MUC

Print Friendly and PDF

Sunday, March 20, 2016

Sabbath School Lesson 9 | Nate Biakna leh Christ Honghilh Thute


LESSON 9  | MAY 21 – 27   NATE BIAKNA LE KHRIH’ HONG HILH THUTE

TU KAAL SUNG SIM DING: Thsia. 9: 10; Matt. 18: 1-4, 21 – 35; 19: 16

– 30; Gal. 3: 21, 22.


KAMNGAH:“ Tua hun laitakin Jesu kiangah nungzuite va pai uh a, “ vantung gamah kua lian pen ahi hiam? ci-in a dong uh hi. Matthew 18: 1.


Mihing in kiimlepaam, ngei-na cihte tawh a khangkhia khawm i hi hi. Tua hi-in manpha i sak, i lungsim puakzia le i zuih thu cihte hong omto hi. Khuapi sung pan a khangkhia taleng, khuata pan a khang khia hi taleng, kiim le paam cih pen a thupi mahmah hi; i nunzia hong zuun hi. I nuntak bup hong huzaap hi. Ahi zongin kiim le paam, ngei-na kim khat pen Pasian’ thu tawh kilehbulh hi. Hih leitung pen mawhna dim leitung ahih mah bangin kicing, hoihkim cih om thei lo hi. Pasian Gam sung nunzia ding, a deihhuai cihte hong hilh hi. Vantung in manpha hi, ci-in a hong piak le leitung in manpha hi, ci-in a ngaihsutte kilamdang hi.

SUNDAY  MAY  22

KINIANKHIATNA IN LIATNA

A lian nuam lo kua om ding hiam? Na lianpi sem nuam lo kua om ding hiam? Hih bangte in kiliatsakna, kiphatsakna hi pah lo hi. Na sepna khat peuh hanciamin nasiam theih penin nasep ahih nak leh tua pen kiliatsakna hi lo hi. Thuhilhsia 9: 10. “ Liatna” pen a kitel khial mahmah thu hi. Pasian in ama mai-ah milianin a ngaihsutte mihingte’ ngaihsut tawh kibang khol lo hi.



Matt. 18: 1- 4 sim in.  Koi bangin Zeisu in liatna taktak hong hilh hiam? Koi bangin tua thu nuntakpih ding na hiam?

______________________________________________________________________

______________________________________________________________________

Zeisu in liatna taktak a hong hilhcian nadingin naupangno khat Ama kiangah sam hi. “ Hih naupang bangin a kiniamkhiatte in vantung gamah a lian pen hi ding hi,” ci-in hilh hi (Aneu 4). Zeisu in a minthang thuhilhsia, mi minthang khat pen liatna taktakin ngaihsun lo hi. Pasian’ mai-ah milian taktakte in a kimu thei liatna hi lo-in lungsim le nunzia hi zaw hi. Leitung mite in milianin a ngaihsut mi khat Zeisun in milianin ciamteh pah lo hi. Milian a suak nuam khat in naupang khat bangin kiniamkhiat leh, liatna taktak ngah ding hi. Leitung nunzia in hong vukcip khin ahih manin naupang bangin kiniamkhiat cih pen telhak i sa hi.

Naupang bangin kiniamkhiat cih in bang deihna nei hiam? A thumang mi khat in ama deihna sangin Pasian’ deihna masak zaw hi. Adam le Eve in Pasian tungah ki-ap, Ama’ kammal zui, Ama mai-ah kiniamkhiat uh hi leh, Pasian’ thupiak palsat lo ding uh hi. Nuntakna singkung le thutheihna singkung in Eden huanlaizangah a nihin po hi. Vei le tak a om bangin sihna le hinna in om gige hi. Tuate geel kikaal ah kiniamkhiatna in kilamdangsak hi.

Lai Siangtho tawh kituak lo ngaihsutna, ngei-na na nuntakpih lai veve hiam?

MONDAY MAY 23

MAWHMAISAK A THUPITNA


Mawhna hangin Pasian tawh kizopna, mi tawh kizopna kisia hi. Thu-um mite lak dongah buai-na hong lut hi. Adam in ama mawhna Eve ngawhin, tua akipan tu dong gimna i thuak hi (Pian. 3: 12).

Matt. 18: 15 – 35 sim in. Zeisu in bang gen hiam? Bang hangin a hong hilh bangin nungta lo i hiam?

________________________________________________________________________

________________________________________________________________________

Mi khat ii mawhna kipulaak hamsa i sa kei hi. Mi khat a khialh leh pai-in a khialhna va hilh ding sangin ama hoih lohnate i pulaak nuamse hi. Zeisu in, “mi khat in na tungah hong khialh le amah tawh na kilemkik nading hanciam in” ci-in hong sawl hi. Na thuhilh a hong man nop tuan kei leh sep zia ding Zeisu in hong hilh hi.

“ Note khat le nih keima min tawh na tutkhop uh leh note lakah ka hong om ding hi” (Matt. 18: 20). Hih thu in kikhalhna le kizopkikna tawh kisai thu hong hilh hi. Kha Siangtho in tua bang puahphat nasepnate panpih hi. Hih bang puahphat nasep in hotkhiat nasep hi. Kiniamkhiatin, mi mawhmaisakna panin kipuahphatna piang thei pan hi. Liatna man taktak a neite in tua bangin nungta uh hi.

Matt. 18: 21 – 35 sim in. Zeisu in a thupi mahmah bang thu pulaak hiam?

______________________________________________________________

______________________________________________________________

Zeisu in mi khat ii mawhna ‘sawm sagih mun sawm sagih vei’ na maisak un, ci-in hong sawl hi. Mi khat in na tungah hong khialh leh tatsat lo-in ama mawhna maisak ding cihna hi. Ei mawhna zong mawhmai ding ngen tawntung ding kisam hi. Tatkhiatna i cih in mawhmaisakna thu ahi hi (Pai. 32: 32; Sawl. 5: 31; Kol. 1: 14). Pa Pasian in i mawhna a hong maisak mah bangin mite’ mawhna i maisak kei leh, Topa’ thukhenna i thuak ding hi.

Bang hangin Singlamteh siksanin mawhmaisak ding thupi mahmah hiam? Pa Pasian in na mawhna maisak ahih leh, nang zong mite’ mawhna khempeuh na maisak ding hi lo hiam?


TUESDAY MAY 24

A KIMU THEI LO MILIM BIAKNA

Matt. 19: 16 – 30 sim in. Koi bangin na tel hiam? Bang thumanpha nuntakpih ding na hiam?

_____________________________________________________________________

_____________________________________________________________________

Hih mipa’ thu tam i thei kei hi. Ahi zongin amah peh sumhau, ukna nei banah Pasian’ thukham a zui mahmah mi khatin a kingaihsun khangno khat hi (Lk. 18: 18). Ahi zongin a nuntakna ah a kisam khat om lai hi, cih phawk thei hi. Martin Luther pen phunggi khat hi-in, a thuzuihna ah citakin a zui mi khat hi napi, a nuntakna a hawmpi ahihlam kiphawk hi. Lungkim thei lo hi. Tatkhiat mi ahih lam kitel lo hi. Gamtatna in Pasian tawh hong kinaisak thei tuan lo hi, cih mukhia hi. “ Hih mipa in amah le amah dikkisa tawm hi. Kitangsap bangmah nei nawn lo-in kingaihsun hi. Tua pimah lungkim zo lo hi. A kitangsap khat om lai hi, cih bel phawk hi. Zeisu in naupangte thupha piak bangin hih mipa zong thupha pia thei hi. Ellen G. White, The Desire of Ages, 518.

Matt. 19: 17 ah “tawntung nuntakna sungah na lut nop leh, thukham zui in,” ci-in kigelh hi. Hih mun bek siksanin a neite in “ Zeisu in gamtatna hoih tawh hotkhiatna kingah hi,” ci-in ngaihsun uh hi. Ahi zongin Lai Siangtho tua bangin hong hilh lo hi. Thukham in hong hon thei lo hi. Thukham in hotkhiatna lampi hong lak hi bek hi (Rom. 3: 28; 7:7; Gal. 3: 21). A taktakin Zeisu in a hong hilh thu in thukham a zui mi khat in hotkhiatna kisam, Honpa kisam ahih lam a phawk thei dingin hong hilh zaw hi. Thukham zuihna tawh hotkhiatna kingah ding hi leh, Zeisu hong sih kul lo ding hi. Hotkhiatna in i nuntakzia hong khel kul hi. Pa Pasian tawh kizopna a daltan thei na khempeuh hepkhiat ding kisam hi. Mihau pa in ama neih le lamhte iplahin Khrih Honpa nungzui ding nial hi. Sum le paai, neih le lamhte pasianin ngaihsun hi. Sumhaute vantung nopna sunga lut ding haksa sa mahmah uh hi (Lk. 19: 1 – 10).

Sumhaupa’ dinmunah om dingin kingaihsun in. Zeisu kiang kiciinna na ngah nadingin bang sem ding ka hiam? ci-in dong hi lecin Khrih in bang hong dawng ding hiam?


WEDNESDAYMAY 25

BANG NGAH DING I HIAM?


Sumhaupa le Zeisu kiho khit teh bang thu om hiam? Peter in Zeisu kiangah “ Kote in na khempeuh nusia-in na nung hong zui ka hih manin kote in bang ngah ding ka hi uh hiam? ci-in dong hi (Matt. 19: 27). Kamciam piak kiciamteh lo hi. Sumhaupa hi taleh, nungzuite hi taleh, a vekun Topa taisan uh hi. Khrih’ nungzui mi khat suah ding hamsa mahmah hi, cih hong hilh hi. Nuntak hamsa sa lo kua om ding hiam? Nuntak nuam a sa mahmahte in zong hamsat a sak hun uh om hi lo hiam? Nuntak i cih pen haksatna vive hi. Nuam i sak hun om phial taleh siatna tuah kha pah zel hi lo i hiam? Peter’ thudot pen thutak hi. Zeisu a zui khempeuh in Ama kiang pa lamet bang nei uh hiam?



Koi bangin Zeisu in Peter’ thudot dawng kik hiam? Matt. 19:28 – 20: 16.

_________________________________________________________________________

_________________________________________________________________________


Peter in lungulh le lamet khat nei hi. Tuate hangin Zeisu in Peter han lo hi. Zeisu in nasemte gentehna tawh Peter’ thudot dawngkik hi. Zeisu nungzui khempeuh in Ama hong kamciam khempeuh ngah ding uh hi.
  
Mi khat in Zeisu ka zuih manin bang ngah ding ka hiam ci-in hong dong leh, bang na dawng diam?


THURSDAYMAY 26

“ KOTE IN KA HI ZO UH HI”


Matt. 20: 20 – 27; Mk. 10: 35 sim in. Jerusalem khua manawhin a paikhiat madeuh, James le Johnte’ nu in Zeisu kiangah, “Pasian Gam ah James le John in Zeisu’ vei le takah dinmun a ngah nading, a ngetna thu hi. Tua dinmunah om dingin amaute kiging takpi mah uh hiam?

________________________________________________________________________

________________________________________________________________________


James le Johnte unau pen lungtom mahmah mi-in kiciamteh hi. Hotkhiatna a gen ding uh sangin amau ngah ding bek buaipih uh hi. Nungzuih tawh kisai Peter’ thudot pen Zeisu in hih bangin dawng hi. “ Nong na nget uh bang hiam cih na thei kei uh hi. A sawtlo a ka dawn ding hai dawn zo ding na hi uh hiam? Ka kibaptize na ah kibaptize zo ding na hi uh hiam? a cih ciangin amaute in, “ Hi zo mah nung,” a ci uh hi (Matt. 20: 22). Zeisu’ ngah ding vangliatna a ngah nadingun Ama thuak ding gimna le sihna zong a thuak ding uh kisam hi. Ahi zongin tua dingin amaute kiging lo pimah “ hi thei mah nung’ ci-in dawng uh hi. Tua bang a cih uh hangin amaute in Zeisu’hilhkholh thute telzo lo cih kilang hi. Zeisu nung a zui mi in kipiakkhiatna lo-in nungzui mi taktak hi zo lo hi. Zeisu mahmah in zong Peter kiangah Khrih a zuihna hangin kithahna thuak ding hi, ci-in genkhol hi (Jn. 21: 18, 19).

Khrih nung a zuih manin sihna thuak mi tampi om hi. Gimna, hamsatna na thuak kei leh, Khrih nung a zui taktak mah na hiam, ci-in kisittel in. Na ngah ding hamphatna ngaihsun lecin na thuakna in gentham lo hi. Khrih na zuihna ah bang na taanlawh hiam?

FRIDAY MAY 27

SINBEH DING: Piansak nate in a zuih uh ngei-na khat nei hi. Kiim le paam nate’ pianzia tungtawnin mihing in a gamtatzia ding theithei hi. Piansak nate pen Lai Siangtho nihna hi, kici phial hi. Mite in piansak nate tung panin Pasian tawh kisai thumanpha tampi kithei thei hi (Rom. 1: 18 – 32). Ahi zongin mawhna tawh kidim leitung hi, cih mangngilh loh ding kisam hi. Tua hi-in nate tung panin zong a hoih thute kingah kha thei hi. Gentehna-in Greek mipil Aristotle in sila a om ding mah hi. Mihing namnih, to le sila ci-in nam nihin khen hi. Sila-te pen mihing taktakin ngaihsun lo hi. Hih bang thu a kipan kiim le paam pan i ngah thu pawl khat pen Lai Siangtho tawh kituak lo hi. Tua hi-in koikoi-ah i om zongin Lai Siangtho mah siksan tanghtangh ding kisam mahmah hi. Lai Siangtho bek mah kimakaihsak in. Lai Siangtho sim loh muanhuai dang om lo hi.

KIKUP DING DOTNATE:

1.                I innkuanpihte a kipan mi khat peuh i tungah hong khial kha-te’ mawhna mai sak dingin Zeisu in hong hilh hi. Na tungah hong khial kha-te ngaihsun in. Mawhmai-sak ding vangik bangin na lelh hangin koi bangin na tungah hong mawh, hong khialte’ mawhna maisak ding na hiam?

2.                Sunday ni i kikup, Lai Siangtho tawh kituak lo kiim le paam mite in manpha a sak uh thute ngaihsun in. Koi bangin Lai Siangtho tawh kituak lo-te zozo ding na hiam?

3.                A lian taktak mite pen naupang bangin kiniamkhiat uh hi, cih thu ngaihsun kik in. A deihna in bang hiam?

4.                Pasian’ thukham sawmte i zui hi. Thukham zuihna kicing lo ahihzia sumhau mipa le Zeisu kihona in hong hilh hi. Tua ahih leh Thukham zuihna in bang huamto lai hi ding hiam? 

To get the latest update of me and my works

>> <<