LESSON 12 JUNE 11 – 17 ZEISU’HUN NUNUNGTE
SABBATH NITAK
TU KAAL SUNG SIM DING: Matt. 26: 1- 19, 36 – 46, 51 – 75; Lk. 12: 48; 1Kor. 5:7.
KAMNGAH: “ Tua khit ciangin Zeisu in amaute kiangah “ Tu zan ciangin keima hangin na vekpi un na puk ding uh hi. Bang hang hiam cihleh Lai Siangtho sungah ‘Tuucingpa ka satlum ding a, Tuuhonte a kithehthang ding uh hi,” ci-in a kigelh hi.” Matt. 26: 31.
Zeisu in singlamteh tungah sihna thuak ding hi ta hi. Leitung piancil a kipan na khempeuh a’dingin a thupi mahmah hun hong tung ding hi ta hi. Tu kaal sungin i kikup ding thu in deihtel theihna le suahtakna thu hi. Koi bangin piakkhong deihtelna le suahtakna kizang a, tua tungtawnin a gah bang ki-at cihte zong i kikum ding hi. Peter, Judah le Zeisu’ khe sathaunilh numei cihte tung panin i sin ding thu om hi. Tuate lak pan Zeisu in a’ nunna pia dingin a khensatna thu mah lian pen hi. Zeisu in “ Pa aw, hih hai tawh hong kipelhsak in. Ahi zongin keima’ deihna bang hi lo-in, nangma’ deihna bang hi zaw ta hen,” ci-in thungen hi (Matt. 26: 39).
Mihing in piakkhong letsong suahtakna a zatkhialh manin Zeisu hong sihlawh hi. Ahi zongin Zeisu in Ama suahtakna a hong zat manin a tawntung mangthang ding kimlai tawntung nuntakna lampi hong bawlsak hi.
SUNDAY JUNE 12
A KILAWM NA HOIH SEM
Zeisu in singlamteh tungah kikhai lumin, sihna pan a thokik Honpa hi, ci-in kilang ding hi. Nungzuite in Zeisu le a sep a bawl a kipan a thuhilh khempeuhte tungtawnin Zeisu in kua hi-a, bang sem lai ding cihte a theihbeh ding uh om lai hi. Paul in tatkhiatna thu hong hilh ahih manin, nungzuite sangin, tu-in tatkhiatna thu kicing zaw-in i thei thei hi.
Matt. 26: 1 – 6 sim in. A manpha mahmah letsong i tel nading bang hong hilh a, koi bangin Zeisu kizopzia ding pulaak hiam?
______________________________________________________________________
______________________________________________________________________
Jerusalem khuapi ah gualzo takin lutin, kithahna a thuak madeuhin Zeisu’ khe sathau kinilh hi. Ama mipihte mahmah in thah ding a vaihawm laitakun, Amah a na it mahmah mi zong na om a, Mary in Zeisu a itna a manpha mahmah sathau nilhna tawh va lak hi. Nungzuite in tua sathau mawk bei hi, ci-in Mary mawhsak uh hi. Ahi zongin Zeisu in Mary’ nasep pen manpha-sa mahmah hi. Innsung khempeuhah sathau namtui kizel hi. Mary in Zeisu a itna kilangkhia sak hi. A sathau nilh in bang limcingin, bang khiatna nei cih Mary thei lo hi mah taleh, Zeisu tungah leiba lianpi khat a neih lam kiphawk hi. Tua hangin a piak theih zah sit lo-in pia khia hi. Mary in “tampi kipia mi tung panin a tam kisikkik ding a, tampi a ki-apte tung panin a tam zaw a kingen kik ding hi,” (Lk. 12: 48) cih thu ngaihsun hi kha ding hi. Nungzuite in Mary’ nasep sangin a lianzaw Zeisu’nasep telthei lo uh hi.
“ Sathau in lungsim takpi tawh piakkhiatna limcing hi. Vantung itna guntui hangin lungdamna limcing hi. Nungzuite in pammaih a sak uh Mary’sathua in lungdamna pulaak hi. Mi tampi in a lungdamna uh a khitui uh tawh pulaak uh hi. Ellen G. White, The SDA Bible Commentary, Vol. 5., 1101.
Mary kipiakna in Zeisu tungah i lungdamzia ding bang hong hilh hiam? Tatkhiatna hangin Topa tungah piaknopna tawh bang pia ding na hiam?
MONDAY JUNE 13
THUCIAM THAK
Matt. 26: 17 – 19 sim in. Bang hangin Paisan Pawi hun tawh kituakin thupi hiam? Pai. 12: 1- 17; 1Kor. 5: 7 zong sim in.
_________________________________________________________________________
_________________________________________________________________________
Israel mite in sehnel gam sung zin kawikawi-in Egypt pan paikhiatna in Tatkhiatna limcing hi. Mihing in amah le amahin kitankhia tawm thei lo ahih manin Pasian’ hong tatna limcing hi. Zeisu mahmah in a hong tatkhiatna limcing dingin tu-in limciinna khat Nungzuite tawh nei khawm dingin kithawi hi.
Matt. 26: 26 – 29 sim in. Zeisu in Nungzuite bang gen hiam? Zeisu’ kammalte in nang le kei a’dingin bang pulaak hiam?
________________________________________________________________________
________________________________________________________________________
Zeisu in Paisan Pawi ii deihna taktak pulaak hi. Egypt panin suahtakna pen Topa Pasian’ vangliatna kilatna hi-in, na khempeuhte’ Topa ahihna zong hong hilh hi. Tham lo-in Hebrew mite bek hi lo-in tatkhiatna kisam mi khempeuh a hong tatna pulaak hi. Tawntung nuntakna, Zeisu’ hong tatna a kisam vive i hi hi. Hih thu hangin Amah mah in Pa Pasian le mawhnei mite kikaalah palai hong semin, eite a’dingin mawhthumna nei hi. Amah a um khempeuh in tawntung nunna kamcian a ngah nadingun a nunna hong pia hi. Tua in Thuciam Masa zong kicingsak hi (Heb. 9: 15).
Zeisu in lenggahtui in Ama’ sisan, khomun in Ama pumpi limcing hi, ci-in hong hilh hi. Hihte in singlamteh tunga a hong sihna pulaak hi. Ganhing tawh biakpiakna in a piang nai lo thu limcing hi-in, tu-in ‘Khomun’ ahihleh a beikhinsa thu hong phawksak hi. A nihin singlamteh tunga Zeisu’ hong sihna pulaak hi. Khrih in singlamteh tungah a hong sihna in a tawpna hi lo hi. Nungzuite tungah “Ka Pa’ Kumpigam-ah note tawh lenggahtui a thak ka dawn ni matengin tu a kipan ka dawn nawn kei ding hi,” ci-in kamciam pia hi (Matt. 26: 29). Hih in Khrih nihvei hong kum kik khit hun hong lak hi.
Khrih in vantung Pa Kumpigam-ah eite tawh lenggahtui a thak a dawn ni matengin tu a kipan ka dawn nawn kei ding hi, cih thu ngaihsun in. Khrih tawh kizopzia ding bang pulaak hiam? Bangci bangin tu mahmahin tua kizopna na nei ding hiam?
TUESDAY JUNE 14
GETHSEMANE
Paisan Pawi sungin siampite in biakinnpi ah biakpiakna dingin tuu a tul tampi go uh hi. Tuu’ sisante la-in biakna tau ah sungkhia uh hi. Biakna tau panin sisante Kidron Zangkuam ah luangkhia suk hi. Kidron Zangkuam sisan tawh kidim hi. Zeisu le Nungzuite in sisan dim Kidron Zangkuam kantanin Gethsemane huan lam zuanin hong pai uh hi.
Matt. 26: 36 – 46 sim in. Bang hangin Zeisu in Gethesemane huanah a tuahkhak thute hamsa sa hi ding hiam? Bang thu piang taktak hiam?
_________________________________________________________________________
_________________________________________________________________________
Zeisu in Pa Pasian tungah ‘a hih theih leh hih hai tawh hong kipelhsak in’ ci-in thu a nget laitakin sih ding a kihta hi lo hi. Pa Pasian tawh a tawntung kikhenna ahih khak ding lau hi. Mawhnei mite a sih tangin Amahmah a si dingin mihingin hong piang ahih manin tua mawhna in Pa Pasian tawh tungtawn kikhenna suaksak ding hi, ci-in ngaihsun hi. A siangtho Pasian’ thukham a palsatte in tawntung sihna thuak ding uh ahih manin, tua mawhna’ thaman Amah mahin hong pua ahih manin tawntung manthan nading panin i suakta hi. Tua tawntung manthanna pen mah Zeisu’ lunggimna lianpen ahi hi.
Pa Pasian tawh hong kikhensak mawhna hangin Khrih in gimna lianpi thuak hi. Satan in Zeisu kiangah, ‘mawhnei mite a’ dingin na nunna pia lecin a tawntungin Pa Pasian tawh kikhenna suak ding hi,”ci-in ngaihsutna guan hi. Satan ukna sung tungin Pasian tawh kipawl thei nawn lo ding hi, ci-in ngaihsutna guan hi. Tua bang hun laitakin leitung le na khempeuhte a’dingin khensatna lianpi kisam hi. Khrih in a dawn ding tua hai nial thei hi. Pa Pasian’ sawlna nial ding hi leh nial theihna hun nei lai hi. Zeisu in “ Mawhnei mi-in a mawhna’ thaman thuak hen. Kei ka hih leh ka Pa kiangah kileh kik ning,” ci nuam leh a hi thei thu hi. Pasian Tapa in kinengniamna le gimna thuak takpi ding hiam? Mawhnei lo Zeisu in mawhnei mite tawntung sihna pan honkhia dingin sihna thuak ding hiam? Ellen G. White, The Desire of Ages, 687, 690.
WEDNESDAY JUNE 15
JUDAH IN TAWNTUNG NUNTAKNA ZUAK
Bang zahin Judah’ nuntakzia dahhuai hiam? Jerusalem ah a va pai ma-in si zaw leh mi siangtho-in kiciamteh zaw ding hi. Amah phawkna-in biakinn hoih pipi kilam khin kha ding hi. Ahi zongin ama min kilawh sialin ciampel, mi zuakpa-in kiciamteh hi.
Jn. 6: 70 le Lk. 22: 3 sim in. Koi bangin Judah’ gamtatzia hong telsak hiam?
_____________________________________________________________________
_____________________________________________________________________
Judah’ gamtatzia pen Satan a ngawh om kha mah ding hi. Ahi zongin Judah in Satan’ deihna bangin a gamtat ding nial thei hi. Satan in ama nasem dingin Peter zong zawn hi ( Lk. 22: 31). Peter le Judah kilamdang hi. Judah in Topa tungah ki-ap lo hi. Topa tungah mawhmai ding ngen lo hi. Ama deihna khahkhia nuam lo hi. Hih munah deihtel theihna kimu thei hi. Judah in ama deihtel theihna zui-in gamta ahi hi.
Matt. 26: 47 – 50 le 27: 1 – 10 sim in. A dahhuai Judah’ nunzia tungtawnin bang thu na mu hiam?
______________________________________________________________________
______________________________________________________________________
Judah in galkap 600, siampite le upate makaih hi. Mi khat peuh ii deihna bangin a sem khia thei dingin mite in nang a hong muan uh ciangin amau’ deih a tunpih dingin sep theihna na khut sungah om hi. Amau deih na neih lai siah pawl na nei ding a, ahi zongin amau deih nasepsak zawh nawnloh, amau deih na neih nawnloh hun ciangin, nang hong kinusia ding hi. Judah zong mite’ nusiat thuak hi.
Judah in bang tawh a nunna khek hiam? Sumtang 30? Tu hunin kha khat le a lang sep thaman khawng bek hi ding hi. Bang bangin manpha ta leh, a nunna taan hi lo hiam? A sum ngah teng beek nopsakpih leh tua bek mah meet lawh ven cin! A nuntakna taan sawnsawn! Judah in tawntung nuntakna taan ding ama khensat hi. A ngah sumte a paihmang zong ama khensat mah hi.
THURSDAY JUNE 16
PETER’ NIALNA
Judah in ama deihtelna tawh Zeisu nial ding hi cih pen Zeisu in theikhol hi. Pasian’ theihkholhna in mihing’ deihtel theihna khaktansak lo hi. Zeisu in Judah in a Topa nial ding a theih kholh mah bangin Peter in zong a Topa a nial ding thei khol hi.
Matt. 24: 51 – 75 sim in. Bang hangin Peter in Zeisu nial hi ding hiam?_____________________________________________________________________
_____________________________________________________________________
Peter lau ahih manin Zeisu nial hi. Ahi zongin a taktakin Peter in hangsan takin Rome galkapte do dingin temta dokkhia ngam hi (Jn. 18: 10). Zeisu in a taai masiah Peter in do sawm hi. Tua zahin a hangsan Peter, tu-in, bang in a lungsim khelin, Zeisu a nial dongin meidawi-sak hi ding hiam? Bang hangin Peter in, ‘ kei, Ama nungzui hi keng. Ken, amah thei kha keng” ci hi ding hiam (Matt. 26: 72). Peter in Mihing Tapa theitel taktak nai lo, bang hang a hong pai, bang hangin matthuak cihte tel zo lo hi kha ding hi. Patau ahih manin, “Galileei Mipa na thei hiam ci-in a kidot teh ka thei ngei kei hi,” ci-in nial hi. Zeisu in bang sem cih Peter in thei lo hi. Peter in Zeisu pen guallel ta ding hi, ci-in ngaihsun kha ahih manin tua munah Peter in Zeisu nial kha mawk hi. Peter in Zeisu kiangah ‘Nang in Khrih na hi hi’ ci-in pulaak napi, Khrih tung panin nalamdang tampi zong mu hi. Ahi zongin Zeisu tungah a ki-ap sangin, amah le amah kimuang khial hi (Matt. 16: 16). Pasian tungah ki-ap sim loh nalamdang in citakna hong nei thei sak tuan lo hi.
Peter in Zeisu thum vei a nial laitak mahin Zeisu kihei-in Peter tawh maitang kituahin en hi (Lk. 22: 61). Zeisu in Peter’ maitang bek en hi lo-in a lungsim ngaihsutna dongah en hi (Jn. 1: 42). Peter mah bangin lampial kha mah ta lehang Zeisu sungah lametna nei thei lai veve hi lo i hiam?
FRIDAY JUNE 17
SINBEH DING:
1958 kumin migilo nih in Kansas khuapi ah pata nih that uh hi. Mithatte kimatma-in thahna thuak pate’ pano in bang pulaak hiam cih leh, “ mithatte khailup ding hi,” ci-in a gen ka za hi. Tua bang hih kei ni. Migilote’n mi that khin hi. Amau i thah hangin a si khinte hong nungta kik lo ding hi. Pa Pasian in i mawhna hong maisak mah bangin amau’ mawhna zong maisak ni. I lungsimah thangpaai-in phulak ding ngaihsun kei ni. Migilote in lungnopna a ngah nadingin mawhmaisak Pasian kiang zuan uh hen. Lungnopna a ngah nading thungetsak zaw ni,” ci-in pulaak hi. Truman Capote, In Cold Blood, 124.
Mi khempeuh sih ding tawh pelh theihna dingin Khrih in hong hehpih hi. Peter in Zeisu a nial teitei hangin Khrih in Peter’ mawhna maisak banah Ama nasem dingin sawl hi. Peter in Zeisu a theilhtel loh hangin a Topa in Peter’ lungsim tel lua mahmah hi. Peter in amah le amah a kitel loh hangin Zeisu in Peter’ nunzia a theih loh khat zong om lo hi. Ellen G. White, The Desire of Ages, 713.
Peter in Zeisu a theihma-in Zeisu in Peter thei khin hi.Peter in ama sep ding a theihma-in Zeisu in Peter’sep ding khempeuh mukhol khin hi. Tua pimah Zeisu in Peter nusia lo-in, hehpihin, a itna lak veve hi. Mi tawh kizopna ah zong hehpihna nei-in, a mawhna uh maisak ding thupi mahmah hi.
KIKUP DING DOTNATE:
1. Nuntakna kikhelna khempeuh thuhoih tawh zawhna vive hi. Koi bangin tua zawhna na ngah hiam?
2. Gethsemane huanah Zeisu in, “ a hih theih leh hih hai tawh hong kipelhsak in” ci-in thungen hi. Bang hangin mihingte a hong tat nadingin a nunna piak kul hi ding hiam? Bang hangin mawhna pua Zeisu a hong sih kul sese hi ding hiam? Bang hangin Pasian in mihingte a hong tatna dingin lampi dang vaihawm lo hi ding hiam?
