LESSON 10 MAY 28 – JUNE 3
JERUSALEM AH ZEISU
SABBATH NITAK
TU KAAL SUNG SIM DING: Zech. 9: 9; Matt. 21: 1 – 46; 22: 1- 15; Rom.4: 13 – 16; Sawl. 6: 7; Mang. 14: 7 – 12.
KAMNGAH: “ Zeisu in amaute kiangah “Innlamte in a nilkhiat suang, innkiusuangbulpi a suak hi. Hih in Topa sep hi a, eite muhna ah lamdang hi,” ci-in Lai Siangtho sunga a kigelh thu sim ngeilo na hi uh hiam?Matthew 21: 42.
Zeisu in a geninah “note lakah a masa pen a suak nuamte in note sila hi tahen. Mihing Tapa nangawn ama na a kisepsak dinga hong pai hi lo hi. Midangte’ na a sepsak ding le a nuntakna pia-in mi tampi a tankhia dinga hong pai ahi hi,” a ci hi (Matt. 20: 27, 28). Kipatna le mongnei lo Pasian, na khempeuh a Piangsak Pasian in sila-in hong nungta-in a mangthangte zongin, cinate damsakin, simmawh hong thuak hi. Tua bangin hong kilangkhia Pasian’ zia le tong mihing in a tel zo kei hi. Mihingin a hong pianna i tel zo kei hi. Tua banah tawntung Pasian ahihna tel kei taleng, mi tampite tankhia dingin leitungah hong nungta hi. Vantungmite in hih tatkhiatna lamdangsa mahmah uh hi ( 1Pet. 1: 12). Eite in Khazih sungah Pasian’ dikna i tanhtheih nadingin Pasian in Khazih eite tangin mawhna a suaksak hi (2Kor. 5: 22).
SUNDAY MAY 29
GENKHOLHNA TANGTUNG
Jew mite in Babylon ah kum 70 sung saltangin a om khit uh teh pawl khat Jerusalem ah va ciah kik uh hi. Lawptakin Jerusalem biakinnpi lamkik kipan uh hi. Ahi zongin biakinnpi in Solomon biakinn bangkik zo ngei lo ding hi, cih thei uh hi. Tua thu hangin nakpi-in kap uh hi (Ezra 3: 12). Lamet lohin uham khin kamsang Haggai le khangno-lai kamsang Zechariah in nasemte thapia hi. Haggai in amaute kiangah, “Solomon’ hangin biakinnpi minthang hi lo-in, Pasian’ biakinnpi ahih manin minthang hi,” ci-in hilh hi. Haggai in mipite kiangah hih bangin pulaak hi: “Thahatpen Topa in hih bangin ci hi. A sawt lo-in vantung le leitung tuipi le leikeu, khat vei ka lokkik ding hi. Minam khempeuh ka lok dinga minam khempeuh deihna hong tungin hih inn minthanna tawh a kidim ding hi. Thahatpen Topa in ci hi. Ngunte keima aa hi a, khamte zong keimaa a mah ahi hi. Thahatpen Topa in cikhia hi. A masa inn minthana sangin tu laitaka inn a minthangzaw ding hi. Thahatpen Topa in ci hi. Tua hi-a hih munah kilemna ka pia ding hi. Thahatpen Topa in cikhia hi, a ci hi (Haggai 2: 6 –9).
Kamsang Zechariah in thu a gen ciangin mipi in thangahbeh uh hi. “Zion tanu aw, nuam mahmah in. Jerusalem tanu aw, kiko in.En in na kumpipa na kiangah thumaanna le hotkhiatna kengin migi-in laa tungah, sin nai loh, laapi ta lano tungah hong tuang hi (Zechariah 9: 9). Koi bangin hih genkholhna tangtung hiam? Matt. 21: 1 – 11.
______________________________________________________________________
______________________________________________________________________
“Khrih in vangliatna tawh laa-no tuangin Jerusalem hong lut ding hi,” cih genkholhna tangtung takpi hi. Zeisu in Messiah taktak hi, cih kilang hi. Jerusalem lampi dung zui-in pai-in mi honpi in nuamin, “Messiah, Kumpipa hong pai hi,” ci-in awng ziahziah uh hi. Zeisu in cikmah hunin tua bangin mipi’ muakna ngah ngei lo hi. Hih bangin mipi’ pahtawi-na a ngah ciangin a nungzuite in Zeisu in kumpi tokhom tung tu taktak ding hi, ci-in ngaihsun uh hi. Mipi in zong tua ding mahin ngaihsun uh hi. Jerusalem khuapi panin Rome galkapte kihemkhia-in Jew mite’ uk hun hong tung ta ding hi, ci-in ngaihsun uh hi. Ellen G. White, The Desire of Ages, 570.
Lai Siangtho’ genkholhnate tangtung takpi hi. Ahi zongin khat veivei mihing in tua thute tel zo lo hi. Bangci bangin up khialhna, lamet khialhna tawh kipelh ding na hiam?
MONDAYMAY 30
BIAKINNPI –AH ZEISU
Mawhna a om a kipan Pasian in ganhing tawh biakpiakna zangin tatkhiatna lampi hong lak hi. Pasian in hong hehpih ahih manin hong tan hi-a, mihing in upna tawh tua tatkhiatna i ngah thei hi (Rom. 4: 13 – 16). Hih thu a patcil a kipan Cain le Abel-te’ biakpiakna tungtawnin kimu thei hi (Pian. 4). Hih unaute’ biakpiakna in biak ding le biak loh dingte zong hong hilh hi (Mang. 14: 7 – 12). Hih thu tawh kisai-in Pasian in tatkhiatna thu a hilh nop manin Ama mi siangtho ding, siampi ding le a siangtho minam dingin Israel mite teelin, biakbuk lamin ganhing tawh biakna pia dingin thupia hi. Sehnel gam sunga biakbuk a kipan Solomon’ biakinnpi, saltanna pan ciak kikin a kilam kik biakinn le biakna tuamtuamte in Lungdamna Thu limciina vive hi. A manpha mahmah tatkhiatna thu limcing hi mah taleh biakna pia mite in mawhna tawh kidimpi mah, tua kawmkawm mah, Pasian in a hong hehpihna, itna hong lak tawntung hi. Zeisu in tatkhiatna thuhilhin a hong om lai-in siampite in huaihamna, siatna tawh kidim khin mang uh ahih manin, a siangtho siampite’ nasep a mawkna suak hi. Ellen G. White, The Desire of Ages, 590.
Matt. 21: 12 – 17 sim in. Pasian a bia mite bang thu hong hilh hiam?
_____________________________________________________________________
_____________________________________________________________________
Zeisu in Lai Siangtho siksanin nasemin thuhilh hi. Gamtat zia le tong, upna cihte Lai Siangtho siksan hamtang ding cih hong hilh hi. Lai Siangtho siksanin nasem banah cina damsak, mittaw-te khuamusakin, khebai-te lampaisak hi. Hihte in Tankhia Pa hi, cih pulaak hi. Zeisu umin a nungzui ding siampite le laithei-te in Amah langpanpipen suak zawsop uh hi. Siampite le biakinnpi a nasemte in amau angsung hamphatna a taan ding uh lauthawng ahih manun Zeisu’ hong tatkhiatna tawh kipelh uh hi.
Koi bangin tawntung nuntakna tawh hong kigamla-sak thei
i huaiham, angsung theihnate hemkhia ding na hiam?
TUESDAY MAY 31
GAH NEI LO
Zeisu in mi hehpihna tawh kidim ahih manin biakinnpi siansuah hi. Gentile-te’ omna ding munah siampite in vanzuakna, vanlei-na munin zang uh hi. Zeisu in biakinnpi pen minam khempeuhte’ thungetna inn ding hi, ci hi. Tua hi-in biakinnpi a siansuah pen a thukhenna ahi hi. Siampite in a sep ding uh sem lo ahih manun, a sawt lo-in thukhenna thuak ding hi, cih a hilhkholhna ahi hi. Zeisu in biakinnpi a siansuahin siampite in Zeisu a na sang uh hi leh, siatna tawh kipelh thei ding uh hi lo hiam?
Matt. 21: 18 – 22 sim in. Koi bangin biakinn siansuahna le
theikung samsiatna kizom hiam?
_________________________________________________________________________
_________________________________________________________________________
Theikung samsiatna in Jew biakna makaite’ thuak ding gimna, a vawh bangun a gah at ding ahihzia limcing hi. Biakna makai khempeuh in Zeisu nial uh hi lo hi. Tampi mah in Zeisu in Messiah hi, ci-in um uh hi. “ Tua bangin Pasian thu a kizel hi. Jerusalem ah nungzuite khang semsem a, siampite tampi in tua upna a zui uh hi” (Sawl. 6: 7). Theikung in gah nawnlo-in a sih mah bangin, a sawt lo-in biakinnpi’ nasep a mawkna suak ding hi ta hi.
Nungzuite in hehpihna, itna le thukhualna tawh nasem Zeisu in theikung tunga thupiang le a a nasepziate lamdangsa uh hi. Mihing Tapa in mawhsak ding hi lo, honkhia ding, susia ding hi lo, nungtasak dingin hong pai (Lk. 9: 56) cih pen nungzuite in thei uh hi. Zeisu’ kammal khempeuh, a sep khempeuh in lametna tawh kidimin, mawhnei mite a hong tat nading thu vive hi. Tua bang hi napi Zeisu in a heh teh nungzuite in lamdangsa uh hi.
Mite in Pasian’ hehpihna, itna nial uh hi (Pian. 6: 13; 15: 16; 19: 24; Mang. 22: 11). Pasian nasep pen ei mihing in lunghimawh lo-in, Pasian mah ap ding bang hangin thupi hiam?
WEDNESDAY JUNE 1
“TUA SUANGPI”
Ni tawm khat nungta lai bek ding hi lecin bang nasem diam? Zeisu in a sih madeuh in nuntakna kikhel ding, lungsim a lawng kha ding thute hong hilh hi.
Matt. 21: 33 – 46 sim in. A nuai-te mite in bang limcing hiam: Huanneipa:_________________________________________
Nasemte: __________________________________________
Sila-te : ____________________________________________
Tapa: ______________________________________________
Zeisu in Late 118: 22, 23 siksanin hih thu hilh hi. Kamsangte’ genkholh a kinilkhia suang in Israel mite’ sunga thupiang pulaak hi. Biakinnpi masa kilam lai-in suang golpite tawh biakinnpi kilam hi. Suang simloh bang mah dang zang lo uh hi. Suang khat gol lua mahmah ahih manin a tatna ding mun mu zo lo uh ahih manin tua suang pen zat lohin koih uh hi. A sawt teh dongkholhsa uh ahih manin tua suang hemkhia uh hi. Ahi zongin innkhuam bul ding suang zong mi khat in mite’ hepkhiat suangpi a muh tak uh ciangin, a kihemkhia khinsa suang pen innkiu suang dingin la uh hi. A kizatna ding munah hoih takin kizang hi. Ellen G.White, The Desire of Ages, 598.
Matt. 21: 44 sim kik in. Suang tawh kisai thunih kigen hi. Suang tungah a kia mite le mite’ tungah a kia suang. Bang kilam dang hiam? Koi zaw na hiam? Late 51: 7; Dan. 2: 34.
THURSDAY JUNE 2
A lungdam huai mahmah thu in itna tawh kidim eite a hong bawl Pasian in mawhna le sihna pan i suahtak nadingin, singlamteh tungah Zeisu a hong sihna tawh, lampi hong bawlsak hi. Lai Siangtho sung thuguipi in hih thu mah hi. Zeisu in zong gentehna tungtawnin hih thu hong hilh hi.
Matt. 22: 1 – 15 sim in. Upna tawh hotkhiatna kingah hi, cih thu bang pulaak hiam?
_____________________________________________________________________
_____________________________________________________________________
Lamdang a kisa phial zongin hih thugentehna in tawntung sihna maw, ahih kei leh tawntung nunna, khat zaw zaw pulaak hi. Bang in thupi ding hiam? Singlamteh ngaihsun lecin kuama telzawhloh a lamdang mahmah, mihingte a hong kitat khiatna dingin a kipia khia bang zahin lian hi, cih na mu ding hi. Pasian Tapa in mawhna hangin Pa Pasian’ hehna thuak hi lo hiam? Tua sangin a sia huai zaw bang om diam? Bei hun om lo a tawntungin vantung dongah tatkhiatna thu pulaak ding i hih leh tu-in tua mah masuan lianpen hih sak ding kisam hi lo hiam?
Mopawi thugentehna in a mangthang ngei lo ding thutak hong hilh hi. Pasian in mi khempeuh ngah dingin tatkhiatna lampi hong bawl sak hi (Mang. 19:7). Hih sangin a hoih zaw, a kicing zaw hotkhiatna thu pulaak ding thugentehna om lo hi. Tua mopawisim dingin sapna a nial mite sangin hehpihhuai zaw kua om ding hiam? Pawisim ding misamte bawlsia sawnsawn lai uh!
Mopuan in bang limcing hiam? Mang. 19:8.
________________________________________________________________________
________________________________________________________________________
Tua mopuan in Khrih kiang pan hong pai dikna limcing hi. Tatsa misiangthote in tua dikna puan bangin silh ding uh hi. Mopuan silh lo mite in, Khristian thu-um mi hi napi tatkhiatna tawh a nuntakna uh kikhel lo mite limcing hi. Mopawi sim ding sapna ngah khempeuh in mopuan ngah dingin kigeelkholhsak hi. Mopawi inn va phak ding sangin mopawi sungah va lut theih nading mopuan kisam zaw hi.
FRIDAYJUNE 3
SINBEH DING: London khuapi sungah thupiang khat: Joyce in a inn sungah a sih zawh kum thum bang pha khin napi, kuamah in ama sihlam phawk kha lo hi. Tuhun thu kizakna manlang mahmah napi, kuamah in amah va phawk kha lo maw? Amah a phawk kha khat beekbeek om buang lo hiam? Vantung lametna le tatkhiatna om kei leh hih numei nu mah bangin khasiat huai mahmah hi lo i hiam? Hih nu sangin khasiat huai zaw ni. A tawntungin kiphawk kha nawn lo ding! Ahi zongin Singlamteh sangin lametna, tawntung nuntakna kamciam hong kipia hi. Van thak le lei thak tawh hong kipelhsak ding nakhempeuh tu-in hepkhiat huai mahmah hi lo hiam?
KIKUP DING DOTNATE:
1. Sihna tawh kipelh nading mihing hanciam theih khempeuh a mawkna pi hi lo hiam? Misi luang a muat loh nadingin hanciamin kikoihte sihna zawhna dingin khiatna nei peuh mah hiam? Tua ahih leh, hin tawntung nadingin Singlamteh tungah Khrih a sihna in bang zahin thupi hiam?
2. “Zeisu’ dikna in hong tuam’ cih thu in bang a khiatna hiam? Hih thunih: “Gamtatna awl mawhlohna, lam khat panin gamtatna siksanin Topa’ maipha ngah sawm” cih koi-ah bang kisam hiam? Bang hangin thukham om lo hehpihna, ahih kei leh, hehpihna om lo thukham zuihna pelh ding kisam hiam?
