MUC

Print Friendly and PDF

Sunday, March 20, 2016

Sabbath School Lesson 8 | Peter leh Suangpi



LESSON 8  MAY 14 – 20       PETER LE SUANGPI


SABBATH NITAK


TU KAAL SUNG SIM DING: Gal. 4: 4; Heb. 7: 26; Matt. 16: 13 – 27; 17: 1 -9; Eph. 2: 20.


KAMNGAH: “ Amah in amaute kiangah, “ Tua ahih leh note in kei kua hi nong ci uh hiam?” a ci hi. Matthew 16: 15.

“ Tua hun a kipan Zeisu in Jerusalem khuapi ah pai-in makaite, siampi uliante le thukhamhilh siate tung panin gimna tampi a thuak nadingte le tua mite in amah thatin a nithum ni ciangin a kithawhkiksak nading thute a nungzuite’ kiangah a sianggen hi.” Matt. 16: 21. Lai Siangtho in Zeisu si pelmawh ding hi, ci-in gen hi. A sih hun naita ahih manin Zeisu in hih bangin thungen hi: “Tu-in ka lunggim hi. Bang cih ding ka hi hiam? Pa aw, hih hun panin hong honkhia in,’ ci ding ka hiam? Ahi zongin hih mah a thuak dinga hong pai ka hi hi. (Jn. 12: 27).


Tapa in sihna thuakin a mite tankhia ding hi, cih pen na khempeuh a kipiansakma-in Pa Pasian in a geelkholhsa ahi hi (Titus 1: 2; 2Tim. 1:9). Gimna thuakin si-in tua khit ni thum khit ciangin tho kik ding ci-in om hithiat lo-in, a thuak ding gimna le sihnate hangin lunggim mahmah hi. Pasian in vanglianin, a thupiakte zong siangtho-in, deihtel theihna hong guan hi. Mawhna sung pan a hong honkhia thei ding Amah bek mah ahi hi. Tu kaal sungin Peter le koi bangin Peter in Zeisu nasep huh cihte i kikum ding hi.

SUNDAYMAY  15

“NANG IN ZEISU KHAZIH NA HI HI

Zeisu in nasep a kipat a kipan Peter tawh kithuah hi. Zeisu in natna damsak, dawiveite damsak, mi honpite anvak, thuhilh, huihpi daisak, misi thosak, tui tungah lampai cihte, Peter in cikmah hun a muh ngei loh nate mu-in, cikmah hunin a zak ngei loh thute a zak khit teh bang a ngaihsun diam? Bang hangin thongkia John honkhia lo ahi tam? Bang bang hita leh, Zeisu pen mihingin hong nungta Pasian hi. Amah tawh anne khawm tuidawm khawm, a kithuah khawm nungzuite in a tuah khak uh thute in manpha mahmah hi.


Matt. 16: 13 – 17 sim in. Zeisu in a’ nungzuite bang thu dong a, Peter’ dawn kikna in bang manphatna nei hiam? Bang hangin tua dawnna in thupi mahmah hiam?

__________________________________________________________________

__________________________________________________________________

Peter in Zeisu’ thudot a dawnkikna, “Nang in, Khrih, a nungta Pasian Tapa na hi hi” cih thu Lai Siangtho’ thupaipi khat ahi hi. Peter in ‘Khrih’ ‘Sathau kinilhpa’ ‘Messiah’ ‘kamsangte’ genkholh a tangtunna, Pasian in Abraham le Israelte tawh a thuciam a tangtunna hi, ci-in pulaak hi (Gal. 3: 16).

Caesarea Phillipi khua in Gentile-te’ tenna gam hi-in, hih munah Peter in Zeisu in Khrih na hi hi, ci hi. Peter in tua bangin a pulaak madeuhin Zeisu in Jew mite bek hi lo Gentile mite zong a itna mu hi. Kha Siangtho’ makaihna tawh Peter in Zeisu pen Jew mite’ kamsang hi bek lo-in, Tuiphum John, Elijah, Jeremiah cihte’ gen Mipa hi, cih theitel hi. Ama sungah mi khempeuh huam khin ahih manin Zeisu in amah le amah Mihing Tapa kici hi. Mihingte’ dinmun ah a hong kiniamkhiatna kilang hi. Lai Siangtho in hong hilh mah bangin Peter in, Zeisu in mi khempeuh a’ ding a nasep ding nate a theih ding tampi om hi.

Midangte’ tungah na pulaak ding Zeisu in na nuntakna ah bang sem hiam? Bang hangin tua bang thute pulaak ding kisam hiam?

MONDAYMAY 16

“ HIH SUANG TUNGAH”


Hangsan takin Peter in Zeisu kiangah, “Nang in, Khrih na hi hi,” ci-in a pulaak khit ciangin, Zeisu in Peter tungah gen khat nei hi.

Matt. 16: 17 – 20 sim in. Zeisu in Peter tungah bang gen hiam? Koi bangin tua thu in bang khiatna nei hi, ci-in na telthei hiam?

_________________________________________________________________________

_________________________________________________________________________

“ Hih suang tungah” cih thu in thu-um mite sungah a kibuaipih mahmah thu khat hi. Catholic thu-um mite in tua suangin Peter hi; “Peter in a masa penpen pope hi pah hi,” ci uh hi. Catholic thu-um mi hi lote in, “tua suang in Peter hi lo hi,” ci uh hi. Lai Siangtho ah tua suang in Peter hi lo-in, Zeisu mah hi, cih thu kimu thei hi. Peter mahmah in zong, “tua suang in Zeisu hi,” ci hi (Sawl. 4: 8 – 12; 1Pet. 2: 4 -8). Gentehna, limciinna tuamtuamte ah suang in Khrih limcing hi-in, mihingte ahih leh thanemin, muanhuai lo hi. “Amah in eite hong kibawlzia thei a, eite leivui i hihlam a phawk hi (Late 103: 14). “ Kuamah a hon thei lo kumpitapate, a si mihingte muang kei in” (Late 146: 3). John in zong hih bangin pulaak hi: “Amah in mihing lungsim sunga omte thei khin a, mihing in mihing thu a gen ding kisam lo hi” (John 2: 25). Tua hi-in Zeisu in Peter’ lungsim thei hi (Matt. 26: 34).

Tua Suang in kua hi-in kua tungah pawlpi kiphut hiam? 1Kor. 10: 4; Matt. 7: 24, 25; Eph. 2: 20.

_________________________________________________________________________

_________________________________________________________________________

Khrih in tua bangin a pulaak kammalte ngaihsun lecin pawlpi in thanem mahmah hi. Thu-um mi tawmno khat bek hi-in, dawigilote’ nakpi do-na thuak sawnsawn hi. Ahi zongin Khrih a zui mite in bang mah kihtak ding om lo hi. Pawlpi in Suangpi Zeisu tungah kinga ahih manin bang mahin susia zo lo ding hi. Ellen G. White, The Desire of Ages, 413.

Thanemin siatna ah na puk kha zel hiam? Koi bangin Suangpi Zeisu tungah kinga tawntung ding na hiam?

TUESDAY MAY 17

PETER IN SATAN BANGIN KAMPAU

Matt. 16: 221 – 23 sim in. Bang hangin Zeisu in khauhtakpi Peter thuhilh hi ding hiam?

_______________________________________________________________

_______________________________________________________________

Peter in Zeisu a hut nop lungsim a mawhsak i hi kei hi. Peter’ khialhna taktak pen ama deih bangin Zeisu gamta ding ut hi. Tua bang hi leh Peter in Zeisu a zui hi nawn lo ding hi. Zeisu in amah a zui ding thupia suak mawk hi. Tua hangin Zeisu in “ Satan aw, ka kiang panin kihemkhia in” ci-in sawl hi (Aneu 23) Bang hang hiam cihleh sehnel gama Satan mah bangin, Peter in Khrih’ nasep dongtangsak ding kipan hi. Zeisu in Peter a hopih kawmkawmin nungzui dangte en in tua bangin Peter tai hi (Mk. 8: 33). Khrih in amaute honkhia dingin hong pai hi. Satan’ ze-etna thuak ding hi mah hi. Khrih in tua ze-etna zo lo hi leh, Peter cih pen a man mah suak ding hi. Peter in amah le amah ki-uk tawm ding banah Zeisu nangawn uk hanciam kha mawk hi. Peter in Judah tawh kilamdang tuan lo hi. Ahi zongin Judah bang lo-in Peter in a mawhna kisikin, Topa’ nungzui dingin a nunna pia-in gimthuakin, a mawhna mai hi.

Matt. 16: 24 – 27 sim in. Zeisu in “ama nuntakna a kemcing nuam mi in a nuntakna a taan ding hi. Keima hanga a nuntakna a taan mi in a nuntakna a kemcing ding hi” ci-in pulaak hi. Bang a deihna hi ding hiam?

________________________________________________________________________

________________________________________________________________________

I ut, i deih bangbangin nungta ding cih upna nei leitung mite lakah a nungta i hi hi. Ahi zongin Zeisu in tua bangin gen lo hi. I ut, i deihte cihte nial ding in Amah muang ding i hi zaw hi. Peter le nungzui dangte in upna man thei to tektek uh hi. Upna man i cih in i deih bangbang sepna i hi lo hi. Upna manin i deih thute nialin ze-etna nawktan hi. Na deih na nial ciangin nuntakna taan na hi ding hi. A taktakin nuntakna mu na hi zaw hi.

Zeisu na zuih theih nadingin bang na taan ngam hiam? A beisa na nunzia ki-sittel lecin, koi bangin tu in tua nate na ngaihsun hiam?

WEDNESDAY  MAY 18

VANTUNG PAN THAPIAKNA


Matt. 17: 1 – 9 sim in. Bang thupiang kigelh hiam? Bang hangin Zeisu le nungzuite a’ dingin thupi hiam?

________________________________________________________________________

________________________________________________________________________

Zeisu in vantungmite’ itna le Pa Pasian’ itna tawh vantungah om hi napi, Ama bawlsa leitungah Amah kia bek-in hong nungta hi. Khrih Honpa in gimna a thuak laitakin vantung pan hong kumsuk vansawltak in thaguan hi. Moses le Elijah in Khrih tawh kopin nasem uh hi. Khrih in mawhnei mite a hong tatnop mah bangin amaute in zong tatkhiatna thu tangko uh hi. Moses le Elijah in vantung tokhom panin Honpa’ thuakna mu-in amau hehpihna lungsim hangin Khrih in a thuak gimna nawktan zo hi. Moses le Elijah in leitung mite’ lametna, mi khempeuh a hong kitatkhiat nading thu mah amau kinbel thu mah ahi hi. Ellen G. White, The Desire of Ages, 422, 425.

Mihing in thanemin thapiakna kisam mite hi mah taleh, Zeisu, Pasian Tapa in mihingte’ thapiakna, hehnepna kisam cih thu in lamdang hi. Luke in hih bangin pulaak hi: “Peter le a lawmte a ihmut uh suak mahmah ahih manin a lusu uh hi. A khanlawh uh ciangin Zeisu vantang le Amah tawh a dingkhawm mi nihte a mu uh hi.” (Lk. 9: 31). Zeisu a hong sihna manin mihingte a hong kitatkhiat ding tangtung taktak hi. Tatkhiatna dingin bang dang kisam lai ding hiam? Peter, James le Johnte in van panin awging za uh hi. Hih in a upna uh kipsak ding hi. Tua banah Zeisu mahmah in amaute lawngin, lau kei un, ci-in thapia hi (Matt. 17: 7). Khrih in gimna a thuak kawm mahin nungzuite thapia veve hi.


Mi khat ki-ap mahmahin upna kip mah taleh thapiak kisam veve hi lo i hiam? Mi khat peuh thapiak kul hi, cih na phawk hiam? Tu ni-in kua tha pia ding na hiam?

THURSDAY MAY 19

ZEISU LE BIAKBUK SIAH PIAKNA


Matt. 17: 24 – 27 sim in. Bang thu piang om hiam? Tua thu piang in Zeisu tawh kisai bang pulaak hiam?

_______________________________________________________________________

_______________________________________________________________________

Jew mi khempeuh in siah piak kul hi. Ahi zongin siampite, Levi mite le rabbi-te in piak kul lo hi. Siah piak ding thu in Khrih le a nasepna zong sukha hi. Peter in Khrih in thunei ahih lam a phawk theihna ding hun hoih khahsuah hi. Khrih in siah a piak ding hi mah hi. Ahi zongin hih thu tawh kisai-in Peter in siahkai-te tungah a dawnkikna tungtawnin Khrih’ thuneihna theikhial hi, cih kilang hi. Siampite, Levite mite in siahpiak ding kimap ahih leh, Khrih in a piak ding kimap zawkan lo diam? Bang hang hiam cih leh tua biakinnpi in Ama’ biakinnpi hi. “Ka Pa’ inn hi,” ci hi. Ellen G. White, The Desire of Ages, 433, 434.

Khrih in Peter tungah lungduaitakin a dawnkikzia tungtawnin eite zong hong thuhilh hi. Zeisu in Peter maizum dingin thugen lo-in, a theihloh thu hilhcian zaw hi. Biakinn siah pia ziau thei napi, Zeisu in pia ziau lo-in, a siah piak ding, mun dang khat, ngasa sung pan lakhia hi. Hih nalamdang pen nalamdangte bang lo-in tuampha diak hi. Hih nalamdang ahih leh Zeisu in biakinn siah piak nading, Ama aa ding ngiatin a bawl hong suak hi. Ahi zongin tua dingin Zeisu in a bawl hi lo hi. Hih nalamdang in biakbuk tungah Zeisu’ thuneihna bek tham lo-in piansak na khempeuhte tungah Ama thuneihna pulaak hi zaw hi. Mihingte’ ngaihsutna panin koi bangin hih nalamdang i tel thei ding hiam? Peter mahmah in bangci bangin nga sung pan biakbuk siah piak dinga kisam zahlian sumtang kingah khia thei hiam? ci-in ngaihsun kha ding hi (Isa. 40: 13- 17).

A taktakin Zeisu le a Nungzuite in biakbuk siah piak tektek a kul hi lo hi. Ahi zongin Zeisu in makaite tawh kisel kinial a pelh nop manin siah pia hi zaw hi. Koi bangin kinial, kitot a piangsak thei thu cihtak khol lote pelh ding na hiam?

FRIDAY MAY 20

SINBEH DING: Zeisu in Peter kiangah biakbuk siah piak nadingin a kisam zah lian sumtang ngasa sung pan lakhia dingin sawla, Zeisu gen bang lian mahin sumtang mu takpi hi. Hih thu in a lamdang mahmah thu khat hi. Mi khat in hih nalamdang um lo uh hi; a kipuak tawm tangthu-in ngaihsun uh hi. Hih nalamdang in cina damsakna, mittaw-te khuamuhsakna, gilkialte anvakna, misi-te thosak cihte tawh kibanglo, tuam diak mah hi. Tuitungah heitang laam (2Kum. 6: 2 -7); leikawt tungah tuumul kawt lo, tuumul kawtin lei kawt lo cihte (Thukhente 6: 36 – 40) lamdang mah hi. Bang hangin Zeisu in sum kisam zah Peter pia ziau lo hi ding hiam? Lai Siangtho in bang hang cih hong hilh lo hi. Ahi zongin Pasian in na khempeuh tungah vangliatna nei hi, cih hong hilh hi. Na khempeuh in Pasian’ vangliatna pulaak hi lo hiam? I nuntakna mahmah zong Pasian’ vangliat a kilatna hi lo hiam? Pasian a’ dingin a hamsa khat beek om lo hi. Pasian’ sep theihna tawh kisai-in Paul in “Pasian’ pilna le a thu theihna thukin kicing zen mah si ee! Ama thukhenzia theih khit zawh ding hi lo-a, ama sulnung kankhiat zawh ding hi lo hi” ci-in pulaak hi (Rom 11: 33). Matthew in hih thu mah pulaak hi.


KIKUP DING DOTNATE:

1.    Peter in ama’ deihna Pasian tungah a ap ding hamsa sa hi. Ei zong tua mah i hi hi. Hih tawh kisai Malachi sungah gentehna khat tawh hong kihilh hi. “ Tua ciangin, “ Cimhuai le”na ci uh a, simmawhin na mukpiksan uh hi,” Thahatpen Topa in a ci hi. “ Ganhing liamsa, a khebai ahih kei leh a cina hong paipihin biakna-a na piak uh ciangin note khut panin tuate hong sang ding ka hi hiam? Topa in ci hi ( Malachi 1: 13). Bang hangin Pasian in i biakpiaknate kin mahmah hi ding hiam? Bang hang hiam cihleh manpha i sak mahmah Amah i ap ding hong deih hi. Na nuntakna-ah bang nate na iplah pen hiam? Koi bangin i iplah nate mah Topa a’ding pia khia thei ding na hiam?

2.    Zeisu in biakbuk siah piak ding tawh kisai a’ muhzia ngaihsun in. Lungkham ngaihsut lo-in oltakin vaihawm hi. Nisim i tuah khak hamsatnate i nawkzia ding bang hong hilh hiam? Koi bangin na hoih sep ding hun le om hithiat hun ding khentel ding na hiam? 

To get the latest update of me and my works

>> <<