MUC

Print Friendly and PDF

Saturday, February 13, 2016

Biakinn leh Aki Apna

Chapter 2
Biakinn leh A ki-apna

David in sawtpi—alunggulh Topa ading biakinn lamh ding a geel, Solomon in pilvangtakin matut khia hi. Kum sawmsagih sung Jerusalem-a nasemte buai mahmah uha biakinn lamhna dinga atelna mun leitang ziktam in, kawm lianpi te lamh uha, atawbul sual te phah uh hi,--“a kisek ngil suang hoih ngah nadingin suangkhuk panin suangmai lianpipi tokhia uh a, suangmai seeksa”—sing golpi te atsa in Lebanon gamtawng pan in ahoih mahmah biakbuuk lamh nading apua uh hi. Kumpite Masa 5:17.
Mi tul tampi te in sing leh suang kaikhawm in a thatang zungtang teng uh tawh a kisan laitak un, Tyre mi Hiram makaihna tawh biakinn a vanzat ding khutsiamte in zong na bawlkhia ngekngek uh hi, “a khutsiam mahmah … ngun leh kham, sumngo leh sik, sing leh suang, leh adupsan leh adum, leh a-ausan leh saihadial puan hoih zem a kisinsa ahi hi” Khangtangthu Nihna 2:13, 14.
Moriah Mual pan ka’ngtat hetlo-in [36] na khempeuh bawlsa in kipua ahi manin, “Biakinnpi lamhna-in suangkhuk-a seksa bek kizanga biakinnpi lamh laitakin sek, sekkhu ahikeh sik vanzat ging khatpeuh a huang sungah kiza lo hi.” David in a tapa tungah alimlah sa banglian in pauban omlo-in hoih takin kibawl hi, “Pasian biakinnpi sunga vanzat khempeuh zong bawl hi.” Kumpite Masa 6:7; Khangtangthu Nihna 4:19. Tua vanzat te lakah namtui hal biaknatau, anlum koihna sabuai, khuaimeivak leh mei, cih te zong kihel a, hih te pen siangtho mun a siampite sep leh bawl ding tawh kisai vanzat ding te ahi hi, a vekin “kham hoih pen tawh a kibawl,” hi. Khangtangthu Nihna 4:21. Sah tak-a kibawl,--haltum biaknatau, bawng kapguk (12) ii puak a gol mahmah kisilnakuang (laver), kisilnakuang aneu nono te, vanzat dang tampite, “Jordan zanglei-a om Succoth leh Zarethan kikala beellei ah kumpipa in hihte a sungsak hi.” Khangtangthu Nihna 4:17. A kisam bangmah aomlo dingin vanzat ding te kicingtak in kibawl hi.
A hoih mahmah leh zahtaak kaai mahmah in Solomon leh a pawlte in Pasian ading leh Pasian abiakna dingun biakinn thupi mahmah khat lamh uh hi. Suang manpha te tawh zemin, a hoih mahmah inntual tawh kiim-uum uha, kham kizui taamtak sing te tawh biakinn lam uha, a etlawm tuamtuam te khai-in limtakin zem uha a nungta Pasian biakinnpi ding hih leitungah lamh uh hi, hih in khang tawntunga Pasian limlahna tawh kizui-a kilam inn hi-in, vanzat te hibang ahi hi, “kham, ngun, suang manpha,” “kumpi inn zep nadingin hoihtak-a kikhuak-a kizem.” Ahi hi. Corinthians Masa 3:12; Late 144:12. Hih khalam Christ ii biakinnpi in, “innkiu suangpi Christ Zeisu mahmah tawh sawltakpite leh kamsangte bulkip tunga hong kilam na hi uh hi. Ama sungah tua inn buppi kizomkhawm a, Topa sungah a siangtho biakinnpi a suak dingin a khang hi.” Ephesians 2:20, 21.
37
Atawpna ah David ii geel biakinnpi Solomon in a lamh hong zota hi. “Solomon in Topa’ biakinn ding alungsim-a a ngaihsut bangin kicingtakin a mansiang hi.” Khangtangthu Nihna 7:11. Tun ah, David ii a lunggulh mahmah bangin, Mualsang Moriah pan-a kilam innpi, teenna inn “mihing ading hi lo-in TOPA Pasian ading”(Khangtangthu Masa 29:1), akizat theih nadingin, mulkimhuai leh zahtaakkaii takin Jehovah leh Ama biakna tungah aki-ap ding kitaangsam lai hi.
Biakinn kilamna mun pen sawtpi pek-a akiseh tuamdiak khinsa hi. Tua mun pen Abraham, upna ii pa, in Jehovah thupiakna a manna tawh a tapa neihsun biakpiakna-a a piak ding a lunggulhna mun ahi hi. Tua lai-ah Pasian in Abraham tawh thupha tawh kisai akithukimna uh thaksuaksak a, tua lakah Sangpen Pasian Tapa kipiakkhiatna tawh leitung mihing te tatkhiat nadingin a vanglian Messiah hong pai nading thu zong kamciam hi. Enleng Piancil 22:9,16-18. Bektham lo-in hih mun pen a susia mang ding namsau tawi vantungmi kiang pan suahtaak nadinga meihal biakna leh kilawmtaatna biakna pia a, Pasian in a ngetna dawngin, van pan meikuang akiatsakna mun zong ahi hi. Enleng Khangtangthu Masa 21. Tunah khatvei Jehovah bia te in a Pasian uh tawh kimu a, Pasian tungah a cihtak dinguh kiciamna thak nei kik ding hong hita hi.
Biakinn ap hun ding a teel hun uh pen hun lem pen khat hi a—kha sagih kha, mun tuamtuam pan kikaituah-a Jerusalem ah a ngeina bangun Biakbuuk Pawi a khaam hun uh tawh kituak hi. Hih pawi pen akilungdam penpen pawi ahi hi. Anlaak kizawh khit kumthak nasep hamsa kipat madeuh hun ahih manin mite a lunghimawh uh omlo-in, mipi te amau mahmah limtak ki-ap uha lungdam kipakna tawh kidim uh hi.[38]
A kiseh hun atun ciangin Israel mihon te leh, puan hoihte silh-in gamdang pan mipi ai-awih tampi te, biakinn tualah kikaituah uha, hih pawi-in a ngeina dangte tawh kibang lo-in tuamdiak hi. Solomon in Israel upate leh mipi lak-a huzapna a nei pasal te tawh mundang khuapi pan-in tecipanna thukhamsingkuang pua-in hong pai uh hi. Gibeon Mualsang tung pan in ta-anglai biakbuuk kituahkhia hi “singkuangpi leh Kikhopna Puan-buk leh a sunga vanzat siangtho khempeuh”(Khangtangthu Nihna 5:5); hih in Israel tate tungah nidang pemta-in aomlai-un gampalak ah buuk te tuah koikoi-in aom hun uh leh Canaan te zo-in innpi hoih te lamh-a teen nading munkip aneihna uh phawksak hi. 
Biakinn sungah Pasian in suangpek nih tungah A khutme tawh agelh A thuguilet Thukham Sawm aom singkuang hong kilutpih ciangin Solomon in a pa etteh-in David hih mah bangin kal guk simin biakpiakna pia hi. Lasakna leh tumtheih te tawh nasiatakin pawikhaam uha, “siampite in TOPA Thukham singkuang a om nading mun biakinnpi sunga inndei sungnung-a siangtho pen mun ah pua uh hi.” Aneu 7. Biakbuuk sung pan hong pusuah uh ciangin, amau mun ciat mun nala uha, “Tumtheih tum Levi-te—biaknatau nisuahna lam pangah ding-in, saihadial puan hoih silh uha, daltuahte, harp-te leh lyre-te a tum uh hi. Amaute pengkul mut siampi za leh sawmnih tawh a kithuah uh hi.” Aneu 12.
“Lasate leh pengkul mutte awkhat-a gingin TOPA tungah lungdam ko ding leh a phat dingin a kigawm uh hi. Pengkulte, daltuahte leh a dang tumtheihte kipawlkhawm uha,[39] a aw uh sangsakin: Amah hoih hi; ama itna kip tawntung hi, ci-in TOPA phatna a sa uh hi. Tua ciangin TOPA biakinnpi meii tawh kidim a, Pasian biakinnpi TOPA minthanna tawh kidim ahih manin siampite in a biakna nasep uh a sem thei kei uh hi.” Aneu 13, 14.
Hih meii lompi te hangin Solomon in hibangin genkhia a: “TOPA in meii mial lakah ka teng ding hi, ci hi; keimah in a lian biakinnpi khat ka lam khin hi, na teenden nading mun khat ahi hi," a ci hi. Khangtangthu Nihna 6:1, 2.

“TOPA in uk hi,
Minamte ling uh hen;
Amah cherub-te kikal kumpi tokhom ah a tu hi,
Leitung gamtang hen.

“Zion ah TOPA lian a;
Minam khempeuh tungah amah kitawisang hi.
A lipkhaphuai Na min lianpi amaute in phat uh hen -
Amah siangtho hi. . . .

“Eite Pasian TOPA tawisang unla,
Akhe ngakna ah bia un;
Amah siangtho hi.”
Late 99:1-5.

Biakna “ inntual laizangah tong nga asau tong nga azai tong thum asang sumngo tau khat a kibawl hi.” Tua tungah Solomon dingto-in mihonpi mai-ah a khut te lamto in mipi te thupha a pia hi. “Israel mi a kikhawm buppi tua lai-ah ding uh hi.” Khangtangthu Nihna 6:13, 3.
“Topa Israel Pasian kiphat tahen,” ci-in Solomon nakpitakin akiko a, [40]
“Ka pa David tungah a kam-a a ciamsa a khutin a tangtungsak TOPA … Ka min om nadingin Jerusalem ka teel … khin ta hi,” ci hi. Aneu 4-6.
Tua ciangin Solomon sual ah khukdin suk-in mipi khempeuh ki-ap thungetna a ngai hi. Mipi khempeuh lei lakah a kuunsuk laitakin kumpipa in a khut te vantung lamah laamto-in, hibangin a ngen hi: “TOPA Israel Pasian aw, vantung ahi a leitung ahi zongin nang bang Pasian a om kei hi - Nang in na nasemte tawh na itna thukhun Na lungsim neih zahin na hihna a zomsuak Pa na hi hi.”
“Leitungah mite tawh Pasian teng khawm takpi ding ahi hiam? Vante, a sang pen vante nangawn ah nang na ta zo kei hi. Hih ka lamsa biakinnpi lah neuzaw tham a! Tua hitaleh TOPA ka Pasian aw, na nasempa in na lainat ding hong ngetna leh hong thumna thudon in. Na omna ah na nasempa hong kikona leh hong thungetna na za in. Na Min na koih nading na cihna mun hih biakinnpi lam sun leh zanin hong en in. Hih mun lam nga-a na nasempa thungetna hong za in. Na nasempa leh na mi Israel-te in hih mun lam nga-in hong thumna uh za in. Nangma teenna vantung panin za inla, na zak ciangin a mawhna uh maisak in. . . .
"Na mi Israel-te nang tungah hong mawhna uh hangin gal khatpeuh in a zawh a, nang kiangah hong kileh kikin hih biakinnpi sunga na mai-ah na min pulakin thu hong ngenin hong thum uh leh tua ciangin vantung panin na za inla na mi Israel a mawhna maisakin amaute pate tunga na piaksa gamah amaute puak kik in.[41]
"Nang tungah na mite hong mawhna uh hangin vante kikhakin guah a zuk kei-a a mawhna uh hangin gimna na thuaksak a, amaute hih mun lam nga-in na min hong pulak uh leh, tua ciangin van panin na za inla na nasemte, na mi Israel mawhna maisak in. Amaute nuntakna lampi man hilh inla na mite luah dinga na piaksa leitang ah guah zusak in.
"Hih gamah kialpi ahi-a pulpi ahi zongin a tuna, ahikeh ankung cinghteekna, ankung maibuakna, kaukhup, kauphe tunna ahikeh amau khuapite galte khatpeuh in umciha, haksatna, natna khatpeuh a tuah uh a, na mi Israel-te khatpeuh in thungetna ahi-a thumna ahi zongin hong bawl uh a - ama lungsim gimna kithei-in hih biakinnpi lamah a khut hong zak uh leh tua ciangin na teenna mun vantung panin na za in. Maisak-in ama lungsim na theihsa ahi nungsang ama sepsa khempeuh tawh kizui-in ama tungah tungsak in, (ahang in, nang bek in mihing lungsim khempeuh na thei hi). tua ciangin ka pate uh na piaksa gamah a teen laitengun nang hong kihta in na thu hong mang ding uh hi.
"Na mi Israel-te tawh a kisaikha lo ahi hanga na min liatna leh na khut thahatna leh na ban zankhiatna hanga mun gamla pana hong pai gamdang mite hong pai-in hih biakinnpi lam nga-in thu hong nget uh ciangin, na mi Israel-te theih bangin hih ka lamsa na inn in na Min a puak lam leitung mi khempeuh in thei-a, nang hong kihtak nadingin na teenna mun vantung panin na za inla gamdang mite hong nget peuhpeuh pia in.[42]
“Na sawlna peuhah a galte uh sim dingin na mite a kuan uh ciangin na teelsa khuapi le nangma Min-a kilamsa biakinnpi lam nga-a thu hong nget uh ciangin amaute thungetna le thumna vantung panin za inla amaute thu panpih in.
"Mawhna bawl lo mi khatbeek om lo ahih manin - amaute nang tungah hong mawh uh ciangin - amaute tungah nang heh-a a galte uh tungah pia-in a nai a gamla amaute gamah sal-in a kaih uh ciangin; saltangin a omna uh gamah a lungsim uh kikhel-a amau saltanna gamah kisikin, ‘Ka mawh zo uh hi. Ka takhial khin uh a, gilo in ka gamta khin uh hi,’ hong cih uh a; amaute sal-in a kikaihna gamah a lungsim khempeuh uh leh a hinna uh tawh nang tungah hong kihei kik uh a, a pate uh na piaksa leitang lam, na Min-a ka lamsa biakinnpi lam nga-in thu hong nget uh leh; tua ciangin na omna mun vantung panin amau thungetna leh amau thumnate za in, amaute thu panpih in. Tua teh nang tungah hong mawh na mite maisak in.
"Tu-in ka Pasian aw, na mit hong hakin hih muna thunget-nate na bil hong ngat in. Tu-in TOPA Pasian aw, ding inla na khawlna munah hong pai in nang leh na thahatna singkuangpi pai ta un. TOPA Pasian aw, na siampite in hotkhiatna silh uh henla,
nangma hoihna-ah na misiangte nuamsa uh hen. TOPA Pasian aw, na sathau nilhpa nolh kei in. Na nasempa David tunga na ciamsa itna lianpi phawk gige in," a ci hi. Aneu 14-42. [45]
“Solomon a thunget a man ciangin van panin meikuang hong paisuk-a, meihal biakna leh biakna-a kipiate hultum hi.” Siampite biakinn sungah a lut thei kei uh hi bang hang hiam cih leh “TOPA minthanna biakinnpi sungah a dim hi.” “TOPA biakinnpi sungah TOPA minthanna dim ahih manin a sungah siampite a lut thei kei uh hi. Israel khempeuh in meikuang hong tuaksuk leh biakinnpi tungsan-a TOPA minthanna a muh uh ciangin suangphah tungah leilam nga-in kunsuk uh a TOPA bia-in lungdam ko uh a: Ama itna kip tawntung ahih manin Amah hoih hi,” aci uh hi.
“Tua ciangin kumpipa leh mite khempeuh in TOPA mai-ah biakna a pia uh hi.”
“Hih bangin kumpipa leh mite khempeuh in Pasian biakinnpi a ap uh hi.” Khangtangthu Nihna 7:1-5. Ni sagih sung gam tuamtuam pan-a mihonpi te in, “Hamath gamgi pan Egypt gun dong dimin,” “ mihon tampi tak te in,” a nuam pen pawi abawl uh hi. Tua khit kal khat sung lungdam takin mihonpi-in Biakbuuk Pawi khaam suak uh hi. Ki-ap thak kikna leh kipakna pawipi man ciangin mipi te, “TOPA in David leh Solomon leh Ama mi Israel tungah a hoih a bawlnate hangin lungnuamtak le kipaksa in amaute inn ah a ciah uh hi.” Aneu 8, 10.
Kumpipa in ama hih theihna khempeuh tawh mite amau mahmah Pasian tungah kipum-ap a Pasian na sem-in Pasian min siangtho a tawisang nadingun hanthawn hi. Solomon’ uk tuunglai-in Gibeon mah ah khatvei Israel ukpipa thungetna Pasian in a sanna leh thupha apiakna hong om kik hi. Zanin ama tungah TOPA kilang a: "Na thungetna Ka za-a Keimah biakpiakna biakinnpi mun dingin hih lai Ka teel khin hi. Guah omloh nadingin vante Ka khakcip ciang, gamsung a netum dingin kauphete thu Ka piak ciang,[46] mite lakah pulpi Ka tunsak ciang, Ka mina kilo Ka mite amau mah kiniamkhiatin thu hong nget uh a, Ka maitang hong zongin amaute a gitlohna panun a kihei uh leh tua ciangin vantung panin Ka za dinga a mawhna uh maisakin a gam uh Ka damsak ding hi. Tu-in Ka mitte hakin hih muna thungetna-a kigente Ka bil Ka ngat ding hi. Tua lai-ah ka Min a om den nadingin hih biakinnpi teel khinin ka ap khin hi. Ka mitte leh ka lungsim tua lai-ah a tu tawntung ding hi.
Israel amaan in Pasian tungah om paisuak hileh, hih avang nei innpi pen a tawntungin kip dinga, Pasian in A teltuam mite tungah a tawntunga A dik diakna lim hi ding hi. “Tua ciangin Topa nasem ding, TOPA min a it ding, Amah a bia ding, Sabbath tangin a siasak lo ding, Ka thukhun a kiplet, TOPA pawl-in a beel gamdang mite - tuate Ka mualsiangtho ah Ka paipih dinga, Ka thungetna inn sungah Ka lungnuamsak ding hi.
Ka inn minam khempeuh thungetna inn a kicih nadingin, amaute meihal biakna leh a biakpiaknate uh Ka biakna-tau tungah a kisang ding hi," a ci hi.” Isaiah 56:6, 7.
A thungetna a kisanna tawh kizom in, Topa in kumpipa mai-ah a kitel sinsen-in a sepding vaipuak na bawl hi. Topa in cikhia hi, “Nang adingin ahileh na pa David hih bangin Ka mai-ah na kalsuan a, Kong thupiak khempeuh hih in Ka thukipte leh Ka thukhamte na zuih leh, na pa David tawh thu khungin, ‘Israel a uk ding mi na kisam kei ding hi,’ Ka cih bangin na kumpi tokhom Ka kipsak ding hi.” Khangtangthu Nihna 7:17, 18. [47]
Solomon in kiniamkhiatna tawh Topa na asem paisuak hileh, apa David uk hun sung leh ama uk cil lai kum masa lam te a, a nasep hoih mahmah leh a pil kampauna te tungtawn-a, gamdang (minam) te in pakta-in a zahtaak mah bangun, ama uk sung tawntung a kiim-aom minam te tungah a hoih huzapna lianpi nei paisuak ding hi. Leitung minthanna leh neihlehlamh te ah aom ze-etna lianpi te muhkholhna tawh Solomon tungah Pasian in siatna ii khemna a nan nadingin vauhilh khol a, aliapkhaphuai mawhna ii gu zong na genkhol hi. A ki-ap khin a hoih mahmah biakinn nangawn, Pasian in bangin piang ding hi ci-in pulak khia hi, “Mite khempeuh lakah thugentehna leh ciamnuihna Ka suaksak ding hi” Israel te in “TOPA a pate uh Pasian” taisan in milim biakna tawh kisia ding uh hi. Aneu 20, 22.
Israel ai-awih-a a thungetna vantung panin kiza ahih manin lungsim thahat in nakpitakin lungdam kipak hi, Tu-in Solomon in ama uk hun sunga a minthan pen hun hita a, “Pasian in Solomon lungsima a guat pilna ngai dingin leitung kumpite khempeuh” in ama kiang a zuan ciat uh hi. Khangtangthu Nihna 9:23. Mi tampi te in ama gamukna zia kan ding leh thuhaksa te bangci vaihawm ding cih sinna ngah dingin a kiang a zuan uh hi.
Hih mite Solomon kiangah a hawh uh ciangin, Solomon in na khempeuh a Piangsakpa Pasian thu na hilh a, Pasian in mihing hong itna thu leh Israel’ Pasian thu theihcian semsemsa-in a inn uh zuan kik uh a, piansakna (nature) te sungah Pasian hong itna a kipulakna leh Ama zialehtong a kilatna te, tu-in a muhkhiatna hangun Piangsakpa pen amau Pasian in hong bia ta uh hi.
Solomon in gambup vangikpi teng ama vaipuak hong hihtak ciangin kiniamkhiatna nei hi. Pasian mai ah amah leh amah hong kitheih ciangin, “Kei naupangno khat” (Kumpite Masa 3:7), ci-in kiniamkhiatna tawh khukdin-in huhna ngen-in ki-ap hi. Pasian’ itna a phawk zia, vantung nate lunggulh bel in nei, amah leh amah kimuanglo, leh ciangtan neilo-a na khempeuh a Piangsakpa a pahtawina—cih hih lungsim puak zialehtong te hangin hanciamna thupi nei-a biakinn lamh a zawhna hang zong hih te hangmah ahi hi. Tuhun a Zeisu’ nungzuite in zong Pasian zahtaakna leh a hoih gamtat nopna lungsim te khahsuah khakloh nadingin kikep ding kul hi. Laisiangtho in kiniamkhiatna leh zahtaakna tawh upna tungtawnin ki-apna tak tawh—hong Bawlpa kiang vazuat ding ahihlam hong hilh hi. Late gelhpa in hibangin pulakkhia hi:[48]
“TOPA in a lian Pasian hi a,
pasiante khempeuh tunga Kumpi lian ahi hi….
Hong pai un, Amah bia in kun ni,
eite hong Bawlpa TOPA mai-ah khukdin ni.”
Late 95:3-6.

Mipi tawh ahi a, aituam piakbiakna ah ahi zongin Pasian kiangah huhna ih nget ciangin Ama mai-ah khukdin-a ih nget ding pen eite hihtheih ahi hi. Ih etteh ding, Zeisu, “khukdin-in thungen hi.” Luke 22:41. A nungzuite zong “khukdin-in thungen hi” ci-in kiciamteh hi. Sawltakte 9:40. Paul in zong genkhia hi, “Pa Topa Zeisu mai-ah ka khukdin hi.”Ephesians 3:14. Pasian mai-ah Israel mawhnate a thuum, Ezra zong khukdin hi. Enleng Ezra 9:5. Daniel zong “ni khatin thumvei khukdinin thu ngen-a a Pasian tungah lungdam a ko hi.” Daniel 6:10.
Ciangtan neilo Pasian liatna ngaihsun-a, Pasian ompihna phawkna in Pasian zahtaakna taktak ahi hi. A kimu theilo hibang lungsim ngaihsutna a nei khempeuh pen lungkimna taktak tawh kidim ding hi. Thungetna mun leh thungetna hun te ah Pasian om ahih manin thupi-in siangtho hi. Hih banga siangtho tak-a zahtaakna pen gamtatna leh pumpi mahmah tawh a kilangh khia lungsim tawng pan-a phul khia hiding hi. Late gelhpa in, “Ama min Siangtho in kizahtaak hi.” Vantungmite in tua min a lawh uh ciangin, amai uh liah hi. Bangzah takin zahtaak uh hiam, tua ahih leh akhial leh mawhna tawh kidim eite in ih mukpauna te ah hihbang hih in zaw kanlo ding ih hiam! [49]
Tua ahih manin amoi aham te khempeuh in Laisiangtho kammalte in atuamdiak Pasian’ omna munah bangci om ding cih hong hilhna te limtakin ngaihsut ding ahi hi. Sawlbawk kuanna munah Pasian in Moses tungah,“na dinna mun siangtho ahih manin na khedap suahkhia in,”ci hi. Paikhiatna 3:5. Jacob in vantungmi a ma-ang in amuh khit ciangin, “TOPA hih munah om takpi-a, kei a phawkkha lo ka hi hi… Hih in Pasian inn lo adang hi lo hi; vantung kongpi ahi hi," ci hi. Piancilna 28:16, 17.
Ih gensa mah bangin Solomon in ki-apna hun abawlna sungah Pasian theilo te ngaihsut bangin Piangsakpa thu a ngaihsut khak loh nadingin kikem hi. Vantung Pasian in Amah biak nadinga ki-ap inn ah mite kikaituah in aom uh ciangin Ama Khasiangtho tungtawnin A mite tawh va kimu hi. Pasian theilo te’ pasiante bangin khut tawh kibawl biakinnte bekah a omcip hilo hi. 
Kumzalom tampi khitteh Paul in zong hih thumaan thu mah hilh hi: “Leitung leh a sunga om na khempeuh a bawl Pasian, Amah in vantung leh leitung ii Topa hi-a khut tawh kilam biakinnpite ah a teng kei hi. Amah in kisapna khat peuhpeuh a nei bangin mihing khut tawh na a kisepsak hi lo hi. Bang hang hiam cih leh amah mah in mite khempeuh nuntakna leh huu leh adang khempeuh a pia hi.…Eite tek kiang panin Pasian gamla lo hi napi, mihingte in amah zonga, zama, a muh khak zenzen leh cih deihna in hihte a hih ahi hi. Ahang in, Ama sungah eite nungta-in, i gamtanga mihing hihna i nei hi.” Sawltakte 17:24-28.[50]
“Amaute Pasian TOPA hi-a
a gouluah dinga a teel mite, thupha ngah minam ahi hi.
Van panin TOPA in ensuk a,
mihing khempeuh a mu hi;
Ama tenna - mun panin
leitunga teng khempeuh a vil gige hi.

TOPA in vantung ah a tokhom kipsak a,
a kumpi-gam in na khempeuh a uk hi.

Pasian aw, na lampi siangthona (biakinn) sungah om hi. (Thy way, O God, is in the sanctuary)
Eite Pasian zah a lian bang pasian om ahi hiam?
Nalamdangte a bawl Pasian nang na hi-a;
mite lakah na vangliatna na lakkhia hi.
Late 33:12-14; 103:19; Late 77:13, 14.
Khut tawh kibawl biakinnte ah Pasian a teen loh hangin, Ama mite akikaituahna munte ah Ama ompihna tawh va-uap hi. Mite kikaituah in Amah zonga, a mawhna te uh kiphawk-in, khat leh khat thu a kingetsak uh leh, A Khasiangtho tawh amaute kiangah om dingin Amah in kamciam hi. Ahih hangin tua banga Amah bia dingin a kikaituah te khempeuh in a hoihlo na khempeuh nusia ding uh hi. Thumaan, kha, leh a hoih sianthona tawh Amah a biak nak uh leh tua a kikaituahna uh a mawkna suak lo ding hi. Hibangin Topa in cikhia hi, “Hih mite in a muk uh tawh kei hong pahtawi uh a,
ahih hangin a lungtang uh Kei kiang panin gamla hi.” Matthew 15:8, 9. Pasian a bia khempeuh te in “kha le thumaan thutak tawh: bang hang cih leh Pa in hibanga Amah a kibiakna a zong hi.” John 4:23.
“Topa in Ama biakinn siangtho sungah om hi: Ama mai-ah leitung khempeuh daidide in om hen.” Habakkuk 2:20.



To get the latest update of me and my works

>> <<