MUC

Print Friendly and PDF

Wednesday, March 23, 2016

April 2 | Nang Mah Hi teh

April 2

Tu Sabbath i zak ding mission news in Vanuatu gama Adventist pawlpi nasepzia hi ding hi. Vanuatu gam in Trans Pacific Union Mission huam sungah om hi. 1912 kuminVanuatu gamah SDA biakna hong lut hi. Tu-in Adventist thu-um mi 21,354 om hi. Biakinn 85 bang om hi. Company pen 130 bang om hi.

NANGMAH HI TEH! KHEN MASA

Jean Pierre

Jean Pierre pen Presbyterian pawlpi pan khangkhia hi. 1845 kumin amau tenna tuikulhah ah Pasian nasem missionary pawl khatin nasemin Presbyterian pawlpi phutin biakinn zong khat lamsak pah uh hi. Amau khua pan tai 1000 val bang a gamlatna tuikulh Futuna ah Jean Pierre pu Pasian nasem missionary a pai ngei khat hi. Jean Pierre ii theih mi khempeuh in Presbyterian pawlpi mi vive hi khin uh hi. Jean Pierre zong a u hamlam hong hi ta ahih manin a pawlpi ah pawlpi upa sem hi.

Ni khat Jean Pierre nunzia thahatin kikhel vat hi. A nasepna khua Vanuatu ah Lana tawh hong kimu kha uh hi. Jean Pierre nasep pen gamdangte amau gam ah hong zinte makaih kawikawi (tourism) hi. Jean Pierre in Lana pen Seventh-day Adventist thu-um mi khat ahihlam hong thei hi. Lana in ni masa ni Nipi zang lo-in ni sagih Nipi, Sabbath ni-in nasem lo-in biakinn ah kikhawm hi, cih a theih ciangin Jean Pierre in lamdangsa hi.


Jean Pierre le Lana zong a kitheih uh hong sawtin kiteng uh hi. Ahi zongin Pierre in Sunday Nipi zangin Lana in Sabbath Nipi zang ahih manin innkuan sung nop taktak zo lo hi. Ahi zongin Sabbath ni  
hong tun ciangin Jean Pierre in vakkhia lel hi. Sunday ni teh Lana zong daitakin vakkhia lel hi. Tua bangin a nupa-un om toto uh hi. Pierre in a pawlpi ah upa sem bek hi lo-in upa tentan pia thei zelzel hi.

Tapa thum hong nei uh hi. A tate un a nu kikhopkhopna, Sabbath Nipi zang uh hi. Innkuan sungah khat veivei teh upna thu hangin buaina hong om thei zel hi.

Lampi khat kihong:

Lana in Adventist Book Center kici Adventist laibu zuakna ah nasep ngah hi. Adventist laibu-te Pierre sabuai ah hong om thei zel hi. Pierre in thugen, sermon dingin a kiginteh sabuai tunga Adventist laibu tuamtuamte mu kha zel hi. Tua laibu-te a simteh Pierre in tha ngah mahmah hi.

Lana in a pasal Pierre biakinn ah pawi thupi deuh khawng a neih uhteh kikhawm dingin zawn thei zelzel hi. Adventist pawlpi ah thusin ding khawng a om teh Pierre zong vakah thei zelzel hi. Pierre in tua bang thusinnate nuamsa-in tha ngah mahmah hi. Pierre in Sunday Nipi zang, a zin Lana in Sabbath Nipi zang ahih manin Pierre in hamsa sa mahmah hi. Pierre in Sunday maw Sabbath, koi man zaw ding hiam cih thei tel nuam mahmah hi.

PV 14

2014 kumin General Conference in Mission to Cities ci-in Pasian thugenna khat Port Vila, Vanuatu khuapi ah nei hi. Hih Pasian thugenna pen PV 14 ci-in kiminvawh hi. Khua sung mi banah khua kim khua paam pan in mi tampi thungai in hong kikhawm uh hi. Mi dawn, mi kha ding motor hawl dingin Jean Pierre kisawl hi. Jean Pierre zong hong kikhawm thei pah hi. A masa lamin Pierre in thungai khol lo hi. Ahi zongin a kaal thumna hong tun takteh Jean Pierre in thu kigente za nuamta hi.

Nang Hi Teh!

Tua nitakin thugen Pastor Jean Noel in “tuni-in, nang hi teh” cih thulu tawh thugen a, tua nitaka thu kigen in Pierre lungsim sukha mahmah hi. Pastor Jean Noel in a thu gengen a, tua kawmin, “ nang hi teh, tu ni-in Topa hong sap,” ci-in Jean Pierre maitang kawksuk hi. Ahi zongin Peirre in a thei lo kineihkhem hi. Tawl khat khitteh thugenpa Pastor Jean Noel maitang en to kika, pastor Jean Noel in, khat vei Pierre maitang kawk sukin, “tu ni-in nang hi teh” ci kik leuleu hi. Tua leh Pierre in thugenpa maitang en ngam nawnlo-in tawl khat sung kuncip hi. A den lamteh Pierre zong khituiluangin thugenpa ento-in hi mah ing, kei mah hi mah ing,” cikhia petpet hi. Tua a kipan Pierre in khensatna khat hong nei hi. Pawlpi upa a hih hangin a sep khempeuh Pasian deihna tawh kituak lo hi, cih pen hong theitel hi. Ka Nipi zuih pen man lo hi, ci-in khensatna khat hong nei thei hi. Sabbath Nipi zangin kituiphum dingin khensatna khat hong nei hi. Tua bang a ngaihsut kawmkawmin Zacchaeus in theithek tungah kahin Jesuh a ettoh phawkkha hi.

Maikaal ah zom lai ni.

To get the latest update of me and my works

>> <<