June 11 | Ahoih lawpna

Ben

Kei pen Khristian innkuan sung pan a khangkhia khat ka hih hangin Pasian thu ka thei mel kei hi. Kum 12 ka phakin Lai Siangtho sim ka kipan hi. Siampi Laibu 11 ka tun ciangin, sa siang le sa sianglo cihte ka sim kha-a, voksa pen sa siang lo ahihlam ka simkhakteh lamdang ka sa hi. Hih tawh kisai ka pastor dongin ka khensat hi. Papua New Guinea gamah voksa pen kilim nek mahmah hi.

“ Lai Siangtho sungah voksa pen sa sianglo, nek loh ding hi napi, bang hangin kine hiam? ci-in ka pastor pa ka dong hi. Ka pastor pa hong dawnzia ka lungkim thei kei hi. Ka innkuanpihte kiangah voksa ne nuam nawn keng ka ci hi. Tua bang ka gen ciangin ka innkuanpihte in lamdang hongsa uh hi. Ka nek nop lohpipi ne dingin hong sawl ngamsam lo uh hi.

SDA-te in voksa ne lo cih ka za ngei hi. SDA pawlpi pen pawlpi man hi kha ding hi, ci-in ngaihsutna khat ka nei hi. Lai Siangtho thuman ka kanbeh nuam hi. Ka dot theih ding Adventist dang om tuan lo ahih manin kei sangin a u zaw deuh khat ka dong hi. Tua leh aman zong Adventist biakinn ah kikhawm dingin hong zawn hi. Adventist biakinn pen ko khua panin tai (3) gamla hi.

Ze-etna Mual:

Tan (4) ka zawh khitteh ka u in vokgo-in, mei-ah hangh hi. Lim mahmah hi, ne in hong ciammuih uh hi. Ka nial zo kei a, tawm khat ka ciapsak hi. Tua khit a sawt lo-in ni khatin za bung khat bang ka tep hi.

Ka sangkah ka zoma Tan (8) ka sin laitakin Tan (10) ka zawh dong sangkah ding ngimna ka nei hi. Tan (10) pen Kabiufa Adventist sangah ka kah nuam hi. Tua bangin ka pulaak ciangin ka lawmpa in hong nuihsan mawk hi. Tua leh sang dang khat ah kah dingin ka khensat hi. Tua munah sangkah ding hong kisang lo ahih manin kum khat tawntung ka sumh hi.

Sanghon kikteh ka pa in Kabiufa Adventist sangah sangkah dingin hong hanthawn hi. Ka pa in ka zatep ka khawl ding hong deih hi. Kabiufa Adventist sangah zatep kiphal lo hi. Hih sangah sangkah leng zatep thei nawn lo ding cih ka pa in ngimna nei hi, cih ka thei hi. Ka lawm ka gualte gamtatzia in hong huzaap hi. Kabiufa Adventist sangah ka tunga sang zong gina kahlo-in, zu le za tawh ka nitum den hi. Tua leh sangsiapapi in hamsatna neite in hong mu un, a cih uh hangin ka mu nuam kei hi. Bang mah hamsatna nei lo bangin ka om lel hi.

Ka Hihna taktak Kithei:

Sanggina kah lo ka hih manin ka mat hoih lo pah hi. Ka pate lungkia mahmah ding hi, cih ka mukhol hi. Ka lai ong kei leng ka nu ka pa lungkham mahmah ding uh hi, cih ka ngaihsun hi. Ka zatep ka khawl kulta hi, cih ka phawk hi. Ka khawl nuam a, ahi zongin kei le kei tha-in ka khawl zo kei hi. Topa Pasian in hong zawhpih ding thu ka ngen hi. Ka zatep nopna hong lakkhiatsak ding thu ka ngen hi.

Sangkong kikhak hun hong tungta hi. Siate in ka gamtatzia bangci bangin hong pulaak uh tam maw, ci-in ka lunghimawh mahmah hi. Sang kihong kik leh sangkah dingin hong phal lai mawk uh tam maw, ci-in ka lungkham mahmah hi. Tua leh siate in lai hong pia uh hi. Sangzom thei lai, ahih zongin hoih tak lai ka sin kei leh, sangkah thei nawn lo ding, ci-in hehpihna hong ngahsak lai uh hi.

Inn ka tun ciangin zong zatep ding peuhmah ka ngaihsun nawn kei hi. Ka nu kiangah Adventist biakinn ah kikhawm nuam ing, ka cih leh ka nu zong nuam peuh mah hi. Ka nu in “ kei zong ka neu lai-in Adventist biakinn ah kikhawm pahpah ing” hongci hi. Tua hang mahin zong ka nu in ka kikhop ding hong deihsak mahmah hi.

Sangkah dingin sangah ka pai kik a, pastor kiangah tui kiphum ding ka ngen hi. Pasian thuman thutak thei nuam ing, ka ci hi. Kei le kei ka telta hi.

Nuntak Thak kipan:

Pasian huhna tawh zatep ka kidekzo hi. Ze-etna bel thuak ding cih ka thei khol hi. Ahi zongin Pasian tungah huhna ngen leng Aman hong huh ding hi, cih ka muang hi. A sawtlo-in tui ka kiphum hi. Ka inn kuanun Adventist pawlpi sungah ka om nadingun thu ka ngen uh hi. Ben Pilisi in tu-in Kabiufa Adventist sangah sangkahin a sawtlo-in sangman ding hi.

Papua New Guinea Union Mission in 1949 kumin kiphut hi. Hih gamhuam sungah Adventist thu-um mi ( 240, 205) val bang om hi. South Pacific Division sungah pawlpi mi a tampenna gam hi. Biakinn 962 omin, company 2852 bang om hi. Tu quarter 13 Sabbath School sumpi in Papua New Guinea gam kipuak ding hi. MUC in MMCC aa dingin zek ding hi.