MUC

Print Friendly and PDF

Wednesday, March 23, 2016

May 21 | Mangin Kimu Kik


Pastor Paul


Paul pen New Zealand gama om Samoan inn sung pan a khangkhia mi khat hi. Amah pen unau (7) lakah a u pen hi. A nu le pa in a gol ciangin Pasian nasem dingin deih uh hi. Ahi zongin Paul hong golteh a nu le pa deihna bang lo-in mi gilo khat hong suak hi. Kum ( 6) a phakin a pano in mawhpih mawk hi. Paul zong heh mahmah ahih manin a pano muh ding ut lo-in nuamsa het lo hi. Lau den mawk hi. Kuama kiangah lah pulaak ngam lo hi.

Thongkia bang!

Paul in kum (8) hong pak ciangin inn ah zong lo-in lampi lamdungah hong om mawk hi. Kum (9) a cinteh bawngnawi, ta-den-sa cihte hawm kawikawi-in kaal khat in $ 4 ngah hi. Sum tam ngah zawh nadingin gamdang pai ding tembaw tunga kiguang ding singkuangte bawlin nasemin hong om hi. Sun ciangin sangkah hi. Zan ciangin a nasepna ah singkuangte lumna-in zangin singkuang sungah lum ziau hi. Tua bangin nasemin a om hangin a ngah sum tawh lungkim lo-in guktak hong kipan hi. Tua banah guihtheih khamtheih zangin , zu tawh kidiah hi. Kum 13 a phakteh sangkah nawn lo hi.

Nasep tuamtuam semin sum bel ngah bilbel hi. Kum (17) a phakteh Fiona nungak khat tawh hong kingai-in hong taisim uh hi. Ahi zongin a nupa-un kitawngtawng uh hi. Paul in bawlungsui, boxing thum, kimawl tuamtuam kimawl den hi.

Kikhel Ding Sapna:

Ni khat Fiona lawmte khat in a inn ah hawh dingin amau nupa vasam hi. Paulte nupa ut lo hi. Ahi zongin a lawmin sam thithe ahih manin a sawtteh amau zong vapai uh hi. Tua bangin a vahawh uhteh Fiona lawm in a lawm nupa-te Lai Siangtho sinna neihpih hi. Paul in pai nawn kei ning, a cih hangin, va pai kha zelzel hi. Roman sung sinkhawm uh hi. Lungdamna Thu a zak ciangun Paul in um zo lo hi. Pasian in ka mawhna hong maisak takpi mah ding hiam? ci-in hong dong hi.

Ki-ap Takpi:

Tua bangin tawl khat sung Lai Siangtho sinna a neih khit uhteh Paul le a zi Fiona in Adventist biakinn ah va kikhawm uh hi. Kaal nih khit lamteh Paulte nupa kituiphum ding khensat uh hi. Tui a kiphum khituh teh Paul in Papua New Guinea Advetnist Univerity ah theology sin hi. Sangman khinin a nupa-un tu-in North New Zealand Conference sungah pastor a sep zawh kum 13 val khinta hi.

Pawlpi phut kawikawi siamna nei:

Paul le a zi Fiona in sangkah beh ding lunggulhin Fuller Theological seminary, USA ah sangkahbeh uh hi. A sangkahkawmin amau gam pan USA a teng mite kiangah Pasian nasemin om uh hi. Tua bangin a nasepna tungtawnin pawlpi phut kawikawi hi.

2010 kumin a nupa-un New Zealand gamah va ciah kik uh hi. Tu-in Paul in North New Zealand conference ah ministerial director sem hi. Paul in a neulai a nunzia-te a ngaihsut ciangin tu-a a dinmun tawh kilamdang mahmahin, Pasian makaihna ahihlam phawk tektek hi.A neu lai-a a gamtat bangin khangno tampi zong gamtat ahih manin tuate aa dingin nakpi-in vei-na tawh nasem hi.

New Zealand gam pen Australia gam ii nisuahna lama om gam hoih mahmah khat hi. New Zealand huam sungah tuikulh gol pipi le tuikulh neu nono tampi om hi. Hih gamah mi 4500000 bang om uh hi. New Zealand gamah khuapi gol penpen Auckland hi-in mi 1400000 bang om hi. New Zealand gama mite pen Polynesian i cihte hi-in South Pacific pana hong pem mite hi. Hih mite tu-in Maori kici hi. Gambup ii 14.6 % bang pha ding uh hi.

To get the latest update of me and my works

>> <<