MUC

Print Friendly and PDF

Sunday, March 20, 2016

Sabbath School Lesson 7 | Jew Mite le Gentiles Mite Topa

LESSON 7    MAY 7 – 13

JEW MITE LE GENTILES MITE’ TOPA 
 SABBATH NITAK

TU KAAL SUNG SIM DING: Matt.14: 1 – 23; 15: 1- 28; Pai. 3: 14; Isa. 29: 13.

KAMNGAH: “ Keimah Topa in thumaanna tawh nang kong sam khin hi; na khut ka lenkip ding hi. Nang hong kemin mite a dingin thukhun Gentile-te a dingin khuavak kong suaksak ding hi” Isaiah 42: 6.

Zeisu in “ Tuu banga a mangthang Israel minamte kiang longahah kei hong kisawl lo hi,” ci giap hi. Khrih in mihingin na a sep lai-in Israel minamte bulphuhin nasem hi. Ahi zongin Lai Siangtho in Israel mite bek hi lo minam khempeuh itin, hehpih hi, ci-in hong hilh hi. Pasian in bang hangin Israel minamte teltuam hiam cih leh amaute tungtawnin namdangte thupha dingin a tel hi zaw hi. “ Vante piangsakin tuate a zalpa, leitung phah a, a sung pana piangkhia khempeuh a piangsakpa leitung mite tungah huu a guanpa le a tunga lampai khempeuh nuntakna a piapa Pasian Topa in: “ keimah Topa in thumaanna tawh nang kong sam khin hi; na khut ka lenkip ding hi. Nang hong kemin mite a dingin thukhun Gentile-te a dingin khuavak kong suaksak ding hi. Mittawte mit honsak ding, thong sung pan le thong hawmpi sunga khuamial laka tute a khahkhia ding na hi hi.” Isaiah 42: 5 – 7.


Israel minam sung panin Messiah hong piang khia ding hi. Messiah tungtawnin minam khempeuh in hotkhiatna ngah ding uh hi. Tu kaal sungin minam khempeuh in Topa hong hotkhiatna kisapzia i kikum ding hi.

SUNDAY    MAY  8

A GILKIAL MITE ANVAKNA

Zeisu’ nasep tampite lak pan a kithei mahmah khat in numei le naupang kihel lo mi 5000 anvakna a hi hi (Matt. 14: 21). Hih thupiang in deihna nei hi-in, tua deihna i tel nadingin Matthai sungah bang thu kigen hiam cih i kan kul hi.



Matt. 14: 1 – 21 sim in. Mi 5000 anvak ma-in bang thupiang hiam? Mi 5000 an vak khit teh bang thu piang hiam?

__________________________________________________________________

__________________________________________________________________

Mi 5000 anvak laitakin Nungzuite’ dinmun ah a om dingin kingaihsun in. Tuiphum John in gawltanna a thuak sawt nai lo hi. Zeisu kiangah John’ thuakna a vako nungzuite mah hi. Lungkia mahmah kha ding uh hi. Tua thu in a upna uh sittel hi. Ahi zongin mi 5000 anvakna thu in a upna uh thakhauhsak tuam ding hi. Ahi zongin mi 5000 anvakna in tua sangin thu tampi huam hi. Pasian in Israel mite gam sungah manna tawh a vakna thu a phawk ding kisam uh hi. Tua hun lai mite’ upna-ah, “Paisan Pawi ni-in Messiah hong pai ding a, a hong pai ciangin manna hong kia kik ding hi,” ci-in lamen uh hi. Paisan Pawi madeuh in Zeisu in mi 5000 an a vak tak ciangin mipi’ lungsim ah, “Zeisu in Messiah takpi mah hi ding hiam, hih sangin nalamdang lian zaw a bawl thei lai ding hiam,” ci-in ngaihsun uh hi. Jon Paulien, John, 139, 140.

Mi honpi in Messiah hong tun ciangin amau’ kitangsapna khempeuh sik ding hi, ci-in lametna nei uh hi. Tua hi-in mi honpi in Zeisu Khrih in Kumpi dingin thatang hatna tawh sawl uh hi. Ahi zongin Khrih in amau’ thu mang nuamlo ahih manin mipi lungkia hi. Amau lamet bangin piang lo ahih manin lungkia uh hi. Khrih in amaute’ lametna sangin kicing zaw a sem dingin hong pai hi napi, amaute lak pan pawl khat in Jesuh taisan uh hi.

Koi bangin Pasian kiang pan na lametna neu sak kha zel na hiam?

MONDAY   MAY 9.

NA KHEMPEUHTE’ TOPA

Mi honpite anvak khit ciangin Jesuh in gunkuang tawh paikhia dingin a nungte thupia hi (Matt. 14: 22). Khrih in a nungzuite gamdaihna khat ah paipih nuam hi. Nungzuite kiging nai lo uh ahih manin tua bangin Jesuh in gungal lam Capernaum ah nungzuite paipih hi zaw hi. Mipi lungkim lo uh hi. Ahi zongin Zeisu in thuneihna tawh a sawl ciangin kuamah in nial ngam lo hi. Jesuh in amaute’ langpanna in mannei lo ahihlam thei ahih manin mipi paikhiatsan ahi hi. Ellen G. White, The Desire of Ages, 378.


Matt. 14: 23 – 33 sim in. Jesuh i cih in bangci bang pianzia  nei-in, koi bangin hotkhiatna hong pianzia pulaak hiam?

________________________________________________________________________

________________________________________________________________________

Nungzuite in tui tungah lampai khat a muh tak uh ciangin lau lua mahmah uh hi. Tua leh Zeisu in “ Kei mah hing. Lau kei un,” ci-in amaute hopih hi. “ Keimah” cih kammal in Moses tungah a kilang Pasian in “ Kei in Kei mah ka hi hi,” a ci Pa mah ahi hi (Pai. 3: 14). Topa Pasian in na khempeuh uk hi. Pasian in na khempeuh a Piangsak Pa hi banah a “Don Tawntung Pa” hi. Ama’ vangliatna-in tu ciang dong na khempeuh a kip lai ahi hi ( Late 104). Pasian in na khempeuh a bawl khit ciangin kin nawn lo-in nusia cih bang upna (Deism) in upna man hi lo hi. Na khempeuh a uk Topa Pasian mahmahin na khempeuh cingin kem ahih manin nuntakna nei i hi hi; Ama hang bekin a nungta thei i hi hi (Heb. 1: 3).

Peter in “ Topa aw, hong hon in” ci-in kiko hi (Matt. 14: 30). Ei zong tua mah bangin hotkhiatna kisam hi lo i hiam? Pasian in hong hon kei leh, kua in hong hon ding hiam? Tuikia-in a cimawh Peter in bang hong lak hiam cih leh leitung siatna a zo zo lo i hih lam hong hilh hi.

Hehpihna, huhna kisam na hih lam kiphawk lecin nang sangin vanglian zaw khat om hi, cih na phawk hiam? Bangci bangin Jesuh tungah kinga ding na hiam?

TUESDAY MAY 10

A KINEIHKHEMTE’ LUNGTANG

“ Topa in, hih mite in a kam uh tawh kei hong nai uh a, a muk un kei hong pahtawi uh hi; ahi hangin a lungtang uh kei tawh kigamla hi. Amaute in kei hong biakna uh mihingte’ hilhsa ngeina-a kibawl hi lel hi” (Isa. 29: 13). Topa in hih thu nidang lai pek a mite tungah a gen hi taleh, tuhun eite a’dingin hong bang hong hilh hiam? Topa in bang thunih vauhilh hiam? Amau tawh a kibang na hih loh na’ng na kipuahpha ding hiam? Isaiah khit kum tampi khit teh Jesuh in biakna makaite tungah pulaak kik hi.



 Matt. 15: 1 – 20 sim in. Bang thu kician takin  kigen a, koi bangin Zeisu in tua thu pulaak hiam?

____________________________________________________________________

_____________________________________________________________________

Zeisu in Capernaum gamah zin kawikawi-na panin Jerusalem pan hong pai Laitheite le Pharisee-te tawh siantho-na tawh kisai thukhun tawh kisai-in kinial hi. Biakna makaite in siantho-na tawh kisai thukhun tuamtuam bawl uh hi. Gentehna-in annek ma-in khutsil zia ding. Ahi zongin Zeisu le nungzuite in biakna makaite’ bawl tawm thukhunte zuih dingin ngaihsun lo uh hi. Zeisu in vangik a suak mihing’ bawl tawm thukhunte, kineihkhem cihte langpan hi. Biakna makaite in amau bawltawm thukhunte amau mahmahin zui lo napi midangte in a zui dingin tangsawl uh hi. Amau’ khialhna mu lo-in midangte’ khialhna bek mu thei uh hi.

 Midangte’ kineihkhemna i zadah hi. Midangte’ kineihkhemna zong i mu baih hi. Midangte’ kineihkhemna i muhtheihna in ei le ei kineihkhemna a pulaaklaak hi lel lo hiam?


WEDNESDAY MAY 11

SABUAI TUNG PAN ANNENGTE


Zeisu in gilkialte anvakin, cinate damsakin, thu a hilh kawikawi khit ciangin a thupi mahmah na khat sem kipan dingin, Jew mite’ omna panin Gentile mite omna zuanin va pai hi.




Matt. 15: 21 – 28 sim in. Koi bangin a kigen thute na tel hiam? 
_________________________________________________________________

_________________________________________________________________

Tua thupiang tawh kisai-in ei mahmah in i va muh hi lo ahih manin a thupiangzia telhak i sa hi. Zeisu in tua numei kin lo-in kamkhauh tawh hopih hi. ‘Naupangte’ nek ding an ui-te piak ding kilawm lo hi”. Mite khat in an hong ngen dingin tua bangin dawng lecin mite’n hong kong cimuh diam? Ahi zongin i ngaihsut ding thu pawl khat om hi.

Tua hun laitakin Jewte in Gentile mite pen ui bangin ngaihsun uh hi. Ahi zongin Jesuh in ui mawkmawk hi lo, innkhawi ui-te cih kammal tawh pulaak hi. Hih numei in Zeisu pen David Tapa aw, ci-in sam hi. Jesuh in Jew minam ahihlam phawk hi. Jesuh in numei nu sittel hi. Numei in Jesuh a theihtel ding deih ahih manin tua bangin Jesuh in numei hopih hi zaw hi. Tua hi kei leh, numei in Zeisu in Gentile mi dawihawlkhia thei mi khatin ngaihsun kha ding hi. Ahi zongin Zeisu in tatkhia dingin hong pai ahihlam theisak nuam hi. Hih thu bang tawh tehkak thei ding i hiam cihleh, Aramean gam ah gun hoih Abana le Pharpar cihte om napi Elisha in tua gunte sangin Jordan gun sungah Namaan va kidiah dingin sawl hi. Namaan in a nungta Pasian a theih nadingin tua bangin kisawl ahi hi (2Kum. 5: 17 – 18). Craig Keener, The Gospel of Matthew, 417.

A taktakin tua numei in Greek u lian numei khat hi-in Tyre khua-a om Jew mizawngte’ an a ne zel numei khat hih tuak hi. Tu-in Zeisu in tua an pen Israel mite piak masak dingin gen hi. Hih Greek numei in Jew mikhual Zeisu kiang pan an ngen hi. A telhak thu hi. Ahi zongin Jesuh Khrih i muan ding kisam hi. Zeisu in Jacob tuikhuk a Samaritan numei nu bangin, hopih hih Greek numei nu manphatna pulaak hi. Hih numei’ tanu damsak hi. Tua numei in David Tapa a upna hong khang hi.


THURSDAY MAY  12

GENTILE-TE’ TOPA


Matt. 15: 29 – 39 sim inla Matt. 14: 13 – 21 tawh enkak in. A kibang le a kibang lo thute bang om hiam?

___________________________________________________________________

___________________________________________________________________
  
Lungdamna Thubu sungah mihon anvakna mun nih om hi. Tuate in Jew mite anvakna le Gentile mite anvakna ahi hi. Gentile mi honpi hong pai khia-in Rabbi khangno khat ii thuhilh va ngai ding le ama an va ne ding cih ngaihsun in. Tua hun lai-in Jewte le Gentile kikaal a thupiang tu-in i phawk khak loh hangin amau hun lai-in Jew le Gentile mite in kizopna nei lo hi. Zeisu in tua bang kideidannate susiatsak hi. Mi nam khempeuh Amah tawh kinai dingin thuhilh hi. A lamdang thu khat: “ No Israelte aw, kei a dingin Cush-te tawh kibang hi lo na hi uh hiam? Topa in cikhia hi. “ Keimah in Israelte Egypt pan, Philistia-te Caphtor pan le Aram-te Kir panin hong paikhiatpih hi lo ka hi hiam?Amos 9: 7.

Hih sanah Pasian in bang pulaak hiam? Pasian in Israel mite banah nam dangte zong don hi lo hiam? Pasian in Philistine mite zong kin hi lo hiam? Thuciam Lui in Pasian in nam dangte tungah zong Ama hotkhiatna thu pulaak hi, cih kimu hi. Nungzuite le sawltakte in zong hih thu thei tel semsem uh hi.

  
Romans 4: 1- 12 sim in.  Koi bangin hotkhiatna in mi nam khempeuh a’ ding hi, ci-in pulaak hiam?

FRIDAY MAY  13

SIMBEH DING: Christian khat in kumpi sangnaupangte’ kiangah, “Pasian om takpi hi,” ci-in hih bangin gen hi. “No bangin ka khangno lai-in Pasian om hi, ci-in ka um kei hi. Ahi zongin tu-in Pasian om takpi hi, ci-in ka um hi. Bang hangin Pasian om takpi hi, ci-in gen thei ka hiam cih leh, ka nuntakzia ka ngaihsut ciangin ka lungkham hi. Ka nunzia ka sittel ciangin Pasian om takpi hi, ci-in ka tel hi,” ci-in gen hi. Tua sangnaupangte in zong gamtat zia le tong cihte ngaihsun lehang Pasian om takpi mah ding hi, cithei uh hi.

Jew hi taleh Gentile hi taleh cimawhin Khrih’ dikna le thumanna kisam hi. Mimawh i hihlam i kiphawk theih ciang bekin ci le sa deihna zui lo-in Kha deihna a zui, Khazih Zeisu sunga a om mite aa dingin mawhsakna a om nawn kei hi. (Rom. 8: 1). Khrih in Jew, Gentile, minam kuamah deidan lo-in mi khempeuh hong sam hi.

KIKUP DING DOTNATE:

1.                Matt. 16: 1 – 12 sim in. “ Pharisee-te le Sadducee-te’ silngo kidawm un,” cih thu in bang hong hilh hiam? Nungzuite in silngo takpi mahsa kha uh hi. Paisan Pawi ciangin silngo khempeuh hemkhia uh hi. Zeisu in silngo taktak sangin a zai zaw pulaak hi. Tua in bang hi ding hiam?

2.                Christian biakna in Khrih in kuamah deidan lo-in mi khempeuh a hong itna siksan biakna hi. Mihing in Khrih lo-in lamet bei, cimawh i hi hi. Hotkhiatna thu i pulaak ciangin khat veivei mi mawhna bek mu-in, mawh nei lo bangin i gamta kha zel hi. Koi bangin Zeisu nung a zui mite in itna pulaak hiam? 






To get the latest update of me and my works

>> <<