MUC

Print Friendly and PDF

Sunday, April 10, 2016

Khenpi 1 | Banghangin Mawhna Hong kiphal Hiam?

PASIAN in ki-itna hi. John 4:16. A pianzia, a thukhaamte in a beisa hunah ki-itna vive ahih bangin hong pai lai ding hunte ah zongh hi den ding hi. "Saangpenpa omna in a tawntungin kipa, kikheel ngeilo hi." Ama sungah kilamdanna om lo-in, kikheelna meel zongh om ngiat lo hi. Isai 57:15. Habk. 3:6, James 1:17.

Pasian bawlsa na khempeuhte in a bawlpa itna lak hi. Mihing khempeuhte tungah Pasian vaangliatna leh ukzawhna omin, tua in mihingte adingin thupha ahi hi. Laphuakpa in hih bangin na phuak hi.
"Na khut in thahaata, Na taklam khut in saang hi.

Thumaanna leh thukhenna in Na Tokhom kiphuhna hi a:
Na mai ah hehpihna leh Thutak pai hi.
Nopsakna aw ging a neite mi nuamsa a hi uh hi
Na min hangin nisimin lungnuam uh a:
Na thumaanna sungah pahtawi-in a om uh hi.
Nangmah in amaute thahaatna bulpi na hi a:
Siangpen Pa in eite kumpipa ahi hi." (Ps. 89: 13-18)

Sia leh pha kikala buaina pen vantung pan a kipan mawhnateng kihaaltum dong dong, a kikheel ngeilo Pasian itna tellahkhiatna ahi hi.
Ukpipa in vanpi leipi a bawl laitakin amah bek hi lo hi. A bawlsa mihing te tawh a lungnopna, a ngimnate a genpih dingin naseppih, kikholhpih khat nei hi. "A kipat ciilin Thu a om hi. Thu in Pasian tawh a om khawm hi. Thu in Pasian ahi hi. Thu in Pasian tawh a om khawm hi. Thu in Pasian ahi hi. Thu in a kipat ciil a kipanin Pasian tawh a om khawm hi." John 1:1,2. Khrist , Thu in, Pasian Tapa neihsun hi a, Pa tawh pumkhat ahih banah, pianzia, gamtatna leh ngimna te ah pumkhat ahi a, Amah bek mah Pasian tawh thu kikum thei leh ngimnate genkhia thei dingin a om hi. Ämin in, Lamdang, Thupiapa, A haat Pasian, Tawntung Pa, Kilemna Kumpi," ahi hi. Isai 9:6. Amah paina in taanglai a kipan hi a, bei ngei lo hi." Micah 5:2. Pasian Tapa in amah leh amah a kigeenna ah: "A kipat ciil a kipanin Topa in kei hong nei a, A nasepte a kipat ma pekin : A tawntungin ka om hi.......Hih sim leitung a phuh ding lai-in, Amah tawh khangkhia khawm bangin, a geiah ka om a, Amah in keimah hong paakta in, Keimah in Ama mai ah a tawntungin ka nuamsa hi." Prov. 8:22-30
Pa in Tapa tung tawnin van a om nuntaakna nei khempeuh a piang sak hi. Ämah tawh na khempeuh kibawla,.....Kumpi tokhomte, ukzawhnate, dawite, haatnate hi ta leh, na khempeuh Amah tung tawnin kibawla, Ama ading ahi hi." Col 1:16. Vantungmite in Pasian naseem sawltaakte a hi uh a, Pasian deihna bang seemkhia dingin Pa khawvaak tawh kituam uh a, amanlang mahmah khate a nei uh hi. Ahih hangin Pasian Tapa, Pasian sathaunilh, "Pasian meel kilangsakpa,"in Ä vaanglianpi tawh," "Hih na khempeuhte uk a," ukzawhna vaangliatna a nei hi. Heb. 1:3. A vaanglian kumpi tokhom in a kipatciil a kipanin Amah biakinn mun hi a, (Jer. 17:12) thumaan ciangkhutin Amah gam ukna kumpi ciangkhut ahi hi. Heb 1:8. Minthanna leh Thupinate Ama aa hi a, A biakinn sungah hoihna leh haatnate a om hi." Ps. 96:6. Hehpihna leh Thumaanna in Amai ah pai hi. Ps. 89:14.
Ki-itna thukham in Pasian kumpigam, kiphuhna bulpi hi a, A kumpi gam sunga mite nopsakna in tua ki-itna thukham tawh kituak siangtho nuntaakna a neihna ahi hi. Pasian in a bawlsa nuntaakna nei peuhmah in Amah pen itna tawh a biak ding uh deih hi. Aana tawh thumanna cih bang, kisawl tentan ahih mana thumanna cih bang deih lo hi. Mi khempeuh tungah deih bang teel theihna hunpha pia hi. Tua hi leh mitte'n amau deih thu tawh Pasian min phat thei zaw ding uh hi.
Ki-itna sunga a om lai siah kilemna leh kithuhualna om hi. Vantungmite nopsak pen in Piangsakpa ngimna bang taangtun na dinga sepna ahi hi. Pasian vaang kilat sak leh Amah phatna lasakte nuam a sa uh hi. Pasian itna a thupi penin a neih manun kisak theihna leh angsung khualna omlo hi. Vantung mun khempehah kilem lo hi cih lahkhiat theih nading om peuhmah lo hi. Ahih hangin, hih nopsakna dinmun pen hong kilamdang hi. Pasian bawlsate lakpana khat hong thutangpeek se hi. Tua pa in Khrist khita lian penpa hi a, amah tung panin mawhna hong kipan khia hi. Amah pen bawlsa nuntaakna nei khempeuhte lakpanin siamna a saaang pen leh vaangliatna thupi pen tawh a kituam ahi hi. Amah in Lucifer, "Zingsang tapa," a siangtho a niin baanglo, Cherub masa pen ahi hi. Pasian maiah dingin, a bei ngeilo Pasian vaangtaang in ama tungah om ngei hi. Tua ahih manin Topa in "Nang in na khempeuh kicinna na hi a, pilna tawh kidimin, melhoihna tawh na kidim hi. Pasian huan ahi Eden huan sungah na om ngei a, suangmanpha namkimte na kizepna ahi hi....Sathau kinilh cherub na hi a, Pasian mual siangtho tungah kong koih hi. Meikaang tawh kibang suangte lakah na vaak kawikawi hi. Hong kipiansak ni a kipan na sungah mawhna akimuh dong geen bang lo-in na om hi." Eze. 28:12-15.
Damdamin Lucifer in amah leh amah a kisaangkhai nopna hong kilangh sak ta hi. Laisiangtho in "Na meel hoih manin na kiphasaka, navaak na kisak manin na pilnate na susia zo hi....Isa. 14:13,14. A vaangliatnate Pasian kiang pana a ngah hi napi Lucifer in amah leh amah neihtawm bangin ngaihsun hi. Vantungmite lak pan a saang pen hi napi, tua dinmun tawh lungkim lo in, Piangsak Pa bek ii ngah dinga kilawm biak leh paai ding ut mawk hi. Piangsak Pa dinmun haza hi. Bawlsa nuntaakna neite'n piangsakpa tunga zahtaakna leh itna apiakding teng uh tawh amah a ki belh nadingin hanciam niloh mawk hi. Mongneilopa in A Tapa tunga apiak vaangliatnate haza ahih manin, Lucifer in tua vaangliatna a suh zawh theih nading bekbek hanciam hi.
Tu-in vantunga kilemna, kithukhatna pen hong kitam kham ta hi. Piangsakpa kibiak ding saanga Lucifer a kibiak nadingin a hanciam tak ciangin vantung mite'n Pasian bek mah a lian pen hi na ci zaw uh hi. Tua hi a, vantung mite'n Lucifer nakpi-in kho uh hi. Pasian Tapa in zongh Lucifer maiah Piangsakpa liatna, hoihna leh thudiknate leh a siangtho, a kikhel ngeilo Pasian Thukhaamte a phutpa hi a, tua a phuhsate panin pialkhia mawk leh Lucifer in amah a Bawlpa zahtaak lo in, amah leh amah tungah siatna kitun suak ding hi ci-in a hilh hi. Tawpna neilo itna leh hehpihna tawh a ki khoh hangin Lucifer in nial teeiteei hi. Lucifer in Khrist a hazaatna picing sak nuam ahih manin hong ngawng khauh seemseem mawk hi.
Pasian Tapa pen amah saangin a liat zawk nading thu omlo hi cih thu tawh kinialna neih ding pen Lucifer ngimna ahi hi. Tua hi a, Lucifer in PiangsakPa pilna leh itna pen mawhsakin kosia hi. Hih a ngimna a taangtun theih nadingin a khuak pilna a zangh ding hong hi ta hi. Ahih hangin PiangsakPa in A piansakte keem loin koih khong lo hi. Kiseelna lianpi a om ma-in, vantungmi khempeuh in Pasian deihna in bang hiam cih a theih uh kisam masa hi. Pasian pilna leh hoihna in amaute nopsakna naak ahih lam a theih uh kuul hi.
Vantung Kumpipa in vantunga teeng khempeuhte a maiah kikhawm sak hi. Amaute maiah A Tapa dinmun omzia maan pen lak hi. Pasian Tapa in a Pa tawh kumpi Tokhom luah khawma, a tawntung vaangliatna amau geel aituam hi. Tapa leh Pa in amau leh amau thu a "öm" ahi uh a, kuama piansak ahi kei uh hi. Pasian tokhom kiimkotah a kisim zolo vantungmi "tulsawm a sim tulsawm, tul tampi" te om uh hi. Vantung miliante in, sawltaakte bang leh gammite bangin om uh a, tung Sianmaang kiangpana hong luang khia khuavaakte tawh nuamtakin a om uh hi. Tua akikhawm ziahzuah vantung mihonpite kiangah Kumpipa in, Pasian Tapa neihsun, Khrist bekbek in Amah tawh thu kikum thei in, A ngimnate taangcing sak dingin seem thei hi ci hi. Pasian Tapa in a pa deihna bangin vantung mihonpite a bawl hi. Tua hi a, Amah leh Pasian tungah biakna leh paaina piak ding ahi hi. Vantung mite a bawl lai mah bangin, hih leitung leh a sunga teengte a bawlna ah zongh Khrist in Pasian vangneihna mah zangh lai hi. Ahih hangin, hih munte ah Tapa in Pasian vaihawmna tawh kilehbulhin Amah leh Amah kiliatsak ding zong ngei lo in, A Pa minthan nading leh migiitna leh itna tawh a kidim A pa ngimnate a seemkhia bek hi.
Tua ciangin, vantungmite'n kipaak takin Khrist pen alian mah hi ci uh a, A maiah kuunin bia uh hi. Lucifer zongh a kuun hi. Ahih hangin, a lungsim sungah a lamdang, a lauhuai ktukalhna khat om hi. Tua pen in Pasian deih bang zui zaw ding maw cih leh hazaatna leh diehgawhna tawh langdo ding maw cih thu ahi hi. Tawlpi khat sung pen vantung mihonpite huzaap in zo gawp bangin kilangh hi. Phatna late kisa a, aw tul tampi a gin khiat ciangin, a lungsim sunga ngaihsutna hoihlo pen a tuimang bangin, a mahmah in zong Pa leh Tapa phatna la sakpih saam hi. Ahih hangin, a vaangliatna pen hong ki phatsakpih kik pah hi. A lian pen ahih nopna hong om kik hanhana, Khrist dinmun a hazaatna pen Pasian piakkhong hehpihna hi ci lo in, PiangsakPa tungah lungdamna ko het lo hi. Vaanglian leh pil kisa mahmah ahih manin Pasian tawh kizakim ding bek ut hi. Bang hang hiam cih leh vantungmite'n amah pen it uh a, zahtaakin a thupiakte bangin gamta uh hi. Vantungmi khempeuh tungah vangliatna leh pilna tawh kituam ahih man hi. Ahih tei hangin, ama tungah Pa tawh kizakimin Pasian Tapa tawh thu kikum thei lo hi. Tua ahih manin, "Bang hangin Khrist in zaliatna nei tuan se hiam? Bang hangin Lucifer saaangin kipahtawi zaw se hiam? cih dotna lungsim hong nei hi.
A manlaang thei penin Pa kiang pan hong pai khia a, vantungmite zongh amah banga a lungkim loh theih nadingun na hong seem hi. Pasian a zahtaak mahmah bangin a ngimna thukpi seelsimin hong vaak kawikawi hi. A masa-in Pasian kumpigam ki-ukna ahi Pasian thukhaam pen a kimuanmawh nadingin hong geen hi. Leitungmite'n bel thukhaam kisam kha mah ding uh hi. Ahih hangin a pil, amau pilna tawh a gamtang thei vantungmite'n Pasian deihloh seem het lo ding uh hi. Amau ngaihsutnate uh siangtho ahih manin Pasian mah bangin khial thei het lo ding uh hi ci hi. Pasian Tapa in pa tawh kizakima a om vial pen zongh a kizahtaakhuai leh a kipahtawi huai khat mah hi ci hi. Tua hi a, Lucifer pen a saangpen munah om thei leh vantungmi khempeuhin suahtaakna ngah ding uh hi. Tu mahmah in zongh amaute suakta lo uh hi: bang hanghiam cih leh amaute UKPA deihna bangin a om uh kuula, a biak a paai uh kul hi ci hi. Hih bang kheemna teng tawh a kheem takciangin vantungmi tampitak in na saang pah uh hi.
Khrist dinmun bel kibang gige lai hi. Lucifer in Khrist a hazaat mana ahilo lamah geena, Khrist tawh kizakima a kigeenna in Khrsit dinmun pen amaan mah ahih lam tellah zaw hi. Vantungmite tampitak in Lucifer kheemna ah mittaw in om uh hi.
Vantungmite' ukpipa ahihna zanghin siamna thuuk mahmah tawh vantungmitte'n zongh Pasian a muanlah nadingun guuk sep sim hi. Pasian'ngimnate leh vaihawmnate ahih lo lamin hei khia a, vantungmite uploh ding leh lungkimloh nadingin bawl hi. Kam khum nono leh aw zol nono tawh vantungmite kiangah thu muam niloh hi. Amah pen Pasian tungah a thumaan den mah bangin kigeena, tua laitak mahin Pasian kumpigam thukhaam langpang sa-in naseema, ama lungkimlohna pen vantungmite leh vantung ki-ukna a lemtuah bang danin kilangh sak hi. A sim tham takin kikhenna leh kilangpanna khaici a tuhtuh hi napi, a siamna thuuk mahmah tawh amah pen vantungah kilemna leh lungnopna, muanna a om den nadinga hanciam bangin kidawk sak hi.
Lungkimlohna pen hong kipan khia ta hi. A kilangtangin kikhenna a om loh hangin, vantungmite lakah pawl kikhen nading lungsim hong om ta hi. Pawlkhatte in Lucifers lamah pangin Pasian Kumpigam ki-ukna maanlo hi ci uh hi. A tungin vantung ii ki-uknate hoihsa in lungkim mahmah uh hinapi, Pasian ngimna leh vaihawmnate a theihpih loh manun, tu-in Lucifer zuau kheemna um in, hong lungkim nawnlo mawk uh hi. Khrist a liatsakna thu thei loin lungkim nawnlo uh hi. Hih a lungkim lo vantungmite in Lucifer panpih uh a, Lucifer pen Khrist tawh a kizakim mah ding hi cih pih uh hi. Ahih hangin, Pasian lama kip vantungmite kibawl ma pek a kipan Pa tawh pumkhat ahi sa hi. Pa taklamah dingdena, a zaliatna pen Ama nuaia om khempeuhte adingin thupha hi. Tuni ciang dong kuamah in Amah nial ngei nai lo ahih manin, tu-in vantungmite'n a lungkimlo a vantungmi pihte kianguah, Pasian langpang se dah un, Na langpan uh leh kisiacip lel ding hi uh teh. Hong kihei kik unla, Pasian kiangah thumaanna tawh hong ki-ap kik zaw un ci-in thuum uh hi.
Pasian in angeina mah bangin, migiitna lianpi tawh Lucifer pen thuak tentan lai hi. Vantungah lungkimlohna leh muhdahna cih bang peuhmah kithei kha ngei nai lo hi. Hih thu in thu thak, a lamdang, a kithei zolo, a kituat theilo thu ahi hi. Lucifer nangawn in ama ngaihsutna bang a sepkhiat ding hong lau giauguau saam hi. Ahih hangin khawl tuan lo mawk hi. Pasian itna leh hehpihna bek tawh amah khial zaw ahih lam kihilh thei bek hi. Lucifer in zongh amah khial zaw ahih lam kithei hi. Amah in "Topa in a lampi khempeuhah thumaanin, a nasepna khempeuh ah siangtho hi." cih a thei hi. Ps. 145:17. Pasian thukhunte in dikin, vantungmite maiah ahi banga a geen ding hi cih mu hi. Hih a muh leh a theih thu bangin om hileh amah leh vantungmi tampi gumkhia zo mah ding hi ven. Ahih hangin Pasian tunga a kipaik ding pen ut lo hi. Vantungmite laka lian pen ahihna dinmun a nusiat khit hangin, Pasian lamah kihei kik henla, PiangsakPa pilna thei in, ama dinmun tawh lungkim lel hi leh, a dinmun ngei mah ah kikoih kik ding ahi hi. Tu-in, thu khensat hun hong tungta hi. Pasian kiangah ki-ap ding maw? Ahih kei leh, a kilang tangin langpanna kipan khia ding maw cih thu ahi hi. Pasian kiangah ki-ap kik dektak hi. Ahih hangin a kiphatsakna, ama ngaihsutnate khial hi ci-a, a kosiat kumpigam kiangah a ki-ap kik ding pen haksa sa mahmah hi.
Itna tawh a dim PiangsakPa in, Lucifer leh anungzuite kisiatna sunga tuak dektak uh hi cih amuh ciangin hehpih-in a kihei kik nadingun lampi zonsak hi. Ahih hangin, Ama hehpihna na nial uh ih. Lucifer in Pasian' thuakzawhna pen Pasian' kiliatsak nopna in geen zaw sop a, a sawtloin Pasian mahmah ama ukna sunga hong ki-ap dingin geen hi. Vantungmite'n kiptakin amah a panpih naak uh leh a deih khempeuh ngah ding uh hi ci hi. Ama thu bek tawh om tentana, Ama a Bawlpa tawh kigaaldo ding phamawh sa lo hi. Tua hi a, Lucifer pen vantung mite cing ding kimlai vantung mite susiapa a lehsuah ta hi.
A thumaan vantungmite thuumpihnate neu-etna tawh nialin, amaute pen a kibum silate cihsan hi. Khrist kisaangkhanna pen dik hetlo ahih manin Pasian kumpigam sungah ki-ap lo ding hing ci hi. Khrist ii zaliatna zongh cikmah hunin lungkimpih ngei kei ning ci hi. A nungzuite kiangah kumpigam thak leh a nuamzaw ngah ding uh a, suahtaakna tawh nuamsa mahmah ding uh hi ci-in kamciam pia hi. Vantungmite tampitakin a makai dingun saang dingin limlahna pia uh hi. Vantungmi khempeuh a ngah thei dingin ki-ummawha, Pasian tawh kizakimin, vantunga om khempeuhte in ama thu mang ta ding uh hi ci-in kilamen hi.
A thumaan vantungmiten Lucifer leh alawmte kiangah Pasian tungah ki-ap dingin thuum uh hi. A ut kei teeiteei uh leh a kipelh thei lo a thuak ding uh nate zongh hilh uh hi. Amaute a piangsakpa in amaute pen zo peuhmah dinga a langpan manun daan thuak sak hamtang ding hi ci uh hi. Vantungmi kuamah in Pasian thukhaam langpan in zawhna ngah ngeilo ding hi bang hang hiam cih leh Pasian thukhaam in Pasian mah tawh kibangin siangtho hi. Lucifer kheemna ngai kei un ci-in hilh uh a, Lucifer leh a nungzuite'n a manlaang thei pen in a khialhnate uh pulaaka Pasian a zuat kik nadingun ngen uh hi.
Tampi mah in hih khohna ngai-in kisik kik nuam uh a, Pa leh a Tapa hong zuan kik nuam uh hi. Ahih hangin, Lucifer in kheem na ding khat na nei khol gige hi. Amah in, Amah tawh kipawl vantung mite gamla paikhia khin lua uh ahih manun a kilehkik hangun Pasianin mawhmaina pia zo nawn lo ding hi ci hi. Pasian kianga ki-aap kik nuam peuh mah kikosia in a dinmun panun kiniam sak ding hi ci hi. Amah in bel Khrist pen tungnungpen hi ci ngei lo ding hi. Tua ahih manin amah leh a nungzuite adingin sep ding khat bek om lai a, tua in a suahtaak theih nadingun gaal ado uh kuul hi ci hi.
Satan ahih leh bel gamla paikhia khin lua mah hi. Ahih hangin a kheemna tawh a mittawsak a nungzuite a dingin gamla lua nai lo hi. A thumaan vantungmite ngetna bangin ki-ap kik uh hileh lametna nei thei ding uh a, Satan a itna leh a suahtaak nopna un ki-ap sak lo a, itna leh hehpihna tawh thuumna nunung pen nial uh hi.
Satan in a lungkimlohna min saka, langdona a tut dong a deih bang seem dingin Pasian in phal hi. Satan ngimna leh ngaihsutna khempeuh a picin kuul hi, tua hi leh a omzia diktak mi khempeuh in mu thei pan ding uh hi. Lucifer, sathau kinilh Cherub, pen saang takin kipahtawi ngei hi. Vantungmiten nakpi'n it ngei uh a, a huzaap zongh khauh mahmah hi. Pasian kumpigam ih cih in vangtungmite bek hi lo-in, a bawlsa leitung khempeuh zongh ahi hi. Tua hi a, Lucifer in vantungmi khempeuh zo thei leh leitung khempeuh zongh zo thei ding kisa hi. Tua hih manin, a ngimna a taangtun theih nadingin a khelpilnate zangh hi. A kheem theihna vaang pen nasia mahmah hi. A nasep peuhmah a kithei thei lo nate tawh tuam ahih manin, a ngimna taktak pen vantungmiten tel hak sa mahmah uh hi. A hong picin mateng, a nasep in thusia ahih lam kithei lo hi. A lung kimlohna zongh langpanna a suah ding kimu thei lo hi. A thumaan vantungmite nangawn in zongh a nasep leh a ngimna taktak tel theih zo lo uh hi.
Lucifer in ama lama a kaih zawhloh vantungmite pen vantung a teengte hoih nading deihsak lote, bangmah kilamdanna neilote ci-in mawhsiat hi. Pasian lama om vantungmite pen langdona a seem bangin ngawh pong mawk hi. Thu seelna tawh Pasian ngimnate a kitel zawh loh nading pen ama ngimna ahi hi. A telnop mahmah nate a kitel theilo bangin kilangsaka, Jehova thu telnop mahmahte muanlahna tawh telzawhloh suak sak hi. Vantung mite laka a lianpen ahihna in tu-a a langdona nasep pen mavangsak tuam mahmah hi.
Pasian in thumaanna leh diktatna bek zangh thei hi. Satan in Pasian zat theihloh ahi zuauphuahna leh mi bumna, kheemnate zangh hi. Pasian kammal a khial bangin kilangh saka, a bawlsate zuih dinga thukhaam akoih zongh maan lo bek tham lo in, Pasian biak leh paai ding cih sawnsawn pen tawh Pasian in amah leh amah kilian sak hi ci hi. Hih bangin Satan in Pasian leh Agam ki-ukna naak mawhsiat lua mawk ahih manin, vantungmi khempeuh leh leitung khempeuhte mitmuhin Pasian kumpigam in dika, A thukhaamte zongh siangtho hi cih lah kuul hi. Satan inlah amah pen vanpi leipi hoih na ding bek zonga gamtang bangin kigeen lai deep hi. Tua ahih manin a ngimna taktak leh a nasep zia pen mi khempeuh theih dingin a picin kuul hi. Tua hi a, a nasepna a taangcin theih nadingin hun tawlpi khat a neih kuul hi.
A ma hanga om kikhenna pen Satan in Pasian kumpigam ki-ukna hoihloh man hi ci-in pum ngawh hi. Thusia khempeuh Pasian kumpigam ki-ukna hang hi ci hi. Amah pen Pasian Thukhaamte puahpha leh akicing sak zaw dinga seem bangin kigeen hi. Tua ahih manin, a ngimna leh akigeenna banga a sep theih nading Pasian in hunpha pia hi. A nasep in amah mawhsak ding hi. Satan in a tuungin a langpangin kigeen lo hi. Ahih hangin, vanpi leipi in ama omzia, pianzia, zuauphuakpa ahih lam a daal omlo in a theih uh kuul hi.
Vantung pan a kinawhkhiat ciangin zongh mongnei lo itna nei Pasian in Satan pen susia pah lo hi. Pasian in itna bek tawh Ama na a kisep ding leh Amah a kibiak ding deih ahih manin, a bawlsate'n a thudikna leh a migitna a theih cian uh kuul hi. Vantung leh leitung danga teeng khempeuhte in mawhna omzia leh mawhna thaman om zia thei zolo ahih manun, Pasian in Satan susia pah mawk leh Pasian thudikna koi hiam cih thei lo ding uh hi. Tua ahih manin Satan kihing khawi lai tadih suak hi. Thakhat thu in kimeeklum pah hi leh bawlsa pawlkhatte'n itna tawh hilo in launa, kihtaakna tawh Pasian bia ding uh hi. Tua hi leh mikheempa huzaap pen kibeimang sak zo lo ding a, langpan nopna lungsim zongh maimang zo lo ding hi. Hong pailai ding a kisim zolo khang tampi sunga vanpi leh leipi hoih zawk nadingin Satan in a deihnate a picin sak kuul hi. Pasian kumpigam ki-ukna a langpannate leh a mawhsaknate, bawlsa nate khempeuh in kitel taka amuh uh kuul hi. Tua hi leh Pasian migiitna, a thudikna leh A thukhaam kikheeltheihlohna pen cikmah hunin kuamah in mawhsak ngeinawn lo pan ding hi.
Satan langpanna pen vantung leh leitung adingin hong pai ding khang tawntung hun sungah theih den ding kihilhna thu khat ahi hi. Mawhna leh mawhna thaman omzia theih nadinga teci ahi hi. Satan deih thu in mite leh vantungmite suplawh sak mahmah ahih manin, Pasian thukhaam kipaampaih mawk leh bangci bang hi ding hiam cih kimu thei hi. Pasian kumpigam a om lai siah a sunga teengte'n lungmuangtakin om thei uh hi cih kilangh hi. Hih langpanna a kipicin sak manin, hong pai lai ding hunte ah misiangthote'n mawhna bawl nuam nawnlo, langpang nuam nawn lo-in, mawhna thaman thuak nuam nawn lo ding uh hi.
Vantung a ukpa in na khempeuh a kipatna pan a tawpna dong, a beisa leh hong pai lai ding nate, a theipa hi-a, kuama nawngkaai sak zawhlohin a ngimna leh a vaihawmna bangin taangtung sak hi. Ä kiimkotah khuamialna leh meeipi a kaai hangin, a tokhom in thumaanna leh thukhennatungah kiphut hi." Ps. 97:2, R.V. Hih thu pen, a khial hi ta leh, a thumaante hi ta leh bawlsa khempeuh in ni khat ni teh thei ding uh hi. "A nasep in siangtho hi: bang hang hiam cih leh a lampite in thukhenna hi a: amah in a thumaan Pasian, Mawhna tawh kihello, a thu dik leh a thutang Pasian ahi hi. "Deut. 32:4.

Source: Vantungmi Thumte Tangkona





To get the latest update of me and my works

>> <<