LESSON 5 APRIL 23 – 29
A KIMU THEI LE A KIMU THEI LO GALDO-NA
A KIMU THEI LE A KIMU THEI LO GALDO-NA
SABBATH NITAK
TU KAAL SUNG SIM DING: Matt. 11: 1- 12; 12: 25 – 29; Mang. 5:5; Isa. 27: 1; Heb. 2: 14.
KAMNGAH: “ Tuiphumpa John hun a kipan tuciang dong vantung kumpigam in zawhthawh bawlna thuak a, a zawhthawh bawlte in thagum suangin a la uh hi.” Matthai 11: 12.
Nisimin nuntak khuasakzia ding, khua sung vak nading, lawm le gual , nek le dawn a kipan na khempeuh i khensat bangin kalsuan i hi hi. I khensat khialh khak loh nadingin limtak ngaihsun a khensat ding ahi hi. Mit tawh kimu thei lo vangliatna neite in hong uk nuam ahih manin Lai Siangtho in bang hong hilh hiam ci-in kalsuan ding ahi hi. I muh theihlohnate in i nunzia huzaap mahmah hi. Mit tawh kimu thei lo nate om takpi hi, cih pen leitung pilna in zong hong hilh hi. X ray, radio waves cihte mit tawh kimu thei lo hi. TV, phone cihte’nasepzia in mit tawh kimu thei lo huih lak nasepna ahi hi. Tuate a kimuh theih loh hangin a om mah hi veve hi. Satan in Khrih a do, Kido-na Lianpi zong mit tawh kimu thei lo ahih hangin i nuntakna-ah i tuak kha veve hi.
Tu kaal sungin mit tawh kimu thei lo vangliatna neite in i nunzia a hong huzaap ziate i sin ding hi.
SUNDAY APRIL 24
MATTHEW
Lai Siangtho pen Pasian’ kammal hi. Lai Siangtho in tatkhiatna thu kician takin hong hilh hi. Ahi zongin Lai Siangtho sunga thute i theih zawh loh tampi om hi. Tua bangte’ hangin Pasian’ kammal muanlah ding hi lo hi. Nisim i tuah khak i tel zawh loh tampi om hi. Tua hi-in i telzawhloh thuman thutak hong lak Pasian’ kammal om hi, cih pen lamdangsak ding hi lo hi. Hih tawh kisai-in Ellen G. White in, “Amah bangin kiniamkhiat om lo mipa in leitung mipilte in a theih zawh loh ding thute pulaak hi. Mun khempeuhah mihing telzawh loh ding nalamdang tampi om hi. Mihing theihna in ciangtan nei, kicing zo lo, muhna neu ahih manin i telzawhloh thu om hi, cih pen lungkham ding hi lo hi. Pasian in Ama zia le tong i theih nadingin kicing takin Lai Siangtho in hong hilh hi. Ama’ kammal muanmawhna ding om lo hi. Bang hang hiam cih leh Ama nasepzia in mihing’ telzawh dingin lamdang lua hi, “ ci hi. Ellen G. White, Steps to Christ, 106, 107.
A telhak mahmah tampi lak pan, gentehna-in Matt. 11: 11, 12 telhak hi. “ Aman takpi kong cih in ah, numei sung panin a suak mite’ lakah Tuiphumpa John sanga a lianzaw kuamah a om kei hi. Ahi zongin vantung kumpigam sunga a neupenpa nangawn amah sangin a lianzaw hi. Tuiphumpa John hun a kipan tuhun dong vantung kumpigam in zawhthawh bawlna thuak a, a zawhthawh bawlte in thagum suangin a la uh hi.” Bang na tel hiam? Bang na tel kei hiam? Khrih in bang pulaak hiam?
Leitungah i tel zawhloh thu tampi om hi. Mihing in ni, kha le aksite’ omzia a telloh thu tampi om hi. Tua cileng mihing in upna thu le Pasian’ kammal tawh kisai a telzawh loh ding thu tampi om mah lo ding hiam?
MONDAY APRIL 25
“KIDO-NA LIANPI SUNGA GALDOTE”
Matt. 11: 12 sunga thute a buaipih mi om hi. Bang hang hiam cih leh vangam le a mite tawh kisai a gen thute telhak hi. Vangam pen thagum hatna tawh a piang maw, ahih kei leh gimthuakna tawh kingah hiam? Vangam pen dikna tawh kidim in gilo-te in vado gawm hiam, cih bangin a ngaihsun om hi. Ahih kei leh vangam pen thagum hatna tawh a kip hiam, Khrih’ nungzuite in thagum hatna tawh nasem ding hiam, cih bangin dotna om hi. Tua bang a hi thei mah ding hiam?
Matt. 11: 12 sunga kigen thute i tel nadingin Matt. 10: 34; Mang.
5:5; Micah 2:13 sim in. Bang thu hong hilh uh hiam?
________________________________________________________________
________________________________________________________________
Siantho-na le vangliatna nei vantungmite in hatna nei kha gilote a do gawp laitakin kha gilote tawh kipawl mite in, siangtho nasepnate nawngkai sak uh hi. D. A. Carson, The Expositor’s Bible Commentary, 266, 267. Hih in Matthew Thubu tawh kituak pen hi. Khuamial gamtatna le khuavak gamtatna, Khrih le Satan cih bangin a kilangneih tawntung ahi hi. Lai Siangtho buppi in zong hih thu mah pulaak hi. Mimal khat ciat in mit tawh kimu thei lo Kido-na Lianpi sungah kihel den i hanga, koi lam ah ka om zaw hiam, Khrih maw, Satan maw cih nisimin a kisittel den ding i hi hi.
TUESDAY APRIL 26
“KIDO-NA LIANPI TAWH KISAI MUHZIA”
Thuman le thuzuau kido tawntung hi (Matt. 11: 12). Tua ‘Kido-na
Lianpi’ sungah kuate kihel a, bang pulaak hiam?
Matt. 12: 25 – 29 _____________________________________
Isa. 27: 1 _____________________________________
John 5: 19 _____________________________________
Rom. 16: 20 _____________________________________
Pian. 3:14 – 19 _____________________________________
Eph. 2:2; 6: 10 – 13 _____________________________________
Hih a tung teng banah Lai Siangtho mun tampi in Kido-na Lianpi gen ciat hi. Khrih le Satan, thuman le zuau thu, kido tawntung hi-in, nang le kei in hih Kido-na Lianpi sungah i kihel hi. SDA pawlpi a’dingin hih Kido-na Lianpi in thuthak hi lo hi. SDA pawlpi kipat a kipan a kipulaak den ahi hi.
Koi bangin na nuntakna ah Kido-na Lianpi na tuak kha ngei hiam? Koi bangin khensatna, ze-etna, deihtelnate cihte in tua Kido-na Lianpi pulaak hiam? Koi bangin Kido-na Lianpi in na nunzia ding, na gamtat zia ding hong huzaap hiam?
WEDNESDAY APRIL 27
KIDO-NA LIANPI PANIN SIATNA
Pasian in Satan do-in, susia-in a Kumpi Gam phut ding hi (Matt. 11: 12). Tua ‘Kido-na’ tu ciang dong om lai hi. Siatna khempeuh a bei ni, Satan a kisuksiat hun mateng tua “Kido-na” om ding hi. Tua hun hong tun mateng siatna, sihna, gimna i tuak kha ding hi. Khrih in a gen mah bangin (Matt. 11: 12) hih ‘Kido-na’ in tu ni dong siatna piangsak hi.
Matt. 11: 1 – 12 sim in. Koi bangin ‘Kido-na Lianpi’ kilang khia hiam? “Kido-na Lianpi’ in i tuah khak thute mannei sak hiam?
________________________________________________________________
________________________________________________________________
John thongkia hi. Kua in thongkhia hi ding hiam? John in nasem thei nawn lo ding banah Zeisu a up nawnloh nadingin Satan in nasem hi. Honpa pai nading lampi sial John in hih bangin thuak hi leh Honpa mahmah in tampi thuak zaw kan ding hi. Satan in Jesuh’ nungzuite le John’nungzuite kiangah, “Nazareth khua mi Zeisu in vangliatna tawh kidim takpi ahih leh bang hangin a sanggampa, mi hoih, mi citak, John in thong sungah gim thuaksak dihdih hiam,” ci-in ze-et hi.
John in Zeisu Khrih a muangmawh dingin kua in nasem hiam? John in bang hangin thongkia ka hiam? Bang hangin Zeisu in hong honkhia lo hiam? ci-in ngaihsun lo hi leh, “a hong pai ding Pa mah na hiam? ahih kei leh Messiah hong pai ding lamen lai ding ka hiam” ci-in thudongsak lo ding hi (Matt. 11: 3). Tua a dong pa pen kua mah dang hi lo-in Jesuh a tuiphum tektek laitakin ‘vantung panin Kha Siangtho in vakhu lim la hong kumsuka, hih in ka lung hong damsak ka Tapa hi,’ ci-in vantung pan aw ging a za pa mah ahi hi (Matt. 3: 17). Tua bang hi napi a thuak gimnate hangin lunghimawhna tawh hong kidim ta hi. John in a thuak lunghimawhna tawm vei sung bek hi-in, tua sangin a nasia zaw lunggimna tam semsem ding hi (Mk. 6: 25 – 28).
Na lunghimawh ciangin bang mitsuan ding na hiam? Thungetna le Topa’ hoihna muang lecin hong lunghimawhsak nate vengh theisak lo ding hiam?
THURSDAY APRIL 28
MAWHNA HANGIN SUPNA
Leitung in gal kido-na tawh kidim hi. Mihingte khat le khat hong kido-sak thu in i pianpih lungsim mah hi. Leitung Galpi Khatna-in, England in Germany a zawhna ciangin a gam sung khempeuh uh nuamin kipakin a om uh teh, Katherine Tait in galzawhna tawh kisai a pa Bertrand Russel’muhzia hih bangin pulaak hi: “ka pa pen gam khantohna lam a kin mahmah khat hi. Leitung gam khempeuh in mi thatin gam sung daihna ngah England nungzuih uh hi. A galte uh a thahna uh hangin tua bangin nuamsa-in kipak uh hi. A thah mite uh kua mah dang hi lo-in German kampau mite mah that uh hi.” My Father Bertrand Russell, 45. Hih bang gamtatzia mun khempeuhah om hi.
Galkapte in galdo dingin a kuan uh ciang, gal lel ding maw gal zo ding cih thei khol lo hi. Ahi zongin ‘Kido-na Lianpi’ sungah kihel eite in gal zo khin ihih lam i thei hi. Khrih in galte khempeuh hong zawhsak mangkhin hi. Khrih a hong sihkhit nungah kua in GALZO cih lunghimawh ding hi lo hi. Satan ahih leh a tawntungin a kisia ding hi ta hi.
Heb. 2: 14; 1Kor. 15: 20 – 27; Mang. 12: 12 ; 20:10. Nitawp ni ciangin
Kido-na Lianpi hangin bang thute piang ding hiam?
_________________________________________________________________
_________________________________________________________________
Satan in vantung pan guallel hi-in, leitung ah zong guallel hi. Ahi zongin muhdahna le thangpaihna tawh kua ka zo ding hiam, ci-in vak kawikawi hi (1Pet. 5: 8). Tua bangin Satan a gamtat veve lai hangin Khrih in Satan zo khin ahih manin eite’ mun muanhuai le i kidal nading galhiam hoih penpen in Khrih bek mah ahi hi. Satan maw, Zeisu maw koi zaw-ah om ding cih pen nisimin tua dingin khensatna a nei thei na hi hi. Na tun nadingin mun in tua na khensatna tungah kinga hi.
FRIDAY APRIL 29
SINBEH DING : ‘Kido-na Lianpi’ a phawk kha lo i om hiam? Nisimin hih‘Kido-na Lianpi’ tuak kha den i hih manin a thei lo i om kei ding hi. A kisia leitung, natna,gimna tawh kidim leitungah i nungta hi. Ze-etna tawh kidim leitung ahih manin upna kip nei lo le thungen-in a ki-ap lo mi in ze-etna sungah puk ding hi. Tanglai Gulpi in leitung mun khempeuh uk hi. Tua hangin Zeisu in ze-etna sungah na kiat loh nadingun ‘vil unla thungen un’ ci hi. Ze-etna na zuih khak leh Pasian in hong sang nawn lo ding hi. Na mawhnate hong maisak nawn lo ding hi, ci-in na ngaihsun ngei hiam? Na mawhna na kisik ding Zeisu in hong ngak hi. Pasian’ kiang pan paikhia na hih leh, Ama kiang na ciah kik kul hi. Khrih in mawhmai-na pia dingin leitungah hong pai ahi hi. Eite’ sep theih loh thute sem dingin Amah hong pai ahi hi. I sep ding khempeuh Amah in hong sem hi. Nisim, naisimin Amah tawh a nungta dingin na khensat kul hi. Amah tawh a nungta khawm na hihleh, a’ thupiak bangin a nungta na hi ding hi. Ama’ gualzawhna muangin Ama tung bek mahah na kinga ding hi.
KIKUP DING DOTNATE:
1. Mit tawh kimu thei lo a om takpi nate ngaihsun in. Dawigilo le Satan in nasem takpi ahih lam na phawk thei hiam? Kido-na Lianpi om takpi hi, ci-in na telthei hiam?
2. Christian tampi in ‘Kido-na Lianpi’ a om lam um lo uh hi. Bang thute hangin um thei lo uh hi ding hiam? Koi bangin tua bang mite tungah hih thuman na hilh diam? Lai Siangtho bang mun na siksan ding hiam?
3. Khrih in Satan zo khin hi. Tua hi napi, bang hangin tu ni ciang dong siatna om veve lai hiam? ci-in hong kidong leh, koi bangin na dawng diam? Sihna pan tho-in, van a kah khit ciangin bang hangin Khrih in hih leitungah hong pai kikin Satan le a pawlte susia pah lo hi ding hiam?
