MUC

Print Friendly and PDF

Sunday, April 10, 2016

Khenpi 3 | Khemna leh mawhna


VANTUNGAH langdona seem thei nawnlo ahih manini, Satan in Pasian a gaalbawlna tawh hih leitung a teeng minamte hong susia hi. Eden huana nupa kopte nopsakna leh lungmuannate a muh ciangin ama supna kithei saan hi. Hazaatna tawh tua nupate'n thu aman loh nadingin kheem sawm hi. Tua hi leh amau in amawhna uh thaman a thuak thei ding uh hi. Amau itna pen muanlahna leh a phatna la uh pen PiangsakPa geensiatna in hei sak sawm hi. 

Tua hi leh amah bek hi lo in, tua nupate tawh lungkham, sinkhamna teng thuak khawmin, Pasian min a kigeensiat banah, vantungah zongh dahna om ding hi cih ngaihsun hi.

Adam leh Eve te tungah hih a lauhuai thu om thei ding cih kihilh khol ngitnget zo hi. Vantung kamtaai ten Satan tuukna leh Satan ngimna hoihlote hilhin, Pasian gam ii hoihna leh diknate lakin, Satan in a sim sawmna teng lak uh hi. Satan leh alawmte in Pasian thukhaamte a langpan manun mawhnei a hong suak uh hi bek hi. Tua ahih leh Adam leh Eve te adingin tua thukhaam zuih ding thu in bang zah takin thupi hiam cih ki thei thei hi.

Pasian thukhaamte in Pasian a siantho zah mahin siangtho in zahtaakhuai hi. Banghang hiam cih leh thukhaam in Pasian deihna, a gamtatna, a itna leh a ciimnate kilah khiatna ahi hi. Bawlsa nate in kilem taka a om dimdiam theihna un, mihing, ganhing, nuntaakna nei leh neilote te in, PiangsakPa thukham tawh kituaka a om man uh ahi hi. Thukham pen mihing te bek hi lo, bawlsa na khempeuhte a uk ding a Pasian in a bawl hi zaw hi. Na khempeuh te in thukhaam kip nuai ah omin, bangmah ki-awlmawh lo in om thei lo hi. Mihing simloh bawlsa nate in amau om dan dingin thukhaam nuai ah ki om sak hi. Mihing pen Pasian bawlsa nate lakpan a tawpna leh a thupi pen hi a, Pasian in mihing tungah Pasian deihnate theihtheihna, Pasian dikzia leh thukhaamte' manphatzia tel siamna leh mihing in tua thukhaam nuai ah omin, a thu aman ding a kuulnate thei sak hi.

Vantungmite mah bangin, Eden a omte zongh teel theihna nuaiah kikoih hi. Nuam taka a om theih den nadingun PiangsakPa thukhaamte a zuih uh kuul hi. A zuih uh leh nungta ding uh a, a zuih kei uh leh a kisia ding uh hi. Thukhaam pen Pasian kiang pan thupha a kingah theihna ding lampi a kibawl ahi hi. Ahih hangin tua thukhaam a awlmawh lote bel, vantung mite nangawn a koih khong lopa in, koih khong lo ding hi. A palsatpa in Pasian letsong a simmawh bek hi lo in, amah leh amah tungah lungkhamna leh siatna kibuak a suak hi. Vantungmite'n tua nupate kiangah Satan khembawlna pan akikep nadingun thupia khol den uh hi. Amaute'n Pasian thu aman lai siah uh gilopa in zongh kheem zo tuan lo ding hi. A zen zen in huhna kisam le uh zongh amau huh dingin vantung mi khempeuh kisawl ding hi.

Gilopa Kheemna masa pen na nang zo uh hi leh amau in zongh vantung mite mah bangin muanhuai ding uh hi. Ahih hangin, tua kheemna a zuih sawm uh leh bel, amau sungah Satan a do zawh na ding uh tha haatna omlo pah ding ahi hi.

Tua ahih manin, sia leh pha theihna singkung pen amau sawl manna leh Pasian a itna uh sittel nadingin a kikoih hi. Hih singgah lo huansunga om khempeuh a zat theih nadingun thupia a, hih a kikhaam singkung ah Pasian thu a awlmawh kei uh leh bel mawhna a bawl nading un lampi a zuan uh ahi ding uh hi. Satan in bel amaute mawhna a bawl nadingin a tawntungin zui lo ding hi. Satanin amaute hih a kikhaam singkung tawh kisai bekin kheem theih nading hunpha a nei hi. Tua ahih manin, amaute'n hih singkung ii omzia theih nopna tawh ahong naihi uh leh Satan huang sunga hong tum ding uh ahi pah uh hi. Tua singkung tawh kisai Pasian thuhilhnate a zuih nadingun thu kipia den hi.

A nasepna a kilang lo thei thei dingin, Satan in gul bang zangh hi. A kheem nading a khut zat hoih pen ahi hi. Bang hang hiam cih leh bawlsate lakpanin gul a pil pen leh a hoih pen khat ahi hi. Khate nei in, huih lakah a leen ciangin tee zialziala, a kinawt siang siseuh kham tawh kibang hi. Tua akikhaam singhiang bawk litliat tungah kual ngieu ngeu a, a gei a hong pai peuh mahte muhnop sak theihtheih dingin a om hi. Tua bangin, Satan in a an ding ngakin na om gige hi.

Vantung mite'n Eve kiangah a nasepna uh panin, a pasal tawh a kikhen loh nading hilhkhol zo uh hi. A pasal tawh om leh amah guaka a om sangin lauhuai lo zaw hi ci uh hi. Ahih hangin, ama ut banglel khat in, a pasal kiang pan hong pai khia kha hi. A paikhia ahih lam a ki thei tak ciangin launa naai hi cih a ki phawk hi. Ahih hangin, amah leh amah pil gawp, haat gawp kisa in kheemna a om zongin thei thei ning, nang zo zo ngawn ning ci in a launateng bei sak hi. Vantung mii khohna mangngilh in, a sawt lo in, tua a kikhaam singkung pen lamdang sakna lianpi tawh hong en ta hi. A gahte pen hoih in, khum tuak lim tuak mahmah a, bang hangin Pasian in a neek ding uh phal lo a hi hiam ci-in amah leh mah kidongh hi. Tua bang hun laitak pen a kheempa adingin hun hoih ahi zaw hi. Eve lungsim thei danin akiangah hi bangin hopih pah hi. "Pasian in singah khat zongh ne thei lo ding hi uh teh hong ci a hiam?" Eve in kuamah lah mu lo ahih manin lamdangsa in, angaih sutna a ki thawnkik peuh ahi kha tam maw ci hi. Tua laitakin, gul hong pau leuleu a, a aw pen zolin khum mahmah hi. Eve ii ngaihbaanna teng leh ameel hoih dan khong phat phit phetin, lungkim sak peuh mah mawk hi. Tua hih manin, Eve zongh tua gulpi kiang pan a taaikhiat saangsikin, lamdang sa-in ki ze-kaai saka, en gega lailai hi. A zenzen in vantungmi dan khat in hopih hi leh, lau zaw behlap kha ding hi. Tu in ahih leh tua a muhnop, gulpi pen amah a tuuk sak ding a gaalpi pen ahih lam a thei kha kei hi.

Amah a kheempa dotna hih bangin saang hi: "Huan sunga singgahte ne thei mah ung: Ahih hangin, huan laizanga singgah pen bel, Pasian in, Ne kei un, zongh lawng beek kei un na neek vua, na lawn uh leh na si ding uh hi hong ci hi. Tua ciangin, gulpi in nupi nu kiangah Na si kei ding uh hi. bang hang hiam cih leh hih singgah na neek ni un na mitte uh kihong dinga, Pasiante bangin sia leh pha na theih ding uh Pasian in thei hi." ci hi.

Satan in hih singgah a neek manun nuntaakna saang zaw, Pasian bang hihna leh a zai zaw pilna nei dingdan in geen hi. Gulpi kimlai tua singgah a neek manin amah zongh apau thei bangin kigeen hi. Amaute Pasian banga ki saangkhan ding pen Pasian in haza ahih manin a khaam hi ci-in kheem hi. A singgah pianzia ngiat hoih lua leh lim lua a, neek manin pilna leh vaangliatna kinei thei ahih manin, Pasian in a ciap loh nading uh leh alawn loh nadingun a khaam hi cih sak hi. Pasian geen bang linlian in kua in zui zo in picing sak zo ding hiam? Bang ci sih theih ding uh hiam? Singgah ne theilo ding uh ahi hiam? Pasian in amaute a zahtakhuai zaw leh a thupi zaw nopsakna angah ding uh a khaam hi lel hi ci-in Satan in thu bawl hi.

Hih bang dan vive in Satan in Adam hun akipan tu hun dong seem suksuka, lawh cing mahmah hi. Mite'n Pasian itna a muanlah nading uh leh a pilna a up zawhloh nadingun kheem den hi. Pasian bek neih theih pilna leh vangliatnate mite'n a theih nop nadingun lungsim khel nono guan hi. Pasian phal loh pipisa theih khiat nop manun, mi tampi in thumaan pen mu khial uh hi. Pasian thu aman loh nadingun, amaute pilna, siamna lamdanga thupi mahmah sunga a om bangun ku umsak hi. Hihte a mi bumna bek ahi hi. Amaute in a khang toto kisa in, Pasian thukhaamte nuai-et in, a khe uh tawh kiamna leh sihna lam zuanin a kalsuan zaw uh hi.

Nupa kopte kiangah Pasian thukhaam palsatna in amau adingin meethuai zaw hi ci-in Satan in kheem hi. Mitampi te in Pasian thukhaam deihna sanga ngaihsutna thupi zaw, lianzaw leh suah taakna pia zaw geelna anei bangun ki geen uh hi. Tua bangte pen Eden huana Satan kheemna hong ki thawn sawn ahi hi. Satan in tua singgah a neek man a hoihna lian neidanin kigeena, thukhaam a palsat mana vantung pana kinawhkhiatna thu kilangh sak het lo hi. Tu in thukhaam palsat mi in a siangtho bangin ki geena, ahih hangin amah pen a lauhuai leh akihtaakhuai mahmah mi kheempa ahi zaw hi. Bang hang hiam cih leh thukhaamte simmawhin midangte zongh tawntung siatna ah a tun theih nadingun, lam makaih niloh hi.

Eve in Satan thu um hi, ahih hangin tua a upna in mawhna thaman pan in suakta sak zolo hi. Amah in Pasian thu um lo hi. Hih in ama puukna ahi hi. Thukhenna ah mite'n zuau thu a up manun kimawhsak lo ding uh a, thumaan a uploh manun ki mawhsak ding uh hi. Bang hang hiam cih leh amaute in thumaan theih nadingin a awl mawh kei uh hi. Pasian thu man lohna in a tawntungin siatna ah hong tun hi. Tua ahih manin thumaan in bang hiam cih ih theih ding kisam hi. Pasian thu bu sunga kiciamteh thu peuhmah in eite adingin thuhilhna leh khohna ahi hi. Kheemna ah ih lut loh nadingin tua thute a kigelh ahi hi. Tuate ih awlmawh loh manin ei leh ei siatna ah ih kitun hi. Pasian thu tawh akileh bulh peuhmah Satan kiangpana hong pai hi cih thei ciat ni.

Gulpi in tua singgah lo in, Eve kiangah a pia hi. Tua ciangin, tua singgah a neek man leh a lawn manin bangmah ci het lo ding hi ci lai hi. Eve in zongh bang mah ci vat takpi lo ding hi cih a muh ciangin hong haang seem seem hi. Tua ciangin, "tua singgah pen limtuak sa-in, etlawm sa mahmah a, mi khat pilsak tuam leh kilawm hi cih lungsim nei a, singgah la in a ne hi." Limsa takpi a, a neek khit ciangin a lungsim kilamdang a, nuntaakna saang zaw ah om bangin kingaihsun hi. Tua ciangin, launa om het lo takin, singgah lo in a ne hi. Tu-in thu palsat khina, a pasal kisiat nadingin Satan khutzat hong suak pah hi. A ngaihsutna leh a omdan kilam dang sa in, a khut dimin singgah hong pua letlutin a pasal kiangah hong pai pihin, a thu piangteng a geen khia hi.

Tua ciangin, Adam pen hong dah mahmah hi. Lamdangsa in, kigaih liang hi. Hih pen in ih gaalpa hong thangsiahna hi. Ih awkloh nadingin thu hong kihilh khol khin zo hi. Ahih hangin Eve in Pasian thumang lo ahih manin a sih ding mah hi ci hi. Eve in lah a pasal in tua singgah a neek nadingin sawl teeiteei hi. Gulpi geen bang mah in kisi takpi lo ding hi ci lai hi. Bang hang hiam cih leh a neek khit zawh Pasian hehna hong kilatna lah omlo, bek tham lo in, singgah limna thei in, a neek mana nuntaakna thak angah danin kingaihsun zaw zek hi.

Tua ciangin, Adam in a zi in Pasian thukhaam palsat khin hi cih thei pah hi. Pasian tunga a thumaanna uh leh a itna uh sittell nadinga kikoih sunsun pen va ne kha peetmah ta hi cih amu hi. Tua hih manin a lungsim buai mahmah hi. A kiang pana Eve a paikhiat sak khak pen kisikin, kap hi. Ahih hangin, tu-in bel a piang dingteng piang khin ta hi. Amah pen Eve tawh akikhen hong kuul ta hi. Eve tawh kithuah pen nuamsa mahmah ahih manin, akikhen ding pen ngaihsun zolo hi. Adam pen Pasian bek tawh hi lo vantung mite tawh zongh kiho in, kithuah thei hi. PiangsakPa vangliatna mu in nuam sa hi. Amaute thumaan pai suak hi le uh a suan a khak te thupi dan dingte zongh thei zo hi. Ahih hangin, hih thupha khempeuh saangin, a it mahmah a zi tawh akikhen ding nasa pen hi. PiangsakPa a itna, A tunga a lungdamna leh a thumaan ding saangin Eve a ngaihna lian zaw hi. Bang hang hiam cih leh Eve in Adam ii pum lang khat hi a, amau gel akikhen ding uh pen ngaihsut haksa a sa uh hi. Pasian in Eve tawh kibang mah ahoih mahmah lawm khat Adam kiangah bawlsak in pia thei ding hi cih Adam in thei kha lo mawk hi. Tua hih manin, Eve a sih ding leh amah zongh Eve tawh sikhawm dingin a khensat ta hi. A thu nungin, hong ngaihsun kikkika, gulpi geen hoh maan kha sawp lo diam? ci hi. Eve lah a singgah neekma mah bangin kikheelna om lo in, ngaih banga meel hoih mahmah lai veve hi. Bek tham lo in, Eve nidang sangin Adam a itna hong kilangh sak zaw lai hi. Eve pen hong sih pah meel het lo hi. Tua ciangin Adam in zongh a piang bang bang thuak ngam dingin thu hong khensat hi. Singgah la in, a ne samsam mawk hi.

Singgah anek khit ciangin, Adam in zongh nuntaakna saang zaw ah a om danin hong ki ngaihsun hi. Ahih hangin a mawhna hangin hong lunggim mahmah hi. A cidam huai mahmah a nung hiau-hiau pen tu-in hong vot gawp tawh kibang hi. A lung muanna leh a ki-itna te uh leeng mangin, kisuangtaaka omna, mailam hun ding kihtaakna, leh hawm suak kisaknate hong nei uh hi. Amaute a tuam khuavak puan pen om nawn lo-in, tua taang dingin a kiseel nading khat hong vaihawm uh hi. Bang hang hiam cih leh, puansilh lo in, vantung mite leh Pasian a mu ngam kei uh hi.

Tu in ahih leh mawhna om zia diktak theih hong kipan ta uh hi. Adam in a zi hong taai gawpa, bang hangin ka kiang pan paikhia in gulpi va kikheem sak lawmlawm na hiam ci hi. Ahih hangin, anihun hong kisiangsak nuam uh a, Pasian in hih a mawhna khat lellel uh pen mai sak lua inteh, bang mah lau nading om kei hong kici leuleu uh hi.
Satan ahih leh lawhcing kisa peuh mah ahih manin nuam mahmah hi. Satan in Eve in Pasian itna a muanlah nading, A pilna a up loh nading, leh A thukhaamte a palsat nadingin kheema, tua zawh ciangin Eve khutzatin nei a, Adam hong kheem pah leuleu hi.

Thukham piapa in Adam leh Eve kiangah a thukhaam palsatna thaman geen khia dingin huan sunga hong kilang hi. Amawhma un PiangsakPa hong pai ding ngaklah uh a, na na dawn pahpah uh hi napi tu-in, launa leh zumna tawh taai mang uh a, sawlbawk sah penpen nuai ah va bu uh hi. Tua ciangin, "Topa Pasian in Adam sama, Koi ah om na hiam? ci hi. Adam in dawng kik a, Huan sung pan na aw ka zak ciangin ka lau hi. bang hang hiam cih leh ka guaktangin ka om hi. Tu in kei leh kei ka kiseel hi ci hi. Pasian in, kua in na guaktangin om teh hong ci hiam? Singgah ne kei un ci-a ka khaam pen ne na hi vevua maw?" ci hi.

Adam in nial thei lo, kisiang sak theilo in om hi. A kisik kik ding saangin, a zi mawhsakin, tua ciangin Pasian mahmah mawh sak hi. "Kei a dinga nong piak nupi in singgah hong pia mawka, ka ne kha hi" ci hi. Adam in Eve a it luat manin, Pasian nial in, a Paradise inn nusia in, tawntung nuntakna leh nopsakna a paisan hi napi, amawh khit tak ciangin, a zi leh PiangsakPa mawh sakin ngawh mawk hi. Mawhna ii lauhuai na in nasia mah zen si maw!

Nupi kiangah, "Bang hangin hih bangin seem mawk na hi hiam?" ci-in a dot ciangin, "Gulpi in hong buma, singgah ne kha hing"bang hangin gulpi bawl sese na hiam? Bang hangin huan sunga lut ding phal sese na hiam?" ci-in amawhna pan kipeng sak nuam hi. Adam mah bangin Eve in zongh Pasian mawhsak mawk hi. Hih ei leh ei kisiangtho sak nopna, mawh kipengsak nopna lungsim pen zuauphuakpa kiang pana kipan khia ahi hi. Amawh khit phet vua kipan Adam leh Eve te'n amau leh amau mawh kipeng sak nuam uh a, tua pen mah Adam suan leh khaak te'n zomto zel uh hi. Amawhna te uh a kisiik kik saangsikun, midang te peuh, ahun leh amun peh, Pasian peuh mawh sak zaw mawk uh a, Pasian thuphate Pasian geensiat theih nadinga thusia suak sak uh hi.

Tua zawh ciangin Topain gulpi samsiat hi: "Hih bangin mi kheem na hih manin, ganhing khempeuh lakpan a niam pen, samsiat pen na hi dinga, awm taalsa-in na pai dinga, leivui tawh na ki vaak ding hi"- Satan khutzat ahih a kipan gulpi in samsiatna a thuak hi. A ki paakta pen leh a hoih pen ganhing ahihna panin, a kimuhdah pen leh akilau pen a suak hi. Gulpi kianga thu kigeen laite bel Satan adinga kigeen ahi zaw hi. Hun bei cianga gual lelhna leh a kisiatna kawk in: "Nang leh numei kikaal, na suante leh numei suante kikaal ah, kimuhdahna ka om sak dinga, amah in na lu ah hong tuan peek dinga, nangin ama khetuul na tu ding hi.."

Tua ciangin Eve ii thuaksiat dan dingteng kigeen hi. Topa in, "Na duh na deih pen in na pasal hi dinga, amah in na tungah hong uk ding hi." A tuungin Eve pen Adam tawh kikimin Pasian in a bawl hi. Pasian tungah thumaan paisuak uh hi leh amaute khat leh khat kithutuak ding uh hi napi, mawhna hong om ciangin, kilem lohna hong om a, a kilem theih nadingun khat zawzaw in akhat zaw tungah a ki-ap kuulta hi. Eve pen amawh masa hi a, a pasal kiang pan a paikhiat manin na kikheem hi. Ama zol zawhna hang tawh in Adam zong mi mawh hong suak ahih manin, Eve pen Adam kiangah hong ki-ap kuul hi. Hih pen mawhna thaman ahi phial ta zongin, mihingte in Pasian geen bangin om hi le uh, thupha suak thei veve ding hi. Ahih hangin pasal pawl khatte'n numei tungah ukna kinei sak lua, kigualzo sak lua uh ahih maniin, numei tampi takte nuntaakna in vangikpua bangin niamkhiatna tawh kidim hi.

Eve in a pasal geiah a om lai-in nuamsa mahmah hi napi tua saanga nuamzaw a ngah theih khaak leh cia a pai khiat ciangin, genthei zaw-in niam kiat zaw lai hi. Pasian ngiimna leh deihsakna pana paikhia peuhmahin hih bangin a niamkiat zaw ding uh hi. Pasian koihsak leh geelsak lopi munte ah a tun sawm uh ciangin, niamkiat zaw uh ahi manin thupha saan ding uh zah zongh saang thei lo uh hi. Mun saang zaw ah om nuam uh ahih manin, mi tampi takte amau hoihna leh a zahtaakhuainate uh beimang sak zaw sop uha, Pasian piak nasep ding tampi seem lo-in a pum nusiat uh hi.

Adam kiangah, Topa in, "Na zi thu manin, ne kei in kong cih piipi na neek manin, leitung in nang hangin samsiatna thuak ta hen. Na dam hun sung dahna leh lunggimna tawh na ne dinga, nang adingin lingkungte zongh hong po ding hi. Singgah, singtehte na ne ding hi. Lei ah na ciah kik dongin, na khaw-ul kaai in na ann ding na zong ding hi. Leivui tawh kibawl nahih man bangin leivui ah na ciah kik ding hi." ci hi.

Hih nupa kopte in mawhna thusia ii siatna leh agah te a theih ding uh pen Pasian deihna hi lo hi. Amaute kiangah a hoih nate pia in a hoihlote lakkhiat sak hi. A hita zongin, amaute'n a kikhaam singgah na ne uh a, nuntaak hun sungin mawhna ii thaman a thei ding uh hi ta hi. Tua hun a kipan, mihing peuhmah Satan kheemna bekbek in buak huan hi. Lungkim tak leh nuamsa taka na a sep ding uh kimlai tu-in lungkim lo, hehsa pipi in a sepuh hong kuul ta hi. Amaute in ngiimna bang tunlohna, dahna, natna leh sihna nangawn a thuak ding a hi ta uh hi.

Mawhna nuaiah bawlsa nate in mihing gamtatna leh a langpanna hanga hong om nate thu teci a pang hi. Pasian in mihing a bawl lai-in nuntakna nei khempeuh leh leitung buppi uk dingin a bawl hi. Adam in vantung deihna bang a zuih sungteng bawlsa khempeuh in ama thu ngai uh hi. Ahih hangin, thukhaam a hong palsat tak ciangin, bawlsa nate in ama ukna langdo pah uh hi. Hih bangin, Topa in ahehpihna tawh, A thukhaam ii siangtho zia mite lakin, lam makaih in, tua thukhaam palsatna neu no khat ii lauhuaina musak hi.
Mihing tunga kiopia nasep silbawl ih cih pen in itna tawh hong kipia ahi hi. Nasep ih cih pen mawhna pan kikep siangtho theih nading lampi khat ahi hi. Kisiatna leh niam kiatna pana hong saangkhan toh nadigna Pasian hong vaihawm sakna ahi hi.

Adam leh Eve kianga "Na neek ni un na si ding uh hi" Gen 2:17 cih thu in singgah a neek ni lian in sihpah ding a cihna hilo hi. Ahi zongin, tua ni in aki dok kik theilo sihna samsiatna kilo khia ding cihna ahi hi. Sih theihlohna pen thu a man uh leh piak ding ci-a kiciam ahi hi. Tu-in, thu palsatna tawh tua sih theihlohna pen a taan uh hi. Tua ni a kipanin amate in sihna lampi ah a om uh hi.

Nuntaakna singgahte ne le uh si thei nawnlo ding uh ahih manin, tua singkung kilaak khiat sak dinghi. Tua zawh ciangin thahaatnate uh hong kiam dinga a tawpna ah a bei mang ding ahi ta uh hi. Adam leh Eve in thuman lohna tawh Pasian hehna thosak leh cih pen Satan ngimna ahi hi. A zenzen in, mawhmaina ngah lo pipi, nuntaakna singgah ne kha le uh si thei ngei lo in, mawhna leh samsiatna tawh a tawntungin kidim ding uh hi cih pen Satan lunggulhna ahi hi. Tua ahih manin, mihing a mawh phet leh tua nuntaakna singkung a cing dingin vantungmite kisawl pah hi. Hih vantungmite kimkotah namsau tawh kibangin khuavaak a taang hi. Adam innkuanpihte khat zongh tua singgah ne dingin kipai sak lo ahih manin, a si thei lo ding mimawh kuamah om lo hi.

Adam leh Eve te ii mawhna hanga samsiatna in nasia lua ahih manin, mi pawlkhatte in Pasian pilna, ciimna leh a thudikna pen neu seh in thupi simlo kha uh hi. Amaute in ki en phapha le uh amau khialhna mu thei pan ding uh hi. Pasian in mawhna banglo in, mihing pen Ama meel leh lim pua in na bawl hi. Tua hi a, mihing in vantungmite saangin tawmno khat aneu zaw bek hi uh a, leitung maitangah kizeel dinga thupiaksa ahi hi. Tua hih manin, amaute in Pasian thu aman uh leh aman loh uh sittel ding kisam hi. ahang pen Pasian in A thukhaam simmawhte tawh hih leitung zeem nuam lo hi. Pasian in ahehpihna tawh, Adam tungah sittelna thupi na pia lo hi. Tua bang mahiin amawhna in naakpi takin a lian hi. Sittelna neuno khat nangawn zozo lo ahih leh sittelna gol bel thuak zolo ding cih pen muhsa ahi mai hi. Adam tunga kipia sittelna in a lian, a gol mahmah khat hi leh mawhna bawlna pana kipeng sak nuamte in, "Hih thuin bangmah piangsak zo kei inteh. Pasian in thu neunote awlmawh se lopi," ci-in thuneu piana a ngaihsutte uh palsat pahpah ding uh hi. Ahih hangin, Topa in bang mawhna hi ta sese leh A muhdah lam kilangh sak hi.

Eve a dingin, singgah va neek lel ding leh a pasal zongh a ne dinga a sawl lel pen thu neuno khat tawh kibang hi napi, tua mawhna pen mah in leitungah mawhna a tamzaw a hong lut nadinga kongpi a hong ahi zaw gige hi. Kheemna a thuak lai takin, a nungcianga thupiang dingte in bangzahtakin nasia ding hiam cih kua in geen thei hiam?

Pasian thukhaam in mite uk nawnlo hi ci-a a hilh mi tampite in thukhaamte ki zui zolo hi a ci uh hi. A ki zui zolo takpi ahih leh bang dingin Adam in a palsatna thaman thuak mawk hiam? Kuamah amau leh amau kikheem kei uh hen. Mawhna thaman in sihna hi. Rome 6:23. Adam hun lai mah bangin, Pasian thukhaam in tu hun dongin a kipalsat ziauziau thei ding hi tuan nai lo hi.
Amawh khit uh ciangin, Adam leh Eve te Eden huanah ki-om sak nawnlo hi. Tua huan nuam sunga a ki om sak nadingun naakpi takin ngen uh hi. Tua nopsakna khempeuh a taan dingin mawhna a bawl lam uh ki pulaak uh a, mailam hunah Pasian cih bangbang a kawi a maamin mang dingin kiciam uh hi. Ahih hangin, amawh manun a taksate uh cidam nawn lo-in, mawhna a daal zawh nadingun thahaatna uh kiam gawpa, Satan hong pai pahpah ding hi ci-in thu ki hilh hi. Misiangtho ahih lai napi un kheemna zui ahih uh leh, tu-in mimawh ahihna uh tawh a thumaan zawh nading uh haatna tawm neih mahmah uh hi.

Kiniamkhiatna leh a kigeen theilo dahna lianpi tawh Eden inn nuam pen mangpha khaak uh a, tua panin mawhna gam ahi leitungah hong pai khia uh hi. Khaw hunte hong kilamdang gawp ahijh manin, Topa in ahehpihna tawh savun puan bawl sak hi. Tua tawh khualum leh khuavotte a thuak tentan ding ahi ta uh hi.

Siatna, kiamna, muatna limla ahi paakte vul in, singtehte a pulh tak ciangin, Adam leh Eve ten nasa lua in naakpi takin a kap uh hi. Tua kah zah un tulai hunin kuamahin a misite uh kah naai lo hi. Paak kungte sihna in dahna lianpi om sak a, singteh kiate in nuntaakna nei peuhmah a si ding hi ta uh hi cih teci pang hi.
Eden huan panin Adam leh Eve te aki hawl khiat zawh hun sawtpi tak sung Eden huan om lai hi. Adam innkuanpihte'n tua huan nuam sung gaal-et theih nadingun kiphal hi. Ahih hangin a sunga luut ding uh bel vantungmite'n na daal uh hi. Vantungmite, Cherubim in kongpi ah Pasian vangliatna kilangh sak zel hi. Adam leh a tate zongh hi munah Pasian bia dingin hong pai zel uh hi. Hih mun ah "Thumang nung" ci-in kiciam phapha uh hi. Mawhna hong pungin mite hong kisiat luat uh ciangin tuiciin tawh daan piak hong kuula, tua hun ciangin Eden huan kila khia pan hi. A hih hangin, a sawt lo in hong kikoih kik ding hi, tua hun in "van thak leh lei thak" (Rev. 21:1) hun hi dinga, Eden huan masa saangin vanglian zaw, nuamzaw leh thupi zaw ding hi.


Tua hun ciangin, Pasian thukhaam a keem tawntungte in nuntaakna singkung nuaiah sih theih nawn lohna huihte diikin om ding uh hi. Tawntung a tawntungin leitung dan a om mite'n hih Pasian bawl huan nuam mahmah pen en ding uh hi. Tua huan ah samsiatna om lo hi. PiangsakPa deihna bang kizui zo hi leh hih ih teenna leitung mahmah tua huan nuam bangin suak sak mah ding hi ven!

Source: Vantungmi Thumte Tangkona




To get the latest update of me and my works

>> <<