MUC

Print Friendly and PDF

Monday, March 21, 2016

Sabbath School Lesson 1 | David Tapa























MATTHEW THUBU

Rick Hoyt in a nu gil sung panin khuaknatna ngah a, a suah teh a khut a khe tang thei lo hi. Siavuante in a khantawnin zawcip ding hi, ci uh hi. Ahi zongin a nu le pa in tua ci lo ding hi, ci-in a hih theihzahun pantah uh hi. Kum 11 pha cingkhin, pumpi tang thei lo, pau thei lo ahih manin, khat le khat kizop theihna ding na khat peuh a kibawl theih khak leh cih lametna tawh a nu le pa in Tufts University ah paipih uh hi. Tufts University in computer khat bawlsak uh a, Hoyt in a nulepa tawh kiho theihna khat hong om thei hi. A kisawn thei ding leng khat bawlsak uh a, a pa in lamsiauh pih hi. A sawtpian ciangin a pa in tai kidempih hi. Tawl khat khitteh Rich in lampai thei lo ahihlam mangngilh kha phial hi. A pa in thapia-in pantah a, Hoyt in Boston Marathon tai kidemna ah va kihel hi. Hoyt in, ‘ ka pa tawh kibang kuamah om kei,” ci hi.

Eite in pa kici khempeuh sangin hong it, hong hehpih zaw PA i nei hi. Amah in vantungah om hi. A khuak kisiat manin Rick Hoyt in amah le amahin bang mah a sep theih loh bang mahin mawhna hangin eite in zong na hoih bangmah i sem thei kei hi. Bangzahin i hahkat zongin ei le ei-in i kihonkhia thei kei hi. Mawhna i pianpih hi a, i kipuahphat nadingin vangliatna i kisam hi. Ellen G. White, The Ministry of Healing, 428.

Mihing sangin vanglian zaw Honpa, David Tapa, Nazareth khua mi Zeisu bek in hong hon thei hi. Tu quarter sungin Matthew sung a kigelh Zeisu thute i sin ding hi. Mathew in Zeisu tawh kikhawl, kithuah ahih manin Zeisu’ thu a pulaakte thuman hi. Matthew sungah Mark, Luke le John cihte in a gen uh thute zong tampi om a, Jesuh in kamsangte genkholh Messiah hi; Israel mite kihotkhiatna ding hi, ci-in Matthew in pulaak phadiak hi. Hih thu siksanin Zeisu a mihing hihna, a nunzia, a sihna le sihna pan a thawhkikna le van a kahna cihte hong hilh hi. Matthew in Jew mite tungah a gen hi mah taleh, eite tungah laikhak hi kei kici thei lo hi. Bang hang hiam cihleh mi khempeuh Honkhia Pa in Zeisu Khrih ahi hi.



LESSON 1       MARCH 26 – APRIL 1  


                                             DAVID TAPA
          
SABBATH NITAK: 

TU KAAL SUNG SIM DING: Matthew 1; 2: 1 – 14; Mark 12: 35 – 37; Isa. 9: 6, 7; Rom. 5:8; John 2: 25; Jer. 29: 13.

KAMNGAH: “Ama mite mawhna panun honkhia ding ahih manin a min ZEISU na phuak ding hi, a ci hi.” Matthew 1: 21.
Kha Siangtho in a makaihna Matthew in Zeisu hong piankhiatna gelh hi. Khanggui sut mawkmawk hi lo-in Zeisu’ pianzia hong hilh hi. Matthew mahmah zong a kinawlkhin mi khat hi kha ding hi. Siahdong nasep a ngah theih nading Rome uliante tungah sum pia-in, a mipihte tung pan siahkai hi. A mipihte in it lo uh hi. Pasian in lungsim tawng a en Pasian hi-in, Matthew’ lungsim thei ahih manin mite in mudah mah taleh Zeisu in Ama nungzui dingin sam khia hi. Zeisu in a sap tak teh Matthew in zong nial lo-in zui pah hi. Matthew in nuntak thak tawh a nungta mi hong suak hi. Tua hi-in Zeisu tawh a kithuahna pan a muh , a zak thute a hong hawmsawn ahi hi.

SUNDAY MARCH 27

PIANCILNA THUBU

“Hih in Zeisu Khazih khang ciaptehna ahi hi. Amah in David tapa ahi hi” (Matt. 1:1). Matthew in khang ciaptehna pen siangtho ahihlam pulaak hi. Greek laimalin khang ciaptehna cih kammal in ‘piancilna’ ci-in khiatna nei hi. Tua hi-in Matthew’ gelh thu masa pen piancilna thu hi, kici thei hi. Piancil Thubu in piansakna a pulaak masak mah bangin Matthew in zong Piangsak Pa, Honkhia Pa thu pulaak masa hi.

John 1: 1- 3; Heb. 1: 1- 3; Micah 5: 2; Mark 12: 35 – 37 in Khrih thu

bang pulaak hiam?

_________________________________________________________

_________________________________________________________


“A tawntungin Topa Zeisu in Pa Pasian tawh om khawm hi. Khrih in Pa Pasian, A vangliatna pulaak hi. Mi khempeuh le vantung mite in Pa Pasian a theih nadingin Khrih in mihingin hong piang hi. Amah in Pa Pasian’ kammal hi. Pa Pasian’ ngaihsutna khempeuh pulaak hi.” Ellen G. White, The Desire of Ages, 19.

John Thubu sungah zong Khrih in Pasian ahihna pulaak masa phot a, tua khit ciangin a mihing hihna pulaak pan hi. Matthew in zong Khrih in mihing ahihna, David Tapa, Abraham’ suan le khak panin hong piang ahihna, kamsangte’ genkholh Messiah ahihna, Nazareth khua mi Zeisu, ci-in pulaak hi. Matthew in Zeisu’ khanggui limtakin kantel hi. Khanggui pen thupi hi. Ahi zongin tatkhiatna thu ah eite pupa khanggui in thu tuam khat hong suak hi. Eite khanggui in bang pulaak hiam? Gal. 3: 29.

MONDAY MARCH 28

KUMPI KHANGGUI

Jew mite in “Messiah hong pai ding hi. Tua Messiah in David sung pan hong piang ding hi,” ci-in um uh hi. Tu ni dongin tua bangin a um Jew om hi. Jew mite’ lamet siksanin Matthew in, “Zeisu in Messiah hi,” ci hi. Jew mite’ pupi, a piankhiatna uh Abraham siksanin, Messiah in Abraham’ khanggui pan hi. Tua banah kumpi khanggui David sung pan hong piang hi, ci-in Zeisu hong piankhiatna limtakin ciamteh hi. Tua banah Matthew Thubu in Jew mi honpi tungah kigelh ahi hi.

A nuai-a thu in Matthew’ pulaak nop thu bang hong hilh hiam?

2Sam. 7: 16, 17:     ________________________________

Isa. 9: 6, 7:             ________________________________

Isa. 11: 1, 2:           ________________________________

Sawl. 2: 29, 30:      ________________________________

Bang hangin Matthew in Zeisu piankhiatna khanggui pulaak hiam cih leh (Matt. 1:1), “Zeisu Khazih in David Tapa hi,” cih hong laktelnuam hi. Zeisu’ pianzia a pulaak masak bangin, John in zong hih bangin pulaak hi: “ Keimah Jesuh in pawlpite a’ dingin hih thute nang kiangah a hong gen dingin ka vantungmi ka hong sawl hi. Kei pen David’ zung le a suan ahi, zingsol ka hi hi,” (Mang. 22: 16). Zeisu in David’ suan pan hong khangkhia hi. Hih in Zeisu in mihing takpi ahihna, Piangsak Pa ahihna hong phawksak hi.

TUESDAY   MARCH 29


ZEISU’ KHANKHIATNA KHANGGUI

Zeisu’ khanggui simna-ah David banah kuate kihel hiam? Matt. 1: 2, 3.

____________________________________________________________

____________________________________________________________

Jew mite’ khanggui simna-ah numei kihel lo hi mah taleh, bang hangin Zeisu’ khanggui simna-ah Tamar kihel hi ding hiam?

Tamar pen Judah’ tapate tawh kiteng Canaan numei hi. Ta nei lo-in a pasalte gel in sihsan hi. A tekpa Judah in a tapa thumna pa tawh kiteng dingin geelkhol hi. Ahi zongin kiteng lo uh hi. Tamar in bangci kalsuan hiam cihleh, Tamar in a melselin numei kizuak kineihkhemin, a tekpa Judah tawh naupaai hi. Tawl khat teh Judah in numei ginalo ci-in thah dingin thupia hi. Tamar in Judah kiangah, “ hih ka naupaai pen nang tawh ka neih hi,” ci-in pulaak khia hi. Hih thu in zaknop huai thu ahih loh hang, Zeisu hong khankhiatna khanggui hi.


Matt. 1: 4, 5 sim in. Zeisu khanggui simna-ah kua kihel lai hiam?

_________________________________________________________

_________________________________________________________

Canaan numei kizuak Rahab! Thukansim a hong pai Israel mite a honkhia Rahab in Pasian’ teel mite lakah va kihel thei hi. Amah zong Zeisu khanggui simna-ah kihel hi. Kua dang kihel lai hiam? Matt. 1: 5, 6.

____________________________________________________________

_________________________________________________________

Ruth pen numei hoih khat hi. Ama ginatlohna hang hi lo-in mite’ muhdah Moab minam pan a khangkhia numei khat hi. Moab mite pen Lot in zukhamin a tanute tawh a neih minam hi. Bathsheba, Uriah’ zi, a pasal galkuanin a om laitak, David in mawhpihin, a zi dingin a lak, David mahmah zong Honpa kisam mi gina het lo khat hi. David tung pan etteh ding tampi a om hangin, khialhna tampi nei hi.

A kicing lopi, khialhna tampi nei mah taleng Pasian in hong it veve ahih leh, bangzahin migina kei ta le-uh, midangte i it ding hi lo hiam?

WEDNESDAY MARCH  30

“MAWHNEI MI I HIH LAITAK MAHIN”

Rom. 3:9, 10; 5:8; Jn. 2: 25; Jer. 17:9 in mihing’ zia le tong bang

pulaak hiam?

________________________________________________________________________

_________________________________________________________

Lai Siangtho in mihing’ hoihna tam gen lo hi. Mihing’ hoihlohna in mawhna om a kipan hi-in, leitung bei dong kizom suak ding hi (Pian. 3; Mang. 18). Pawlpi masate’ nunzia hoih hi, ci-in i ngaihsut hangin amau zong khialhna tawh kidim uh hi (2Thess. 2:3; 1Kor. 5: 1). Mihing in siatna tawh kidim hi. Mihing’ khanggui zui-in Zeisu hong piang khia hi. Mi tampi in Matthew Thubu lamdangsa kha thei ding uh hi. Bang hang hiam cihleh thuman lah hi si, siatna khanggui sung pan Zeisu’ khanggui pulaak hi. Pasian in Ama nasem dingin mi gina lote mah sawl hi. Zeisu’ khanggui sungah midik khat beek om lo hi. Mithat, nulepa mawhna bawl, gitlohna namkim bawl vive tawh kidim hi. Kumpi gilo Rehobaom’ pa Abijah, amah zong gilo mahmah, Abijah’ pa kumpi hoih Asa hi. Asa pen kumpi hoih Jehosaphat ii pa hi. Jehosaphat’ pa kumpi gilo Jorum hi. Pasian in tatkhiatna a sep khiatna dingin mi hoih le hoihta kei leh, mi khempeuh zang thei hi. Hih bang mite mah honkhia dingin hih leitungah Zeisu hong nungta hi.

Mite’ nunzia bek et ding hi lo a, ei le ei zong kisittel kul hi. Midangte enin upna nei lo hiam, kikhel taktak lo hiam ci-in lungkham i om kha zel hi. Lamet bei, lungkhamin om mah taleng, lametna hong guan Pa Pasian muangin, mawhneite hon dingin Khrih in hih leitungah hong pai hi, cih phawk ding kisam hi.

Na lungkiat ciang, lamet bei na kisak ciang, Topa’ hong kamciamte muang lo ding na hiam?


THURSDAY MARCH 31


VANGLIAN DAVID TAPA’ HONG SUAHNA

December 25 ni in Zeisu’ suah ni hi lo hi. Siampi Zechariah in biakbuk ah siampi a sep hun sungin Zeisu suak hi. Khuadam, phalbi kipat tung hi ding hi. Hih hunin tuucingte zong gam sungah om lai uh a, September ahih kei leh October kha bei kuan kim hi ding hi.

Jew mite in, “Messiah hong suak ding hi,” ci-in lamen mahmah napi uh, Messiah hong suah taktak ciang, a va bia masate pen Jew mite hi lo-in Gentile mite hi. Tua hun lai-in Messiah hong suak leh, koi bangin Messiah hong suak ding cih pen lametna khat nei uh hi. Mipil, magi i cihte pen Persia gam pan hong pai mite hi-in, thuman thutak a kan mite hi. Thuman a theihnop mah bangun THUMAN MIPA mu takpi uh hi. Kum zatampi lai-a kigen, “note in kei na hong zong ding uh a, na lungsim khempeuh uh tawh nong zon uh ciangin nong mu ding uh hi” cih thu tangtung hi (Jer. 29: 13).

Matt. 2: 1 – 14 sim in. Kumpi Herod le mipilte a kilamdangna uh ngaihsun in.

____________________________________________________________________

____________________________________________________________________

Herod in Zeisu thah ding thu a piak laitakin a nungta Pasian a thei lo namdangte in Zeisu bia dingin va pai uh hi. Herod le siampite in kamsangte’ gen thute tel uh hi leh, Messiah bawlsia lo ding uh hi. Herod in ama kumpi kip nading bek ngaihsun hi. Zeisu in Messiah takpi ahihlam thei hi leh, Jesuh kihta lo-in om lo ding hi. Zeisu in Jew mite’ Kumpi hi, cih tel hi leh, bang mah a kihtak ding om lo hi.

Pawlpi min sazian sungah min kikhum manin Pasian tawh kizopna nei cih hi lo hi. Thuman thutak theihtelna lo-in Pasian tawh kizopna om thei lo hi. Seventh-day Adventist pawlpi’ thupuak na up khak manin thupha ngah mi na hi hi. Ahi zongin SDA pawlpi mi na hih nak leh Pasian tawh kizopna nei cih hi pah lo hi. Lam khat panin SDA thuman na theihna tungtawnin koi bangin Pasian’ zia le tong na kilangsak thei ding na hiam?

FRIDAY APRIL 1

SINBEH DING: Mawhnei mi in ama gamtat zia le tong siksan lo-in Khrih’ dikna le Ama hong hehpih itna siksanin Ama kiang i zuan thei hi (Titus 3: 5). Satan in na’ mawhna pulaak tawntung hi. Hotkhiat ngah lo ding lamet bei mi hong cih ciangin Khrih in mawhnei-te honkhia dingin hong pai hi, ci-in pulaak in. Pasian in maipha hong piak nadingin bang mah i nei kei hi. Bang mah man lo ihihna, Topa’ maipha ngah thei ding lamet nei vet lo i hih manin Topa’ hehpihna kisam i hi hi.” Ellen G. White, The Desire of Ages, 317.

Mimawh i hih manin hotkhiat kisam i hi hi. Khrih i up a kipan tu ciang dong Ama hehpihna i kitangsam tawntung hi. Jesuh’ hong khankhiatna khanggui sung mite bang mahin Topa’ hehpihna i kisam tawntung hi. Ze-etna zawhzawhna, Topa’ thupiak bangin nungta-in Ama sungah khangto semsem cihte in thu-um mite’ nunzia ding hi-a, hotkhiat ngah nading hi lo-in, hotkhiat mite in tua bangin a nungta ding uh hi zaw hi. Singlamteh tunga gutapa hi taleh, Khrih hong pai ciangin laktohna ah kihel ding mite in Khrish’ hotkhiat kisam mimawh, ei le ei-in kihon thei lo, mi cimawh vive ihi hi. Hih thu phawk tawntung ding kisam hi.

KIKUP DING DOTNATE:

1.      Herod in kamsangte’ genkholh thute a telkhialh manin gimna tuak hi. Tu hunin zong genkholh thute telkhialhna hanga piang thute ngaihsun in. “Kuama theihloh kalin laksimna om ding hi. Jerusalem biakinnpi kilam kik ding, ganhing tawh biakpiakna om ding hi,” cihte in upkhialh na vive hi. Tua hi-in genkholhna tawh kisai thuman up ding bangzahin thupi hiam?

2.      I khankhiatna, pupa’ ngeina tuamtuamte in mannei hi. Bang hangin hih leitung ngeinate in hotkhiatna tawh kilangdo hiam? Koi bangin nun tak kikhel, nih vei suahkikna cihte in i nunzia hong huzaap kul hiam? 


To get the latest update of me and my works

>> <<