MUC

Print Friendly and PDF

Sunday, March 20, 2016

Sabbath School Lesson 13 | KILHLUPNA THUAKIN SIHNA PAN THOKIK


 LESSON 13   JUNE 18 – 24  

   KILHLUPNA THUAKIN SINNA PAN THOKIK          
SABBATH NITAK



TU KAAL SUNG SIM DING: Matt. 27: 11 – 26; 45, 46, 49 – 54; 28: 1 – 20; Jn. 3: 19; Isa. 59: 2; Heb. 8: 1 – 6.

KAMNGAH: “ Tua ciangin amaute’ kiangah Zeisu pai a, “ Vantung le leitungahthuneihna khempeuh kei hong kipia khin hi,” a ci hi. Matt. 28: 18

Britist gam magazine khatah bang kipulaak hiam cih leh “ mipilte sih theihlohna zatui a muh zawh khak uh leh thukan nadingin sih khit teh pumpi a pia nuam a om leh” ci-in tangko uh hi. Hih mipilte in sih khit ciangin pumpi sawtpipi koih theih nading zatui zongkhia nuam uh hi. Egypt mite in Pharoah a si khinte muat lo-in koih uh hi. Tua bangin bangci koih uh hiam cih mukhia nuam uh hi. Pasian’ thu-um mite a’dingin i sihkhitteh i pumpi bang piang ding cih patauh huai lo hi. A si khin a muat lo ding sangin a hing tawntung ding nunna kamciam i ngah khin hi. Khrih in i mawhnate hangin hong si-in, sihna pan thokik hi. A si mite lak pan a gah masa penpen Khrih hi (1Kor. 15: 20). Egypt mite bangin a si pumpi a muat lo ding sangin a hoih zaw, a si thei nawn lo pumpi le nunna hong kamciam khin zo hi.


Tu kaal sungin, i Topa’ hong sihna le sihna pan a thawhkikna in eite zong a si nawnlo ding pumpi le nunna hong kamciam hi, cih thu i kikum ding hi.

SUNDAYJUNE 19

ZEISU MAW BARABBAS

Matt. 27: 11 – 26 sim in. Mihonpite’ deihna zui manin bang thu piang a, mipi in amau’ deih a tel zawk manun bang piang hiam?

______________________________________________________________________

______________________________________________________________________

Mithatpa Barabbas singlamteh laizangah kikhai thuak ding hi zaw hi. A vei le taka migilote kikhai khawm ding hi zaw hi. Barabbas min a khiatna in ‘abbas ii ta’ ( pa ii tapa) cihna hi. “Bar’ cih min in Yeshua (Zeisu)cihna-in kizang hi,” ci-in kiciamteh hi. Yeshua cih min a khiatna in, “Yahweh in honkhia hi,” cihna hi. Tua hi-in Barabbas min a khiatna le Yahweh in honkhia hi, cih minin kizopna nei hi. A min’ khiatna le minneipa nasep kilamdang hi. Bar in amah le amah, “Messiah ka hi hi,” kici hi. Bar in kumpi gam khat phut ding kipan hi. Satan’khemna sungah nungta ahih manin guktakna le suamlupna tawh kivak hi. Dawigilote tawh kikopin nungzui tampi zong nei-a Rome kumpi langpan dingin kithawi hi. Biakna siksanin gitlohna tawh nasem hi. Pilate in hih migilo pa le mawhnei lo Honpa, khat zawzaw khahkhia dingin mipi telsak hi. Pilate in ama ngaihsutna ah mipi in Zeisu deihzaw dingin ngaihsun hi.” Ellen G. White, The Desire of Ages, 733.

Pilate khial hi. Kha Siangtho’ hong makaihna om kei leh mi a tamzaw deihna in thuman hi lo hi. Nang le kei in Barabbas, ahih kei leh Zeisu, sihna maw, ahih kei leh nunna i tel hun hong tung ding hi. “ Hih thukhenna in leitungah khuavak hong tung khin napi mite a gamtatna uh hoih lo ahih manin khuavak sangin khuamial a deih zaw uh hi” (Jn. 3: 19).

Bang hangin mite in khuavak sangin khuamial deih zaw uh hi ding hiam? Koi bangin nang zong na tua ci kha zel hiam? Koi bangin mawhnei ihihzia, Topa tungah ki-ap kitangsapzia hong phawksak hiam?

MONDAY JUNE 20

EITE’ TANGIN KILHLUPNA THUAK

“Nai guk a kipan nai kua ciangdong leitung bupah khimpi a zing hi. Nai kua pawlin Zeisu nakpi-in kiko a, “Eli Eli, lama sabachthani,” a ci hi. Tua in, “ Ka Pasian, ka Pasian aw, banghangin hong nusia na hi hiam” a cihna ahi hi (Matt. 27: 45, 46). Tua tau-na in bang pulaak hiam? Koi bangin nang mah a hong kitatkhiatna thu na phawk hiam? Lai Siangtho thukhuk kante in hih tau-na aw pen nawlkhiinna tuak, taisan cih kiphawkna aw hi, ci-in pulaak uh hi. Zeisu in Pa Pasian’ taisatna thuakin kingaihsun hi. Tua khimzing mialpi in Pasian in leitung a thukhenna limcing hi (Isa. 13: 9- 16; Amos 5: 18 – 20; Jer. 13: 16). Zeisu mahmah in mawhna’guu, Pa Pasian tawh kikhenna thuak hi. Eite’ thuak ding khempeuh Aman hong thuaksak hi. Khrih in mi khempeuh a’ dingin khat vei hong si hi. Amah hong kum kik ding a lamen mite honkhia ding hi (Heb. 9: 28; 2Kor. 5: 21). Singlamteh tung pan Zeisu in Late 22: 1 sunga kammalte mah pulaak hi. Mihing thuak ding kimlai, Zeisu in mawhna hangin Pasian tawh kikhenna thuak hi. “ Ahih hangin na khialhnate in na Pasian kiang panin hong khenkhia khin hi. Amah in hong zak loh nadingin na mawhnate in Ama maitang a liah hi.” Isa. 59: 2.

Kineih hi lo-in Zeisu in mawhna hangin Pasian’hehna thuak hi. Amah mah in mawhna’ guu thuak hi. Maizumna Amah mah in hong thuak hi. Pasian’ mai-ah mawhna in bangzahin siahuai hiam? Mawhmai i ngah nadingin Pasian Tapa in maizumna, gimna, sihna le Pa Pasian’ taisatna hong thuak hi. Tua mah tawh Zeisu in “ Ka Pasian, ka Pasian,” ci-in kiko hi. Bang bang thuak taleh Pa Pasian a muanna kiam lo hi.Pa Pasian’ taisatna thuak a kisa kha phial zongin a nunna a bei dongin Pa Pasian tungah citak hi.

Mawhna hangin Pasian tawh kikhenkhiat taktak mite in bang thuak ding hiam? Khrih’ dikna bek mah siksanin, i mawhna kisikin, thumin, mawhna nusiat ding hi-in, bang hangin Pa Pasian tawh kizopna lampi tua bek mah om hiam?

TUESDAY JUNE 21


BIAKBUK SUNG PUANPI KIKEKIN SUANGTE KITAM


Lungdamna Thubu’ gelhte in Zeisu thu a gelhzia uh a tuamtek hi mah taleh, a vekun Zeisu’sihna siksan uh hi. Matthew bek in siangtho mun le siangtho bel mun dalna puanpi kikekin, hankhukte kihong hi, cih pulaak hi.

Matt. 27: 49 – 54 sim in. Tua thupiangte in bang pulaak hiam? Lametna bang hong pia hiam?

_____________________________________________________________________

_____________________________________________________________________

Mi honpi in Zeisu zahpihin, “Elijah hong kumsuk henla Zeisu hong honkhia hen,” ci-in awng uh hi. A mipih Jew mite in Khrih in Messiah hi, ci-in um zo lo uh hi, cih kilang hi. Biakinnpi siangtho mun le siangtho bel mun kidalna puan a tung pan a nuai dongah kikeksuk hi. Tatkhiatna hun kikhel hi, cih limcing hi. Messiah limcing ganhing tawh biakpiakna kul nawn lo hi, cihna hi. Meihal biakna, thuciam lui biakpiakna sangin a hoih zaw biakpiakna hong hilh hi.

Heb. 8: 1- 6 sim in. Moses puanbuk thu bang hong hilh a, bang in mihingte’ bawl biakbuk tangin bang kizang hiam?

_________________________________________________________________________

_________________________________________________________________________

Khrih a sih laitakin biakbuk siangtho le siangtho bel mun a dal puan kikek banah suang lian pipite puakkham gawp-in, a si mite pawl khat nungta kik uh hi. Mawhna hangin eite’ munah hong si Khrih sihna a kheng zo ding bangmah om lo hi. “ Bawngtal sisan le keltal sisante in mawhnate a lakhia thei kei hi” (Heb. 13: 4). Zeisu bek mahin mawhna’ thaman sihna zo thei hi. I mawhna hong lakkhiatsakin sihna pan thokik a, a kamciam sihna pan thawhkikna sangin kamciam hoih zaw om lo hi. Tua kamciam lo-in bangmah lamet ding nei i hiam? (1Kor. 15: 13, 14, 19). Thawhkikna masa ah bang zah hong thokik ding i thei khol kei hi. Ahi zongin tua thawhkikna kamciam i nei hi.

WEDNESDAY JUNE 22

SIHNA PAN A THOKIK ZEISU

Khristian’ upna in singlamteh tungah Zeisu hong sihna banah sihna pan a hinkikna bulphuh hi. Khristian banah Khristian mi lo mi tampi in Nazareth khua mi Zeisu in singlamteh tungah sihna thuak hi, ci-in um uh hi. Zeisu khit deuhin a nungta Rome leitung tangthu kan mipil Tacitus in zong hih bangin pulaak hi: “Nero in Khristian tampi bek singlamteh tungah khailum hi. Khristian cih min hong kipatkhiatna Christus min nei mipa in Khrih a upna hangin Tiberius ukpi hun sungin Pontius Pilatus in thatna thuak hi.Tuhun teh Zeisu in singlamteh tungah kilhlupna thuak hi, cih thu pen uphak hi nawn lo hi. Tua hi napi, mi tampi in up dingin hamsa a sak uh thu in ‘sihna pan Zeisu a thawhkikna thu ahi hi. Friday ni-in si-in Sunday ni-in thokik hi. Singlamteh tungah kilhlup thuak bel mi tampi om mah hi. Ahi zongin kuamah hingkik lo hi. Ahi zongin singlamteh tung kilhlupna thuak Jew mi khat in sihna pan thokik!

Ahi zongin Khrih in sihna pan thokik hi, cih upna lo-in na khempeuh in mannei lo hi. Paul in “ Khazih a thokik lo hi leh kote thugen a mawkna hi ding a, note’upna zong a mawkna mah ahi ding hi. Hih leitung nuntakna aa ding bekin Khazih sungah lametna a nei i hih leh mi khempeuh lakah a hehpihhuai pente i hi hi” (1Kor. 15: 14, 19). Zeisu si-in, sihna pan thokik pah hi. Tua thawhkikna bek mah eite’ lungmuanna pen ahi hi. Sihna pan thawhkikna thu tawh kisai thunih kimu thei hi. Khatna ah: Khrih’ nungzui mite in nisimin Khrih a phawkna uh a thaksuah tawntung nadingin Ama nungzuite khatin a hong gelhkhiat ahi hi. Nihna ah: Khrih pen sihna pan tho takpi mah hi. Mi kimkhat in zong a thokik Khrih mu uh hi.

Matt. 28: 1 – 15 sim in. Bang hangin Zeisu in a Nungzuite tungah “lungdam un,” ci hi ding hiam? A nuam mah ding uh hi. A Topa uh si in, sihna pan thokik hi mawk hi ven. Ahi zongin Khrih a thawhkikna hangin i nuamna a hang bang hi ding hiam?

THURSDAY JUNE 23

“SAWLNA LIANPI”

Zeisu in vanah kahto-in tatkhiat nasep pen mihingte tungah a hong ap hi. Hih pen a telhak khat ahi hi. Nungzui masate mah bangin Khrih’ deihna bangin nuntak loh manin lungkia thei zel hi lo i hiam? Hi mah taleh Khrih in hong itin i tangsapna khempeuh hong pia hi lo hiam?

Matt. 28: 16 – 18 sim in. “Vangliatna khempeuh kei tungah hong kipia khin hi,” cih thu le Dan. 7: 13, 14 sung thute enkak in. Koi bangin kizopna nei hiam?

_____________________________________________________________________

_____________________________________________________________________


Matt. 28: 19, 20 sim in. Zeisu in bang thu hong vaikhak hiam? Tuhun a’dingin hong kipia mah hi, na ci hiam?

___________________________________________________________________________

___________________________________________________________________________

“Zeisu in van a kahtoh laitakin tua Olive mual ah thu-um mi 500 kim bang om ding hi,” ci-in Ellen G. White in gen hi (1Kor. 15: 6). Zeisu in hong piak “Sawlna Lianpi” pen Nungzuite a’ding bek hi lo-in eite tungah zong hong kipia thupiak ahi hi. Tatkhiat nasep pen siate, pastorte bekin a sep ding hi, ci-in ngaihsut khak pen khialhna lianpi khat hi. Pa Pasian a um mi khempeuh tungah muanna tawh hong kipia thupiak hi zaw hi. Zeisu a nei mi khempeuh in mite tungah tua tatkhiatna thu a gen ding uh amau masuan hi. Tua nasep a sem dingin pawlpi kiphut hi. Khrih tungah ki-ap khempeuh in Amah tawh nasem khawm dingin ki-ap ahi hi. Ellen G. White, The Desire of Ages, 822.

Khrih tawh nasem khawm mi-in na kingaihsun kha ngei hiam? Koi bangin tatkhiat nasep ah kihel ding na hiam?

FRIDAY JUNE 24

SINBEH DING: Lungdamna Thubu gelh dangte mah bangin Matthew in zong Zeisu sihna pan a thawhkikna thu gelh hi. Khristian thu-upna ah a thupi mahmah ahih hangin, Mark, Luke le Johnte mah bangin Matthew in thawhkikna in bang deihna nei hiam cih bang mah pulaakna nei lo hi. Ahi zongin Paul in tua thu tawh kisai limtakin hong hilh hi. “ Tu-in ahih leh misite lak panin Khazih thokik khinzo a, a ihmu khinsa mite lakah gah masa a suazo hi. Mi khat hanga sihna hong tun mah bangin misite thawhkikna zong mi khat hang mahin a hong tung ahi hi. Bang hang hiam cihleh Adam sungah mi khempeuh a sih bangin Khazih sungah mi khempeuh a kinungtasak ding hi” (1Kor. 15: 20 – 22). Hih bangmahin Peter in zong “Tui pen note a hong honkhia tuiphumna lim hi a, pumpi panin nin sawpkhiatna lim hi loin, Jesuh Khrih thawkkikna hangin lungsim siantho nadingin Pasian’ tungah kamciamna lim a hi hi. Tua Jesuh thawhkikna in note hong honkhia ahi hi” (1Pet. 3: 21).

Bang hangin Lungdamna Thubu gelhte in thawkkikna thu in bang deihna hiam cih a pulaak lohna uh a hang pen amau’ gen thute pen thuman thutak hi, cih a pulaak uh hi zaw hi. Bang hangin thawhkikna thu a ki-up nadingin thupiang a neng a tawngin pulaak lo uh hi ding hiam? A piang taktak mah a hi diam? Ahih kei leh a kilawmsakna hi ding hiam? Tuate pulaak lo-in a piang bangbang a pulaak uh ahi hi.

KIKUP DING DOTNATE:

1.   Singlamteh tungah Khrih a sihin biakinnpi siangtho mun le siangtho bel mun dalna puan kikhek hi. Tua a kipan Thuciam Thak, Siampi Thak Jesuh Khrih nasep kipan ding hi ta hi: “Tua ahih ciangin sanggamte aw, Jesuh hong sihna hangin Siangtho Pen Munah uttuin luttheih nading thu i neita hi. Ama pumpi mahmah ahi dalna puan tawnin nuntakna lampi-ah i pai theih nadingin amah in lampi thak hong honsak hi. Pasian’ inn sung a uk siampi lianpen zong i nei hi” ( Heb. 10: 19 – 21). Koi bangin Khrih in na Siampi Lian hi, ci-in na phawk hiam?

2.   Koi bangin Matthew Thubu in Zeisu’ thuhilhte hong theitel sakin, Khristian hoih khat hong hisak thei hiam? 

To get the latest update of me and my works

>> <<