MUC

Print Friendly and PDF

Monday, March 21, 2016

Sabbath School Lesson 6 | Khrih Sungah Tawlngakna

LESSON 6 | APRIL 30 – MAY 6


KHRIH SUNGAH TAWLNGAKNA



 SABBATH NITAK

TU KAAL SUNG SIM DING: Matt. 11: 28 – 30; 12: 1, 2, 9 – 14; Lk. 14: 1-6; Jn. 5:9 – 16; Isa. 58: 7- 13.

KAMNGAH: “ Vangik pua-a a gim mi khempeuhte aw, ka kiangah hong paita un, tawldamna kong pia ding hi.” Matthew 11: 28.

Khrih sungah thukham tawh kituak lo khat beek a om kei hi. Amah a mawhsak nuamte’ kiangah Khrih in bang thukham palsatin, bang mawhna nei ka hiam,’ ci-in dong hi. Ellen G. White, The Desire of Ages, 287.


Zeisu’ nunzia in Pasian’ thukham 10 in bang deih hiam cih pulaak hi. Mihing in Pasian’ thukham 10 a nuntakpih thei dingin Khrih mahmahin hih leitungah a hong nuntak lai-in hong lak hi. Khrih’ nunzia in thukham a zui mi khat ii nunzia ding hong hilh hi. Tua thukham 10 lakah a li-na, Sabbath thukham tawh kisai tu kaal sungin i sin ding hi. Koi bangin Khrih in Sababth zui-in, bangci bangin Sabbath thuman hilhin, koi bangin Sabbath in Pasian’ zia le tong hong lak, koi bangin i nuntakna in Pasian’ zia le tong kilangsak thei ding hiam, cihte i kikum ding hi.

SUNDAY MAY 1

TAWLDAMNA HONG PIA AMA HAKKOL

Galilee gama khua pawl khat in Jesuh le a nasep nial uh hi (Matt. 11: 20 – 27). Tua khua-te in thuman a nial manun gimna lianpi thuak ding uh hi (Jn. 14:6). Khrih in amaute lakah nungta-in na lamdang tampi bawlin, ahi zongin amaute in a mawhna uh kisik lo uh hi (Matt. 11: 20, 23). Amaute tungah kihilh bangin Sodom le Capernaum ah kihilh hi leh, hih khuapite kisia lo ding uh hi. Galilee mite in Sodom mite sangin siatna tawh kidim uh hi. Hih bangin a thuhilh khit ciangin, Zeisu in Pa Pasian kiangah thungenin, Pa tawh nungta khawm ahihlam pulaak hi. Pasian in a sawl bangin Zeisu in semin bawl ahihlam pulaak hi. Amah a nialte in Pa Pasian zong a nial uh hi pah hi.

Matt. 11: 28–30 sim in. Khrih in bang hangin hih thu gen hi ding hiam?

________________________________________________________________
________________________________________________________________

Galilee mite in Amah a nialna thu, Khrih in Pa Pasian tawh pum khat ahihna thu a pulaak khit ciangin, vangik pua-in a gim mi khempeuh in tawldam ngah nadingin Ama kiang va zuan dingin sam hi. Galilee mite in amah a nial bangin kuamah dang in a nial lo dingin pulaak hi. Khrih in vangliatna khempeuh nei ahih manin a gen bangbangin tangtungin, a cih bangbangin piang pah hi. Amah a nialte in tua tawldamna, tatkhiatna ngah lo ding uh hi. ‘Tawldamna ka hong pia ding hi,’ a cih ciangin a khiatna in bang hi ding hiam? Thadahna maw? Na khat peuhpeuh maw? Hi lo hi. A mannei nuntakna tawh a nungta dingin hong deih hi. Mualtung Thuhilhna in i nun zia ding hong hilh hi. Amah tawh nungta khawmin, Ama tungah kinga mite a tawldam ding uh hi. Sabbath tawlngakna in tua bang tawldamna hong pia hi.

Koi bangin Zeisu’ kamciam na nuntakpih hiam? Vangik napi-in tawldamna le kiniamkhiatna bang kici zop hiam?

MONDAY  MAY 2

TAWLDAM NI-A VANGIK PUA

Christian tampite’ pulaak bangin Sababth bei khin, Zeisu in Sabbath beisak hi leh, bang hangin Khrih in Sabbath tawlngakna thu tampi hong hilh ding hiam? Matt. 12: 1, 2; Lk. 14: 1 – 6; Mk. 2: 23
– 28; Jn. 5: 9 – 16 sim in. Bang in thupi a, bang in thupi lo hiam?

________________________________________________________________

__________________________________________________________________

Israel mite in Babylon gamah a saltanna uh a hang tuamtuamte lakah Sabbath thupiak palsatna kihel hi. Phariseete in tua bang saltanna a tunkik loh nadingin hanciam uh hi. Hih thu siksanin Sabbath ni-in sep ding le sep loh ding, Sabbath zatzia ding thukhun tuamtuam koih uh hi. Gentehna-in: a tui nek akpi khat (uuh-sa) Sabbath ni-in tui henla, tua aktui pen Sabbath ni-in ne ding maw, ne lo ding? Sabbath ni-a a tuikhia aktui pen nek ding hi lo hi. Bang hang hiam cihleh, akpi in Sabbath ni-in nasem hi. Ahi zongin akpi mawkmawk khat Sababth ni-in tui henla, tua aktui pen Sababth ni-in ne thei ding hi, ci-in tua bang dan thukham tuamtuak khung uh hi. Sabbath ni khit teh tua akpi a kigawh ding nak leh, tua a tui ne thei, a ci zong om hi.

Sabbath ni-in limlangh ah ki-en thei ding maw, ki-en thei lo ding? Thukhamhilh siate in, “ki-en thei lo ding hi,” ci uh hi. Bang hang hiam cih leh na sam a kang khat mu lecin, botkhia nuam ding, “bot lecin nasem, Sabbath palsat hi,” ci uh hi. Sabbath ni-in mei in na inn kang ding, na vante va la khia ding maw, la khia lo ding? “Puansilh khat bek la khia thei bek ding,” ci uh hi. Na inn meikaangin meiphel dingin Gentile mi khat na sawl leh mawhna, Sabbath palsat kici ding a, “ahi zongin na sawl lohpi Gentile khat in a na pelh leh, phamawh lo,” ci uh hi. Sabbath ni-in cilsia thei ding maw, cilsia thei lo ding? “Suang tung bek ah cilsia thei ding. Lei lakah cil na siat leh leivui khawm ahih manin, Sabbath palsat,” ci uh hi.

Hih thukhamte i nuih hong za-sak kha mai ding hi. Ei zong tua bangin mite’ nuihsat i hi kha zel hiam? Sabbath thu tawh kisai hi ta kei leh, upna thu khat peuh, cihtak kei ci-in i awlmawh loh thu om kha zel hi lo hiam?

TUESDAY MAY 3

JESUH’ DAWNKIKNA


Pasian in Sabbath a piansakcilin a deihna tu-in kuamah in thei nawn lo hi. Bang dingin Sabbath kikoih hiam cih pen kuamah in thei lo hi. Khrih in Pasian’ deihna bangin Sabbath i zat ding, Sabbath ii manphatna a thei dingin hong hilh hi. Sabbath in nisim nasep ngei khempeuh pan i khawl ni ding hi. Pasian i biak ni ding hi; thu-um mite tawh kikholhkhop ni ding hi. Nasem nu le pa in a tate uh tawh a kikholh ni ding hi. Tua bangin tate in nu le pa tawh kikholh nuam a sak uh mah bangin Sababth ni-in ni 6 sunga i ngah loh, eite hong Bawlpa, hong Honpa tawh kikholh nuamna i ngah ni ding a hi hi.


Matt. 12: 3 – 8 sim in. Koi bangin Zeisu in Pharisee-te’ hakkol thuhilh hiam? 1Sam. 21: 1-6. Jesuh in bang siksan hiam?

____________________________________________________________________

___________________________________________________________________

Zeisu in a thuhilh khitsa thute tu-in khauhtakin hilh kik hi (Matt. 23: 23, 24). Khrih in a thupi thute a theih dingun hilh hi. Zeisu in a beisa thu, David le a lawmte in biakbuk sunga siampite bekin a nek ding uh khomun a nek uh thu siksanin thuhilh hi. Biakbuk sunga biakna tuamtuamte sangin a gilkial David le a nungzuite in mannei zaw hi. Tua bang mahin Sabbath thukhun tuamtuamte sangin a gilkial Jesuh’ nungzuite in manpha zaw, thupi zaw hi. Zeisu le ama nasep in biakbuk nasepte sangin manpha zaw hi, ci-in hilh hi. Zeisu in Sabbath ni-a biakbuk sunga siampite’ nasep zong pulaak hi. Tua bangin Zeisu in Sabbath tawh kisai a pulaak ciangin Sabbath awlmawhlohna hi lo hi. Sabbath a siantho-na zong kiam lo hi. Khiatna neilo, mannei lo thukhunte a hemkhia hi zaw hi. Sabbath in, eite hong Piangsak Pa, eite hong Honpa sungah tawldamna i ngah pulaak ahi hi.

“Zeisu in a hong nuntak lai-in Sabbath kizang khial lua mahmah ahih manin vantung Pa Pasian’ hong itna kilangsak ding sangin angsung khualna le hamphatna dingin kingaihsun hi.” Ellen G. White, The Desire of Ages, 284.

Na nuntakzia kisittel in. Pa Pasian’ hong itna a kilangsak na hiam, ahih kei leh, angsung thu bek kilangsak na hi hiam?


WEDNESDAY MAY 4

SABBATH NI-A DAMNA

Sabbath thupiak kisam nawnlo, Sabbath kul nawn lo hi leh, bang hangin Jesuh le biakna makaite kikaal ah Sabbath tawh kisai buai-na thute Lai Siangtho sungah kiciamteh hi ding hiam? Zeisu a sih khit kum 20 – 30 bang khit teh Lungdamna Thubu-te kigelh hi pan hi, ci-in kiciamteh hi. Sabbath pen Sunday tawh kilaih ahih leh, Zeisu mahmah in zong hong hilh ding a, Lungdamna Thubu sungah zong kigelh ding hi. Ahi zongin Sabbath thupiak bei lo-in, Sabbat kip lai hi, cih pen Lai Siangtho’ hong hilh hi zaw hi.


Matt. 12: 9 – 14 sim in. Bang thu kigen hiam? Bang hangin buai-na dang kibehlap hiam?

_____________________________________________________________________

_____________________________________________________________________

Zeisu in Sabbath ni khat biakinn khat ah lut hi. Tua munah khut zaw mi khat mu hi. Pharisee-te in Jesuh in bang sem ding hiam, ci-in en gige uh hi. Sabbath ni-in natna damsak leh “Sabbath palsatpa hi,” ci-in kingawh ding cih pen Zeisu in mahmah in zong thei khol hi. Ahi zongin mite’ gensiat ding awlmawh lo-in thu hoih bawl ding thupi ngaihsut zaw hi. Jewte in Sabbath zuihna hangin na hoih sep ding tampi sem lo uh hi. Zeisu in tua bang ngeinate sutat hi. Jewte in kamciin khatah ‘ na hoih sem thei ding kimlai na sep kei leh, siatna bawl na hi hi. Na hotkhiat kei leh a that mah na hi,” ci uh hi. Zeisu in Jew mite’ ngeina siksanin Sabbath ni-in thupha bawl hi. Ellen G. White, The Desire of Ages, 286.

Biakna makaite in Sabbath ni-in ganhing khat dum sungah kia leh, tua ganhing honkhia ding uh hi napi, Sabbath ni-in mi cimawh, mi genthei khat in noptuamna ngah ding langpan uh hi. Khrih in tua bang ngei-na hoihlote langpan hi.
Bangci bangin i thuzuih in upna man lampi pan lam hong pialsak thuzuihna a hi lodingin sittel ding na hiam? Thuman lampi tawh a kigamla lo dingin na kidawm ding hiam?

THURSDAY MAY  5

THUPIAK OM BANGIN SABBATH ZUI

Zeisu in Sabbath beisak lo hi. Jesuh in vangik a piangsak Sabbath thukhunte hemkhia hi. Nungzuite khit kum za tampi sung Sabbath kizang hi. Kum zalom 5 lai-in Socrates in “ Christian biakna khempeuh in Sabbath ni sialin Topa Nitak An ne uh hi. Ahi zongin Alexanria le Rome a om Christiante in tua bangin zang nuamlo uh hi,” ci-in ciamteh hi. Ecclesiatical History, Book 5., 289. Sabbath tawh kisai Lungdamna Thubu sunga kigelh khempeuh in Sabbath beita hi, cihna ding khat beek om lo hi.

Matt. 12: 12 sim in. “Sabbath ni-in a hoih sep ding a kilawm ahi hi” cih thu in tua hun lai bek tham lo-in tuhun a’ dingin bang hong hilhhiam?

_______________________________________________________________________

_______________________________________________________________________

Jewte in Sabbath ni-in cina gim khat zatui pia thei hi, ci-in thukhun bawl uh hi. Zeisu in tua sangin kicing zaw-in Sabbath ni-a om zia ding hong hilh hi. Sabbath ni-in a bawl damsaknate Sabbath ni hi lo ni khat peuhpeuh in zong kibawl thei lo hi lo hi. Zeisu in hih thu siksanin “vantung ki-ukna sungah a hong lut Thukham hilh siate khempeuh pen, a sumkholna panin a thak le a lui, a ut utin a lakhia thei ziauziau sumnei pa tawh kibang uh hi,”ci hi (Matt. 13: 52). Jesuh in thumanpha mahmah pulaak khia hi.
   
Isa. 58: 7 – 13 sim in. Koi bangin Topa a zui taktakte i thei thei ding hiam? Sabbath zatzia le thukham in a hong kalh thupaipi na mu hiam? Koi bangin vantungmi thumte’ thupuak siksanin “puahpha-te” cih thu na tel thei hiam?

FRIDAY            MAY  6

SINBEH DING: Biakna om ta kei leh mihoih le misia om veve ding a, mi hoihte in a hoih nate semin, mi hoih lote in a hoih lo nate sem sem ding uh hi. Ahi zongin mi hoih khat in a hoih a sep ciangin biakna in thukhen hi,’ ci uh hi. AD 1600 kim hun lai, French mipil Blaise Pascal in bang gen hiam cih leh “mihing in biakna bulphuh a hih nak leh siatna cih pen bawl taktak ngei lo hi,” ci hi. Hih bang ngaihsutna bel khengval hi. Zeisu in Pharisee-te’ ngimna hoih lo siksanin amaute kiangah Sabbath ni-in thupha bawl ding maw, a sia bawl ding,” ci-in dong hi. Zeisu in thupha bawlin mite’ lungdamna ding a bawl manin Pharisee-te hehin Zeisu thah sawm uh hi. Sabbath ni-in nuntak suksiat ding le nuntak nuamtuamsak ding sep huai zaw ding hiam? Midang khempeuh it ding sangin Sabbath ni-in nuntak suksiat pen thudik hi zaw ding hiam? Ellen G. White, The Desire of Ages, 287.

KIKUP DING DOTNATE:

1.                Zeisu in “ biakpiakna sangin hehpihna ka deih zaw hi,” a cih ciangin bang a cinuam hi ding hiam? Hih dotna Matt. 9: 10 – 13; Hosea 6:6; Isa. 1: 11 – 17 siksan inla dawng in.

2.                Christian tampi in “Lai Siangtho ka zui hi,’ “Zeisu ka it hi,”ci napi, bang hangin Sabbbath thupiak nial uh hi ding hiam? Hih bang mite in Sabbath thuman thutak a theihtel nadingun bang siksanin Sabbath thu pulaak ding na hiam?

3.                Koi bangin Sabbath na zang hiam? Bangci bangin Sabbath in Pasian tawh kizopna kip hong nei thei sak hiam?

4.                Zeisu in “ ka hakkol nuam hi. Ka van zang hi” ci hi. Bangci bangin van pua-in a gim mi khat huh ding na hiam? Koi bangin mi khat ii hakkol nuamsak ding na hiam?

To get the latest update of me and my works

>> <<