak thei lo hi. Mihing pianzia in tunglam ahi Pasian kiang manawh lo in, nuailam ahi Satan kianglam manawh zaw hi. Tua ahih manin, eite lametna bulpi in Khrist bekmah ahi hi. "Vannuai minte lakah eite gupkhiat nadingin Ama min lo mindang kipia omlo hi." Kuama dangah gupkhiat nading lampi omlo hi." Act. 4:12.

Upna dik, Khrist tunga kiphut, pen Pasian deihthu te zuihna ah kilangh hi. Adam huna kipan tu hun dong buaina bulpi pen in Pasian thukhaam a ki zuih leh kizuihloh tungtaang ahi hi. Khang tawntungin, Pasian thukhaamte pawlkhat pampaih pipi mahin Pasian sawl bangin gamta ungh a ci mi tampi om hi. Ahih hangin Lai Siangtho in zuihna tawh upna kipicing saka, nasepna om lo-in upna a si hi ci hi. James. 2:22,17. Pasian thei ingh ci napi'n Pasian thukhaamte a zuih kei leh, tua mipa in zuauphuakpa hi a, ama sunga thumaan omlo hi." 1 John 2:4.

Kain biakpiakna a kisaan loh ciangin, Pasian tung leh Abel tungah a heh mahmah hi. Pasian tunga a hehna pen Pasian ama phuah tawm biakpiakna a saan loh man hi a, a naupa tunga a hehna pen anaupa in Pasian sawlna aman hang leh Kain tawh kikopa Pasian a langdo loh hang ahi hi. Pasian in zongh Kain pen mawk koih tuan het lo in, hong paisuka, Kain kiangah: "Bang hangin heh mawk na hiam? Bang hangin dah maai mawk na hiam?" ci-in dong hi. Vantung kamtaai tungtawnin Pasian in, "Nang zongh, hoihtakin bawl le teh, hong kisaan sak mah ding hi ven? Na gina bawl loh manin mawhna in na kong biangah om hi, ci hi. Kain in teel theihna hun pha nei hi. Gumpa hong pai nading thuciam na muang hen la, Pasian deihna bangin na gamta leh amah'n zongh Pasian maipha mu mah ding hi ven. Ahih hangin, a uplohna leh a thukhaam palsatna mahah om tentan veve mawk hi.

Amawhnate a ki pulaak saangsikin, Kain in Pasian pen thutang het lo hi, ci-in anaupa Abel pen mudah in, haza mahmah hi. Tua ciangin, a hehsa in anaupa kiangah hong pai a, Pasian pen thutang het lo hi ci in hong genpih sawm hi. Ahih hangin, Abel in, kiniamkhiat tak leh laulo takin, Pasian pen thutangin, migi hi ci hi. Bek tham lo in, Kain khialhna pen lakkhia a, Kain pen a khial hi zaw hi cih theih sak sawm hi. Abel in Kain kiangah, Pasian in anu leh apate uh amawh phet un na sisak pah lo in, tua zahtakin itna tawh kidim hi-a, Pasian in amaute geel zongh it mahmah hi ci-in a geenpih ciangin Kain hong heh zaw mawk hi. A ngaihsutna leh a lungsim sung panin bel Abel pen maan mah hi cih thei hi. Ahih hangin anau lel khat, ama thu banga gamta lel ding khat pen amah tawh kithutuak lo in, Pasian a langpanna ah amah bek ahih lam aki muh ciangin, heh lua mahmah in anau pa that mawk hi.

Kain in a naupa mudahin that hi. Anaupa khialh man hi lo in, Kain mahmah gilo in, a nasepnate gitlohna bek hi a, Abel nasepnate ahih leh thumaanna bek ahi man hi. 1 John 3:12. Tua mah bangin khang tawntungin, migilote in amau saang gamtat hoih zaw te mudah tawntung uh hi. Abel sawl manna leh upna kipin Kain pen khial hi teh ci-in hilh niloh hi. "Mi khat peuh in, ahoihlo gamtatna a neih leh, tua mi in khuavaak mudahin, khuavaak zuanin hong pai lo hi; bang hang hiam cih leh amah khial hi a kicih khaak ding deih lo hi." John 3:20. Pasian thumaan zuite tungah vantung khuavaak a tan seemseem ciangin, Pasian kihta lo mite mawhnate uh hong kilangh seemseem ahih manin, tua migilote in Pasian thu zuite mudahin suksiat dingi bek sawm uh hi.

Pasian in gulpi leh numei suante kikala om ding ci-a a geen kimuhdahna pen Abel sihna ah kilangh khia pah hi. Tua ki muhdahna in Satan leh Khrist kikal, Satan nungzuite leh Khrist nungzuite kikalah ahi hi. Mihing a mawh manin, mi khempeuh Satan ukcipna ah om hi napi, Khrist in tua ukcipna hakkol pana a suahtaak theih nadingun bawl sak hi. Bang hun bang hun in, Pasian Tuuno upna tungtawnin, mi khat peuh in mawhna nusia in akisik kik tak ciangin, Satan hehna kitawh kuang sak hi. Satan in Pasian thukhaamte zuih zawh ding hi kei ci-a a geen den pen zuau hi ci-in Abel nuntaak siangtho in teci a pang khia hi. Kain in Abel ukcip zolo hi cih amuh ciangin, Dawimangpa helhawtna tawh heh mahmah a, Abel nuntaakna susia hi. Koi mun koi munah Pasian thukhaam siangtho zuite, tua mah bangin a susia nuam om kawi kawi hi. Hih muhdahna lungsim mah tawh Khrist nungzuite tampi in khangsimin khuam tungah mei tawh kihalna a thuak uh hi. Bang hang hiam cih leh Satan in hih Jesu nungzuite ngah zolo ahih man ahi zaw hi. Galpa hehna gah hi lel hi. Ahih hangin, JESU MIN HANGA SIHNA A THUAK (MARTYR) PEUH MAH A GUALZO MI AHI HI. Kamsangpa in, Ämaute in amah (taanglai gulpi dawi gilo, Satan) tungah Tuuno sisan leh a teci panna uh tawh a gualzo uh hi. Amaute in sihnaa thuak dongun a nuntaakna uh a it kei uh hi." Rev. 12:11,9.

Kain, mithatpa pen ama gitlohna thu dawng dingin kisam hi. "Topa in Kain kiangah, Na naupa Abel koi ah om hiam? ci hi. Amah in, ka thei kei hi : Ka naupa keempa ka hi hiam?" ci kik hi. Kain pen mawhna sunga thuklut lua ta ahih manin, Pasian thupina, liatna, theihna leh mun khempeuh a om tawntung na thei nawn lo hel hi. Tua ahih manin, a khialhna seelcip sawm ta zen hi.

Topa in Kain kaingah, "Bang cih mawk na hiam? na naupa sisan kikona aw in leitung panin Kei kiangah hong kahto hi." ci kik hi. Hih munah Pasian in Kain a kisik kik theih nading hunpha pia hi. Kain in kipuahpha nading hun ngah hi. A gamtatna hoih lo, a zuauphuahnate leh amawh seelsim nopna kimu hi. Tua pipi mahin langpang lai teitei hi. Tua ahih manin ama thuak ding daan pen ki heikhia tuan lo pah hi. Amah a hopih hiat hiat Topa aw mah in, tu-in; "Nang in leitungah samsiatna na hi hi. Lo nakpi-in na khawh hangin, na deih bangin hong gah ziazua lo ding hi. Leitungah a vaakthap lel leh buk nading neilo, khualmi na hi ding hi", ci hi.

Amawh manin Kain pen sihna tawh kidaan tat pah lo hi. Piangsak pa in a hehpihna tawh anuntaakna kep sak lai a, akisik kik nadingin hun hoih pia hi. Ahih hangin, Kain in a gitlohna lungtang khauh sak seemseem a, mawhna bawl tate lutang a suak hi. Satan makaihna tawh, Kain pen midangte zongh amawh dinga kheempa hogn suak to lai hi. Ama gamtat hoih lo huzaap in mite susia lua ahih manin leitungin kihhuaina leh siatna bek tawh kidim hi.

Mithat masa penpa nuntaakna apiak laina tawh Pasianin universe a mite theih ding thu khat lak hi. Kain leh a suan a khaakte nuntaakna dan in, mi mawhte kisusia kei henla, kikhawi den mawk leh bang ci bang hi ding uh cih lak hi. Pasian langpan den ding uh hi. Pasian thuak zawhna in mi gilote mawhna bawl nadingin hang sak seemseem hi. Kain tunga samsiatna a kigeen zawh kul tul leh za nga ciangin, universe in Kain thuman lohna huzaapin bangci ciang tun hiam cih theih pih uh hi. Pasian thukhaam palsatte tunga sihna daan kitaatna in hehpihna tawh akithuah Pasian thutanna hi cih kilangh hi. Mihingte mawhna sunga sauvei a nuntaak uh ciangin, amau leh amau kipampaih zaw seemseem uh a, Pasian zuan ngei lo uh hi. Tua ahih manin, Pasian in hih mawhna pua a khaici banga a tuhte sauvei nunta sak lo hi. Tua in samsiatna hilo in thupha hi zaw hi.

Satan in a thahatna zah sitlo in, lampi a tul tul zangh-in, Pasian kumpigam leh a omzia a ki theih khialh nadingin naseem niloh hi. A thupi, a zahtaakhuai leh a deih huai kipawlna lianpipite tungtawnin hih leitunga om mite a tam theithei a ngah nadingin kheem den hi. Ahih hangin, Pasian, Mongneilo leh ciimnateng kipatna in dawite nasep akipatna pan a tawpna dong mukhol gige ahih manin, Ama vaihawmnate leh a ngimnate in taang cingin daupai mahmah hi. Langpanna beisak ding bek a ngiimna hilo a, langpanna in bangci bang hi mawk hiam cih universe in a theih nadingin lak lel hi.

Leitung dang tampi a om misiangtho te'n, hih leitungah bangbang piang hiam cih theihnopna takpi tawh hong en gige den uh hi. Tuicin tun ma-in, Lucifer gam ki-ukna in bangci bang hiam cih, hih leitungah, mu pah uh hi. Mihingte ngaihsutna in gilo kihhuai na vive bek hi . Gen 6:5. Gamtatna, deihna, duhna, ngaihsutna khempeuhte in Pasian hong deihsak siangthona, itna leh lungmuannate tawh kilehbulh den hi. Pasian thukhaam siangtho mite kiang pan kilakhia mawk hi leh bang ci ding hiam cih tellahna ahi hi.

Buaina hun sunga kilangh khia thute in Pasian kumpigam omzia kitel muhsak hi. A tawpna ah Ama thutanna pen mi khempeuh in theih pih dinga, ahih hangin tua hun teh mimawhte kisik kik nadinigin zekaai ta ding hi. Pasian in a vaaihawmnate khat khit khat a banbanin seem toto hi. A tawpna ah langpanna pen phiat maimang kiuhkeuh ding hi. A thukhaam, siangtho a pampaihte Satan tawh kipawlin Khrist a gaalbawl ahih lam uh kilakkhia ding hi. Hih leitung kumpipa ahi Dawimangpa thu akikhen takciangin, amah tawh a kipawl peuhmahin ama thuak bangin a thuak ding hi. Tua ciangin, Universe bupin teci panna tawh, "Na lampite in thutangin dik hi. Nang misiangthote kumpipa aw," ci ding uh hi. Rev. 15:3.

.Source: Vantungmi Thumte Tangkona