MUC

Print Friendly and PDF

Sunday, March 20, 2016

Sabbath School Lesson 11| Hun Nununga Thupiang Dingte

LESSON 11      JUNE 4 – 10   

       HUN NUNUNGA THUPIANG DINGTE 

 SABBATH NITAK

TU KAAL SUNG SIM DING: Pai. 19: 5, 6; Matt. 23, 24; Jn. 12: 20 – 26; 14: 1- 4; 1Thess. 4: 16.

KAMNGAH: “ Amah le amah a kilamsang mi peuhmah in niamkhiatna thuak dinga a kiniamkhiat mi peuhmah a kilamsang ding hi.” Matthai 23: 12.

Khristian thu-um mite’ lamet lianpi bel in Zeisu nihvei a hong pai kik nading ahi hi. Khatvei a hong pai-na le singlamteh tungah a hong sihna in nihvei a hong pai nadingin manpha hi. Khat vei a hong pai-na om kei leh, nihvei-na hong pai lo ding hi. Mihingte a hong tatkhiatna dingin a nihin kisam hi. Khat vei hong pai khin hi. A beikhin thu hi. Tu-in a hong paikik ding lamenin i ngak hi.


Tu kaal sung i kikup ding thu in: Matthew 23 sunga Khrih a nihvei-na hong paikik ding thute hi. Zeisu in Jew makaite tungah kisik ding thu le amah Honpa-in a up ding uh hanthawn hi. Matt. 24 ah nih vei a hong pai ma-a thupiang dingte kigelh hi. Zeisu in Jerusalem kisiat nading a thupiang dingte le Amah nih vei-na hong pai kik madeuha thupiangte genkhawm hi. Gal, kial le gimna tuamtuamte hong tung ding hi mah taleh, Mihing Tapa hong paikik ding kamciam in lametna le lungmuanna hong ngahsak hi (Matt. 24: 30). Bang bang gimna i tuak kha zongin lungdam nading thu i nei hi.

SUNDAY JUNE 5

LAMLAK MITTAWTE

Zeisu in vangliatna tawh Israel mihonpi Jerusalem khuapi ah lutpih hi. Muvanlai in a note a mapi bangin Topa in Egypt gam panin Israel mite paikhiatpihin Ama mi-in koih hi. “Tu-in ka thu khempeuh nong man kima, ka thukhun na zuih leh, tua ciangin minamte khempeuh lak pan ka gamh neih na hi ding uh hi. Leitung buppi kei aa ahi ta zongin note kei a dingin siampi gam khat le minam siangtho khat na hi ding uh hi, hih thute Israelte tungah na gen ding hi,” a ci hi (Pai. 19: 5, 6).

Zeisu in Israel mite’ tungah Sinai mualtung panin kamciam hi. Pai. 24 ah Israel’ makaite kiangah “ upa sawm sagihte pai to uh a, Israelte Pasian a mu uh hi. A khepek nuai-ah Sapphire tawh kibawl, van banga siang suangphah a om hi…… amaute in Pasian mu uh a, amaute in a ne a dawn uh hi. (Pai. 24: 9 – 11). Tangval khat in a tenpih ding nungak khat tawh thuciam a bawl bangin, Israel in vanglianin a nopsak nadingin, Khrih in amaute tawh kithukimin thuciam bawl hi.

Khrih le Israel mite’ thuciam siksanin ngaihsun inla Matt. 23 sim in. Zeisu in Israel makaite tungah bang thu gen hiam? Khrih in amaute bang vauhilh hiam? Tuhun thu-um mite bang hong hilh hiam? Bangci bangin Israel mite’ khialhna na khialh loh na’ngin kidawn ding na hiam?

______________________________________________________________________

______________________________________________________________________

Israel mite tawh kipawl khawm ding Zeisu in a sap nunung pen hi ta hi (Matt. 23). Ahi zongin a it Israel in taisan veve hi. Zeisu in amau’ khensat bangin koihin, biakinnpi panin pusuakkhia hi. “ En un na inn uh a hawmmangsa-in kinusia hi” ci hi (Matt. 23: 38). Zeisu in Jerusalem biakinnpi nusiata hi. Biakinnpi in tu-in a kisia ding hi ta hi. A kitaisan biakinnpi suak ding hita hi.

Na khempeuh kilamdan ding hita hi. Biakna makaite le mi honpi in Messiah a phawk kha lo ding uh hita hi. Ahi zongin a sawt lo-in Jew makai pawl khat le Gentile mite in Kha Siangtho kimakaihsak ding uh hi ta hi. Tua ciangin amaute in Abraham’ ta taktak hong suak ding uh hi. Topa’ kamciam amaute tungah tangtung ding hi ta hi (Gal. 3: 29). Tu-in zong eite in Pasian’ hong sapna ngah hi lo i hiam?

MONDAY JUNE 6

HUN BEI KUANIN A PIANG DING THUTE

Zeisu in Jew makaite a taihilh khit lianleh, mi khat Ama kiangah hong pai-in, ( Jn. 12: 20 – 26), “Gentile pawl khat in nang hong mu nuam uh hi,” ci-in Zeisu kiangah kigen sawn hi. Hih Gentile-te pen Zeisu tungah a citak Gentite mite hi. Hih ma-in Jew makaite in Zeisu nial uh hi. Ahi zongin tua thu in Gentile tampi in Zeisu upna piangsak hi. Zeisu in biakinnpi kisiat ding a pulaak khit teh hih bangin Gentile-te in Zeisu um uh hi. Jew hi taleh Gentile hi taleh a kibangin tatkhiatna ngah ding uh hi, cih pen Pasian’vaihawm ahi hi.

Matt. 24: 1 – 14 sim in. Zeisu in a citak thu-um mi hi taleh, leitung mite tungah bang thu pulaak hiam?

_____________________________________________________________________

_____________________________________________________________________

Nungzuite in Zeisu kiangah Ama hong pai kik madeuh le leitung hun bei kuan cianga thupiang dingte a dotna uh Zeisu in a dawnkikna thute i mu hi. Zeisu in Jerusalem kisiat ding le leitung hun bei kuan a thupiang dingte tuamkhen lo hi. Anihin gawmkhawm hi. Zeisu in a muhkholh bangbangin a pulaak hi leh, nungzuite lau-in cimawh lua ding uh hi. Zeisu in amaute a hehpih manin a piang ding thute nungzuite in amau le amau-in kantel ding thupia hi. Zeisu in tua bangin a genkholh ciangin nungzuite tung beka a gen hi lo-in tuhun eite a’ dingin zong hong genkhol ahi hi. Ellen G. White, The Desire of Ages, 628.

Zeisu hong paikik ciangin thupiang dingte lungkhamhuai hi. Leitungah nopna om lo ding hi. Gal, kithahna, zinling, tuiciin, kial cihte a kipan bawlsiatna, zuau kamsang, Khrih kineih zuau theite hong piang ding hi. A deih huai penpen khat in leitung mun khempeuhah Lungdamna Thu kizel ding hi ( Matt. 24: 14). A tawp dongin a kipte in thupha ngah ding uh hi (Matt. 24: 13).

Bangci bangin ze-et bawlsiat, gimna namcinte lakah upna taisan lo-in upna kip nei ding na hiam? Upna taisan om hi. Bang hangin nang le nang kimuanna tawh upna khahsuah khak ding kidop kul hiam?

TUESDAY JUNE 7

JERUSALEM KISIATNA

Matt. 24: 15 – 22 sim in. Zeisu in bang thu gen hiam?  Khrih

in bang tawh dawng kik hiam?

___________________________________________________________________________

___________________________________________________________________________

Zeisu in a genkholh mah bangin AD 70 kumin Jerusalem kisia-in, hih kisiatna in Pasian’ khuapi siangtho beimang hi. Pasian’ mindai-sak hi. Jerusalem kisiatna in Pasian in Amah a langpang mite, a lungkhauh mite thukhenin leitung kisiat ding limcing hi. Ellen G. White, The Great Controversy, 22.

Kisiatna lak pan Topa in a hotkhiat ding mi zong hi. Zeisu in Jerusalem kisiatma-in khuapi panin kihemkhia dingin genkhol hi. “ Galkap honpi in Jerusalem khuapi a umcih na muh uh ciangin tua khua a hawmsuak ding hita hi cih thei un. Tua hun ciangin Judea gama om mite mualtungah tai uh hen. Khuapi sunga om mite in khuapi nusia-in gam sung a om mite khuapi sungah lut nawn kei uh hen. Bang hang hiam cih leh tua hun in Lai Siangtho sunga kigelhsa thu khempeuh a tangtun nadingin Pasian’ phulakna hun ahi hi” (Luke 21: 20 – 22). Khristian thu-um mite in Zeisu’ gen thute a muh uh ciangin khuapi panin kihemkhia uh hi. A taikhia lo Jew mi tampi ahih leh Jerusalem khuapi tawh kisia khawm uh hi. Jew mi 1,000,000 bang si-in, 97000 bang salin kikai hi, ci-in kiciamteh hi. Ahi zongin Khristiante khat zong si lo uh hi. Khristiante in Galilee saklam tai 17, Jordan Gunpi’saklam mualzang Pella khua-ah kihem uh hi. The SDA Bible Commentary, Vol. 5., 499.

Mi khat peuh in lauhuai khat peuh hong tung ding hi, ci-in hong gen khol thu awlmawh lo in na om kha ngei hiam? Bang hangin Pasian’ kamciamte le a hong hilhkholh thute’ hangin kiging den ding thupi hiam?

WEDNESDAY JUNE 8

ZEISU NIHVEI-NA HONG PAIKIK DING


Matt. 24 sungah Zeisu hong pai kik ma-in thupiang dingte kigelh hi. Zeisu hong paima-in bang thu piang dinga, koi bangin tua genkholhnate hong tungtung ta hiam? Matt. 24: 23 – 26.

____________________________________________________________________

____________________________________________________________________


Leitung mite in bang mahin a simloh uh Zeisu’ pianzia dingte tangtung takpi hi. Pasian in a genkholh bangin tangtung takpi hi. Pasian’ kammal muan huai hi lo hiam?



Matt. 24: 27 – 31 sim in. Koi bangin Zeisu hong paizia ding hong hilh hiam? A hong pai ciangin bang piang ding hiam?

_____________________________________________________________________

____________________________________________________________________

Vantung panin Zeisu Khrih pumpi hong kumsuk ding hi. Ama’ hong kumkik ding a um lo mite thuhilhna lianpi hong suak ding hi (1Thess. 4: 16). A hong kum kik ciangin mittang khempeuh in mu ding hi (Mang. 1:7). Pengkul in ginngaih mahmah ding cih limla hi-in, Zeisu a hong kumkik gingngaih lua mahmahin misite phong ding hi. Khat vei a hong pai lai-in kiniamkhiatna tawh hong pai hi. A nihvei-na ciangin vangliatna, gualzawhna tawh hong pai ding hi (Mang. 19: 16; 1Kor. 15: 25).



Zing le thai ciangin a piang ding thute i theihkholh loh hangin, Nihvei Hong paikik ding kamciam hangin, koi bangin thala-in lametna tawh nungta ding na hiam?

THURSDAY JUNE 9

A TAWNTUNGIN KIGING IN

Zeisu a hong kumkik ding thu in i lamet lianpi pen hi. A hong kipia kamciam a tangtun nading hi. Zeisu hong pai lo ding hi leh, bang i lamen ngam diam? Si-in leivui suak ding simloh bang mah lamet ding om lo hi. Zeisu hong paikik lo ding hi leh, na khempeuh a kipan, upna cihte a mawkna hi ding hi. Thu-um lo mite in Zeisu a hong paikik ding kamciam koi-ah om hiam, a ci mite’ gen tangtung takpi ding hi. Zeisu hong kumkik ding hi, ci-in lametna le upna nei mi pawl khat in Khrih hong kum kik ding a ni, a hun genkhol uh hi. Amau hunseh kholhna bangin Zeisu hong pai lo hi.
Matt. 24: 36 , 42 sim in. Bang hangin hunsehkholhna pen

khialhna suak hiam?

______________________________________________________________________

______________________________________________________________________

Zeisu a hong kum kik ding a ni a hun thei lo ihih manin a tawntungin

kiging khol den ding kisam hi.

Matt. 24: 42 – 51 sim in. Zeisu hong pai kik ding ahih manin a tawntungin vilin kiging khol den ding cih, a khiatna in bang hi ding hiam?

____________________________________________________________________

____________________________________________________________________

Zeisu hong paikik hun ding i thei kei hi. Amah mah in zong hong gen hi. Kuama lamet loh hun laitakin hong pai ding hi. Tua hi-in kigingkholh det ding kisam hi. Hong pai hak lai ding hi, ci-in ka ut peuh ka sem ding hi, cih lungsim hemkhia in. Topa tungah citak ding kisam hi. Bang hang hiam cih leh eite in amah i it hi. Bang hun bang hunin hong pai ding hi mah taleh na hoih a sem ding i hi hi. Topa hong pai ding awlmawh lo-in a om mi in Pasian’ thukhenna thuak hamtang ding hi.

SDA thu-um mi khat na hihna tawh kizui-in Zeisu hong paikik ding hi, ci-in a um i hi hi. Tua hi-in koi bangin citak lo nasempa’ gamtatzia tawh kipelh ding na hiam?

FRIDAY JUNE 10

SINBEH DING: Ama hong pai kikma-in thupiang dingte tawh kisai-in Zeisu in a genin ah “hih khang mite a bei ma-in Mihing Tapa hong pai ding hi,” ci-in gen hi (Matt. 24: 34). Hih pen mi tampi in a buaipih mun khat hi. Bang hang hiam cih leh tua hun lai mite’ khang sungin Zeisu hong pai lo hi. Hih tawh kisai-in Richard Lehmann in “ hih khangmi” cih kammal in a lungkhauh mite, Pasian a langpan mite (Late 78: 8) hi, ci-in gen hi (The Handbook of SDA Theology, 904). Tua hi-in Zeisu in Ama hong pai ding tawh kisai a hun gen hi lo-in Ama hong pai ciangin mihing’ nunzia pulaak hi zaw hi. Kamsangte’ zat ngei kammal tawh a kibang ‘hih khang mite’ cih kammal in mi kim khatte’ gamtatzia pulaak kammal hi (Matt. 12: 39; 16:4; Mk. 8: 38). Zeisu hong pai mateng gitlohna bei lo ding cih pulaak hi.

KIKUP DING DOTNATE:

1.     Koi bangin Zeisu hong pai hak cih tawh kisai na mu hiam? Tuma kum 100 lai-a a nungta mite in zong amau hun sung mahin Zeisu hong pai dingin lamen uh hi lo hiam? Ei khang hunin lamen nawn lo ding i hiam? Koi bangin Zeisu hong pai ding hun tawh kisai na mu hiam? Gilo nasem bangin ka Topa hong pai hak ding hi, cih upna nialin, a lang khatah, Zeisu hong pai ding nai mahmah kum khat kum nih sungin hong paita ding hi, cihte kikaalah koi dinmunah om ding na hiam? Zeisu hong paikik ding a ngak mite’ omzia ding koi bang hiam?

2.     Zeisu in a hong paikik zia ding a hong hilh kholhte ngaihsun in. Koi bangin ‘laksim’ upna tawh kilamdang ding hiam? Bang hangin Lai Siangtho tawh kituak lo upna om hi ding hiam? Koi bangin tua bang upnate na dawng thei ding hiam?

3.     Zeisu hong pai nai lo hi taleh, koi bangin ngak ding na hiam? “ Hong zekai hi,” cih ngaihsutna in bang hong hilh hiam?Joseph, Abraham, Sarah, Caleb le Joshua cihte tung panin bang na la ding hiam? Mang. 6: 9, 10 in bang hong hilh hiam? 

To get the latest update of me and my works

>> <<