MUC

Print Friendly and PDF

Monday, March 21, 2016

Sabbath School Lesson 3| Mual Tungpan Thuhilhna

LESSON 3     APRIL 9 – 15



MUAL TUNG PAN THUHILHNA
SABBTH NITAK


TU KAAL SUNG SIM DING: Matt. 5 – 7; 13: 44 – 52; Pian. 15: 6; Micah 6: 6 -8; Luke 6: 36; Rom 8: 5 – 10.

KAMNGAH: “ Jesuh in hih a thugente a man khit ciangin, Ama thugenna hangin mihonpite in lamdangsa mahmah uh hi. Amah in Thukham hilh siate bangin thu gen lo in, aana neite bangin thu a genzaw hi.” Matthai 7: 28, 29.

Pasian in Israel mite Egypt gam panin paikhiat pih a, San Tuipi sungah tuiphumin sehnel gam sungah kum 40 bang paipihin, na lamdang tampi tawh makaihin Amah mahin mual tung panin Thukham le thukipte zong pia hi, ci-in Paikhiatna Thubu in hong theisak hi.

Matthew sungah zong Zeisu in Egypt panin paikhia-in Jordan Gun ah tui a kiphum khit ciangin sehnel gamah ni 40 tawntung omin, nalamdang tuamtuam a bawl khit ciangin mual tung pan mahin Israel tungah a thupiakte hong hilh hi. Zeisu in Israel mite nunzia bangin nungta-in, Amah mah Israel mi suakin, thuciam khempeuh Ama sungah tangtung hi.


Thuhilh a om khempeuh lak pan Khrih in Mual tung panin a thuhilhna mah vanglian penpen hi. Tua huna mite bek tham lo tu hun donga mite’ nuntakna kikhelsak thuhilhna ahi hi. A thuhilhte a za hi bek lo-in nuntak pih ding kisam hi. Tu kaal sungin Mual Tung Thuhilhna, Matt. 5 – 7, i nun tak pih thei zia ding i sin ding hi.




SUNDAY  APRIL 10

THUGUIPITE LE TEHKAK DING THUTE

A huampi-in Matt. 5 – 7 sung en in. Nunzia ding bang hong hilh hiam cih ciamteh in. Mual Tung Thuhilh bangin nuntakna a khel zosak thei thuhilhna om lo hi. Jesuh a bia lo, Ama thu a om lo mite nangawn in hih Mual Tung Thuhilhna a nial om lo hi. Mohandas Gandhi pen Khristian thu-um mi hi lo hi. Ahi zongin Gandhi in Mual Tung Thuhilhna limtakin pom thei hi. Hih Mual Tung Thuhilhna tawh kisai-in muhzia tuamtuam zong om hi. Mi kimkhat in nuntakpih zawh ding thu hi lo ahih manin Khrih’ dikna le hotkhiatna in eite’ lamet khat bek hi, ci uh hi. Kimkhat leuleu in gam sung mite’ nunzia ding khat le khat kilem nading hi, ci uh hi. Kim khatte in mihing in hanciamna tawh gam sung kipuahphatna om ding a, tua tungtawnin Pasian’ gam hong piang ding hi, ci uh hi.

Mual Tung Thuhilhna in nuntakna kilamdangsak hi. “ Mual Tung Thuhilhna in theihkhialhna khempeuh puahpha hi. Pasian tawh kisai a kitelkhial thute hong hilh pha hi. Pasian’ zia le tong a kithei khialte hong hilh pha hi. Khrih’ thuhilhte in a tawntungin manpha hi. Mi khempeuh in Pasian Gam tawh kisai nunzia thute a theihtel ding uh kisam hi.” Ellen G. White, The Desire of Ages, 299.


Tua hi-in Mual Tung Thuhilh in Pasian Gam’ thukhunte hong hilh hi. Tua thute in Pasian hong theitelsak hi; Pasian in eite tung pan a hong lamet thute hong hilh hi. Hih leitung nunzia tawh kibang lo, a lamdang mahmah nunzia ding, Tawntung Gam nunzia ding hong hilh hi (Dan. 7:27).

MONDAY  APRIL  11

THUHILHNA LE THUKHAM ENKAK

Mi kimkhat in Mual Tung Thuhilhna pen Pasian Thukham a laih, Khrih hong piak thukham thak hi, ci-in ngaihsun uh hi. Gamtatna siksan biakna panin hehpihna siksan biakna hi, ci uh hi. Hih bangin ngaihsutnate in Mual Tung Thuhilhna tawh kituak lo hi.

Matt. 5: 17 – 19, 21, 22, 27, 28; James 2: 10, 11; Rom 7:7 sim in. Mual Tung Thuhilhna le Thukham 10 tawh kisai bang hong hilh hiam?
________________________________________________________________

________________________________________________________________

Craig S. Keener in hih bangin pulaak hi. “Jew mi a tam zaw in thukham pen hehpihna siksan hi; Khrih in hehpihna thu mah kisam hi. Vantung Gam in hehpihna siksan hi,” ci-in gen hi. Matt. 6: 12, 14; Mk. 11: 25; 10: 15; Lk. 11: 4 cihte bangci pulaak hiam? en in. Pasian’ukna thei-in amau le amau a kiniamkhiat tawm mite’ hoihna in tatkhiat ngah theih nadingin hong kicingsak zo lo hi (Matt. 5:48). Ahi zongin Zeisu in a tangko khiat vantung hehpihna in mi kiniamkhiatsak hi; a gilo mi diksak hi; lungkimna piangsak hi.” Tua lo-in mihing hong puahphat thei ding om lo hi. Craig S. Keener, The Gospel of Matthew, 161, 162.

Pian. 15: 6 sim in. Koi bangin upna tawh hotkhiatna kingah hi, ci-in na theitel hiam?
________________________________________________________________

________________________________________________________________

Khrih in a pulaak upna in upna thak hi lo hi. Mawhna a om a kipan tua upna kipulaak hi. Hun khat lai-in gamtatna tawh hotkhiatna kingahin, tu-in hehpihna tawh hotkhiatna kingah hi, ci-in Mual Tung Thuhilhna in hong hilh lo hi. A kipat pan tu ciang dong mah hehpih tawh hotkhiatna kingah hi, ci-in hong hilhzaw hi. Sinai Mual ah thumang ding a kisawl ma-un, Israel mite in San Tuipi a kantan dingun hehpihna tawh hotkhiat ngah masa uh hi (Pai. 20: 2).

Thukham zuihna hi lo, upna tawh hotkhiatna kingah hi, cih thu koi bangin Thukham in hong hilh hiam?

TUESDAY  APRIL  12

LAITHEITE LE PHARISEE DIKNA

Matt. 5: 20 sim in. Jesuh in note in laitheite le Pharisee-te sangin a hoih zaw na hih kei uh leh, vantung ki-ukna sungah na lut thei kei ding uh hi, cih thu in bang a pulaak hi ding hiam?
________________________________________________________________

________________________________________________________________

“Upna tawh hotkhiatna kingah hi,” ci-in Judaism in zong pulaak hi napi-in, thuzuihna a kilimgen luat ciangin, gamtatna siksanin kingaihsun kha pahpah hi. Khrih hun a biakna makai tampite in hehpihna, itna cihte sangin thuzuihna masak zaw uh hi. Tua in siatna tawh kipelhsak thei lo ding hi. Ellen G. White, Thoughts from the Mount of Blessing, 53.

Mihingte’ bawl tawm thukham, puatham, a limlawm gamtatna in nuntakna, gamtat zia le tong khel thei lo hi. Upna man i cih in itna siksanin gamtatna tawh kilangkhia hi. Tua bek mah in Pasian’ mai-ah san thamcing hong hisak thei bek hi.

Micah 6: 6- 8 sim in. Koi bangin Mual Tung Thuhilhna pulaak hiam?

________________________________________________________________

________________________________________________________________

Thuciam Lui sungah zong meihal biaknate in ngimna nei hi; Pasian’ hong itna, a zia le tong banah Amah a zui mite in tua itna le zia le tongte kilangsak ding ngimna hi. Tua dingin Pa Pasian tungah ki-ap kul hi; Ama hehpihna bek muan ngamna in hong zawhpih ding hi. Pharisee-te le laithei-te’ thuzuihna le upna in Topa nung a zui mite in etteh dingin kicing zo lo hi.


 “Upna bek tawh hotkhiatna kingah hi,” ci-in kiptakin a um mi, Khrih’ dikna bek in hong honkhia hi, ci-in teltakin thei phial mah taleh, gamtatna siksan thuzuihna tawh kipelh ing, na ci thei hiam?

WEDNESDAY  APRIL  13

VANTUNG GAM SUNGA THUKHUNPITE

Matthew 5: 48 pen Jesuh’ thuhilhte tawh kibanglo a tuam phadiak tawh kibang hi. Bang thupiak na mu hiam?
________________________________________________________________

________________________________________________________________

Mual Tung Thuhilhnate lak pan Matt. 5: 48 sunga thupiak in khengval lua hi, ci-in mi kimkhat in ngaihsun uh hi. Vantung a om na Pa uh a kicin mah bangin note zong kicing un. A khiatna, a deihna bang hi ding hiam?
________________________________________________________________

________________________________________________________________

“ Tua ahih ciangin” cih kammal in a kigen thute siksanin a pulaak nop thu khat om hi, cih pulaak hi. Matt. 5:48 ma-in bang thute kigen hiam? Matt. 5: 43 – 47 sim in. Koi bangin Matt. 5: 48 sunga thute hong telthei sak hiam? Lk. 6: 36 zong sim in.
________________________________________________________________

________________________________________________________________

Hih thupiak in a masa penpen thupiak hi lo hi. Siam. 19: 2 sungah zong tua bang thupiak om khin hi. Topa Pasian a siantho/kicin mah bangin note zong siangtho/kicing un. Tua hi-in vantung a om Pa Pasian in hehpihna tawh a kidim mah bangin note in zong hehpihna na nei un (Lk. 6: 36). Matt. 5: 48 sunga kigen thu in, thukham, thukipte bangin nuntakna sangin, tuate thupi mahmah taleh, itna nei ding, hong itte bek it ding hi lo, it huai lote zong it ding hong hilh hi.

A ki-ap mite’ sungah Pasian in a sep zawh loh ding thu a pulaak hi lo hi. Ama tungah ki-ap lo-in siatna tawh nungta-in, Ama aa ding bekin a nungta mi in bangci bangin a galte it ding thei hiam? It thei lo ding hi. Ahi zongin eite in leitung mite bang hi lo-in Pasian’ tate i hi hi. Pa Pasian tungah a ki-ap khempeuh “note sungah hih nasep hoih a hong pankhia Pasian in Jesuh Khrih hong paikik hun ciang dong, mi cingtaak na hih nadingun hong huh ding hi” ( Phil. 1:6). Pa Pasian in a hong it bangin amah i it ding sangin a lian zaw bang om ding hiam?

Tu mahmahin nang hong langpante, na galte it hi lecin, na nunzia a kilamdang diam?


THURSDAY   APRIL 14

VANTUNG PAN THUHILHNATE ZUI

Tua hi-in Mual Tung Thuhilh in Pasian Gam’ thukhunte hong hilh hi. Tua thute in Pasian hong theitelsak hi; Pasian in eite tung pan a hong lamet thute hong hilh hi. Hih leitung nunzia tawh kibang lo, a lamdang mahmah nunzia ding, Tawntung Gam nunzia ding hong hilh hi (Dan. 7:27). Khrih in mual tung pan bekin thuhilh hi lo hi. Israel gam mun tuamtuam panin zong vantung gam’ thu hilh kawikawi hi. Mihonpi in gungei ah omin, Khrih in gunkuang tung panin zong thuhilh hi (Matt. 13: 2). Khrih in a thuhilhte mite zak ding bek hi lo-in a nuntakpih ding uh ngimna tawh gentehna tuamtuam zangin thuhilh hi.

Matt. 13: 44 – 52 sim in. Mual Tung Thuhilhnate i nuntakpih nadingin

a thupi mahmah bang gentehna tungtawnin hong kihilh hiam?

_________________________________________________________________________

_________________________________________________________________________

A masa-in hepkhiat ding thunih hong hilh hi. Na thak khat ngah nading neih luisa khat paihkhiat kul hi. Tua suangmanpha ngah nadingin a neihsa khat zuak kul hi. Hotkhiatna kilei thei lo hi (Isa. 55: 1) Tua hi mah taleh tua gentehna in , tawntung nate sangin iplah zawk ding leitungah bang mah om lo hi, cih hong hilh hi. Tua hi-in Pasian tawh hong kikhensak thei na khempeuh hemkhia-in, Kha Siangtho i kep tawntung ding kisam hi, cih hong hilh hi (Rom 8: 5 – 10). Tua ding pen a baih hi lo hi. Singlamteh puak kul a, ‘kei’ ‘ angsung’ cihte a sih kul hi. Ahi zongin a hong kipia ding a manpha vantung nopna ngaihsun lehang vantung tawh kizopna hong khaktan thei khempeuh i kantan zo ding hi.


Matt. 13: 47 – 50 sim in. Tawntung nunna a hih kei leh tawntung sihna khat teitei ah i pai ding hi. Koi bangin gentehna na tel thei hiam?


FRIDAY APRIL  15

SINBEH DING: Ellen G. White, The Desire of Ages, 298 – 314, The Sermon on the Mount cih thulu sim in.

Matt. 13: 44 – 46 sunga gentehna khit ciangin gentehna dang khat kigen hi (Matt. 13: 47 – 50). Thuman thutakin tawntung nunna lampi hi-in meilipi sung ahih leh tawntung siatna hi ding hi. Kuamah in tuhun ciangin thuman thutak kin lo ding uh hi. Deihhuai penin kingaihsun nawn lo hi. Thu-um mite in tua bangin ngaihsut ding hi lo hi. Thuman thutak a om takpi hi-in, tua thuman in i nuntakna hong kilamdangsak hi. Lai Siangtho in a kip tawntung thuman thutak hong hilh hi. Jesuh mahmah in “keimah in thuman ka hi hi. Kei lo-in kuamah Pa kiang tung lo ding hi,” ci-in hong hilh hi (John 14: 6). Thuman a vekpi-in i thei nai kei hi. Paul in zong tua mah ci hi ( 1Kor. 13:9). Theih ding om lai cihna hi. Topa in tawntung sihna maw, tawntung nuntakna hong tunpih thuman maw, a kantel dingin hong sawl hi.

KIKUP DING DOTNATE :

1.     Mual Tung Thuhilhna bangin a kinuntakna mun in koi bang mun ahi zen diam? cih ngaihsun in.

2.     Galiliee Tuipi gei-ah kigen gentehna khatah mipil innlampa le mihai innlampa gentehna hi (Matt. 7: 24 – 27). Khuakhal hun sungin suang tung kilam inn le sehnel tunga kilam inn a kilamdanna kimu lo hi. Seh nel tunga inn lam pa in suang tunga innlam mahin kingaihsun kha hi ding hi. Guahzu-in tui a khan ciangin amaute kilamdanna hong kidawk ta hi. Khrih’ gen thute za-in a nuntakpih mi in suang tunga kilam inn tawh kibang hi. Sehnel tunga innlampa le Khrih’ gen thute za napi a nuntak pih lo mi kibang hi. Koi bangin i nuntakna ah huihpi in suang tunga inn maw, sehnel tunga inn maw, cih kilamdangsak hiam? Koi bangin ze-et gimna lakah na upna kip veve ding hiam? 


To get the latest update of me and my works

>> <<