Keytext: Revelation
19:10 The Testimony of Jesus is The spirit of prophesy. (Jesu teci panna in
kamsannakha ahi hi,” hong ci hi.) ZIV.
Khrist pen
gampalakah Israelte a om sungin A makaaipa uh hi bek lo-in, Israel mite tunga
Thukham piapa zongh ahi hi. Sinai mualah, vaangtaang nasia mahmahte kikaalah,
Khrist in Amite zaak kim dingin A Pa’ thukhaamte khat khit khat A geenkhia hi.
Thukhaam sawmte kigelhna suangpeekte Moses tunga apia Pa in Khrist ahi hi.
Kamsaangte
tungtawna a Kampau Pa in Khrist ahi hi. Sawltak Peter in Khristian Pawlpite
kiangah a geen inah, Kamsangte in, no tunga hong tung ding hehpihna a hong geen
zo hi. Amaute in Khrist thuaknate leh Khrist vaangliatnate Khasiangtho hilhna
hangin ciam khin zo uh hi.” ci hi. 1 Peter 1:10-11. Lai Siangtho lui sunga
thupia Pa, kampau Pa in Khrist ahi hi. “Jesu teci panna in hilhkholhna thute
ahi hi. “Mang. 19:10. Patriachs and Prophet, 336:3.
1. Koi teng panin
genkholhna (Kamsanna kha) hong pai hiam?
A hangin genkholhna
peuhmah mihing deihna pan hi ngei lo-a, Khasiangtho hihsakna bangbangin mite in
Pasian tung pana a gen uh hizaw hi, 2 Peter 1:21. (ZIV)
2. Genkholhna ii
deihna bulpi in bang hiam? (ZIV)
John 13:19; “Hih
thu a pian ciangin kei amah ka hilam na up nadingun a pianma tu-in note tungah
kong gen khol hi.
John 14:29; Hih thu
a pian cianga na up theih nadingun a pian ma-in no tungah tu-in kong gen hi.
John 16:4 Ahun hong
tun ciangin kong vauhilhsa ahilam na phawk nadingun hih thu kong gen hi. A
cil-in note tawh omkhawm ka hi manin hih thu note kong hilh kei hi.
Keimah ka hi Ka
kammal te sungah genkholhna te kong pia zo hi. A hunzui in nunglam hun bei sa
hi leh a tawntung mailam a thupiang ding khempeuh kong gen zo hi. Tuni in koi
din mun ciangah ki tungta a, Koi din mun ciang ki pai lai ding cihte leh Bang
tan vei sawt lai ding cihte na ngaihsun thei ding uh hi. Prophets and Kings,
536:3.
3. Jesu Khrist
lungdamna thu pen Genkholhna (Kamsanna kha) tungtawn in hong tangtung mah ahi
hiam? (ZIV)
Matthew 4:12-17
Jesu in John thongkiatna thu a zak ciangin Galilee ah a ciah kik hi. Nazareth
nusia in Zebulun le Naphtali gamhuam tuilipi gei khata om Capernaum ah pai-in a
teng hi. Hih in kamsang pa Isaiah tungtawna kigenkholsa: “Zebulun gam le
Naphtali gam, Jordan gun dunga tuipi zuatna lampi,
Gentile-te tenna
Galilee ah, khuamial sunga teng mite in, khuavak lianpi a mu zo uh hi; sihna
liim gam sunga teng mite tungah khuavak tang khin ta hi.” cih thu a tangtun
nading ahi hi. Tua huna kipanin Jesu in, “Vantung gam hong nai zo ahi manin
kisik un,” ci-in thuhilh a kipan hi.
Topa Jesu Thuhilhna
mahmah ah zong “A hun hong tung zo hi. Pasian gam hong nai ta hi. Kisik unla
thupha um un!” a ci hi. Mark 1:15. Lungdam thu gospel pen Jesu mahmah in hong
piak khiat ahi hi. Hih pen genkholhna (Kamsanna kha) te tung tawn in“ a hun
hong tung zo hi” a na ci ahi hi. Hun hong tung zo cih tawh kisai in Daniel
9:24-27 na sim in.
4. Lai Siangtho
thak hun sungah ah Kamsang a om hiam? (ZIV)
Luke 7:28 Ken kong
geninah, numei sung pana suakte lakah Baptisepa John sanga lianzaw kuamah a om
kei hi; ahi zongin Pasian gamah a neupen nangawn amah sangin a lianzaw hi,” a
ci hi.
Sawltak 11:28
Amaute lakah Agabus min nei khat ding to a, “Kha tungtawnin, Rome gam sung
khempeuh ah kialpi nasiatakin tung ding hi,” ci-in a genkhol hi. (Hih pen
Claudius in a uk laitakin a tung hi.)
Sawltak 21:9,10
Amah in pasal a nei nai lo kam a sang tanu li a nei hi. Tua lai-ah ni tam khop
ka tam khit uh ciangin Judea panin Agabus kici kamsang khat hong paisuk hi.
Mang. 1:1-3 Pasian
in a sawt lo-a tung pah dingte a nasemte tungah lak dingin amah a piak Jesu
Christ kilaakna ahi hi. Amah in ama vansawltakte sawlin ama nasem John tungah
theisak a, 2 John in Pasian thu le Jesu Christ thu teci panna a muh khempeuh teci
a pang hi. 3 Hih genkholhna thute a sim mi thupha ngah hi-a, a sunga kigelhte
za-a, a lungtanga a kemte thupha ngah ahi hi; bang hang hiam cih leh a hun hong
nai ta hi.
Genkholhna
(Kamsanna kha) te pen Jesu Christ in Vantung mite sawl in, Tua Vangtungmi in,
Pasian kamsang te tungah Mangmuhna tawh hilhin, Pasian’ Kamsang te tung pan in
Pasian mite in Jesu Christ lamlahna ih ngah thei hi. Tua Jesu Christ lamlahna
te in Zeisu Tecipanna ahi hi. Mang. 19:10
5. A beibaang
pawlpi te in Genkholhna (Kamsanna kha) a nei ding uh hiam? (ZIV)
Mang 12:17 Tua
ciangin tua numei tungah gulpi-sikhiam thangpai a, Pasian thupiak mangin, Jesu
teci panna a len a om lai tua numei tate sim dingin a kuankhia hi.
Mang 19:10 Jesu
teci panna in kamsanna kha ahi hi,” hong ci hi.
Hun nununga Pasian’
pawlpi in Kamsanna silpiak nei ding uh hi ci in, Paul in zong na gen hi, 1
Corin. 1:5-8.
6. Bang hangin
Pasian in apawlpi tungah Zeisu Teci panna ahi Kamsanna kha (spirit of prophesy)
hong pia hiam?
Pasian kammal ahi
Lai Siangtho limtak in sinin, Lai Siangtho ii deihna amaan bangin telin,
Christian nuntakzia taktak dan tel hi le uh cin, Hih Tecipanna na kisam kei
ding uh hi. Kha Siangtho hu mop ahi Lai Siangtho pilna ngahna ding na kin loh
manin a baih zaw ding, a tel baih thei thei ding leh Pasian humop Lai Siangtho
bangin nungta lo in, no hoih sak dan leh no ngaihsut tawm bangin Lai Siangtho
thu na hilh na hih manun, hih Teci panna hong kipia ahi hi. Testimonies, Vol.
2, 605:1.
7. Bang dingin Teci
panna a bei baang pawlpi te tungah hong kipia se hiam? (ZIV)
1 Corin. 12:4-8
Letsong a tuamtuam a om hangin Kha a kibang ahi hi. 5 Nasepna a tuamtuam a om
hangin Topa a kibang hi. Sepsakna nam tuamtuam a om hangin mi khempeuh sungah
tua Pasian mah in a sem hi. Tu-in mi khempeuh i hoihkim nading mikim tungah Kha
kilatkhiatna kipia ciat hi. Mi khat tungah Kha tungtawnin pilna thupuak kipia
hi. Midang khat tungah tua Kha mah in theihna thupuak,
a. Hong hilh ding,
kitel cianna hong nei sak ding, lam hong lak (acian) hong pia ding.
Pasian thumaan
thutak in bang hiam? cih hong hilh ding, kitel cianna hong nei sak ding, lam
hong lak ding leh na lungsim sungah thumaan na theih tel theihna ding ahi hi.
Testimonies, Vol. 2, 605:2.
Reference : Testimonies,
Vol. 1, 426-437; Testimonies, Vol. 2, 625-631; Testimonies, Vol. 2, 243-253
b. Thumaan thak leh
khuavak thak hong kipia hilo hi.
Hih Tecipanna te in
khuavak thak hong kipia hi peuh mahlo hi. Lai Siangtho sunga hong ki gensa
thute teltaka na theihna dingin na lungsim sungah hong kip letsak hong taw sawn
hi bek hi.
Testimonies Vol. 2,
605:2
c. Lai Siangtho
ta-angin zat dingin hong kipia hi peuh mahlo hi.
Testimonies Vol. 5,
663:1.
d. Lai Siangtho neu
seh zawkna dingin hong kipia hilo in, Lai Siangtho a thupi sak semsem zawkna
ding ahi hi. Mite lungsim Lai Siangtho tungah kinga a, ih lungsim sungah Lai
Siangtho deihna ahi Thumaan thutak ih tel zawkna ding ahi hi. Testimonies Vol.
5, 665:2
e. Pawlpi sung ki
pumkhatna ding leh Pasian mite in amuhna uh a kibatna ding ahi hi.
Pasian in amite
akipumkhat dingin bawl hi. Amaute pen ki thukhat in lungsim kikhat, ngaihsutna
kibangin thu a khen khawm ding hong deih hi. Lai siangtho ii deihna thu bulpi
te telcianna nei lo in nuntak pih kei leng ih ki thutuak thei ngei kei dinga,
zong ih kipumkhat thei ngei kei ding hi. Testimony Vol. 3, 361:3
f. Pasian Kammal
lungdamna thu te leitung bup ah a kisam zah in ih puak zawhna ding ahi hi.
Kilam danna om lo
ding, Lawm ahih kei leh ih gal te cih bang omlo in, Eite in citak takin Topa
Zeisu ii hong vaikhak te mazang takin mun khempeuh ah ih puak kim zawhna ding
ahi hi. Testimonies Vol. 5, 077:1
g. Pasian mite ahi
Israel te lakpan in Langpanna ih nial zawhna ding Teci panna in hong
khanglo sak dinga, Pawlpi sungah Pasian mi zatte a nawngkai sak satan nasepna
galte pan in hong ki hem khia thei sak ding hi. Testimonies Vol. 3, 324:1
Pasian in akicing
mahmah dingin ih lungsim sungah amah ih up theihna ding leh ih tel theihna ding
in hong lak khin zo hi. Pasian ii ngimna tel taktak lo in ih om teh ih upnate
hong neu in, tel loh upmawh thu hong tam ciangin dotna hong om hi. tua tak
ciangin Pasian ih upna taktak ih khahsuah ta hi.
Testimonies Vol. 4,
232:1; 5, 675:3.
Pasian deihna
bangin om hing kici lel in, Nang hoihsak bang , na lungsim a hong suak bang
lela na om pen na lungnop lel leh thukhenna na thuak ding hi. Bang hang hiam
cih leh vantung pan in khuvak hong ki pia pen na nialna hang ahi hi.
Testimonies Vol. 5, 688:1
Pasian mite in
Tecipanna a upna uh thanem sak ding pen Satan nasep ahi hi. A upna uh thanem
sak bek hilo in amau te in Lai Siangtho ih upna guipi, ih dinmun te Lai
Siangtho tawh ki tuak lo hi cih lungka sak a, a tawpna ah a puk ding ahi ta uh
hi. Teci panna a um ngeisate in um nawnlo a hong nusiat ciangin, amaute pen tua
ciang bek tawh khawl lo in a lang pan hilhel dong uh Satan in hanciam thuah lai
hi. Amau’ khialhnate gen ngama, amau’ mawhnate a taai ngamte, amaute in hong mu
dah mahmah uh hi. Tecipanna a kilang in niala, uplahna a nei teitei te bek a lauhuai
na munah a om uh hilo hi. khuavak a awlmawh lohna in nialna ahi hi. Teci panna
te na muanna hong bei leh Lai Siangtho thumaan pan a pial ding na hi ta hi.
Testimonies Vol. 4, 211:1.
Part II
Tulai tak mihing te
dinmun piancil lai bangin Pasian tawh ki maitang hona aom loh hangin, Pasian in
mawk nusiat lo in, Kha Siangtho tawh mite hopih hi. Tua ahih manin Paul in zong
“Pasian piaktuam khuavak ngahna in Khrist nungzuite hamphat tuamna ahi hi. Heb.
10:32, 6:4. Khrist van akah madeuh in zong a nungzui te kiangah Kha Siangtho
apai sak ding kam ciam hi. John 14:16,26. Hih kamciam pen bangci bangin hong
tangtung ding cih zong Paul in 1 Cor. 12, Eph. 4:8-13, Matt. 28:20 ah na gen
hi. Tua bek thamlo in geenkholhna (Kamsanna kha) tampi takin hun nunung cianga
Kha Siangtho kibuah khiat dan ding leh Jesu hong pai ding hun cianga, Pasian
pawlpi in Jesu teci panna a neih dan ding zong kician takin geen hi.
Jesu teci
panna ih cih in hih geenkholhna (Kamsanna kha) thu te ahi hi. Act. 2:17-20, 39,
1 Cor. 1:7, Rev. 12:17, 19:10. Hih na te tungtawn in Pasian in apawlpi it in, a
Kha Siangtho pen a mite lam hilh ding, hehnem ding, makaih ding in hong om sak
hi. Lai Siangtho sungah Kha Siangtho in hong makaih dan a tuamtuam oma tua te
lak ah nih in Mangmuhna leh Mangmatna (vision & dreams) ahi hi.
“Ka thu ngai un:
Note lakah kamsaang khat peuh na om uh leh, Keimah na Topa un Kei mah leh Kei
mah mangmuhna pan ahi zongin, mangmatna pan ahi zongin ka hong ki lak ding hi”
a ci hi. Number 12:6. Pasian in A Tapa leh a vantung mite tung tawnin mihing te
tawh kizopna nei lailai hi. Enoch in zong Jesu nihvei hong pai kikna dong na mu
khol hi. Jude 14. Kha Siangtho hilh bangin misiangtho ten thu geen khia uh hi.
2 Peter 1:21. Khrist hun tak teh John in Kha Siangtho tawh kidim in hilh
kholhna te a geen hi. Luke 1:67. Kapa in kei min a hong paisak ding pen in note
na khempeuh a hong hilh ding hi. John 14:26. Kha Siangtho lamlahna in Khrist
nungzuite apai khialh lohna ding in kidaalna lum ahi hi. Acts. 20:29,30.
Hih Kha Siangtho
letsong hun nunungah omkik ding hi ci in Mangmuhna 12:17 ah ki mu thei hi. Nu
mei leh a suan cih teh Pawlpi leh pawlpi mite limla hi a, A om sun a suante cih
teh hun nunung Jesu hong pai hun a Pawlpi te cih nopna ahi hi. Hih pawlpi mite
in “Pasian thukhamte zui-in, Jesu tecipanna a nei uh hi.”Jesu teci panna cih in
Mang 19:10 ah “Geenkholhna (Kamsanna Kha) thute hi,”na ci a, tua ahih manin Kha
Siangtho letsongte lakah geenkholhna letsong zongh khat ahi hi.
1 Cor. 12:7,11 ah
Pawlpi mite lakah mi khat bekin hih letsongte lakah khat aneih bek leh zongh
tua pawlpi in hih Kha Siangtho letsong anei hi kici thei hi. Tua bangmah in
tu-in Jesu teci panna ahih kei leh geenkholhna (Kamsanna Kha) letsong nei hi
ci-in upna aom hi.
Hun Bei kuan
ciangin Pasian in Ka kha ka sung ding hi ci hi. (Joel 2:28, Sawltak 2:17).
Pasian mite in a taklam ah aki hei uh ciangin ahi zongin, a veilamah a ki hei
uh ciangin ahih zongin “Hih pen lampi hi, hi tawn un,” cihna aw a za ding uh hi,
(Isaiah 30:21) na ci hi. Hih thu pen dawi mangpa in zong thei ahih manin Kha
maanlo nasepna tawh Pasian mite do pah hi. Matt. 24:11. Tu hun lai takin
mikhempeuh in na lamdang bawlna khempeuh pen Pasian’ kiangpan sa kha pahpah uh
hi. Mang. 16:14 ah Dawite in zong nalamdang a bawl ding thute zong Lai Siangtho
tungtawnin ih thei thei hi.
Tua ahih manin
Pasian kiang pana hong pai Kha hiam? hilo hiam cih sittel un ci in 1John 4:1 ah
limtak in hong hilh cian zo hi. Tua ahih manin ei te in Pasian kamsang te ih
nial ciangin Pasian lamlahna a deihlo Satan’ mi ki suaka, Satan kiangpana hong
pai kamsang zuau te thu ih up leuleu ciangin, Satan nung a zui ih hi zel hi.
Tua ahih manin Paul in Thesalonika pawlpi te kiangah genkholhna te na simmawh
bawlkei unla, zong nial kei un. Ahi zongin Kamsangte thugen te Lai Siangtho
tawh sittel in, Thumaan thutak Pasian kiangpan ahih leh zui un ci in na hilh
hi; Thesalonika masa 5:20,21. Akhatna ah sittel ding hia, Anihna ah Pasian
kiangpan ahih leh zuih ding san ding ahi hi. Israel mite in Pasian Kamsang te
tungtawn in Pasian makaihna te anial uh ciangin gimna tuak uh hi. Pasian
kamsangte thu aman uh ciangin na daupai in na lawhcinig uh hi. Tua ahih manin
Matt. 7:16 ah Amau te a gahin na en un, ci in Topa Zeisu in hong hilh hi.
Christ lamlahna
Tecipanna
Portland, Maine ah
December 1844 kum iin Methodist nungakno pawlkhat in khukdin in thungen uha,
kum 17 apha adamlo nungakno Ellen Harmon in a masa pen a mangmuhna hong ngah
hi. Ellen pen Pasian nasem James White tawh hong kiten ciangin Ellen White kici
hi. Ama tungah Pasian in a lah bangin hong septoh ciangin, asih 1915 kum dong
ma-ang te leh mangmuhna te kum 70 sungbang hong ngah tosuak hi.
Laisiangtho sunga
amaan kamsangte mah bangin, a mangmuh laitakin akitheitham alamdang Ellen White
ii pumpi tungah tung hi. Kamsang Daniel mah bangin, a mangmuh laitak naak hetlo
iin khat veivei thazawm iin om hi (Daniel 10:8, 17). Pawlkhat a mangmuh te nai
4 bang sawt a, a tua sungbup naak hetlo hi. Siavuante in zong a mangmuh
laitakin ahi takpi ahihna va sit ngiat uh hi.
Adang hun te ciang,
alamdang thahatna kipia hi (Daniel 10:18, 19). Amah pen pounds 95 bek pha
hinapi a mangmuh laitakin pounds 17 agik innkuan Laisiangtho bu akhut zan iin
minit 30 sung atawi, ateci te in mu uh hi. Hih te leh adang akitheitham pumpi
tunga nalamdang cih te pen kamsangte tuahkhak ahi hi. Bangbang ahi zongin, hih
alamdang te in Pasian kiang pan maw Satan kiang pan cih hong gen lo uh hi.
Kamsanna silpiak ngah ci a nalamdang khat hong om ciangin, Christian te in amaan
hiam ci-in Laisiangtho tawh sit pelmawh ding ahi hi.
Sittelna
masa—Laisiangtho tawh Kituak
Ellen. G.White ii
mangmuh dan leh Daniel ii mangmuh dan ki bang lian ahih manin, Ellen G. White
pen L.S.Tho tawh ki tuak hi. Ellen White laibu te khat peuh sim lecin
Laisiangtho ah hong puak ahihna leh Laisiangtho tawh kituak sitset ahihna na
mukhia ding hi. Ahi zongin, Laisiangtho behlap nadinga agelh hilo hi. A laigelh
te in Pasian’ mite lungsim Laisiangtho ah puak ding leh thumaanna naak ahi
Laisiangtho ah ciahkik nadinga sapna ahi hi. Phawk lai dingah Ellen White in
upna zungpi pen Laisiangtho bek hi cih bulphuh hi: “Tu ei khanghun iin mite a
upna (doctrines) uh leh a sanna (precepts) te uh pan gamlapi pial khinta a,
Protestant te thumungpi ahi—Laisiangtho, upna zungpi leh vaipuak ahi
Laisiangtho bek mah ah ciahkik ding kisam hi.”
Hih zong gelh lai
hi: “A kigelh tecipanna te in khuavak thak hong pia hilo a, hong kilaksa hu
kimuam thumaan thutak te ih lung sungah khauhtak-a hong tawsawn hizaw hi.
Mihing te in Pasian tung leh a midang pih te tungah bang vaipuak nei cih
Pasian’ Kammal in limtakin hong lak hi; himah taleh note tawmcik bek in hong
kipia khuavak thu na mang uh hi. Thumaan thutak hong kiguan beh hilo hi. Ahih
hangin Pasian in Tecipannate tungtawnin hong piaksa athuthuk thumaan thutak te
hong telnopsak iin leh Ama teltuam lampi tungtawn iin hih thu te miteng tungah
hong puak a, kuamah apeng theilo dingin hih thu te tawh lungsim te hong
tawsawnin hong phawng hi.
Ellen White in ama
laigelh te Laisiangtho zahin na ngaihsun peuhmah kei un acih hangin, a laigelh
te Khasiangtho humuap mah ahi hi. Pasian’ kamsang lianpipi—Elijah, Elisha, leh
Tuiphum John—te Khasiangtho humuap himah taleh uh Laisiangtho bu khat zong gelh
lo uh hi. Ellen White laigelh te pen alianzaw khuavak, Laisiangtho, ah hong
puak aneuzaw khuavak kici thei kha ding hi. A laigelh te in Laisiangtho deihna
hong telkheh hu kimuam hi a, Laisiangtho mah a bulpi thunei pen hi veve hi.
(gentehna : Rev 22:1-3) sim suk leng, Jerusalem khuapi lai zang ah nuntak na
guntui luang in, tua guntui lang tuak ah nuntak na singkung po hi cih pen,
Kamsangnu E.G.White in hi bang in na gen hi; Tua singkung pi ii a zung 2 in gun
kal kak in gun Lang tuak ah po in, a tung lam pan kung khat in ki zom kik hi na
ci hi. Tua ban ah gen kholhna thu (Prophesy) te ah athuk zaw leh à zai zaw in
hong hilh cian hi.
Sittelna
Nihna—Zeisu thu Thumaan Thutak Hilh
Ellen White
laibu—The Desire of Ages, Christ’s Object Lessons, Khazih kiang Zuatna, leh
Thoughts from the Mount of Blessing—hih te in sittelna tawh kituak hi ci-a teci
te ahi uh hi. Hih laibu te ah ama thu agelhna om hetlo-in midangte Zeisu
mitsuansak den hi.
Sittelna
Thumna—Pasian Deihna banga Nuntaakna
Laihawm (The press)
te in Ellen White sihna thu ah hibangin gen uh hi: “Mrs. White nuntaakna in mi
khempeuh adingin etteh taakcing hi. Kiniamkhiat-a Zeisu nungzui muanhuai leh na
hoih asem tawntung khat ahi hi. Numei gina khempeuh in a pahtawi uh leh a
zahtaak uh hi a, angsungkhol lo-in mite lamto-a mikim phattuamna dinga nasem hi.
Ama sihna in Pasian thu a ngaihsun makai leh kum sawmkua sung phial nasep hoih
semkhia a, kamkhum pau iin, mikim ading nakpi thu a ngetsak nu ahihna phawk
ding leh ciapteh dingin om hi.” Zeisu teci panna leh Pasian’ thukham 10 te tawh
ki leh builh in thu gen, gamta lo hi. Isaiah 8:20. Ellen.G.White in 2000 vei
bang a mangmuhna ah, a khat vei na pen Pasian’ thukham 10 lak ah a 4 na pen ni’
suum bang in tang pem pam ci hi. Sabbath thumaan na ki lak masa pen hi. Hih
amangmuh laitak in, amah S.D.A hi nailo in, Methodish sungah omlai hi. Tua lo a
dang dang tampi om in a theih beh nuam ten Ellen.G.White ii Biography laibu
ngah in sim sawm tek ni. A ma nuntak zia in L.S.Tho sung a, Kha Siangtho gah a
gen te tawh ki leh builh lo hi Galati 5:22,23
Sittelna Lina—Genkholhnate
Maan
Mailam thupiang
ding Ellen White genkholh pawlkhat olno takin santheih dingin om hi. Anuai-a ih
gen ding genkholnate tuzingsang-a laihawmthak (newspaper) bangin a kisim
hangin, khualzin gamvak kikawmna ding vante akibawl mapek-in agelh khitsa hi.
“Thakhatthu-a kikawmna pan tuahsiatna hong khang semsem dinga, buaina, lamkal
ah tuahsiatna, khualzinna lam lianpipi te ah theihkholh loh sihna hong piang
ding hi.” A gen kholh thu khempeuh 100 ah 100 man hi.
Kamsang zuau leh a
maan pen a hun ngak in sit tel kul hi. Ellen.G.White pen Mangmuhna leh Kamsanna
hong neih lai tak in, Methodist pawlpi sunga aom lai tak hi in, S.D.A Pawlpi in
ki sang pah lo in kum 10 sung a hunla in, ki sit tel phot hi. Pasian’ bawlsa
Aksi thu a gen na te ah, Aksi lam pilna anei ten a nung muh teh Ellen G. White
pen Kamsang maan hi ci-in, teci pang uh hi.
Siavuante in
zatepna in tuap hoihsak hi acih hunlai un Ellen White a khangkhia hi. Zatui lam
tuamtuam athei aom hangin, science tawh lahna taktak om nai lo hi. Cidamna ding
ante a kithei nailo science ahih hunlai te-in Ellen White in cidamna ding neek
leh dawn tawh kisai (nutrition) thu te tampi na gelh khin hi. Cornell
University a cidamna lam professor a hingei Dr. Clive McCay in hibangin gen hi:
“science lam te-in cidamna ding thu (nutrition) a muhkhiat mapek un Mrs. White
in ahang leh athu teng agelh khitsa hi a, ama laigelhte sangin a hoihzaw tuni
dongin khat beek omlo hi.”
Laisiangtho in ni
tawpni ciangin kamsanna silpiak om ding hi ci-in hong genkhol hi. Laisiangtho
in kamsang maan hibang hiding hi ci-a agen banglian-in kituak kim hicih kimu
thei hi. Ama laigelhte abu nei-a na sim ding leh Laisiangtho hong thupiak zong
zuih ding in kong hanthawn nuam uh hi, “genkholhna thute na simmawhbawl kei un.
Na khempeuh sittel un. A hoihte kiplet un.” Thessalonians Masa 5:20, 21. TOPA
note Pasian muang un, na dingkip ding uh hi; ama kamsangte muang un, na gualzo
ding uh hi, 2 Khang 20:20. Pasian in akamsangte tungah hilh khol lo pi in bang
mah asem kei hi. Amos 3:7
__________
1 The Great
Controversy (Mountain View, CA: Pacific Press, 1950), p. 204, 205.
2 Testimonies for
the Church (Mountain View, CA: Pacific Press, 1949), Vol. 2, p. 605.
3 Star (St. Helena,
California), July 23, 1915.
4 Messages to Young
People (Washington, DC: Review and Herald, 1930), p. 90 (reprinted from article
in The Signs of the Times, April 21, 1890).
5 Clive M. McCay,
“A Nutritional Authority Discusses Mrs. E.G. White,” Review and Herald,
February 26, 1959, p. 10.
