MUC

Print Friendly and PDF

Sunday, April 10, 2016

Khenpi 2| Leitung Kibawlna






















Topa thu tawh vantungte pianga, a sunga om khempeuh zongh a kampana huu tawh piang hi". "Apaukhiat ciangin nate piang hi". "Thu pia a, kiptakin ding hi". 
Ps. 33:6,9, Ämahin leitung phuta, atawntungin aki lakhia ngei kei ding hi." Ps. 104:5.
Piangsak pa' khut sung pan hong paikhiat phetin hih leitung in naakpi-in hoihna tawh kidim hi. Lei maaitang tungah mual saang pipi te mual neute, zaang kuamte, guun hoih nonote leh bual et lawm te, om kawikawi hi. Mualte in tulai mualte bangin kolh cih bang, kui veuvau cih bang leh ki khokhiat cih bang hilo hi. Mualte in lei hoih tawh ki dim in mun khempeuh ah singkung lopate po ahih manin etlawm mahmah hi. Sehneel gam ih cihte leh a kihhuai tuivunna cihte omlo hi. Ih etna pepeuhah sawlbawk lihliahte leh pakhoih silsialte in hong dawn kawikawi uh hi. A saanna mun peuhmah singkung lianpipite in tuam kawikawi ahih manin, etlawmin zahtaak huai mahmah hi. Hih bang peuhmah tu hun ciangin kimu kha nawnlo hi. Huihte zongh siangtho in ci dam huai mahmah hi. Leimaitangin etlawmin hoihlua ahih manin tu lai a kumpite inn leh paak huan cih te in pha dek naai lo hi. Vantungmite'n zongh hih Pasian bawlsa na tuamtuamte hoihsa in, paakta uh a, alakah vaak kawikawi in, nuam sa mahmah uh hi.

Leitunga om ganhing namcihte leh singgah singteh, khaici a kici peuhmah a kipiansak khit ciangin, Piangsakpa ii nasep manpha pen a hi Mihing kibawl pan phing hi. Tua mihing pen na khempeuh tungah ukna a neih theih nading thu kipia hi; bang hang hiam cih leh "Pasian in, Ei tawh kibangin Mihing bawl le hangh-a, leitung uksak le hangh.... Tua ciangin, Pasian in Amah suunin mihing a bawl hi....numei leh pasal a bawl hi." Hih munah mihingte piankhiatna bulpi kilangh khia hi. Pasian thubu sunga ki gelh hi a, khialhna om het lo hi. Pasian in Ama meel leh lim suunin mihing a bawl hi. Theihlah ding thusim om het lo hi. Mihing pen ganhing hiam, singkung hiam khat pana damdama khangto a, mihing suak hi cih theih na ding peuh mah om het lo hi. Hih bang kihilhna in Piangsakpa nasepna niam sakpha mahmah in Piangsakpa pen mihing tawh kiza kim in koih hi. Mite in Pasian pen na khempeuh a uk, a bawlpa ahih na pan paikhia nuam uh ahih manun, mihing pen Pasian bawlin geenlo uh hi. Pasian in aksi ih cih leitungte tampi tak bawla, lo laia paakte zongh bawl hi. Tua hi a, Amah in vanpi leh leipi pen na lamdang a tuamtuamte tawh tuama, tua nateng a nei ding, a cing akeem dingin mihing a bawl ding mangngilh het lo hi. Lai Siangtho geen bangmah in, eite kipatna in lungno peuh, tengkol, aisa peuh, kheli nei khat peuh hilo in, Piangsakpa ahi hi. Adam in, leivui pana kibawl ahih zenzen hangin amah pen "Pasian Tapa" ahi hi. Mihing pen, Pasian sawltaak dingin leh amah saanga niam zaw khempeuh a uk dingin kikoih hi. Tua ganhingte in Pasian vaangliatna leh ukzawhna a geentheih loh uh hangin, mihing te a it thei ding leh ana sepsak thei ding a ki bawl ahi uh hi. La phuakpa in, "Na khut tawh na bawlna te uk dingin amah na bawla, akhenuaiah na khempeuh na koih sak hi.....Gamlaka sate, hiuhlaka vasate,.....leh tuipi sunga om peuhmah te" Ps. 8:6-8. Mihing in apua tham hi ta leh a gamtatna ah hi ta leh Pasian meel a pua ding ahi hi. Khrist bekmah Pa meel neipa (Heb 1:3) hi a, mihing ahih leh Pasian tawh kisuunna ki bawl ahi hi. A pian ziate Pasian deihna tawh kituak mahmah hi. A lungsim in zongh Pasian thute thei zo hi. A itnate siangtho a; a duh a deih nate zongh a ngaihsutna in uk zo hi. Pasian meel pua a, a thu awi tawh siangtho takin nungta a nuam sa hi. Piangsakpa khut sung pan hong pai khiat ciilin mihing in a tun saangin, kithakim mahmah hi. A meel en leng, cidam tuak mahmah a, lungnopna leh nopsakna tawh kidim hi. Adam tun pen tulai a mite tun saangin naakpi in saang zaw hi. Eve pen bel tawmcik niam zaw hi. Ahih hangin a tha puak pen etlawm mahmah a, ameel zongh hoih in ngaih baang mahmah hi. Mawhbaanglo nupa kopte'n a ki bawl tawm puan silh lo uh hi. Vantung mite' silh bangin, vangliatna leh khuavaak puan silh uh hi. Pasian thu aman lai siah uh hih Khuavaak puan in amaute tuam hi.
Adam akibawl khit ciangin bawlsa nuntaakna nei khempeuh min kiphuah dingin Adam mai ah kipai sak hi. Tua gansate akop akopa hong pai uh mu a, amaute lak pan ama koppih theih ding mu lo hi. Pasian bawlsa nuntaakna neite khempeuh lakah mihing tawh kizakim khat zongh om lo hi. Tua ciangin, Pasian in, "Mihing khat guak a om ding hoih lo hi. A ki thuahpih ding leh a huh dingin khat bawl sak ning" ci hi. Mihing pen amah guaka lungzuang khuangai dinga kibawl hi lo hi. Mihing pen lawm leh gual nei ding ahi hi. Kithuahpih ding omlo in a nop tuak mahmah Eden huan nangawn in zongh a lunggulhna kicing sak zo lo hi. Ama it theih ding leh amah a it thei ding a kibat pih kuamah omlo hi.
Tua ahih manin, Pasian mahmah in Adam kikholhpih ding lawm khat pia hi. A nasep silbawlna, a pai suk a paitohna-a ahuh ding a ki thuahpih ding, amah a hehpih thei ding leh a it thei ding khat pia hi. Eve pen Adam naakguh pan ki bawl sese hi. Ahang pen, Adam tungah ukzawhna tawh a uk loh na ding leh Adam in a khenuaiah a tuat cil loh na dingin Adam geiah dingin a kikimpih, it ding leh huut ding a kibawl ahi hi. Eve pen Adam pum tung pana kibawl hi a, Adam guh leh taksa pan ahih manin, amau geel kinaaina zong tua bang mah in pumkhat sakhat ahi ding hi. Bang hang hiam cih leh "Kuamah in amah pumpi mudah ngei lo-in, a cidamna khantoh na dingin keem cing hi". Ephe. 5:29. "Pasal in anu leh apa nusia in, a zi beel dinga amau geel pumkhat ahi ding uh hi.".
Kiteenna pawi masa pen Pasian in bawl sak hi. Tua ahih manin kiteenna pen na khempeuh Piangsakpa phuat leh phuh ahi hi. "Kiteenna deih huai hi ". Heb. 13:4. Kiteenna in Pasian in mihing te tungah a piak khong nate lakah khat hi. Aphutpa deihna bang ki zui hi leh kiteenna in thupha ahi hi. Kiteena in siangthona leh nopna pia a, kikholhpih ding pia a, pumpi, lungsim leh khalam nuntaakna saang khan hi.
"Topa Pasian in Eden huan pen nisuahna lamah koiha, tua munah Abawlsa mihing zongh koih hi." Pasian bawlsa nate khempeuh te siangtho, picingin, hoih mahmah uh ahih manin tua nupa kopte a dingin noptuak mahmah hi. Tua huan sunga singkung namkim oma, a etlawm tehhingte, anamtui paakte, a duhhuai singgahte tawh kidim hi. Leengguite zongh om a, tua te in singkung bangin dingtang uh a, a hiangte kaai ningniang in, etlawm mahmah hi. A hiang khempeuh te ah lenggah a bawk bawk in kaai ziah zuah kawikawi hi. Adam nasepin tua leenggui hiang te peuh va heuh in, a etlawm theithei a zep ding hi lel hi. Anamtui mahmah paak kung tuamtuamte zongh om kawi kawi hi.
Huan laizangah nuntaakna singkung po a, singkung dang khempeuh saangin etlawm in, vaang nei zaw hi. A gahte pen kham leh ngun meel pua apple tawh kibanga, ane peuhmah anunta tawntung dingin siam thei hi.
Tu-in piansak nasep kizo ta hi. "Vanpi leh leipi, leh a sunga teengte khempeuh kibawl khinta hi". "Pasian in abawlsa nate khempeuh a et ciangin, hoih sa mahmah hi." Eden huan in hih leitung adingin paak huan bang ahi hi. Adam leh Eve te'n zongh nuntakna singgah neek theihna hunpha nei uh hi. Piansakna ah mawhna leh meelhemna lim peuhmah kimu kha lo hi. Tua hi a, "Zingsang aksi te'n lasa uh a, Pasian tate'n lungdamin kipaak uh hi. "Job 38:7.
Jehovah in hih leitung phut khin ta hi. Hih leitung pen hoih na bek tawh zeema, mihingte a dinga kimanna neite bek koih hi. Tuipi leh leitunga na lamdang khempeuh ama bawlsa ahi hi. Niguk sungin, hih piansakna nasep thupi mahmah kizo hi. Ä ni sagih ni-in, Pasian in A nasepna leh Abawlsa khempeuh panin tawlnga a, tua ni pen thupha pia in, siangtho sak hi." Pasian in akhut tawh a bawlsa nate lungkimna lianpi tawh en hi." A vekpi un siangtho in picing mahmah hi. Pasian in a piansakna nasepna ah a gim manin a tawlnga hilo a, A pilna leh a hoihna tawh a vaangliatna kilat na dinga a bawlsate hoih sa in lungkim lua ahih man hi.
Ni sagih ni a tawlngak khit ciangin, Pasian in siangtho saka, mite tawlngak ni dingin tuam koih pah hi. PiangsakPa nungzuihna tawh mihing in tua nisiangtho ni-in a tawlngak ding hi a, tua ni-in vanpi, leipi, Pasian bawlsa nate en kawikawi dinga, PiangsakPa vaangliatna, pilna, ciimna, hoihna te mu-in a lungsim sunga lungkimna, tawldamna leh amah a Bawlpa zahtaak taka itna nei thei ding hi. Eden huanah Pasian in PiangsakPa ahih lam akiphawk den theihna dingin ni sagih ni thupha pia tuam hi. Tua khit ciangin Adam kiangah tua ni ni sagih ni siangtho taka tan na dingin hilha, amah bek hilo, a suan a khaakte khempeuh in zongh Pasian pen Piangsak Pa leh amaute a Ukpa ahih lam atheih na ding uh leh amaute in Pasian bawlsa ahih lam uh a ki theihna ding ahi hi. Tua hi a, Sabbath pen Pasian phuhsa ahih manin, bangmah kiciano, mumal lo cih peuhmah omlo hi.
Pasian in Paradise nangawnah mihing te'n Sabbath kisam uh hi cih mu khol gige hi. Mihing in ama duh leh deihna tawh kituak in niguk sung om thei dinga, ahih hangin a ni sagih ni-in Pasian piansaksa nate ngaihsun phapha in Pasian vangliatna leh ahoihna te ngaihsun ding hi. Piangsak Pa khut pana kipiangsak ahih lam kithei a, a lungkim na dingin Sabbath kisam hi.
Pasian in Sabbath pen mite'n Ama bawlsa nate a ngaihsut phatphat na ding ni-in sehsa in nei hi. Piansaknate in mihing lungsim sungah thegeena, a nungta Pasian, PiangsakPa, na khempeuh a Ukpa om hi cih kilangh sak hi. "Vantung in Pasian vangliatna kilangh saka, vanpi in ama nasepna taangko ko hi. Ps. 19:1. Hih leitung ii melhoihna mah mual saangpite, alipkhaphuai singkung lian mahmahte, singteh hing dikdekte, angek mahmah paak hoih nonote en leng, Pasian in ki-itna a hih lam kithei thei hi. Sabbath leuleu in, hih na khempeuh te a Piangsak Pa in ki-itna Pasain hi cih hong hilh hi.
Ih nu leh pa masate, kawk baanglo, siangtho taka kibawl ahih teci uh hangin, a khial thei lo dingin ki bawl lo hi. Pasian in amau te suahtaakna pia a, Pasian ciimna, citna leh deihnate thei in, thumang ding maw manglo ding cih teel thei dingin kikoih hi.
Amaute in Pasian leh a siangtho vantung mite tawh a ki ho thei den ding uh hi a, ahih hangin, tua banga aom theih den ma un a thumaanna uh sittel kuul phot hi. Sia leh Pha theihna singkung in nuntaakna singkung gei ah po a, tua singgah tawh amaute sawl manna, upna leh itnate kisit tel phot ding ahi hi. Singgah dang khempeuh a ut a deih bangun neek theih ding kiphal hi napi, hih singgah pen aneek uh leh sihna tawh ki gaam ding ci hi. Tham lo in, amaute in Satan khemna zongh a thuak ding uh ahi hi. Ahih hangin, hih sittelna ah a din suak zawh uh leh Pasian tawh nuam sa khawm tawntung dingin, siatna sukkhaak nawn loh dingin kikoih ding ahi uh hi.
Pasian in mihing pen thukhaam nuai ah koih se hi. Bang hang hiam cih leh thukhaam omlo in, kumpi gam ki-ukna om thei lo hi. Pasian in mihing pen a khial thei lo dingin bawl thei a, ahih kei leh Adam in tua singgah a lawn lohna dingin akhut hepkhiat sak thei hi. Ahih hangin, hih bangin hih mawk leh mihing pen ama duh leh deih teel theihna a ngah mi suak ta hi lo dinga, sila bang hi lel ding hi. Teel theihna hunpha ngah lo hi leh, a sawl manna zongh ama ut thu hi nawnlo in, a kisawl hamtang bang hi ding hi. Tua hi leh gamtatna kician zong nei thei lo ding hi. Hih bang pen Pasian vai hawmna leh deihna tawh kileh bulh mahmah hi. Hih bangin hi mawk leh mihing pen apilvaang kici thei lo dinga, Satan in Pasian amawhsakna ahi Aana zangh pa a cih mah hong hi mawk ding hi.
Pasian in mihing pen a pau baanglo-in bawl hi. Gamtatna deih huai tawh bawla, mawhna lam hoi in bawl tuan lo hi. Pilna tawh thuama, ama sep ding nate amaan pen ban theih theihna zongh guan hi. Tawntung nopsakna ih cih in, Sawlmanna, siangthona leh kikheel themthum lohna ah kinga hi.
Ih nu leh pa masa te' inn pen a suan a khaakte luah ding inn limla ahi hi. Tua inn, Pasian mahmah in akhut tawh a bawlsa pen tulai kumpi innte bang hi lo hi. Mihing in a kiphatsak ciangin, inn thupi mahmah, aman tam mahmahte ah om hi. Ahih hangin Pasian in Adam pen huan sungah ka koih lel hi. Hih huan pen ama teenna inn hi pah lel hi. Adum dikdek vanpi in a innkhum hi a, paak nam tuamtuam tawh aki dim a hing dikdek leitung in a sualpeek hi a, singhiang zam zilzialte leh singbawk lihliahte pen a innkawm hi lel hi. Hih a siangtho nupa kopte in a kiim a paam uh panin Pasian bawlsa nate tungtawnin Piangsak Pa tawh ki ho den uh a, nuam sa mahmah uh hi. Mihing te in bawltawm nate saangin, Pasian bawlsa nate paakta zaw uh henla, a baihlam nate deih kiphatsakna leh kihih sakna paaikhia in lungkimna ii a naak taktak ahi Pasian kiangah a pai hi leh nopsakna a ngah ding hi.
Adam leh Eve te pen a teenna mun uh ahi Eden huan keem siang tho dingin kisawl hi. A nasep te uh bel gimhuai hetlo in, lawphuai dena, nuam mai hi. Pasian in nasep pen mite thupha ngah theihna ding lampi in hong bawlsak hi. Nasepna in alungsim keem siangtho in, a pumpi haatsak a, a ngaihsutna ciim sak hi. lungsim leh thatang nasepna, kithasaanna tawh Adam in nopsakna lian pen khat nei hi. Mawhna a bawlkhit ciangin zongh Adam in nasepna tawh kheemna sunga a lut lohna dingin kikeem den hi. Nasep pen samsiatna hi ci a, lungkim lo pipi, haksa pipi a seemte in khial uh hi. Mihaute'n, mi naseemte a niam et khaak pahpah uh pen Pasian ngiimna tawh kilehbulh mahmah hi. Leitunga hausa pete neihsa uh leh Adam gamluah enkaak leng, Adam a pen nasia zaw pek lai hi napi, Adam pen kimawk om sak tuan het lo hi. Eite hong PiangsakPa in mihing te nopsak na ding bang hiam cih thei ahih manin, Adam kiangah nasep na pia pah hi. Mi naseemte bek in nopsakna diktak thei bek uh hi. Vantung mite zongh naseem bek ahi uh hi. Pasian tanote kiangah pai in Pasian cihna bang va seem kawikawi uh hi. Piang sakPa in bangmah seem lo a, thadah naingnuanga om ding deih lo hi.
Pasian tungah thumaanna a om lai a kipan Adam leh Eve te hih leitung ki uk sak hi. Nuntaakna nei khempeuh te tungah a kicaingtan lo uk zawhna a nei uh hi. Humpi neelkaai leh tuuno te in Adam leh Eve gei ah na ne khawm, tu khawm in ki mawl hialhial uh hi. Vasate zongh launa neu khat zongh omlo in leng hialhial uha, PiangsakPa phatna late a sa uh hi. Tua ciangin, Adam leh Eve te'n zongh Pa leh Tapa tungah phatna la sak pih uh hi. Adam leh Eve te in Pasian tate bang bek hilo in, saang naupang bangin thusinna zongh anei uh hi. Vantung mite hong hawh suk zeel uh a, Bawlpa tawh zongh a kiho pahpah uh hi. Akikaal uah kidaalna bangmah om lo hi. Adam leh Eve te pen cidam mahmah uh a, thahaat tuak mahmah uh hi. Ahih hangin vantungmite zah hi nai lo uh hi. A Geelpa leh A keempa kiang panin kum tulguk sung leitung ii omzia dingte a lungsim uh tawh a thei uh hi. Singtehte, paakte leh singkungte tawh kiho uh a, nuntaakna omzia te thei cian seemseem uh hi. Awle akipan thosi aneu pen dong, nuntaakna nei khempeuh Adam in thei khin hi. Amaute a vekpi un amin ding uh a phuah sak hi. Amaute omzia, pianzia leh angeina, nuntaaknate Adam in thei khin hi. Van a saangna a Pasian vangliatnate, akisim zolo leitungte kipeidante, meeilomte omzia, khuavak leh awging cihte, suun leh zaan, na khempeuh sin uh a, a thei uh hi. Gamlak ah singteh te, mualtunga suangtumte, a tang aksite, leitung, huihlak leh vantungah Pasian min ki gelh kawikawi hi. Na khempeuh ii om dan kilem diamdiam te in mongnei lo pilna leh haatna kilangh sak hi.
Pasian thukhaam a zuih hun sungteng uh, a theihna, nopsakna leh a itna te uh khang to to hi. Pilna, ciimna ngah behbeh ding uh hi a, nop sakna naak thak thak, na lamdang tuamtuam te theih beh toto in, a ki teh theilo a kiam ngeilo Pasian itna te a tel theih seem seem uh hi.

Source: Vantungmi Thumte Tangkona





To get the latest update of me and my works

>> <<