MUC

Print Friendly and PDF

Wednesday, March 23, 2016

May 7 | Satan Kiangpan Suakta


Pastor Felix Wadrobert

South Pacific Division sungah New Caledonia Mission in maban lianpi nei hi. Hih sungah Pine tuikulh, Loyalty tuikulh, New Caledonia, Wallis le Futuna cihte om hi. Mi kigawm vekpi-in (280,000) bang pha ding hi. Tua lakah Adventist ( 919) bek om hi. Biakinn (6) le company (3) om hi.

Pastor Felix Wadrobert pen New Caledonia Mission makaipi pa hi. Pastor Felix in 2015, April kha sungin Pasian thugenna nei a, tua-a a tuahkhak thute i gen ding hi.

Nalamdang Lianpi:


Mi (60) tuikiphum cih pen ka mu ngei kei uh hi. Kaal (3) sung zingsangsial 5:30 pan nai 7 ciang pawlpi mite in thungenkhawm uh hi. Ka kipatcillam-un mi (60) khawng bek hong pai-in, mi hong tam semsemin mi 200 bangin hong pai uh hi. Tua bangin thungetna hangin Pasian in a lamdang nate hong sem hi. Tui kiphum bek hi lo-in kikhelna takpi hong om hi. Sabbath ni-a nasem pawl khatte in a nasepna uh pan hawlin Sabbath hong tawlnga uh hi. Mi khat bang a nasepna ah kum (29) bang cing khin, pension la dekdekta, ahi zongin Sabbath a zatnop manin nasep nusia ngam hi. Nungak khat bang dawivei hi-in kikhopna ah hong kikhawm hi. Tua kikhopna ah Adventist hi lo mi (250 ) bang val ding hi. Hih dawivei nungak nu aa dingin, Topa Pasian aw, hih tenga om mite in na pawlpi man a muh nadingun ka thunget hong ngai in ,ci-in thu ka ngen hi.

Tua nungak innah thungen dingin ka thugen man khit uhteh ka pai uh a, zingsang nai (2) dong thu ka ngen uh hi. A inn ka tun uhteh dawi om mah hi, cih a kilatna khat ka thei uh hi. Dawi-aisan-te kiangah va pai zel uh a, dawite tawh kikop thei zel hi, cih ka mu hi. Thu ka ngetsak uhteh sualah boksukin gul bangin awmtal mawk hi. Tua bangteh thu ka ngen ngen uh hi.

A MUIBUN THUNGETNA:

Zingsangnai 5:30 ciangin biakinn ah thungen dingin ka pai zel uh hi. Pawlpi sungah khanlawhna a om theih nading mah lunggulhpi penin ka nei uh hi. Nitak thungetna ah pawlpi mi lote aa ding thungetna-in ka nei uh hi. Mi tampi mah hong kikhawm uh a, biakinn sung khempeuh kidim phitphet ahih mani, kikhopna le thugennate TV tawh ka laksawn uh hi. Tua bangin thu ka ngen uh a, Kelly zong a dawivei-na panin hong noptuam hi. Jesuh min suangin thunget kisinin, Lai Siangtho sim cih bangin hong damsiang hi.

“HIH IN NA INN HI”

Thuman hong theih takteh Kelly in zan ciangin ihmu thei lo hi. Ama kiangah “ Hih in na inn hi. Lum in” ci-in a ihmut theih nading ka hanthawn uh hi. Pastor in zong Kelly aa dingin thungetsak hi. Tua bangin thu a nget uhteh Jesuh min suangin thungetna ahih manin Kelly zong hong hangsan zaw deuhin, Satan tawh kipawl a inn sunga om van tuamtuamte zong hong hemkhia hi. Amasa lamin Kelly in puan gina silh nuam lo hi. Hong hoih zawk deuh lamteh puan hong silh nuam zaw deuh hi. Jesuh Khrih tungah a ki-ap ni pen Kelly aa dingin a manpha mahmah hong suak hi.

Tu-in Kelly in Topa sungah nuamsa-in om hi. Siangtho sinsenin omin, tui a kiphum ma-in dawi tawh kisai a kep van khempeuh khat khit khat a inn sung panin hemkhia hi. Jesu it-in Adventist pawlpi zong it-in nuamsa mahmah hi. Kaal khat kaal nih sungin a dawivei-na panin suakta-in, a innkuanun tu-in Topa- thu-um innkuan hong suak uh hi.

NA SUMPI PIAK:

Tu quarter 13 Sabbath School sumpi in New Caledonia gamah kipuak dinga biakinn kilam ding hi. 1925 kumin hih gamah Adventist pawlpi hong lut hi. 60% gam mite in RC biakna sungah om uh hi. French pau kilim zat mahmah hi.

To get the latest update of me and my works

>> <<