MUC

Print Friendly and PDF

Monday, January 18, 2016

LEINUAI GAM Leinuai mi

       LEINUAI GAM Leinuai mi
 Pr. D. Nangno


Tanglai khamtung Pi-pute in tangthu a tuamtuam tampi na nei uh hi. Leitug leh leinuai mun nih mi’ teenna dankhat na nei mawk uh hi. Hih pen a mun le a mi in maan ta kei phial leh a kinei hi phot hi. LST a umte lak nangawnah hong om ciangin Doctrine dan khatin hong pai a, Misite’ Gam cih min khat kivawh hi. Tua bang a min a kivawh ciangin leitung pan misi ahi phial uh zongin leinuai ah hing lai uh hi cihthu hong om hi. 
Tua ahih manin sikha gam kici nuam hi. Pumpi a sih hangin Kha silo hi cih Satan’ doctrine hong lut ciangin Sikha gamah leitung a misite; khate a hing lai-in sikha gam (hell) ah teeng uh hi, kici nuam pah hi.   

“Nuai lam pan-in” cih kammal zong LST in zatna om ahih manin a leitung-a leinuai mahah tua bang nuntak paisuakna khat om hi dingin kisang ta hi.Pasian kiangpan ahih leh tunglam pan a kici ahih manin tualote nuailam pan akici hi pah hi. Leitung tawngah khua leh gam om takpi sak pah ding hi lo hi. Pu Nantal bang leinuai mi kici hi. Taangthu mawkmawk hi pian napi Beh-a nei peuh zong om dih mawk hi. Tua hih leh Nantal pen mitak pi maw, phuahtawm tangthu maw? Mitakpi ahih leh leinuai-ah teeng takpi maw? Leinuaimi hi in, leitungmi zi hong neito cih danin kigen hi. Dawi maw leh? LST in dawite eite sangin a dinmun uh sang zaw a hihmanin i kidona vai LST in a gen ciangin i tunglam vai vive-in gen zaw hi. Efesa 6:11-17

I dawithu up vai tawh dawi teenna ding a i seh mawkmawk mun citengah dawi in hong pang hong ngak mah uh hi. Ei’ sehna peuhpeuhah a om uh hi pah lel hi. Tua bang munte cih thadah leitung a inn thupi pen inn hoih pente ah zong dawite a teeng ding hi tuanlo hi. Inn kulsa se lo a Pasian’ bawlsa a hoihte a susia nuam a a kawi len kawikawi uh hi zaw hi. Vantungah om munngah kei uh. Leitungah zong Mun leh Mual nei tuan kei uh. Leinuai ah e?

Bang va hih suk laizang ding uh ? Kizen, thanuam, kitaaklah lua uh i inn leh lo, mun leh mual, a khual man uh hi lo hi. Van leh lei amau bat zawhna ciang a toknawi nuam lel uh hi-in kicinglah peuhmah uh, Mang. 12:12 Nasep tamlua ahih manin eite, ei mihingte, amau’ meelmaa ding a Pasian sehte nangawn in a nasep uh va huh kha zen hi hang. (Pian. 3:15).

Dawite leinuai gamah teeng maw?

Tui ciin tun lai-in Pasian in van panin satan suksiatte tui buak suk hi, Pian.6,7. Vantung Guah leh leinuai tui kikhawh teng tawh leitung tui in hong tuumcip hi. Tui ciin in mihing hihzahta, ganhing hi zahta, singkung lopa ama suksiatna lakah innpi (tembaw ci hang) sung aom teng bek hong suakta uh hi.

Tui kihawthawtin mualte zangleite kheel gawpin leitung a omna khempeuh vukcip uh hi.Tuate mihingte in a zat theih veve dingin Pasian in hong bawlsak lailai-in,


1.    Suangmeihol

2.    Namgim (datsi, diesel, etc...)

3.    Gas

cihte i nei hi. Hih na namte bangzahin kizang zang ta leh a beithei lo ahi hi. Tuiciin tun lai a leisung pan a tui a kihawt khiat bang keekin leitung Pasian in mei tawh a haal ni ciangin atung a i gente pawl leisung pan hong pholhkhia ding a, a leisung galvanzat hong suak ding hi. A zat hun a hong tun ma-in tuate in leitung gilsungah gilpuak sungsia bangin a sun a zan kihawthawt uh hi. Rom 8:22. Leitung thuthangte i sim ciangin i thei hi.

1.   Zinliing

2.    Meipawt (meimual puakkham, volcano)

Hih bang apianna pen a tung a i gen nam 3 teng kilem theilo haang ahihi. Topa in tua leitung haalna a azat masiah hong suuk tektek ding hi. II Pet. 3:10-12.

LST lui-ah tam sim mah kigen in tawm khat en ni.
Nahum 1:5,6 _ Topa a heh ciangin mualte kilok, mualneute tuisuak, leitang zong meikaang, atung a teengte leh a omna khempeuh zong kangtum leinuai gam hih bang dan hilo ding hi. Late 144:5,6 - Topa in mualte hong lawng leh meikhu vauvau ding, keek baak tawh hong deeng leh ahihkei leh hong kaap leh a sukkhakte kisia ding uh hi.

LST thak ah Peter’ gen en ni.

II Peter 3: 10-12 - A gin ngaih mahmah in vanpi lengmang ding, vantung nate zong salua-in tuisuak ding, leitung leh leitung a kiseem khempeuh kangtum ding.

Tuiciin hun lai Satan mahmah a manthan ding lau ci hi, PP 99. Mei tawh a kihal ciangin Satan akihaal ding hi ta hi. Mang. 20:10. Leinuai gamah a va kihaal ding hilo-in leitung gamah mit hak thei khempeuh in a muh dingin kihaal ding hi.Hih leitung nangawn ama a ahilopi ama a ci hipeuh ding hi. Hih leitang a neipa in anei kineihpa a haaltum ta ding ahi hi. Satan in hih leitang ama aa hita keileh ama aa ciphot ahih manin Topa in ama cih mah zangh suak lel in, "hih leitung a ukpa" John 14:30, aci hi. Hih leitung a ukpa takpi hi-in hitakei leh leinuai a va teen’ suk sangin leitung a teen’ bel kilawm zaw veve hi.

Leinuai, leisung, bel Pasian galvan teng kisenna hi. Tua lah mihing in a si theilo kha nei takpi a mihing asihte ahinglai a cih a kha tua leinuai-ah va teeng ahih leh zong galvan lak a teng hilel ding hi. LST limtak kan lehang a up huailo upna ahih lam kitel mahmah hi. Mawk up, hai up cih bang piang thei vetlo hi. I tua cih nemnum pen dawi in noptak hong sakna.

Leinuai ateeng ding sikha om lo hi. Leitung a teeng ding sikha zong om lo hi.

Leitungmi a hong kici a, leinuaimi a hong kici zongin Pasian tawh i kizopna a niam luat leh leimi a hong kici ding ahihi. Pasian tawh kizopna hoih a neite vanmi a kici hi ziau hi. Dawite a teennopna mihing’ sung hi.

Lk 11: 24-26

1.   Munkhempeuhah Pasian teeng lo hi, “Vantung a om kote Pa aw”, Mate 6:9

2.   Mun khempeuhah Pasian om hi, cih leh mun khempeuh /na khempeuh Pasian’ teenna a i vawh leh PANTHEISM hong hi hi.

3.   Pasian pen Pantheos hi i cih leh Dawi zong munkhempeuh na khempeuh sungah hong om nuam ding, zong hong om pah ding hi.

4.   Mihing- Pasian' Biakinn, I Kor. 3:17

5.   Mihing- Kha Siangtho biakinn, IKor. 6:19' IKor.3:16

6.   Mihing- Pasian' lim leh meel sun a kipiangsak, Pian 1:16,27

7.   Mihing- Pasian' ta, Matt. 6:9

8.   Mihing- Dawi' meelmaa, Pian. 3:15

9.  Mihing- Dawi' bawl a akhial, Pasian in a tapa tawh a gupkhiat a siansuah kik, Johan 3:16

10.Mihing- Gupkhiatte vantunga dawite’ mun awng a luah ding a kiseh,

- (RH May 29,1900), 7BC 949; 5T 473; COL 163; Mang. 1:6

11.   Mihing- Satan’ dan thuak ding a khensat ding, Matt. 19:28; IKor.6:2,3

Hih zah a thupi mihing suksiat ding Satan’ nasep thupi pen hi. Pasian cih thadah mihing mahmah i om noplohna munte ah dawi teeng cih pen dawi hong kheemna mah hi pah hi. Ei sung hi a teennopna mun. Mihing’ sung a tuh zawh kei uh leh ganhing’ sung beek ah, a ci lai hi uh hi. Mark 5:1-17 (dawi tampi, Legion, V.9)

Dawite mun leh mual neilote hi uh a Pasian’ omna akici ding mun khempeuh atuh uh, a nawngkaisak uh ahi hi. Mi nawngkai khat ka hih khak leh ka sungah dawite teeng hi, lut hi, cih loh thu dang ngawh ding om lo hi mai hi. Tua ahih manin James in, “Pasian’ thu na mang un, Dawimangpa na nial un,Nial le uh cin no kiang pan taikhia ding hi. Pasian kiang nai un. A mah in zong hong nai ding hi. Mawhneite in na khutuh silsiang unla a kineihkheemte in na lungsim uh siangsak un. Dahin thuumin kap un. Na nuihnate uh dahna suaksak zaw unla, na lungdamnate uh maigumna suaksawk zaw un. Topa mai-ah kiniamkhiat un. Tua hi leh amah in hong lian bawl ding hi." na ci hi. James 4:7-10 I sung a hong lutsa dawi not ding haksa ahih manin amah lah kinehsak lo ding, ei zong va neh vetlo ding cih thu hi. Pasian’

deih ahilo khat peuh i sep, i ngaihsut, i gen, i gelh leh dawi a zual bawl kihi ta hi. Hong zual phot leh bang i cih tam?

1.   I Peter 5:8 - Dawimangpa pen humpineelkai tawh a kigentehna ah Ei Zo LST ah “a hawkhawk” cih kammal om kei in, a kammal a omlo pen in a khiatna a suutte hu zawsop sa ing. Manglai- a “hawkhawk” cih pen humpi’ nasep a genna hilo-in a humpi’ pianlim pianlai genna hi. Sa amat nop teh hawk thapaai cihna hilo hi.

2.  Tuazah khatin dawi in a hong bawlsiat nopteh thatang khahkhia zaizai khol lo zaw hi. A kul mahmah munte-ah cih loh Humpi zong tua bang mah hi.

3.    Mate 13:25- Galpa’ khaicii pawi dan “mite a ihmut kal un galte khat hong pai-in tang lakah tahum tang vawhin a paikhia hi.” Pasian’ thu tawh tei sitset lo a om te a ihmu akici a hi hi. Thudang vai dang tawh a pawngnawng hilo ding deih hi. Leinuaimi i hihna tua takah hong dawk hi. Leinuai, lei sungah i va teenloh hangin dawi tawh i kithuahna ah a kituaci hi cih genna hi. A siat khit teh puah hak hi. Pasian in ni 7 sung a hoih a bawl a lungkimna pen a minit (minute) sungin kisia-in Pasian mah in a puahkik tuni ciang ciang kum 6000 val puahin zo siang thei nailo hi.

I leinuai lungtang puak in hih ciang a hong tun’ suk ahi hi. A hilopi ahi sa, “Sia leh pha” theih khopa kul keeilopi i theihkhop ciang a thubuai tu a bang teng hi.

Tuiciin tun lai-in vantung lampan a Pasian galvan zatte "guahtui" bek mah hih tuak hi. Pian. 7:4, 11-20; Leitung lampan in zong “tui” mah hi. Pian 7:11.
“Leinuai gam” ci a teen theih nading mun gen lo hi. Meikuang tawh leitung ahaal ciangin zong vantung panin a vot lua leh a sa lua kigawm hong zangh ding hi. - “gialpi”, Mang. 16:1, leh “Kaat” (brimestone)”, Mang 19:20; II Pet. 3:10. Leinuai lampanin laimai 3 a i gensate hong zangh ding a, tuate zong “tuisa” mah tawh hong kihel hamtang ding muhsa hi.

Tui bek tawh hilo, Mei bek tawh hilo, Mei leh Tui tawh siansuahna hong bawl ta ding hi.

Leinuai gam a teengte tuikiat nading, leh meikaat nading hilo-in leitungmi leh tunglam awngthawl lak a kawi lenlen-te suksiat nading pen tu a i gente hi ding hi. Dawite leinuai-ah teenglo hi. Mi asih ciangin leinuai a teeng ding kha (sikha) neilo hi, nei hi phial ta leh leinuai-ah teenglo zaw ding uh hi. Satan’ phuahtawm leinuai gam pen a gamin teen theih nading hilo hi.






To get the latest update of me and my works

>> <<