Sabbath School Lesson 2 | Tatkhiatna Nasep Kipan

LESSON 2   APRIL 2 – 8

                            TATKHIAT NASEP KIPAN

SABBATH NITAK : 

TU KAAL SUNG SIM DING: Matt. 3: 1 – 12; 4: 1- 12, 17 – 22; 2Pet. 1: 19; Phil. 2: 5 – 8; Isa. 9: 1, 2.

KAMNGAH : “Zeisu in amaute kiangah “ Kei hong zui un; nga mat bangin pawl tampi ngah thei mi kong suaksak ding hi,” a ci hi. Matthai 4: 19.

“Ka nuntakna in man nei hiam, bang ngimna tawh a nungta ka hiam, koi bangin nungta ding ka hiam,”cihte mimal in sittel ding kisam hi. Khamtheiih guihtheih tawh kidim kum 17 a pha khangno khat in, “nuntakna in bang ngimna nei hiam cih thei keng,” ci hi. German mi minthang Paul Feyerabend in zong, “bang hangin nungta i hiam cih thei zo keng,” ci hi.

Lai Siangtho in bang hangin nungta i hiam cih thu hong hilh hi. Khrih in kipatna le mong nei lo Pasian hi-in, mihingin hong kiniamkhiatin, sihna thuakin, sihna pan thokik ahih manin mihing’nunna in manpha mahmah hi. Tu kaal sungin Khrih’ nunzia le a nasep in i nunna manphasak hi, cih thute i sin ding hi.

SUNDAY  APRIL 3

TUIPHUMPA  JOHN  LE  “TU LAI THUMAN”

Matt. 3 kipatna-ah tuiphum John thu tawh kipanin, ama thugen bulpi in ‘kisik un’ cih thu hi (Matt. 3: 2). Lam khat panin mawhna a om a kipan Pasian in mi khempeuh tungah a hong sawl thubulpi in mawhna kisik ding ahi hi.

Matt. 3: 2, 3, 6 sim in. Tuiphumna, kisikna, mawhthumna-te banah

John’ thugen in bang thubulpi pulaak hiam?

____________________________________________________________

_________________________________________________________

John in Thuciam Lui siksanin thugen hi. Sawltakte in kamsangte’ gen thute mah pulaak uh hi. Zeisu, Paul, Peter, John a kipan kamsangte’ thute in bang deih hiam cih thu hilh uh hi. Peter mahmah in zong kamsangte’ genkholh thute in thutak hi,’ cih pulaak hi (2Pet. 1:19).

Matt. 3: 7 – 12 sim in. John in makaite tungah bang thu pulaak hiam?

Khauh takin thuhilh taleh, lametna tawh kidim thuhilhna hi lo hiam?

_____________________________________________________________

_________________________________________________________

John in Khrih mah siksanin thuhilh hi. Khrih a pianzia, a thuhilh le a sep khempeuh hong hilh hi. Hotkhiatna tangko kawikawi-in, Thukhen Ni ciangin Pasian in tang le tahum khen ding hi. Thukhenna le hotkhiatna thu kikhen tuam thei lo hi. John mahin Khrih in mihingin a hong pianna thu le nih vei a hong pai kik nading thute zong hong hilh hi. Khat vei a hong pai-na tungtawnin nih vei-na hong pai hamtang ding hi.

MONDAY  APRIL 4

ZE-ETNA TUAMTUAM

“Tua ciangin Dawimangpa’ ze-etna a thuak dingin Kha Siangtho in gamlakah Zeisu a paipih hi.” Matt. 4: 1. Mawhnei mite a hong hotkhiat nadingin vanglian Pasian Tapa in Amah le Amah kiniamkhiatin, mihingin hong piang hi. Khrih in vantung pan a hawlkhiat Satan le a pawlte in Khrih ze-et hi (Mang. 12: 7 –9). A huh ding kuamah dang a om loh laitak hi, ci-in Satan in a ngaihsut laitakin Khrih in ze-et hi.

“Khrih le Satan kido-in vantungmite’ Mangpipa Khrih in Pasian a langdo vantungmite Makaipapi Satan hawlkhia uh hi. Satan in vantunga a omlai bang lo-in, tu-in ama omzia kikhel hi. A vangliatna a ngah kik theih nadingin hanciam mahmah hi. Ellen G. White, The Desire of Ages, 119.

Satan in Vanglian Pasian bangin a om noplam phawk in ( Isa. 14: 14). Zeisu in vantung liatna khempeuh nusia-in Amah le Amah hong kiniamkhiatsuk hi. Ama vangliatna ding bek a thei Satan le vangliatna khempeuh nusia Zeisu’ nunzia kilamdang hi lo hiam? A siangtho le a siangtho mite’ omzia kilamdang hi.

Isa. 14: 12 – 14 le Phil. 2: 5 – 8 enkak in. Zeisu le Satan kilamdan

zia na mu thei hiam?

________________________________________________________________________

________________________________________________________________________

Vantungmite in mawhnei lo Jesuh in vangliatna tawh kidim hi, ci-in thei uh a, tu-in Zeisu in a thuak ngei loh Satan’ ze-et a thuakna zong mu uh hi. Hih thu vantungmite in lamdangsa mahmah uh hi.

Satan in amah le amahin kiliansak tawm hi. Zeisu Khrih ahih leh a sih dongin amah le amah kiniamkhiat tawm hi. Hih thunihte tungtawnin bang thutak na mu hiam? Kiphatsakna tawh kisai bang hong hilh hiam?

TUESDAY APRIL 5

ZE-ETNA

Matt. 4: 1- 12 sim in. Ze-etna tawh kisai bang pulaak hiam? Bang hangin Zeisu in ze-etna thuak hi ding hiam? Bangci bangin ze-etna le hotkhiatna kizom hiam? Koi bangin Khrih in ze-etna zo thei-in, eite in ze-etna a thuak zo dingin bang hong hilh hiam?

________________________________________________________________

________________________________________________________________

Zeisu in tui kiphum dingin John kiangah vapai hi. John in Zeisu tui a phum ding nial hi. “ Ahi zongin Zeisu in ahi ding bang hisak in; thumaan khempeuh i tangtunsak ding kilawm hi,” ci-in a dawng hi. Tua ciangin John in a mang hi (Matt. 3: 15). Bang dingin Kha Siangtho in gamlakah Zeisu paipih hi ding hiam? Khrih in gamdaihna munah thungenin a om laitakin Satan’ ze-etna thuak hi. Ze-etna tawh kipelh nading thungen dingin hong kisawl hi.

Thumaan tangtun sak ding cih ciangin mihing in i etteh ding sep ding kisam khempeuh sem cihna hi-in, tua mah bangin Khrih in mawhna nei lopi mah eite’ etteh dingin tui kiphum hi. Gamlakah zong Adam bang mahin ze-etna tuak hi. Adam in a kantan zawh loh ze-etna a zozo dingin Khrih in vangliatna kisam hi. A mun a kibang lo hi mah taleh, Khrih in ze-etna a thuak manin Adam’ mawhna panin eite hong honkhia hi. Ellen G. White, The Desire of Ages, 117.

Khrih in ze-etna khempeuh zo ahih manin eite in zong ze-etna thu ah paulap zon ding hi lo hi. Ze-etna i tuah ciangin upna le ki-apna tawh a zo zo thei dingin hong kikoih hi. “Dawimangpa na nial un. Tua hi leh note kiang panin taikhia ding hi. Topa kiangah zuan un . Tua hi leh amah in note kiang hong nai ding hi,” cih kamciam hong kipia hi (James 4: 7, 8).

Paulap tuamtuam nei-in ze-etna zui lo zaw-a, mihing in Khrih’ dikna a kitangsapzia na phawk hiam? Khrih’ dikna in nang hong tuam kei leh, nangma dikna in bang a suak zen diam? Lametna bang nei ding i hiam?

WEDNESDAY APRIL 6

ZEBULUN  LE  NAPHTALI-TE’  GAM

Matt. 4: 12 sungah John in thong sungah a omna thu le a nasep nunung pen thute kimu thei hi. Hih hunin Khrih in nasep kipan hi. Khrih in bang hunin John thongkhiat lam thei hi, cih ciaptehna om ta kei-ta leh, Jesuh in Galilee ah a va pai laitakin John in thongkia hi (Mk. 1: 14 – 16; Lk. 4: 14). John in thuhilhin a vak kawikawi lai-in, Khrih in John thu va za kha hi thei ding hi. Khrih in kiniamkhiat takin hong nungta hi. Mi honpi lak pan kihem khia pahpah hi. Khrih in siatna pel khia pahpah hi. Tua hi kei leh lauhuai-na vive tawh kidim den hi.

Naphtali le Zebulun ngah ding leitang tawh kisai Matt. 4: 13 – 16; Isa. 9: 1, 2 sim in. Jesuh’ nasep tawh kisai bang thu hong hilh uh hiam?

_______________________________________________________________________

_______________________________________________________________________

Zebulun le Naphtali in Jacob sung pan a khangkhia mite le amaute’ tenna munte (Pian. 35: 23 – 26) kimu hi. Zebulun le Naphatali in a nungta Pasian nusia-in namdangte’ pasian tuamtuam bia uh hi. Kamsangte hih mi namnihte’ mawhna langpan tawntung hi. A sawt ciangin amaute kisik tuan lo uh ahih manin Assyrian’ khut sung tungin mun tuamtuamah kithehthang khin uh hi. Hih tawh kizomin Israel leitungah Gentile mite va teng uh a, Galilee gamah mi namcin hong om uh hi. Galilee gamah a minthang kamsang in Jonah hi-in, amaute kipuahpha dingin kamsangpa in hilh tawntung hi. Galilee gam in siatna tawh kidim hi taleh lametna khuavak tang tawntung hi (Matt. 4: 16). Bang bang mi hi taleh, Khrih in amaute hon dingin hong pai hi. A vanglian mah mah hi taleh, Khrih in hong kiniamkhiat hi.

Koi bangin “Mi khat gina kei, hotkhiat ngah ding kilawm kei” cih lungsim nial ding na hiam? Bang hangin hih bang ngaihsutna in khial hiam?

THURSDAY APRIL 7

TOPA IN  NGASA BENG MITE SAM

“Na mawhna uh kisik un. Vantung gam hong nai zo hi” (Matt. 4: 17). John mah bangin Zeisu in mawh kisik ding siksanin nasem hi. Mawh kisikna, Pa Pasian theihna kisam ahih lam zong pulaak hi. Khrih in hih thu mah tangko masa hi.

Matt. 4: 17 – 22 sim in. Koi bangin Khrih in mimal khat ciat hong sam hi, cih thu pulaak hiam?

________________________________________________________________

________________________________________________________________

Galilee gam minthang hi lo hi. Hih gam pan ngabeng mi li khang khia hi. Hih mi-lite in Pasian a’ dingin nungta hi, ci-in kingaihsun uh hi. Bang hang hiam cih leh tuiphum John nungzui khin uh hi. Ahi zongin tuiphumpa John in Galilee gam pan hong khangkhia midang khat ii nungzui dingin pulaak hi. Hih ngabeng mi li-te in Nazareth khua mi Zeisu kiang va naih uh a, amau tawh a om dingin Zeisu kiangah va ngen uh hi (Jn. 1). Amau hun lai-in rabbi a zui nuam mi khat peuh in rabbi kiangah ngen phot hi. Rabbi in tua bang ngetna a phal leh, tua mipa aa dingin manpha mahmah hi. Lunglut takin a thu ngai pah uh hi.

Hih mi li-te in Jesuh tawh kum khat bang kikhawl khin uh hi (John 1 – 5). Zeisu in lai thei lote ngabengte sam hi. Bang hang hiam cih leh lai thei lo, lungsim mawl, amau hun pupa’ ngeina cihte amau in sin kha lo uh ahih manin kiniamkhiat uhin hilh nop uh hi. Amau nisim nasep tawh buai-in miliante tawh kiza kim theihna a pia thei Vanglian Pa khat amau tawh kikhawlkhawm ahih lam phawk thei hi le-uh, Topa cihna mang lo-in a om kei ding uh hi. Vanglian khut in amaute’ nunna a lawn kul hi. Khrih in Amah tawh nasem khawm thei dingin amaute siamna pia nuam hi. Khrih in Amah tawh nasem khawm dingin bang mah lo mite mah hong sam hi. Ellen G. White, The Desire of Ages, 250.

FRIDAY APRIL  8

SINBEH DING

Thugensia khat in a thugen ding hih bangin zasak hi: “ Hong pai unla, Lai Siangtho a balkhia thugenpa hong en dih un” ci hi. Tua hi leh mi tampi va pai bilbel takpi hi. Tua leh thugen siapa zong mipi mai-ah dingin Lai Siangtho tawi-in, mite’ lamdangsa takpi-in, hih laidal in Thuciam Lui le Thuciam Thak kikhensak laidal hi, ci-in tua laidal balkek khia hi. Hih thugenpa’ gen bangin Thuciam Lui le Thuciam Thak in nih hi lo-in, a taktakin khat bek mah hi. Thuciam Thak sunga kigente Thuciam Lui’ gen thute mah hi. Thuciam Lui in Thuciam Thak sung thute mah gen hi. Zeisu mahmah in zong hih thu pulaak hi. Kamsangte’ gen thute tangtung hi, ci-in hilh hi (Jn. 5: 39; 13: 18; Lk. 24: 27; Matt. 22: 29). Paul in zong Thuciam Lui siksan hi (Rom 4: 3; 11: 8; Gal. 4: 27). Mangmuhna sungah zong Thuciam Lui mun 550 val bang siksan hi, ci-in kiciamteh hi. Thuciam Lui sunga meihal biaknate tu hun a dingin kimang nawn lo hi mah taleh, Thuciam Lui in Thuciam Thak sangin thuneu zaw lo hi. Lai Siangtho buppi in hotkhiatna thu hong hilh hi.

KIKUP DING DOTNATE:

1.      Satan in Zeisu ze-et den taleh, Khrih in khat vei bek ze-etna lel ngei lo hi. Bang hang hiam cihleh Zeisu in Pa Pasian’ kammal tawh tua ze-etnate do hi. Pasian’ kammal in vanglian hi. Zeisu in Topa hi mah taleh mawhnei mi-in hong nungta hi (Rom 8:3). Zeisu mahmah in Lai Siangtho siksanin ze-etna naang ahih leh, eite in bang zahin kisam zaw kan lo i hiam? Tua ding thei napi hangin, a taktak ciangin lah ze-etna sungah puk kha zel hi lo i hiam? Bangci-in ze-etna na nan zawh nading Lai Siangtho kimakaihsak ding na hiam?

2.      Bang hangin kiniamkhiat kisam hiam? Koi bangin kiniamkhiat thei ding na hiam? Koi bangin Singlamteh in a kiniamkhiat dingin hong huh thei ding hiam?